¹ Kubi kone among anit bellinghe kitene na Galiliyawa, alenge na Bilatus wa munu nmyi mine, kitin ngutunu nmyi. ² Yesu kauwa aworo nani, "Ulin kpilizu nafo a Galitiyawa ale katin kagizine nin kulapi, nara idin niu nlo libau we? ³ Na nani ba, meng nbelling munu, asa na anung su udiu kutyin ba vat mine iba nanu nloli libauwe lineme. ⁴ Sa anit likure nin kulir nanyan Nsiliyom, ale na kisoro wa diu ki molo nani, idin kpilizu nafo inung wa din kulapi ikatina vat nanit Urshalima? ⁵ Na nani ba, meng bellin munu, asa na anung su udiu katyin ba vat mine ba nanu tutun." ⁶ Yesu belle nani tinan tigoldo, "Umang wa bilisu kupau nanya kunen me, ada pizira kumate na ase ba. ⁷ Unite belle unan ncaa kunene, 'Yene akus atatari ale asa nda nnan da se kumat kutca kone, na nse imonku ba, werne kunin, bara iyang ku wa nanza kunene?' ⁸ Unan ncaa kunene kauwa aworo, 'Suna kunin nlo likuse, mang ba wuzu kuwu, in tighe utanki. ⁹ Asa natah kumat likus ndake, ucaun, asa na ana ba, uwerne kunin!'" ¹⁰ Nene Yesu wadin ndursuzuwe nanya kutyin nlirag namon Asabbath, ¹¹ umon uwani wa duku kikane, wenge na adimun nakus likure nin kulir, uruhu unazang, nkuzu kidowo wa seghe, aso kangarang awasa ayisina dert ba. ¹² Kubi na Yesu nyene ghe, ayicila ghe aworo, "Shino nin nkuzu kidowo fe." ¹³ A tarda ucara me kitene me, dedei ayisina dert, azazina Kutelle. ¹⁴ Inung ago nanya kutyin nlirag, lanza ayi, bara Yesu nnaghe ushinu liyiru nasabar. Ago we kauwa, iworo ligoze, "Ayiri kutocin duku alonge na iwasa isu katuwa, dan lelan shin ninghinu a na liyiri Nasabbath ba." ¹⁵ Cikilari kauwa aworo nani, "Anan rusuzu nati, na anug sa itere nijaki sa innah kite mine, idi ni nani nmyen liri Nasabbath ba? ¹⁶ Bara tutun ule ushono Ibrahim, ulenge na Sheitan ntereghe akus likure nin kulir, itereghe na iwasa ibunku ghe liyiri Nasabbath ba?" ¹⁷ Na abelle ile imone, vat nale na idi nivira nanghe lanza incing, vat ligoze wadi su liburi liboo, kitene nimon ididia na asu. ¹⁸ Ame Yesu woro nani, "Kipin tigoo Kutelle di nafo iyaghari? Nin nyaghari nba gwadu kinin muna? ¹⁹ Kidi nafo fimus kuku, fongo na unit nyawna amin nfilo nanya kunen me, in foni nkuno fiso kutca kudia, anyin kusho ani nda kee addo mine tilanghe." ²⁰ Tutun aworo, "Min nyanghari nba gwadu kipin tigoo Kutelle muna? ²¹ Kidi nafo uyist na uwani nyauna, amunu nin nayanga atat an nbulun, udu kubi na umuzo." ²² Yesu wa do lizzi nanya kipin nin nigbir libau udu Urshulima a dursuzo nani. ²³ Umong woroghe, "Cikilari, anan nse ntucu ba karnu ba?" A belle nani, ²⁴ "Suun nnono inan pira kibulun kishuut, bara anit gbardang ba piziru, na iba se upiruwe ba. ²⁵ Kubi na unan kilari nnuzu, amin ntursu kibulun, anung ba yisinu ndas inin riyuu kibulun woro, 'Cikilari, Cikilari, tiba piru.' Ame ba kauwu aworo munu, 'Na meng yiru munu, sa inuzu nwere.' ²⁶ Aning ba woru, 'Tina tii tisono nbun fe, udursuzu tibau bite.' ²⁷ Ame ba kauwa nani, 'Meng bellin minu, na meng yiru kika na inuzu ku ba. Cacanan kupo nighe, anan magunta.' ²⁸ Kubi ba dak na iba su kuculu nin yaru nayini, kubi na iyene Ibrahim, Ishaku, Yakubu, nin vat na nan nliru nin nnu Kutelle, nanya kipin tigo me, - anung inutun munu ndas. ²⁹ Iba da duru unuzu nasari annass inyi, inani nshino idin nlii nimonli kutebul kipin tigoo Kutelle. ³⁰ Yinon nani, unan ncizinu ba so unan kidung, unan kidung da so unan ncizinu." ³¹ Kubi baat, amon Afarsayawa da kiti me iworo, "Caan suuna kikane bara Hirudus dinin su amollufi." ³² Yesu woro "Caan idi bellin kinyinyo kane, 'Ndin kaluzu nagbergenu nshizhino nin tikonu, kitimone nin nkui, a liyiri lin tat, nba malu katuwa nighe.' ³³ Nanya nko yang, usoyi doli, ntunun kitimone nin nkui, nin liyiri ndortine, na iyinna imolu unan nliru nin nnu Kutelle ndas nin Urshulima ba. ³⁴ Urshulima, Urshulima, te na udin molusu anan nliru nin nnu Kutelle ufiliso alenge na ina tu nani kitife. Ndinin su npitirin nono fe, nafo kukuru na asa a pitirino nono me nanya nagilit nafe nyinna nani ba. ³⁵ Yene nfillo kilari fe, meng bellin fi, na iba kuru uyenei ba, se ubelle, 'Unan nmariarife ulenge na uba dak nanya lisan Cikilare.'"