¹ Nanya nkoni kube, na gbardang limui nanit wa zuro ligowe, gbardang ipalila ati mine, acizina ubellu nono katuwa mye, "Yinnon ubellen nyist na Farisiyawa, unere magunta. ² Bara na imomon duku ilenge na inyeshin, ile na iba punu ba, sa itursun ile na iba yinnu ba. ³ Bara vat nile imon na ubelle nsirti, iba lanzu nanya nkanang, ile imon na ubelle nanya kutyi, iba beellu kitene kilari. ⁴ Meng bellin munu adondon nigh, yenje iwa lanz fiu nle na aba molu kidowo, nin nani na idumun nimomon ile na iwasa isu tutun ba. ⁵ Nba wunun munu atuff kitene nlenge na iba lanzu fiu mye, lanzan fiu nlenge na awa mdu adinin likara nworu atu kidowo nanya nlah. Nanere nbellin munu lanzan fiu mye. ⁶ A na ninari nitaun asa ilewe ikubu iba ba? Vat nani na nkan duku asa ishawa mun ba, nyenjie Kutelle. ⁷ Vat titi litife ina batiza tinin. Na uwa lanza fiiu ba. Udunin ndaraja ukatin ninari gbardang. ⁸ Meng bellin munu, vat nle na ayinni nbun nanit, meng ba yinin ghe nbun nanan kadura Kutelle. ⁹ Bara ame ule na ata amusu nigh nbun nanit, meng bati amusu nigh nbun nanan kadura Kutelle. ¹⁰ Vat nlenge na abelle tigbulang niviran kitenen ngono Kutelle iba shawu, ame ulenge na asu tizogo nin nivira kitene Nruhu, na iba shawu mun ba. ¹¹ Kubi ko na idanin ghinu kiti wucu kidgen, anan tigo, nin na nan nakara, na iwa dama ba, kitene nile imon na iba bellu ubun munu, sa ile imon na iba bellu. ¹² Bara uruhu ulau ba dursu munu, nanya nkoni kube ile imon na iba bellu. ¹³ Umon nanya ligoze woroghe, "Unan yiru belle gwana nighe ti kosu ugadu. ¹⁴ Yesu woroghe, "Unit, ghari ntayi unan wucu kidge sa unan yisinu kiyitik mine?" ¹⁵ Ame woro nani, "Sun seng i kala ati mine kiti ngbardang nimon nacara mye ba." ¹⁶ Yesu belle nani tinan tigold, aworo, "Kunen nmong wa ni kumat kang, ¹⁷ a kpiliza liti mye aworo, 'Iyaghari nba su, na ndumun kiti kanga na nba ciu ileo nighe ku ba?' ¹⁸ Ame woro, 'Nene nbasu. Nba turzunu illai ile nkee ididia, nceu vat nile imon na ndumun. ¹⁹ Nnin bellin kidowo nighe, " kidowo, ning uceo illyou in nakus gbardang. Shinno, uso ulii, uso nin, lanzu nmang."' ²⁰ Kutelle worroghe, 'Fe unit ulalang nin kiyitik kane nba seru ulaife, ile imone na uceu iba lawu inghari?' ²¹ Nanere umon ba yitu, ulenge na a ceo imon, a na ayita nin nimon kiti Kutelle ba." ²² Yesu woro non Katuwa mye, "Bara nani meng nbelling munu, yenje iwa dama nin nlai-sa imon nli, sa imon nshonu kidowo mine. ²³ Bara ulai katin imon nlii, kidowo tutun katin imon nshonu. ²⁴ Yenjen agoron, na idin su tibli sa ugirbi ba. Na idinin kiti kaciso sa filai ba, Kutelle din nli ninghinu. Na anun katin anyine ba! ²⁵ Nin ghari nanya minne nwasa akpina ngbardanag nayiri mye? ²⁶ Andi na iwasu isu ile imon ba, iyari inta idama nin kagisine? ²⁷ Yenjen amamu kusho inda na idin kunju. Na idin su katuwa sa fiyari. Nin nani meng nbelling munu ko Solomon nin ngongon mye wa shon imon nafo umong mine ba. ²⁸ Andi Kutelle din tizu ukpi kusho kuyok, uleng na idiku kitimone, udu nkui ina to nani nlah, iyaghari bati na aba su anunku kuyok ba, anan cing nyinnu sa uyenu! ²⁹ Na iwa dama kitene nimonli sa ile imon na iba sonu, na iwa so nin damuwa ba. ³⁰ Bara vat nigbir inye din piziru, ile imone, ame Ucif mine yiru au idinin su nile imone. ³¹ Piziran kipin tigo mye, kagisin nimone iba kpin munu ku. ³² Na iwa lanza fiu, bara na idi kago kabene ba, bara ucif mine din lanzu nmang ani munu kipin tigowe. ³³ Lessen ile imon na idumun Inii anan diru, keen tikka to nati ba jarzu ba, ceon imus kitene kani kika ukiri duku, sa kiyoro ba. ³⁴ Kiti kanga na Imus fe duku, kinere kibinaife ba yitu ku. ³⁵ Tern alutuk ajangarang mine gangang, na tipilila mine yita nkasu, ³⁶ soon nafo annit alenge na idin ncaa Nchikilari mine, ule na aba sa unuzu kitin buki nilugma, asa ada ariyo kibulun ima punghe mun dedei. ³⁷ Kucin kone unan nmariari ale na Cikilare mine ba dase nani ncaa, kidegen nworo munu, aba bunku kulutuk ku kujangarang mye, ati nani iso, a ni nani imonli. ³⁸ Cikilari une nwandak nin lijii kiyitik, sa udu shantu kiti idi se nani idin ncaa, acin ane anan nmariari. ³⁹ Udu Ubune yinno, asa Cikilari Kilare yiru kubi ko na akiri ba dak, na aba yinnu ipuru ghe kilari ba. ⁴⁰ Soon nin yiru, na iyiru kubi ko na gono nnite ba dak ba." ⁴¹ Bitrus woroghe "Cikilari, udin bellu to tinan tigoldo bara arika, sa anite vat?" ⁴² Cikilare woro, "Ghara unan nginu sa uyenu, ujinjin ule na Cikilare ba nighe acin mye, ani nani imonli kube dedei ya? ⁴³ Unan nmariari kucin kone, ule na Cikilare ba da seghe nsu nile imon na ataghe in suwe? ⁴⁴ Kidegene nworo munu, aba nighe imon mye vat. ⁴⁵ Kucin kone nwa woro kibnei, 'Cikilari ndandauna sa udak,' acizina ufo nacin mye nilime nan nishono, atunna ncii nin nso atah hem, ⁴⁶ cikilari kucin kone ba dak liri lo na adin ncawe ba, sa kubi ko na ayiru ba, aba kezughe agir, a ceoghe kiti na na salin yinnu. ⁴⁷ Kucin kone nin tanni npilizu ncikilare, nin salin nke ncin nye sa asu nafo na Cikilare na bellin, iba foghe nin likuntung. ⁴⁸ Ame ule na ayiru ba, idinsu ile imon na ibatin ikpizighe, iba kutughe baat bara utanni mye, vat ile na inaghe gbadang, iba piziru gbardan kiti mye, ule na iyinna ninghe, iba tirinu gbardang kiti mye. ⁴⁹ Nnna dak nda tii ulah inye, nda usu nigheri iwadi ita ula ku. ⁵⁰ Meng dinin nshintinu ule na nba shintinu munu mun, ndi shotu iwadi imala! ⁵¹ Idin kpilizu nafo nna dak,nda ni munu nshau inye? Nani ba, nna dak nda wuso munuari. ⁵² Nene nbellin munu nanya kilari awatua ba yitu ku, anit na tatt ba su ivira nin na nanit natat. ⁵³ Iba kosu kidowo, ucif nivira nin nsaune, usaune nivira nin ncif; unna nivira nin nshono, ushon nivira nin nnah; nan nles nivira nin nwul, uwul nivira nin nan nles." ⁵⁴ Yesu wadi nbellu ligoze, tutun, "Asa iyene awut kusari kitene, asa woro, 'Na nin dandaunu,' ba uwauri ba juuy nanere udi. ⁵⁵ Asa iyene ufunu nuzu kadas, asa iworo, 'Kiti ba yitu puu kang,' nanere ba yitu. ⁵⁶ Anun anan rusuzu natiminne, iyiru ubellu nimon inyi nin kitene, ani iyaghari nta na iyiru ubellu kube ko na tidi nanye ba? ⁵⁷ Iyaghari ntah na idin wucu kidegen nati mine ba? ⁵⁸ Asa uda nin nan nivira kitingo kubi na idi libau udowe keelin uliru baba iwa do idi teru munu kilari tigo. ⁵⁹ Meng bellin munu, na uba nuzu nacara mine ba, se una nari fikubu na udumun vat."