² Birya byoshi biyumangire oku bulangalire bwa kalamo k'ensiku na mango, kalaganyagwa kurhengera mira na Nyamuzinda orha nywerha, ³ ana yerekan'omwanzi gwage okukasanzi kage omu bwalagaze nahabagwa ok'irhegeko lya Nyamuzinda mucunguzi wirhu; ⁴ kuli Tito, mwana wani omu bwemere bwirhu buguma: Ohabw'olukogo n'omurhula kurhenga Nyamuzinda larha na Yesu Kristu mucunguzi wirhu. ⁵ Nakulekag'Ekrete ly'obik'oku mulongo ebishinganine, na kugerer'amarhegeko gani obike abadahwa omu ngasi lugo, ⁶ Mukabonek'abantu binja, mulume wa mukazi muguma, abagwerh'abana b'irhonzi, abarha shobekirwe bushungu erhi buhushi . ⁷ Bulya bishinganine omudahwa abe wa kurha shungw'olunu, nka mushoho wa Nyamuzinda, arhabaga na wakucishurha cifuba, wa burhe erhi wakuhebwa binywebwa bya ndalwe, erhi buhushe, erhi wakulonza bunguke burha shinganine; ⁸ koki ashinganine abe muntuwa kuyegereza, mwira w'abantu b'okujir'ebinja, oshinganine, wokuli, ocire, mwirhonzi, ⁹ ocishwekire okumwanzi g'okuli kushimbana n'oku ayigirizibagwa, ly'aba n'obuhashe b'okuherez'abandi obushiru kushimbana n'oborhere bwinja n'abakadali abayaze. ¹⁰ Neci kokunali, cibwenene omu abacesibwe muli bantu banji bagoma, na bakaderh'obusha, n'abarhebanyi. ¹¹ oku bali nkabo muka hulika. banaka shandemilala yoshi,banaka igiriza okubunguke bw'enshonyi, ebibarhakwanini okuyigirizibwa. ¹² Muguma mulibo, mulebi wabo, a derha: aba krete baba banywesi, ensiku zoshi, bakali nka nsimba,barha gererez'okurhali kulya. ¹³ Obubuhamirizi buli b'okuli. c'ocirhumire obakalihire lyobaba n'obwemere bucire, ¹⁴ Barha nacishwekeraga oku ngano z'abayahudi erh'oku marhegeko g'abantu barha derh'okuli. ¹⁵ Byoshi bicire oku bacire; cikone ntabo bankaba bicire oku bankaba bazingire n'abarhayemiri. Obwenge bwabo n'entimanya zabo zizingire. ¹⁶ Banaka cigamba mpu baishi Nyamuzinda, cikone ebijiro byabo biyerekine oku arhali ntyo k'obiri, bali bakugaisa, barhengu, barhakanajira ciro n'omukolo muguma mwinja.