¹ Yoi lin'oso enakosumelemi lihaline bato balombake Yakomba ndombo,ko baonde beoondo,ko baondele bakin'ato,ko bakange lokango,latsin'ena bato bahatu; ² Latsin'ena bafoka banalifoka ko bamene lifoka bahatu,latsineho twata etelo oyokamba bikambwa biniso efana lofoso,nko la mwi,ko l'ekumelyo ena Yakomba ko la bokotwa bona lifiko. ³ Bokotw'one bonga,ko bondolotsi enaiso bana Yakomba boiko boniso. ⁴ Onalanga,ate,bato bahatu baike,ko bayele ena njeya ena sosolo eho. ⁵ Latsina Yakomba ayali nk'emoko,ko bolekya ena ntenyi bana Yakomba l'ato nko omoko,nko boto,Masiya Yesu. ⁶ Onoyolekyaki nk'endamene mbiko latsin'enato bahatu yoi liho yasumolama ena bisike binakolana la liho. ⁷ Emi njilamaki bosumoli ko l'ekima ena yoi liho latenda nko sosolo mpafote;bolaki bona befenda eniimelyo l'ena sosolo. ⁸ Latsin'eho,lalangoka mpame baonde enili-liili,kuma bailelya bakasa banoeka,efana nkele ko efana ntaango. ⁹ Ko akoli eneyali bayato bayolots'iyamene bisenda binakolana,lokotwa bona nsonyi ko la njofima; efa la lifo ndoha,ko la ndota ena beyaka la bisenda bin'otuya mene. ¹⁰ Balote nko bikambwa bn'olotsi nk'okotwa bona kolana layato banayotang'iyoamene bakumi bana yakomba. ¹¹ Ekoli eneyali boyoto aekele la mwi ko lifiko lihalitu. ¹² mpimely'oka boyoto alake ko ayalame nyag'oetuke ena boome,akoli latsina ayalame nko mwi. ¹³ Latsin'oka Adama nko ononunolamakioso,ko Ewe ena mbusa; ¹⁴ Ko Adama atafotama,boyoto kog'ofotamaki,ko akwaki en'owe. ¹⁵ Ohonde bayato bangika ena mbota ena bana yombo batsindelana enmelyo l'ena nganji ena lolango l'ena njekyama en'oeka la lokanyi lona njosimba.