¹ Botoloto onimely'oka Yesu ayali Masiya amotama la Yakomba;koko botoloto onookende ototaki nganji aok'ende on'ekende ootaka nganji nk'oho. ² Tey'oka tooka baana Yakomba nganji la yoi line nk'enekisokaka Yakomba nganji ko tomonya beeka benande. ³ Latsina nganji ena Yakomba eho,latsina tomonya beeka benande;ko beeka benande befana lotsili biike. ⁴ Latsina botoloto onootama la Yakomba aokoya looko;ko elonga en'okoya looko ehene nko njimelya eniso. ⁵ Onokoya looko okananyi efende nko boto onimelyoka Yesu ayali boona ona Yakomba? ⁶ One nkende onoyaki laase ko la bakila nko Yesu Masiya;efa laase kei,ohonde laase ko la bakila. ⁷ Onoyali temo ena yoi line nko bolimo,latsina bolimo ayali nko sosolo. ⁸ Latsina teno iyali isaso nko bolimo,la baase la bakila;ko bahasaso baambana yoi limoko. ⁹ Yombo tiimelya yoi linatenda bato,yoi linatenda Yakomba nko liho linaike ende otendaka latsina boona onande. ¹⁰ Onimelya boona, ayali temo enotema bonande,koko ende onofimelya yoi liniki Yakomba otendaka latsin'enena boona onande ¹¹ Ko yoi liho,liha line:Yakomba atofaki liiko lona lona lofasile,ko liiko loho loyali nk'eneyali boona onande. ¹² Ende onoyali la boona,ayali la liiko loho;ende onofana boona ona Yakomba afana liiko loho. ¹³ Mokotengela ino baoyi'ene,ino banimelya ena lina lina boona ona Yakomba,latsina beye'oka boyali la liiko lonofakale. ¹⁴ Ko nkaso enat'iso eneyal'ende ehene,latsina yombo tufola yoi yoka bosambo bonoyali eango enande,atoka; ¹⁵ Ko yombo teyoka atoka ena'oyi bahatu banufoliso;teyoka taata baoy'aho ban'ufoliso ena beondo. ¹⁶ Yombo botomoi kuma aena efili enande ayakambe yoi lin'owe linifatel'oto beweli,angufola,ko Yakomba angofende liiko,latsina en'oto'oho onakamba bowe,bonofayali yoka bowe bofatala bato beweli mene:yoi limoi linay'owe liyali linateloto beweli mene:mbil'emite aonde latsina yoi liho. ¹⁷ baoyi bahatu bafana mbongi bayali nko baoyi ban'owe;koko yoi limoi linaiyali linaifatel'oto beweli. ¹⁸ Teyoka botoloto onootama la Yakomba afakambe baiy'owe;koko ende onotamaki la Yakomba aoyotombanya endamene ko afalange boto'oho onowe. ¹⁹ tey'oka iso toyali bana bana Yakomba,ko baise looko bahatu bayali ena likasa lina boto'oh'onowe. ²⁰ Ko teyoka boona ona Yakomba amoya,ko amotofa iso nkotola latsina teye ende ona sosolo,toyali l'ende ona sosolo,nk'eneyali boona onande Yesu Masiya.One nko Yakomba ena sosolo,ko la liiko lon'ofasile. ²¹ Baan'anami bana tosisali boyotombany'ino'amene malikambo lina baindola.