¹ Baan'anami bana tosisali lakotengel'ino baoyi bane latsina bofakambe baoy'owe.Koko boto omoi akamba boiy'owe,toyali la bolekya eneka bafango,nko Yesu Masiya onambongi. ² Ko ende ayali mbeka en'eambanelo latsina ena baoy'owe baniso;ko efa latsina ena baoy'owe baniso kei:nko la tsin'ena bato bana looko loha lotu. ³ Ko yok'one teyoka tomeya ende yombo tomonya beeka benande. ⁴ Boto onila ,ate,emi momeya ,ko afamonya beeka bena nde,ayali nko mpotsi ko sosolo efoyali ene yali ende. ⁵ Ko boto onomonya youi linande,sosolo nganji ena Yakomba emolonga eneyali ende nko mbonga.La yoi line teyoka toyali eneyali ende ⁶ Onila,ate,ayali eneyali ende nko njalama ekoli eneyali boto oho akende yok'onokend'amene okendaka. ⁷ Ino bana balangama,mpakotengelino beeka bon'ototo:nakotengela nko beeka bena kaakala beyali nko yoi linikin'okaka. ⁸ Koko lakina lakotengel'ino boeka bon'ototo, bonoyali sosolo eneyaly'ende,eneyal'ino,latsin'oka bilima boyasile ko fololo eya loloma isanga. ⁹ Boto onila,ate,ayali ma fololo,ko aoka efili enande bowe,ende ayali nken'ilima. ¹⁰ Koko ende onookamela efili enande nganji,ayali ma fololo nko njalama,ko eneyali ende afate ekumbelo. ¹¹ Koko ende onoka efili enande bowe ayali nken'iilima,ko ayakende m'iilima ko afanonganya mboka enatswende,latsina biilima bolifa baiso banande. ¹² Lakotengela ino bana banami ban'atosisali,latsina ino bomotungwa ena baoy'owe ban'ino latsina lina linande. ¹³ Nakosumola ino Bafango,latsina ino bomeeyende onoyalaki malimatsako.Nakotengela ino befenga latsina ino bomokoya boto oho onowe.Natengela ino baana bana tosisali latsina ino bomeeya bafango. ¹⁴ Nakotengel'ino,bafango latsina ino bomey'ende onoyaaki malimatsako.Nakotengel'ino befenga,latsina ino boyali lotsili,ko yoi lina Yakomba liyali eneyali ino njalama,ko bomokoya botoho onowe. ¹⁵ Botokake looko ko la toma tona toyali ma looko nganji.Yombo boto omoi aoka looko nganji,nganji ena bafango efoyali eneyali ende. ¹⁶ Latsina baoyi bahatu banayali ma looko,mposa ena yonge,la mposa ena baiso,la njengolya en'ekendelo ma looko,baoyi baho bafali bana bafango.Bayali nko bana looko. ¹⁷ Ko looko loyasile,ko mposa eneho eyasile;koko ende onokamba eango ena Yakomba ayali bisike l'isike nko njalama. ¹⁸ Baana bana tosisali,one nkesike enesimbelo,ko yokonokino okaka,iy;ate,Onofeka-la-Masiya ayayi,isanga banafeka la Masiya bike bamemala:la yoi liho tey'oka enesikene nko esike enesimbelo, ¹⁹ iyo banafolaki eneyali iso koko batayala baniso;yombo yaaki baniso tumbe bamoyala liso lotsela;ohonde bafolaki eneyaliso latsina eho baenya yoka iyatu bafayali baniso. ²⁰ Koko ino boyali lefinyelo eneyali ende oneeka ko bomeya baoyi bahatu. ²¹ Ntakotengel'ino latsina ene finyino sosolo eho:nokotengil'ino latsin'oka bomeya solosolo eho ko ntsina yoi lina mpotsi lifakolana la sosolo eho tu. ²² Onoyali bofotsi bona mpotsi okananai? efende onaangana,ate,Yesu afayali Masiya?one nkende onafeka la Masiya. ²³ Nkende onaangana bafango,koko ende onimelya,boona ayali la bafango nk'oho ²⁴ Koko ino'amene,ekoli eneyali ino latsina yoi linikin'okaka malimatsako liyali eneyali ino nko njalama.Yombo yoi linikin'okaka ma limatsako liyali eneyal'ino njalama ino bongoyala eneyali boona eneyali bafango nko njalama. ²⁵ Ko esemba ene enekende otosembyaka ehene liiko lona lofakale. ²⁶ Lakotengel'ino baoyi bane latsina likambo lin'iyo banalanga latsina bokotembole ino. ²⁷ Koko efinyelo enekino otambaka eneyalyende eyali lino nko njalama,ko bofinde lilako latsina omoi akolake ino;koko yoka bosamb'onakolaka efinyelo enande enaoyi bahatu,ko eho eyali sosolo ko efate mpotsi,yok'onoki eho okolakak'ino bongyala nk;eneyaly'ende. ²⁸ Ko isanga baana banami bana tosisali,bongoyala eneyali ende latsin'eho enengend'enya,toyalama la nkaso,ko tofoke nsonyi en'oso bonande eneyelo en'ande. ²⁹ Yombo beey'oka ende ayali la mbongi,beey'oka botoloto ona kamba baoyi bana mbongi amolotwa eneyali ende nko boho.