¹ Oku biyerekere okundja n'omushimanano gwerhu na Nahamwerhu yezu Kristu, Rhubahemere, bene berhu, ² Murhakikereraga omu kurhoga n'okwindja muli, murha rhulunganaga, ky'ango omuka gubi, ky'angw'omwazi, ky'angw'olwandiko luderherwe kurhungererako, nka lusiku lwa Nahamwerhu luli. ³ Ntaye obashumikage; bulala okuhezwa nji kwa hika embere mpu hayinjire omunya byaha, mugala w'oluhezo, ⁴ Omulwisi alahire bwoshi biyerekere Lulema, ayikala omu kishagala akimenyesa oku ye Lulema. ⁵ Murhayibukire oku nali babwirire byo, nkili emwenyu si. ⁶ Na ntya muyindji eki mufarhire, yi arhayindja oku kihe kyage, ⁷ Bulala ekisomezo ky'ebyaha kyakolere; bihunire oki mufarhire ahezwe. ⁸ Na ntyo hebonekane ekihumanire kina zingire, Nahamwerhu Yezu oku bunu bwage, njo akifubaza kugerera oku hika kwage kuyubahisize. ⁹ Okuyindja kw'ekyo kigamba, luli lugero lw'okuyindja kw'oyo mushombanyi shetani n'obushobozi bwage; Haguma na ngasi bisomezo, n'ebimenyeso haguma n'emyazi y'obubehyi, ¹⁰ Na haguma ngasi bubehyi bw'ebyaha oku bali hera bula barhayemeraga obuzigire bw'okunali li bayokolwa. ¹¹ Lulema naye abarhumira obuhashe bw'okuhera, yi bayemera obubehyi, ¹² Oku bulyo boshi barhayemeraga oku nali s'aliko bayemerere ebi basimisize, nw'okurhaliko, bahanwe. ¹³ Rhwewe, bene berhu bazigirwa ba Nahamwerhu, bihunire oku bibalolere egihe kyoshi okukuza Lulema, bula Lulema arhulondwere kurhengera omurhangiro gw'egulu, kugerera obukesibwa bw'omuka n'obwemere omu kunali. ¹⁴ Ky'ekirhumire abahagerwe kugerera omwasi gwerhu gw'obuholo, yi babona obusime bwa Nahamwerhu Yezu Kristu. ¹⁵ Na ntyo, bene berhu, muyorhe oku lwimango, mulame n'enyigirizo mwahabirwe kyango kugerera omwazi gwerhu, ky'ango omwandiko lwerhu. ¹⁶ Nahamwerhu Yezu Krstu yenyine, Darha werhu Lulema, warhusimaga ana rhuha olukogo lwage obubemberezi bw'esiku n'amango nw'obulangalire, ¹⁷ Rhuliriza emirhima yenyu, n'okubakomeza n'akasi kendja koshi n'omwazi goshi gwendja !