¹ Gobu djawu inama Joabpe: Go kowe ymachidja wachugi chĩnga romallã, dja oachy roma Absalondji. ² Go kreype ĩmbama djã achype go urygatu endawepe go ekuandy pua wywy bychepe; go kreype gogi wywy wendu buare go ymachidjagi djã o achy rekodjiwa go dja ray manowedji ³ Go kreype go ekuandy puagi wywy ikẽmba djo djemipe tapytarãpe chã wychopa roma djo go tõ mumbu pua kãndajabawegi nonga. ⁴ Go ymachidja wachugi dja chãdji tyru pechema, gobu chinga chidjama inama: Cho ray Absalon, cho ray Absalon. ⁵ Gobu ekõma Joab go ymochidja wachugi endape, inama: kowekreype dje chã wychopa roma mondo dje ekuãndy pua wywy, go kreype gogi wywy djepe kuwẽma dje manollãwa, emidje ray emi radjy wywype, emi dje breko, emi dje buetygi breko wywype. ⁶ Dje rõ prawo gatuma reko go dje byllãndygipe, dje prawollãma mondo go djepe prawogipe; kowe kreype dje djapoma wechãmbyrã go ore ymachidjagi wywy emi go djetõ allãngi wywy, go dje chã ruwa dje prarupa roma mondo, kowe kreype emi dje djapoma wechãmbyrã emi cho kua gatuma, go Absalon manollãmbu, go ore manombabu dja endawepe, gope dje urygatu rawe. ⁷ Kowebu puã kua, tokape kua, djawu gatuga mondo dja buetygi wywype, go nonga dje djapollãmbu, cho inama djepe Apã wachu bykuapyrepe, Imbechwerã dje djãwe etakrã kbe'e djepe djepe warõwãngi kowe chãwãmbu, go rõ djepe buchãechewerã go bue buchã djepe wembawe nonga, go dje krumidjiwe emi go kowe krey pewe. ⁸ Gobu go ymachidja wachugi puãma oma wapyma go chupa djãwã ikẽlluandy embepe, kuima mondo go ekuandy pua wywype, inambu: kowe go ymachidja wachugi wapy ĩ go chupa ikẽlluandy djãwã embepe, gobu go tõallãngi wywy ekõmbama go ymachdja wachugi endape, go duwe Israel puagi wywy opama dja tapype. ⁹ Go Israel irõndy wywype edji djawu djaka roma reko, inambu: Go ymachidja wachugi rõ nandjepe kuwẽma go nandje byllãndygi ipowydji ware go rõ nandjepe matãma emi filisteo pua wywy ipowydjiware, go kowebu kadjã roma go dja ekuãndy pua wywy chã ruwa, krymballãdjiwa Absalondji. ¹⁰ Ñande mĩ endawe Absalompe go nandje wywy llabu, go kowebu manoma tõ mumbupe. Buerõ nandje warõ rekocherã, nandje oga mondo emi go ymachidja wachugi David endape. ¹¹ Go ymachidja wachugi David wendubu, gogi wywy edji djaka rekõbu, gobu buema mondo dja buety pa'i Sado emi Abiatarpe, inambu: Djawa ga mongo go Juda pua yma chepurãngi wywype, emi eru gami gogi wywype: Bue buare rõ pendje warõ reko pendje ekõwa cho endape cho ekõwã emi pendje ymachigja wachugirã. ¹² Pendje wywy rõ cho pawe wywy, cho ikãdjiwa emi cho o'odjiwa, Buerã pendje bitawera rawã go ymachidja wachugipe go dja endaty tapy dja llapogipe. ¹³ Pendje inawerã emi Amasape: Dje ko emi rekollã cho ikãemi cho o'o. Djedji wẽllãmbu tõallã ymachidjagicho chã ruwa, chope Apã wachu pacho ga mondo. ¹⁴ Go nonga rupi go ekuãndy pua wywy edji ingatupama pukawã Davidpe go etakrã kbe'e djawuchidja nonga, inama go ymachidja wachugipe: Ekõgami dje, go dje buetygi wywydji, go ore wywype kuwẽwã. ¹⁵ Gobu go ymachidja wachugi David wẽ roma djo go Jordan djãwẽ, go Juda puatygi wywy ekõma emi Gigal pewe dorowãgo ymachidja wachugipe, gogi wywy wacha rawã idjape go Jordan rupi. ^{18 16} Simei Gera ray, go Benjamin irõndygidjiwagi Bahurim puatygi, paĩllã romambu ekõwa go Juda kbe'e wywydji, dorowã go ymachidja wachugi Davidpe. ¹⁷ Go rupi ekõma etakrã wachu kbe'e go Benjamin irondydjiwagi, emigo Siba, emigo Saul irõndygidjiwa go etakrã ipo dja irõndygi wywydji emigo mirõtapa go dja buetygi wywydji, gogi wywy wachama o go Jordan, go ymãchidja wachugi wẽ nondje. ¹⁸ Gogi wywy wachapabu go y wachaputygi, gogi wywy djapoma wachawã go ymachidja wachugipe emigo dja irõndygi wywype. Gobu go Simei Gerar ray kmarãma go ymachidja wachugi chã ruwa, go wacha nondje go ypurã Jordan. ¹⁹ Go inama ymachidja wachugipe: kua rekoeme dje dja'ãpe go bue buchã cho djapopawegi, emi kua rekoeme go dje buetygi bue buchã djapopawegi go kreype, dje cho rekoatygi cho ymachidja wachugi, dje ekõ buare Jerusalen puare, go nongabu ymachidja wachugi kua rekoeme emi djonoeme go bae buchã dje djã'ãpe. ²⁰ Cho rõ dje buetygi, cho kua gatu cho djapãwedjiwa, go kowe kreype cho rẽ ekõma Jose irõngugi byche puare, cho ekõma cho dorowã go cho rekuatygipe, emi go cho ymachidja wachugipe. ²¹ Go Abisai Sarvia memby ĩnama:Monollãwerã ko Simei go djawu buchã buare go oje'e Apã Wachu piawowegipe. ²² David gobu inama: ¿Buerõ cho reko pedjedji?. Sarvia memby, kowebu rõ oedje rekoma chodji pedje mbyllandy nonga chope dja'a buwã go manowerã ko kowe krey go Israel puagi, dje kuãlla ko cho kowe kreybu cho ĩma emi Israel ymachidja wachugi. ²³ Gobuinama ymachidja wachu imeipe: Dje manallãwera?. Yma chidjagi wachu mema idjape idja djawu. . ²⁴ Mefiboset, Saul rau ekõma djawã yma chidjagipe wachu kuchillã idja pychã emi djupillã bato. Kuchillã emi idja tyru, go kreybu, wẽ odjiwe idja ekõpewe emi okryra gatupe. ²⁵ Gobu Mefiboset webu Jerusalen puare, go djuwã go yma chidjagipe, gobu David inama idjape: Mefiboset buerã rõ dje ollã cherã cho rupi. ²⁶ Go idja inama emi, yma chidja wachu cho rekotygi cho bue'ygi chope kabewãwe, cho rõ inare idjape. Eru gatu bepurã kaipa irõ cho owã yma chidja wachu endape. Dje buetygi watallãdji wa ²⁷ Idja rõ ko djawubuchã endowe chadji cho rekuatygi. Go yma chidja wachu gichã ruwa. Go cho rekuatygi yma chidja wachu rõ bue ywadjiwatygi emi dje djapo gami djepe begatuwãgi. ²⁸ Cho apã tapy puagi wywy manoba rawe dje chã ruwa, djerõ cho ymachidjo wachupi mima dje buetygipe dje bakupyre uty gipe uwã, emi pukapyregi bychepe, bue cho rekollã gobuare cho bue, yma chidjagipe, bukabechewerã. ²⁹ Gobu yma chidja inama: cho djawa tarã llãwerã, dje emi Siba bowowerã djiwa go ywydji. ³⁰ Gobu Mefiboset inama yma chidjagipe wedjapa gami idja llaporã.Cho uryma cho rekuatygi emi cho yma chidjagi, ekõware okryra gatupe idja tapype. ³¹ Emi Barsilai Galaad pua ekõma go Rogelin, puare emi wachoma Jordan rupi go yma chidja wachudji, idja owa emi Jordan duwe rekuaty. ³² Go Barsilai chuechema chã tapa ruy tarã reko idja menendawe go yma chidja wachugipe dja upyrã go imbuare Mahanaimpe. Idja rõ kbee buta tarã buchãgi. ³³ Go yma chidja wachu inama ekõ gami cho rupi, emi cho webawerã dje rekowã cho djawẽ Jerusalenpe. ³⁴ Go Barsilai inama yma chidja wachupe mawe nonga ruy cho ekõwerã wyteko, cho djopiwa endanjã yma chidja djãwe Jerusalenpe. ³⁵ Kowebu cho reko chã tapã ruy tãrã. Choba prawokuaa wyche bue kbegatugi emi bue buchãgi. Cho kuawy cheba upyrãngi emi tykupyrãgi. Cho wedu kua wycbe werãba kbee emi kudjã pree. Buerã cho ekõ cherã bue puy nonga cho rekuaty yma chidja wachugipuarã. ³⁶ Cho ĩdjueche go yma chidja rupi Jordan ruwã. Go ruwawe mberã rõ go ymachidja wachugi medjue bue tarã chope. ³⁸ Go yma chidja wachu inama: ẽkogami Quimam cho rupi.Emi cho djapo werã buegatu wãgi idjape dje buegatu pukagi wywy cho djapo werã. ³⁹ Gobu go pua wywydji wachama go Jordan rypydji go ymachidja David wachobu go Jordan idja djyka pychema Barzilape gobu emi idja djawu gatu mema go Barzilaipe. Gobu emi djewyma emi idja tapype. ⁴⁰ Gobu rõ yma chidja wachu wacha. Gilgal rupi emi Quimam ekõma erupi; go duiwe wywy JUda toõ allã nuãbyre chõma yma chidja wachugidji, emi Israel pua toõ allã byche pua nuaby redji. ⁴¹ Gobu rõ emi kbe'e wywy Israel puagi ekõma. Ymachidja wachu endape, inamo idjape: Buerã kbe'e wywy Juda puagi. Ore pawe wywy ekuandy dje djãwe. Emi mondo cherã idja tapy puagi wywype y wachu Jordanrupi ⁴² Go Juda puagi djakama Isreal puagipe yma chidja wachu. Ore paweche emi go. Emi bue buare pedje pradjã cherã?. Davidko eruma bue tarã ko weewã orepe, bue gatugi?. ⁴³ Gobu rõ kbee Israelpuagi djawuma emi go inama Juda puagipe: ore rõ etakra tapã irõndy. Go buare rõ chidjawe pedje Juda puagi wywydji. Go David yma chidja iwa ore bychepe. Bue ware pedje orepe reko go prarugi nonga. Pedje kua reko gami orerẽ pukawe idjape djewywa. Go Juda wywy djawu chidjawe Israel puagi wywype.