7

¹ Ifa lojo Yesu lotuhok rori innafa lawak inyeja ŋailimak huwo, ette inyeja ŋaino a kapernom.

² De owuon ifa lobo leitok lo oseŋer lo Roma he pit lohonyie lo lomuno inyeja binno. Hati oŋuai ifa pit le many imomohita ojo a yei. ³ Ifa lojo leitok le letiri saye ne Yesu, ette inyeja ŋaifahak maruak ille yudei de he Yesu, anyar lefi inyeja o woŋ etiluahu pit lohonyie te yie. ⁴ Ifa lojo isieja lafanu hiliaha he Yesu, ette isieja tanna Yesu hijo, "esiru dohoi hiluak iyye leitok le, ⁵ nyo omuno inyeja doŋe nohoi binno, ette hidofe ŋaduhok do hohoe sinnagog."

⁶ Ette Yesu ŋaino hosie a hosiere. Hati ifa leliaha inyie da halai ha haŋ ne, ette leitok ŋaifahak motiarak o hotojio de Yesu, "Habu, idek haitigem kwan nohoi jia, ⁷ Nyo obe naŋ lasiru hijo anyar ligiŋak iye a haji hanaŋ. Obe hidofe losiru da hanaŋ ŋawoŋ dohoi to kwan hanaŋ, hati irora tohutuk to nohoi hijo ette liboi, ette pit leiti liboi. ⁸ Ara naŋ tihoni la lawon do fok ho goloŋ, hidofe oseŋer ileiti owon dofok hanaŋ. Ajo naŋ hijo do lobo, 'inno', ette inyie ŋainno, ojo do lobo, 'woŋ', ette inyie ŋawoŋ, ajo naŋ de pit, 'egema inna', ette inyie higem."

⁹ Ifa la ŋaitiru Yesu rori inne, ette inyeja hililiha do honyie, ette fela de iluluŋ nafa lejufuta inyeja ette hijo, "Ajo naŋ da hatai, olobe naŋ laruma lobo hairuhoni lo loboro hiruk iyya ile do fau ho Israil." ¹⁰ Ette illafa lehahak leitok ha saye ŋacohari a haŋ ette ruma pit le aliboi.

¹¹ Da halu he ne ette Yesu ŋainno abore gala nafa lara Nain, ojo lejifat illohonyie ŋaifie honyie he iluluŋ no huwo. ¹² Ifa le eliaha inyeja he ikat no bore ha gala, eboŋ ho huwo lakfari hayoni, ara ifa hayoni le hito loboitei do honyie honyie na lara ihidak lafanu he iluluŋ no huwo to hototue bore gala. ¹³ Ifa lojo Yesu lowolo ihidak ne, ette inyeja ŋamehini do tihoni ne ette hijo do honyie, "Idek haiyoo". ¹⁴ Ette inyeja boto ette hitany ibala, ette huwo illafa lakafita ibala weita. Ojo inyeja hijo, "Illa, ajo naŋ dohoi, totei." ¹⁵ Ette hayoni le doto a hide ette hiroita. Ette Yesu aŋaisiere inyeja do honyie.

¹⁶ Ette baŋi hifut do huwo daŋ. Odulei isieja hitihabuo Hollum, hijo, "Ebur haikilani le hitok de hiji hohoi." Ette hidofe isieja hijo, "Aŋawoŋ Hollum le riŋari huwo illohonyie." ¹⁷ Aŋaisarari saye ne he Yesu afok ho Yudeya ha masisok nuhe lerek daŋ.

¹⁸ Ifa lojo lejifat illo Yoane lelimak inyeja rori inne daŋ. ¹⁹ Ette Yoane hilloloŋ lejifat illohonyie lohorik ette aŋaifahak isieja ade ha Habu otojo, "Hira iyye lafa lojo otu iso, kuya etila iyohoi lobo tihoni hamai?" ²⁰ Ifa lojo lafanu hiba daŋhati he Yesu, ette isieja hijo, "Yoani Batisto lefahu iyohoi dohoi hijo, 'Hira iyye lafa lojo otu iso, kuya etila iyohoi lobo tihoni hamai?'"

²¹ Do holoŋ nyie etilib ifa Yesu huwo inno loluŋa he iŋeiti ojo idiehiti ojo tee he menega, ette hidofe inyeja ŋaisiere huwo haŋodok inno loluŋa ette riŋei. ²² Ette Yesu hitiraŋ isieja hijo, "Iso liŋaife itai ikoi nahatai, ifie ilimak Yoane rori inne leitiri itai he inne liwolo itai. Eriŋei haŋodok, oloton haŋurak, eliboi huwo ille loŋwai ha talulu, eitira hatuhok, owaran hayok, elimahini sayejin inno lelibo de huwo illafa lawak luaha. ²³ Tihoni le lenyie letiweiti hiruk no honyie detiti te higemita innieti ojoho iso."

²⁴ Ifa laŋafie lejifat ile Yoane, ette Yesus hitiera hiro de iluluŋ rori inno Yoane hijo, "Efuo ifa itai leriŋari nyo a waha he ecalaŋ Leyami ne letadiho hujiti? ²⁵ Hati hifuo ifa itai leriŋari nyo, tihoni le eciefo boŋojin inna lanyarŋ Iwolo itai huwo ille eciefo boŋojin inne lelibo, amanya te hitidara amanaya do lobie ha habu. ²⁶ Hati hifuo ifa itai leriŋari nyo, haikilani? Ee, ajo naŋ dahatai, aŋalik hati haikilani.

²⁷ Ara hati lafa leigioro hijo, 'Tiwolo aifahak naŋ leifahati leiti a hosiere hatai, lolotu ŋaitibisak ikoi nahatai a hosiere hatai.' ²⁸ Ajo naŋ dahatai tere he ille lesiu te hiji ho ŋoruo, obe lobo lagalik Yoane, hati tihoni asai do lobie ho Hollum lara lehitok tere honyie."

²⁹ Ifa leitiri huwo rori inne, ho huwo hahurok ho musuru, hijo ebis Hollum. Ara isieja illafa loruma luha bhatisimo tere he Yoani. ³⁰ Hati Farisei ha haitiyenak he hifahita inno Yudei, obe ifa lorumu bhatisimo no Yoane, ebo isieja lofioroho inno Hollum do kwaite hosie.

³¹ Ette Yesu hijo, "Hatiriamik iso naŋ huwo hilahaji inna ho nyo? ³² Heciala isieja ho nyo Eciala isieja iyya hurre ille leiramita do suk, eitole ette hilliloŋo kwaite inno hosie hijo, ehuta iyohoi hetter dahatai obe itai lica. Etariha iyohoi obe itai eiyo.

³³ Hati Yoani Batista obe ottu adahari imune hidofe obe ottu amatari fino, hati ijo itai, 'owon inyeja he menega.' ³⁴ Ottu Lonyi tihoni daha ette mata, ijo itai hijo, 'Tiwolo, logo ha harumani le, mote ha haiduduhak ho musuru ha hayak!' ³⁵ Hati itihutek lefioroho do wure illohonyie daŋ."

³⁶ Elilloŋo lobo Farisei Yesu anyar lotu daha honyie ŋiria. Ifa laŋajiŋak Yesu a haji ha Farisei, ette inyeja ŋawoinyie da tabuan ette daha. ³⁷ Hati owon nabo hito noŋoruo do bore gala nyie na lara hayani. Ifa leitiri tihoni ne hijo owon Yesu da haji ha Farisei da tabuan, ette inyeja ŋayani riaa ta jak no logol iholit no. ³⁸ Ette riŋoŋo de lerek he hejek he Yesu oyo binno. Ette hifufus hejek inno Yesu te hidenya honyie, ette inyeja hipot hejek inno Yesu to hofir, ette hidofe hijujur hejek ette hedo fe hitue hejek inne Yesu te riaa.

³⁹ Ifa lojo Farisei lafa le liloŋo Yesu a haŋ honyie lowolo rori inne, ette inyeja higigillo to kwan honyie hijo, "Laŋara tihoni le haikilani, aŋayen nyari hito noŋoruo ne letettefa inyeja hijo ara hayani." ⁴⁰ Ette Yesu hitiraŋ inyeja hijo, "Simone, awon naŋ he hinnak hirro inna lawak naŋ ŋailimak" dohoi," "Heilimak Haitiyenani!"

⁴¹ Ette Yesu hijo, "Owon ifa lohorosi hilak lohorik illo lobo tihoni. Owon loboitei ho arobiya hisihet miyet, Ojo lobo ho orobiya tomona miyet. ⁴² Hati obe huwo ile lowuon ho orobiya inno lodumari nuhe, ette monyie horosi ŋabusak hosi nuhe daŋ ararik. Iyane, dehiji hosie, lari tere hosie iso lomuno inyeja binnoŋ?" ⁴³ Ette Simone hitiraŋ inyeja hijo, "Agil naŋ lafa le busak huwo inno loluŋa." Ette Yesu hijo dohonyie, "Iten iye analanyar."

⁴⁴ Ette Yesu fela de hito noŋuruo nyie ette hijo de Simone, "Hito noŋoruo inna, ajiŋak naŋ ahaji hoi, obe iye lisiere naŋ hifioŋ hilleta inno hejek, hati elila inyia hejek inanaŋ te hidenya honyie ette hidofe hifufus to hofir honyie. ⁴⁵ To lotuni hanaŋ ahaji hoi, obe iye lijur naŋ, hati tihoni ne odulei jura hejek ihanaŋ.

⁴⁶ Obe iye litue no hanaŋ te hiyali, hati tihoni inna aŋaitue naŋ te riaa. ⁴⁷ Te hirro te inne, ajo naŋ dohoi hijo hiyata inno tihoni inna innafa loluŋa, aŋaibusahini ette wanai ho munoi binno. Hati ajo naŋ hijo tihoni le lebusahini kai, etuhutahini iso munoi kai."

⁴⁸ Ette hijo do tihoni ne, "Aŋaibusahini hiyata innohoi." ⁴⁹ Ette huwo illafa lowuon da tabuan hiŋuŋunuta to kwaite hijo, "ŋai hidofe le leremikŋ ahek hiyetteŋ?" ⁵⁰ Ette Yesu hijo do tihoni ne, "Aŋaitilahu hiruk nohoi iye. Inno Bolioŋ."