6

¹ Da nabo holoŋ ha Sabato, aŋainno Yesu he lejifat honyie to hotuai module ŋagigilari ŋama, hifufua ette daha. ² Hati ette hilak Farisei hijo, "Jei lihuma itai higemita inne leinya hifahita lawak to holoŋ no Sabato?"

³ Ette Yesu hitiraŋ isieja hijo, "Obe itai ehen hiram no Davide ifa ojo inyeja lowodo, ifa lowuon inyeja ho huwo illo honyieŋ? ⁴ Aŋajiŋak isieja a hotui ha haji ho Hollum, ette ŋadumu imuneaha innafa lara hisiorita inno Hollum ette daha, ette hidofe ŋaisiere hinnak do huwo illo honyie a tanhya, hati hido inyie hifahita ojo odua imune nyia do huwo sabak, arari fadirisen hamai ladaha." ⁵ Ette inyeja hijo do hosie, "Ara Lenyi ho tihoni Habu lo Sabato."

⁶ Ifa da far nabo no Sabato, ajiŋak Yesu de Sinagog ette hitiyena huwo. Owon lobo tihoni lo logulo hana ne idahit. ⁷ Ojo haitiyenak he hifahita ho Farisie hiriria binno, hiwak wolo hijo heitilib iso tihoni lobo to Sabato, ette hoisie ŋarumu hipali ne leitisiahari inyeja. ⁸ Hati eyen inyeja higigillo no hosie ette hijo do tihoni le logulo hana, "Totei a hide, toweite inni de hiji ho huwo daŋ." Dee odoto tihoni le a hide, ette weita.

⁹ Ette Yesu hijo do hosie, "Efi naŋ itai, aŋettek hifahita to Sabato anyar legem ilibiti kuya iruti, ŋhatilahu manya kuya hitihar manyaŋ?" ¹⁰ Ette inyeja riŋa do hosie daŋ ette hijo do tihoni le, "Itibisak hana nohoi." Ette tihoni le higem, ette hana no honyie liboi. ¹¹ Ette isieja hifut ho jore, ette isieja hiriota hijo hehum iso iyohoi Yesu jei.

¹² Ifa far nabo do holoŋi nuhe, aŋaino Yesu a doŋe lo mojori. Odulei inyeja harie daŋ mojo do hollum. ¹³ Ifa leira far, elilloŋo inyeja lejifat do honyie, ette inyeja ŋanyimu isieja tomon harik, illafa efurek inyeja hijo "lefahat".

¹⁴ Fureta inne lefahat ara Simone (ara hido Peturu) ha harasi honyie Andrea, Yakobo, Yoane, Pilipo, Bartilimeyo, ¹⁵ Mateyo, Tomaso, Yakobo Lenyi Alfeyo ho Simone (Lafa lelilloŋo hijo Sillot), ¹⁶ Yuda Lenyi Yakobo, ette Yuda Iskariote lafa letinyaŋai Yesu.

¹⁷ Ette Yesu ŋarubu to doŋe hosie daŋ ette weita do bur. Owon ifa iluluŋ no lobolo ne lejifat honyie de, ojo hidofe iluluŋ no huwo te Yudea he Yerusalem ojo hido to holoroŋ ha hari no Yaya ho Sidon. ¹⁸ Afanu isieja hitira inyeja ojo anyar etilib isieja te iŋweiti. Ojo huwo ille letigema loyirihen inno lebot hidofe liboi. ¹⁹ Awak ifa huwo daŋ hitir inyeja, nyo ottu ifa duaran to kwan honyie ette hitilib isieja daŋ,

²⁰ Ette inyeja riŋa de lejifat honyie ette hijo, "Ojok iso itai lociaŋak, ara Lobie no Hollum na hatai! ²¹ Ojok iso hidofe itai huloŋ liwodo Eina, ifoŋi iso itai! Ojok iso itai hulon liyoo Eina; nyo illohita iso itai!

²² Ojok iso itai hulo leyalai huwo, le fuhei huwo ade tehiji hosie, lemoro itai, ette hido hituruo fureita inna hatai, to rori inno Lenyi tihoni! ²³ Itimune hidofe isahuta, hijo ira dede, nyo, oboro iso hisiorita da hatai de ido. Nyo, ebo ifa hohonyiok hosie haikilak illo Hollum ani.

²⁴ Hati oru iso binno da hatai ha hasamak, hijo iruma itai munei Eina. Oru iso hido binno da hatai ille ifoŋi Einna! Nyo, ifuo iso itai wodoi. ²⁵ Oru iso da hatai ille lillohita Eina! Ifwo iso itai yo ette molo.

²⁶ Orru iso da hatai letahuo huwo itai! Nyo ehuma ifa hohonyieok hosie haikilak talerok ani.

²⁷ Hati ajo naŋ da hatai ille litira, itimunei merok hatai, hidofe ihuma ana lanyar do huwo ille leliwari itai. ²⁸ Itijak huwo ille lipit itai hidofe imojo do huwo ille letigema itai.

²⁹ Lanaŋ tihoni logul nohoi, isiere hido inyeja logul nabuettei. Lodumu tihoni kout nohoi, isiere hido dohonyie gamis nohoi. ³⁰ Isiere tihoni sehi ne lefi inyeja, leyari tihoni sehi nohoi, idek do honyie.

³¹ Iya liwak itai huwo ehuma da hatai, ehuma do hosie daŋ ani. ³² Hati limuno itai huwo ille lemuno itai, hirrumu iso itai nyo tere hosie? Hido omuno hayak huwo illo lomuno isieja. ³³ Lihuma itai ana lanyar do huwo ille le huma ana lanyar da hatai, hirruma iso itai nyo tere hosie? Hidofe hayak ehuma ani. ³⁴ Liluahak itai saŋ innahatai do huwo ille liyen itai hijo enyiehak iso dahatai, irumu iso itai nyo tere hosie? Hidofe oluha hayak saŋ da hayak, ette hitila ŋanyahu saŋ innohonyie.

³⁵ Hati itimunei merok illahatai ette itai hihuma isieja ana lanyar. To luahak do hosie, idek haigigillo ŋainyahu saŋ tere hosie, nyo oboro iso hisiorita innahatai. Ira iso itai Lenyirok ho Hollum tehide, nyo ara inyeja le lemehini do huwo ille lenyia lojo humo ho huwo illo loru. ³⁶ Itimehini iya lemehini Monye hatai.

³⁷ Idek haiŋot, anyar honyie lobe oŋotok do hoi. Idek haiŋot hipalita inno huwo, anyar honyie innohoi logoto. Ibusak hapalita inno huwo, ette innohoi ŋaibusahini.

³⁸ Isiere do huwo, ette ŋaisiere da hatai. Hisiori ne lefut sudu, oduhori ette ŋaitaŋahini do murosi hatai. Ikemit ne likemari itai, ekema iso itai te ekemit te nyie.

³⁹ Ette inyeja ŋailimak isieja hitiriami. "Heremik tihoni loŋodo ŋaidihori tihoni lo loŋodo? Kuya le dihori, eremik isieja daŋ ŋahuye aiwudo, honya fa isieja? ⁴⁰ Obe hejufani loboro tere ha hatiyanani honyie, hati leitiyen tihoni daŋ, ette cialai iya hatiyanani lo honyie.

⁴¹ Nyo liriŋa iye do hujuti letiŋ no lowuon do honyiek ha harasi hoi, inya iye ligigilu hita ne to honyiek hoi? ⁴² Jei lijo iye da harasi hoi, 'Harasik, iko adumu naŋ hujiti ne to honyiek hoi,'' hati hido iye inya liwolo hita ne to honyiek hoi? Iyye haitimayahani! Todumu doo hita ne to honyiek hoi, ette iye wolo analanyar idumuni hati hujiti to honyiek ho mote hoi.

⁴³ Hati obe yani ne lelibo eŋorak haŋer inno lomura, obe yani no lomura egorak haŋer inne le libo. ⁴⁴ Hati eremik yani daŋ herini ta haŋer hosie. Obe itai lidia ŋaboro tere ha ŋaria, obe hidofe itai lidia haŋer inno fino tere hikua.

⁴⁵ Tihoni la lanyar, afanu ilibiti to lotunari ha taji honyie inno lelibo, ojo tihoni lo loru afanu irutioho ta taji honyie. Nyo ero hutuk rori inno lowuon da taji.

⁴⁶ Nyo le lilloŋo itai naŋ, 'Habu, Habu', ijo itai ibo hihuma rori inno elimak naŋ itaiŋ? ⁴⁷ Huwo daŋ ila afanu de iti, ette hitira rori inne iti egemari, ette naŋ ŋailimak itai he ciala jei. ⁴⁸ Owon iya tihoni le ledima haji, ette hibok fok no lowudo wir wir many eba do moruo ette ŋadimak haji da mai no logol. Lojo igura lotu ette hibul hiji, inya letadik haji no honyie, obe loworei, nyo emijak haji ŋaidimahini.

⁴⁹ Hati tihoni le letiri rori inne iti obe eruk, owon iyya tihoni le ledimak haji dehide ho fau obe lobok ahotue fau. Lojo igura lebulak haji, ette haji ŋairibori ko kwak ette ruoro."