4

¹ 1 Ette Yesu hifut ho Loholio olibo ette ŋacohini tahari ho Yordano, ette Loholio no Hollum eyari inyeja a waha ² Do holoŋitek tomona aŋwan, ette sitan hikem inyeja. De hicuŋi no holoŋi nuhe, obe inyeja lanya hinnak hirro, ette inyeja wodoi.

³ Ette Sitan hijo dohonyie, "Lira iye Lenyi Hollum, illoito moruo inna hetera ŋiria." ⁴ Ojo Yesu etiraŋ inyeja hijo, "inya tihoni lamanya te ŋiria hamai."

⁵ Ette Sitan ŋayari inyeja a hide ho doŋe, ette ŋatuhutek inyeja lobierejin daŋ inna fau doholoŋ nyie. ⁶ Ette Sitan hijo dohonyie, "Aiso iso naŋ iye hillohitok he hinnefita no lobierejin hunna, he imanyiti inna fau daŋ. Aremik naŋ higem hiram nia hijo aŋaiseiere ifa saŋ inne da hanaŋ anyar enefita naŋ, aremik naŋ aŋaisere do tihoni lalawak naŋ. ⁷ Liremik iye rigoŋo dafau dohosiere hanaŋ ette iye hitihabwo naŋ, ara hunaŋ daŋ innohoi."

⁸ Hati ette Yesu hitiraŋ inyeja hijo, "Egioro hijo, 'Tomojei Habu lohoi Hollum, ette iye higema dohonyie hamai.'"

⁹ Da halu ette Sitan ŋaiyari Yesu a Yerusalem ette ŋaihumak inyeja de sihidi ha Haji Imojit nehitok, ette hijo do honyiei, "lira iye Lenyi Hollum, ibire kwan nohoi teni. ¹⁰ Egioro hijo, 'efahu iso Hollum anjelohien illohonyie anyar leriria iye.' ¹¹ Enief 'iye dahas hoi, ibe iso iye liriafak hejek innohoi do moruo.'"

¹² Ette Yesu hitiraŋ inya hijo, "Ojo ifa, 'edek haikem Habu lohoi Hollum.'" ¹³ Ifa lojo sitan lotohu kema Yesu, aŋainno ade ette inya aŋaibusak Yesu doholoŋ nabo.

¹⁴ Ette Yesu ŋacohari a Galilio to golon no Loholio Lolibo, ette sayejin innohonyie ŋaisarik da masiok ha fau daŋ. ¹⁵ Etiyana inya da Sinagog, ojo huwo daŋ etihabuo inyia.

¹⁶ Ifa far nabo aŋawoŋ Yesu a Nasareta, do bore hagala nafa letibolori huwo inya. Iyya imohiti innohonyie, aŋajigak inyeja a Sinagog da far na Sabato, ¹⁷ Odioto inyeja ette hihen to Buk no Hollum, ette ŋamoju buk no Isaya ette hiŋa gagar, ette arruma ŋhati ne legioro hijo,

¹⁸ "Owon Loholio no Hollum da hanaŋ, nyo onyimu inyeja naŋ anyar erotari naŋ sayejin inna lanyar do lociaŋak. Efahu inyeja naŋ anyar elimak naŋ saye no lohoini luha efita, ojo hidofe enyahak haŋodok etteriŋie, ette ŋahek luha letigema huwo, ¹⁹ Ette ŋailimak hiŋa nolibori Habu."

²⁰ Ette inyeja ŋaisonok gagar, ette ŋainyahak da haigemak illo Sinagog, ette aŋwonyie. Eriŋa honyiehite daŋ inno huwo illafa te Sinagog dohonyie. ²¹ Ette inyeja hiter hiro dohosie, "Eina ottubai hiram no Hollum innaŋ do yohe hatai." ²² Owolo isieja illafa lowuon de hiram lojo inyeja daŋ ette isia daŋ hililiha binno do rori inne lelimu Yesu tohutuk honyie. Ette isia hijo, "Honya lara lenyi Yosefu leŋ?"

²³ Ette Yesu hijo dohosie, "Dede elimak iso itai lofioroho huna da hanaŋ, 'diktor, itilibo kwan nohoi. Igema inni daŋ dobore gala nahatai rori innafa letiru iyohoi hijo ihuma iye do Kapernom.'" ²⁴ Ette inyeja hijak hijo, "Dede ajo naŋ dahatai, obe huwo leruk haikilani do doŋe hosie.

²⁵ Hati ajo nag dahatai, dede owon ifa ŋoruo ihidahi eno loluŋa de Israile do holoŋitek inne Elija, ifa lojo ido lesiono, enya hai ŋasi hunik ha yafajin ile, ifa hati loboro hiŋa da fau daŋ. ²⁶ Obe ifa lefahak inyeja do ihidahi daŋ, hati de ihidak nafa lamanya da Sarefat de lerek ho doŋe ne Sidon. ²⁷ Owon hido huwo illologui ha talulu de Israile doholoŋ he Elisa haikilani, hati obe ifa letilibo lobo tere hosie daŋ arari Namana te Siria."

²⁸ Efut huwo illafa lowuon de Sinagog hojore ifa lojo isiaja letiri rori inne. ²⁹ Odioto isieja ette ŋaipihore inyeja ade todoŋe hosie, ette ŋayari inyeja amai nolomunya dodoŋe no loduhori isieja hajik innohosie, de leremik isieja ŋasule inyeja a imunya. ³⁰ Ette inyeja ŋahisari tehiji hosie ette ŋaino ade.

³¹ Ette Yesu ŋaino a Kapernam, do bobre gala na Galileya. Ette hitiyana huwo do holoŋ no Sabato. ³² Ette isieja hililiha do hitiyana nohonyie, hijo ero inyeja to golon.

³³ De Sinagog do holoŋ nyie, owon ifa tihoni lobo lo lowuon he meneŋa ette yo ne lewowoŋita, "Yesu lo Nasareta, ³⁴ Hiwak iye hihuma iyohoi jei? Ittu iye letaturori iyohoi? Ayen naŋ iye ŋai! Ira iye haliboni lo Hollum!"

³⁵ Ette Yesu ŋaiburahini de meneŋa hijo, "Okwai, tejiŋu te honyie!" Ifa lojo meneŋa lobuarak tihoni le dafau dehiji hosie, ette ŋajiŋu te honyie obe leriafu inyeja. ³⁶ Eliliha ifa huwo binno, ette isia ŋadulei hiroita do kwaite innohosie ette hifia, "ŋari hiro hunaŋ? Eburahini tihoni le loyirihien inne lebot te illohitok ojo hido to golon, ette loyirihen ŋajiŋu adeŋ?" ³⁷ Nia ette saye inno Yesu ŋaisarik afau daŋ.

³⁸ Ette Yesu ŋabusak Sinnagog ette ŋainno a haŋ he Simone. De oŋwai ifa homoni Simone ho nohon no kwan nelefiriwa binno, ette isia hifia Yesu anyar letilib inye. ³⁹ Ette Yesu weita dahalai ette ŋaifuhei nohon ade, ette inyeja ŋaino. Tere ette homoni Simone doto ette hifo dohosie ŋiria.

⁴⁰ Ifa lojo holoŋ laswori, ette huwo ŋaiyani de Yesu huwo daŋ inno lomui ho iŋaiti inno lolufa. Ojo Yesu ŋettenyak has inno honyie do huwo inno lomui daŋ ette isia liboi. ⁴¹ Ette meneŋa hido ŋajiŋu tere hohuwo inno loloŋa, oyo hijo, "Ira iye Lenyi Hollum!" Ette Yesu ŋaiburahini meneŋa obe hosie ero, hijo eyen isia hijo ara inyeja Masiya.

⁴² Ifa beren to moite, ewan Yesu amai nolodua. Ette iluluŋ no huwo ŋawoŋ ŋasiehini inyeja amai nolowuonyie inyeja. ⁴³ Ekem isia hijo ette nyia inyeja lohu ade tere hosie. Hati ojo inyeja dohosie hijo, "Awak naŋ hidofe hitiyena sayye inno lelibo inno lobie no Hollum do borejin hinnak inna gala nuha, hijo ara hiram nia nafa lefahahini naŋ aini." ⁴⁴ Nia, odulei inyeja hitiyana de Sinagogi innafa lowuon da fau ho Yudeya.