19
1
Aŋajiŋak Yesu ette ŋaino te Yeriko.
2
Nia, owuon ifa lobo tihoni de lalara fure Sakeyo. Ara ifa habu la haiduduhak homusuru ojo hidofe asam.
3
Awak ifa inyeja wolo hijo ŋai lara Yesu hati obeleriamik wolo te hide he iluluŋ, nyo osuk ifa inyeja.
4
Nia enyero inyeja ahosiere ho huwo ette ŋarek ahide he yani aŋabori owolo honyie inyie jia huwo awak ifa Yesu ŋaino te ikoi tenyie.
5
Ifa laŋawoŋ Yesu amai nyie ebono ahide ette hijo do honyie, “Sakeyo, dolu kokwak afau hati anyar leitole naŋ da haŋ hoi.“
6
Nia aŋafiriŋu ŋallu afau ette ŋaitiboŋu Yesu alanyar.
7
Ifa lowolo huwo daŋ ette hiŋuŋunuta huwo hijo, “ŋaino halaŋ illeŋ hira ahatomononi da haŋ ha hayani.“
8
Ette Sakayo diote ette hijo, “Habu teriŋai, “Habu eisere iso naŋ hirro inanaŋ do lociaŋak ojo lemumun naŋ lobo tihoni tehinnak hirro adumak iso naŋ inyeja hinyahita aŋwan.“
9
Ette Yesu hijo do honyie, “Eina eiba ŋaitilahani da haŋ inna nyo ara ifa inyeja lenyi Abramo.
10
Nyo lotu lenyi tihoni leisiahari hikoi ne leitilahari huwo ille lerita.“
11
Ifa laŋaitiru isieja hirro hunna aŋaduloi inyeja hiroita ette ŋailimu hitiriami nyo eliaha ifa inyeja ho Yerusalem, ette isieja higigillo hijo eihiha iso lobie no Hollum hijo ŋalieu kokwak.
12
Ette inyeja hijo hati de, aŋaino lobo leitok anobo doŋe nololoma hijo ahu ŋaifotu do honyie lobie ette ŋacohini.
13
Ette inyeja hililloŋ haigemak illo honyie tomon ette hiso arobia tomon ette hijo dohose "Itinyaŋari many aguruni naŋ.‘
14
Hati eyalai ifa huwo illo doŋe honyie inyeja ette isieja ŋaifahak hilak lefahat da halu honyie hijo 'Inya iyohoi leiwak tihoni le ahabu lohoi.‘
15
Nia ifa laŋaifotu inyeja lobie tere ette ŋawoŋ ŋailloloŋu hegiamak illo honyie illafa leiso inyeja arobia afanu do honyie hijo eyenari hijo hera mahu arobia jai inne leitinyaŋu isieja.
16
Ette hiteri ŋawoŋ ette, hijo, ‘leitok aŋaitinyaŋu naŋ arobiyaha tomon te illafa esiere iye da hanaŋ.‘
17
Ette inyeja hijo do honyie "Anyar binno. 'Ira iye haigiamani lelelibo no' iya enefita ifa iye hirro illo lomuta Eina lanyar aŋaihumak iso naŋ iye aleitok loboŋito inna bore gala tomon.‘
18
Ette haigemani hitarihi ŋawoŋ ette hijo, 'leitok, aŋaitinyaŋu naŋ arobiyaha miyet te illafa eiso iye da hanaŋ.
19
Ette inyeja hijo do honyie, 'Etoŋita iso iye botin inna gala miyet.‘
20
Ette hidofe lobo ŋawoŋ ette hijo, ‘Leitok, ibe arobiyhati lafa hoi.
21
Abubunak ifa naŋ ta manir ette naŋ ŋatunak inye ana lanyar. Nyo aŋabaŋ ifa naŋ hiro nohoi hatihoni lo lorrute. Idumu iye hirro inno lobe ara innohoi ojo hidofe edieŋitta hirro hunna libe liyek.‘
22
Hati eijo habu do honyie, 'Ira iye ahagiemani no! Aŋot iso naŋ hiram nohoi te hiroita te inne lafanu to hutuk hoi iyen iye hijo alanaŋ hatihoni lorute, edumuta naŋ hiro huna lobe lara tana ojo hido abala hiro huna labenaŋ layek.
23
Nyo hati obe inyie litunak arobia inia daŋ de beŋ Nyo ana ma ŋefwotu naŋ isieja, ho lo mojiti no hosie ifa laŋacohini naŋ aini.'
24
Hati ette letok hijo, do hosie, 'Itiweitai de, itidumu arobiyihati le ade tere honyie, isiere de lie lowuon ha arobia tomon!
25
Eijo isieja do honyie, ‘Habu, eyeita inyeja ha arobia tomon.‘
26
‘Ajo naŋ da hatai, hijio lowon lobo hasaŋ iluluŋ ofonihini iso de honyie ariai ojo de lia obe hiro tere honyie, eyari iso ade tere honyie amara ara hido lobo sehin lo owon do honyie.
27
Ojo merok ille hanaŋ, illo lobe lawak naŋ hetera naŋ eitok lohosie, iyani isieja inni ette itai ŋatohoi isieja do hosiere hanaŋ.‘“
28
Ifa laŋatohu inyeja hiro hirro inne, ette inyeja ŋeinno tohosiere, oboto manya Yerusalem.
29
Ifa eliaha inyeja aŋhati ho Bespaij ho Betani, to doŋe nafa eliloŋo huwo hijo Olifeto, ette inyeja ŋaifahak hejufat arik,
30
Ette hijo, “Ifeti a doŋe inyie. Lijiŋak itai, efwotu iso itai arrumu nobo sigira inna holobe huwo etirrek saŋ do hide. Itihek ette itai ŋeyani da hanaŋ.
31
Lefi lobo itai, ‘No nyo eho itai inyeja?’ itijo, ‘Awak Habu inyeja.’”
32
Efie luha illafa lefahak huwo ette ŋarrumu Sigira iya nafa elimahahini isieja.
33
Oho ifa isieja sigira ette monye he Sigira arrumu isieja ette hijo do hosie, “No nyo liho itai sigira?”
34
Ette isieja hijo, “Awak Habu inyeja.”
35
Ette isieja ŋeyani inyeja do Yesu, ette ebirok boŋojin innohosie ette etuhunyiek Yesu to hide.
36
Ette isieja daŋ ŋafetak boŋojin innohosie de ikoi nafa ohuye Yesu.
37
Ifa leliaha inyeja aŋhati ho illut no doŋe no Olifeto, ette iluluŋ ne lefahat hitiara munoi ojo etihabwo Hollum, eyorro woŋ woŋ te igem te nyie hitok daŋ lowolo isieja ette hijo,
38
Hijo, “Hotowuana jaha da Habu lie lolottu to fure ta na Habu Hollum! Himora te ido ojo munoi lohwo hotowuana do Hollum.“
39
Eijo hilak illa Farisei te hiji he iluluŋ do honyie, “Hetiyanani, iriŋa lefahat illohoi,”
40
Eitiraŋ Yesu ette hijo, “Elimak naŋ itai hijo leremik ida hulloŋ dwai, ette moru yio ade.”
41
Hati lawoŋ Yesu aŋhati ho bore ha gala, ette inyeja yio te Yerusalem,
42
Hijo, “Iya lamayien itai da far inna hamai, kuya iye, hirro inne leriamik dohoi himora! Hati iyane iye eiŋofahini to honyiehite hatai.
43
Hati afanu iso holoŋi inne da hatai, lojo merok illahatai loduhok iwudoho da ŋhati, hati ette mitini ahotwai ta hala daŋ.
44
Ogoŋok iso isieja iye da fau ojo durre innohoi daŋ hoi. Obe iso eibusak morwo de hide ha nabo, nyo obe ifa isieja ogilu hijo awak Hollum hikem hijo alwuaha isieja.”
45
Niya aŋajiŋak inyeja iklesia ette hitiara hifuhuta huwo illafa leitinyaŋa de,
46
Ette hijo do hosie, “Aŋairohini, ‘Hijo ara iso haji hanaŋ Haji Imojit,‘ hati eŋaihumak itai inyie a haji no hoholak.”
47
Niya etiyana ifa Yesu moite moite da Haji Imojit nahittok leitaha illa Fadirihien ojo haigeriok ojo hetidihitak illo huwo ette isieja hiwak ŋatohoi inyeja,
48
Hati obe isieja lorrumu nabo hikoi ne legiamak ŋaitisiahari inyeja, nyo eitira ifa huwo bi daŋ do honyie dede.