¹ ವಾಡು ದೋಣಿನಿ ಎಕ್ಕಿ ಸಮುದ್ರುಮ್ನಿ ದಾಟಿ ವಾಳ್ ಊರ್ಕಿ ವಚ್ಚೆ. ² ಆನ್ಕಿ ವಚ್ಚ್ನಪ್ಪಡು ಹಾಸ್ಗ್ಮಿಂದ ಪಡುಂಡಿನ ಓಕ್ ಪಾರ್ಶ್ವವಾಯು ರೋಗ್ಮುವುoಡೋಡ್ನಿ ಯೇಸು ದೆಗ್ರುಕಿ ಎತ್ಕೋನಿ ವಚ್ಚ್ರಿ. ಯೇಸು ವಾಳ್ ನಂಬ್ಕುಮ್ನಿ ಸೂಸಿ ಪಾಶ್ವವಾಯು ರೋಗಿಕಿ - ಕೊಡ್ಕ ಧೈರ್ಮಾಗುಂಡು , ನೀ ಪಾಪುಮ್ಲು ಕ್ಷಮಿಚ್ನಾವಿ ಅನಿ ಸೊಪ್ಪೇ. ³ ಆನುಂಡಿನ ಶಾಸ್ತ್ರೀಲ್ಲಾ ಕೆಲುವ್ಲು - ವೂಡು ದೇವುಡು ದೂಷಣ್ಮು ಸೇಸ್ತಾಡನಿ ವಾಳ್ವಾಳ್ಳಾ ಮಾಟ್ಲಾಡ್ಕೊನ್ರಿ . ⁴ ಯೇಸು ವಾಳ್ ಆಲೋಚುಮ್ನಿ ತಿಲ್ಸ್ಕೋನಿ - ಮೀರು ಎಂದ್ಗೂ ಮೀ ಮನ್ಸ್ಲ ಶೆಡ್ಡೆ ಆಲೋಚ್ಮುಲ್ನಿ ಸೇಸ್ತಾರು? ⁵ ಯಾವ್ಡಿ ಸುಲ್ಬ್ಮು ? ನೀ ಪಾಪಲು ಕ್ಷಮಿಚ್ನಾವಿ ಅನೇದೋ ? ಲೇಸಿ ಪದ ಅನೇದೋ ? ⁶ ಆಯ್ತೆ ಪಾಪಲ್ನಿ ಕ್ಷಮಿಚ್ಚೇಕಿ ಮನುಷ್ಯಕುಮಾರುಡ್ಕಿ ಭೂಲೋಕುಮ್ಲ ಅಧಿಕಾರ್ಮು ವುಂಡಾದನಿ ಮೀಕಿ ತಿಲಿಯಾಲ ಅನಿ ಸೊಪ್ಪಿ ಪಾರ್ಶ್ವವಾಯು ರೋಗಿಡ್ನಿ ಸೂಸಿ - ಲೇಸಿ ನೀ ಹಾಸ್ಕ್ನಿ ಎತ್ಕೋನಿ ಇಂಟ್ಕಿ ಪೋ ಅನೆ. ⁷ ವಾಡು ಲೇಸಿ ಇಂಟ್ಕಿ ಪಾಯೇ. ಜನಲು ದೀನ್ನಿ ಸೂಸಿ ಭಯ್ಮು ಪಟ್ಟಿ ದೇವುಡು ಮನುಷ್ಯುಲ್ಕಿ ಅಟ್ಟೆ ಅಧಿಕಾರುಮ್ನಿ ಇಚ್ಚಿಂದಾನ್ಕು ಯೇಸುನಿ ಕೊಂಡಾಡ್ರಿ. ⁸ ಯೇಸು ಆನಿಂಚ ಪಾಯೇನಪ್ಡು ಸುಂಕುಮ್ಕಿ ಕುಚ್ಕೊನುಂಡಿನ ಮತ್ತಾಯುಡನೆ ಓಕ್ ಮನುಷ್ಯುಡ್ನಿ ⁹ ಸೂಸಿ - ನನ್ನೀ ಹಿಂಬಾಲಿಯ್ಯಿ ಅನಿ ವಾಡ್ನಿ ಪಿಲ್ಚಿ ವಾಡು ಲೇಸಿ ಯೇಸುನಿ ಹಿಂಬಾಲಿಂಚೆ. ¹⁰ ಆಮಿಂದ ವಾಡು ವಾಡ್ ಇಂಟ್ಲ ಊಟುಮ್ಕಿ ಕುಚೋನುಂಡ್ನಪ್ಪ್ದು ಬಹು ಮಂದೀಲು ಸುಂಕ್ಮೊಳು ಪಾಪಿಲು ವಚ್ಚಿ ಯೇಸುಲ ಮಲಿ ಯೇಸು ಶಿಷ್ಯುಲು ಪಂಕ್ತೀಲಾನೆ ಕುಚ್ಚೋನ್ರಿ . ¹¹ ಪರಿಸಾಯ್ಲು ದಾನ್ನಿ ಸೂಸಿ ಯೇಸು ಶಿಷ್ಯುಲ್ನಿ - ಮೀ ಗುರುಡು ಸುಂಕೊಳ್ಳಾ ಮಲಿ ಪಾಪಿಲ್ಲು ಜೊತ್ಲ ಎಂದ್ಗೂ ಊಟ್ಮು ಸೇಸ್ತಾಡು ಅನಿ ಅಡುಗ್ರಿ. ¹² ಯೇಸು ದಾನ್ನಿ ಇನಿ - ಕ್ಷೇಮುಲವುಂಡೋಳ್ಕಿ ವೈದ್ಯುಡು ಬೇಕಾವ್ಲೇ , ಕ್ಷೇಮುಮುಲೇನೋಳ್ಕಿ ಕಾವಾಲ. ¹³ ಮೀರು ಪೊಂಡ್ರಿ - ನಾಕಿ ಯಜ್ನುಮು ವದ್ದು, ಕರುಣ್ಮೆ ಕವಾಲ ಅನೆ ಮಾಟ್ ಅರ್ಥುಮ್ನಿ ನೆರ್ಸ್ಕೊಂಡ್ರಿ. ನಾನು ನೀತಿವಂತುಡ್ನಿ ಪಿಲ್ಚೇಕಿ ವಚ್ನೋಡ್ಕಾದು, ಪಾಪಿಲ್ನಿ ಪಿಲ್ಚೇಕಿ ವಚ್ನೋಡು ಅನೆ. ¹⁴ ಆಮಿಂದ ಯೋಹಾನುಡಿನ ಶಿಷ್ಯುಲು ಯೇಸು ದೆಗ್ರುಕಿ ವಚ್ಚಿ- ಪರಿಸಾಯುಲು ಮಾಮು ಉಪ್ವಾಸ್ಮುಸೇಸ್ತಾಮ್ಕದ , ನೀ ಶಿಷ್ಯುಲು ಎಂದ್ಗೂ ಉಪ್ವಾಸ್ಮು ಸೇಸೆಟ್ಲೆದು ಅನಿ ಅಡ್ಗೆಕಿ ಯೇಸು ವಾಳ್ಕಿ ¹⁵ ಪೆಂಡ್ಲಿ ಜನ್ಮು ವಾಳ್ ಜೊತ್ಲ ಪೆಂಡ್ಲಿ ಸಿನೋಡು ಉಂಡೆಗಂಟ ದುಖ್ಮು ಪಡ್ತಾರಾ ? ಆಯ್ತೆ ಪೆಂಡ್ಲಿ ಸಿನೋಡ್ನಿ ವಾಳ್ ಜೊತಿಂಚ ತೊಡ್ಕೊಂಪಾಯೇ ಸಮಯ್ಮು ವಸ್ತಾದಿ , ಅಪ್ಡು ಉಪ್ವಾಸ್ಮು ಸೇಸ್ತಾರು . ಯೋಳು ಕೊತ್ ಬಟ್ಳು ತುಂಡ್ನಿ ಪಾತ್ ಬಟ್ಕಿ ತ್ಯಾಪೆಸೆಟ್ಲೇ , (ಏಸ್ತೆ ) ¹⁶ ಆ ತ್ಯಾಪ ಬಟ್ಳುನಿ ಹಿಂಜೆದಾನಿಂಚ ಸಿಂಪಾತಾವಿ. ¹⁷ ಇದ್ಕಾಕುನ್ನ ಪಾತ್ ಬುದ್ದಲಿಲ ಕೊತ್ ದ್ರಾಕ್ಷ ರಸ್ಮುನಿ ಏಸ್ಪೆಟ್ಟೆಟ್ಲೇ, ಪೆಡ್ತೆ ಬುದ್ದಲಿಲು ಪಗ್ಲಿ ದ್ರಾಕ್ಷ ರಸ್ಮು ಚಲ್ಪಾತಾದಿ , ಬುದ್ದಲಿಲು ಶೆಡ್ಪಾತಾವಿ , ಆಯ್ತೆ ಕೊತ್ ದ್ರಾಕ್ಷ ರಸ್ಮುನಿ ಕೊತ್ ಬುದ್ದಲಿಲ ಏಸ್ಪೆಡ್ತಾರು , ಅಪ್ಡು ರೊಂಡು ಉಳ್ಸ್ಕೊಂಟಾವಿ ಅನಿ ಸೊಪ್ಪೇ. ¹⁸ ಇಟ್ಟೆ ಯೇಸು ವಾಳ್ ಜೊತ್ಲ ಮಾಟ್ಲಾಡೆನಪ್ಡು ಒಕ್ಡು ಅಧಿಕಾರುಡು ವಚ್ಚಿ ಯೇಸುಕಿ ಅಡ್ಮು ಪಡಿ - ನಾ ಬಿಡ್ದ ಇಪ್ಡೆ ಸಚ್ಪಾಯೇ, ಅಟ್ಟಾಯಿ ನುವ್ವ ವಚ್ಚಿ ದಾನ್ಮಿಂದ ಸೈ ಪೆಡ್ತೆ ಬದ್ಕ್ತಾದಿ ¹⁹ ಅನಿ ಬೇಡ್ಕೊನಿ ಯೇಸು ಲೇಸಿ ವಾಳ್ ಶಿಷ್ಯುಲ್ನಿ ತೊಡ್ಕೋನಿ ಯೇಸು ಎನ್ಕ ಪಾಯೇ. ²⁰ ಅಂತಿಟ್ಲ ಪನ್ನೆಂಡು ಎಂಡ್ಳಿoಚ ರಕ್ತ್ಮು ಕುಸ್ಮು ರೋಗ್ಮುಂಡೆ ಓಕ್ ಆಡ್ದಿ - ನಾನು ಯೇಸು ಬಟ್ನಿ ಮುಟ್ತೆ ಸಾಲು , ²¹ ನೆಟ್ಗಾಯ್ತಾನು ಅನಿ ಮನ್ಸ್ಲ ಅನ್ಕೊನಿ ಎನ್ಕಿಂಚ ವಚ್ಚಿ ಯೇಸು ಬಟ್ಳುನಿ ಮುಟ್ಟೆ. ²² ಯೇಸು ಎನ್ಕ್ತಿರ್ಗಿ ದಾನ್ನಿ ಸೂಸಿ - ಬಿಡ್ದ , ಧೈರ್ಯ್ಮಾಗುಂಡು , ನೀ ನಂಬುಕ್ಮೆ ನಿನ್ನಿ ಸ್ವಸ್ಥ್ಮು ಸೇಸೆ ಅನೆ. ಆ ಕ್ಷಣ್ಮೆ ಆ ಆಡ್ದಿ ಸ್ವಸ್ಥ್ಮಾಯೇ. ²³ ಆಮಿಂದ ಯೇಸು ಆ ಅಧಿಕಾರುಡು ಇಂಟ್ಕಿ ವಚ್ಚಿ ವಾದ್ಯಾಗಾರುಲ್ನಿ ಗದ್ಲುಮು ಸೇಸೆ ಜನಲು ಗುಂಪ್ನಿ ಕನಿ - ಆಕ್ಟರ್ಕಿ ಪೊಂಡ್ರಿ, ²⁴ ಸಚ್ಪೋಲೆ , ನಿದ್ರಾ ಸೇಸ್ತಾವುಂಡಾದಿ ಅನ್ನಪ್ದು ವಾಳು ಯೇಸುನಿ ಹಾಸ್ಯುಮು ಸೇಸ್ರಿ . ²⁵ ಜನಲ್ನಿ ಆಕ್ಟರ್ಕಿ ಅಂಪಿoಚ್ಮಿಂದ ನೋನ್ಕಿ ಪಾಯಿ ದಾನ್ ಸೇತ್ನಿ ಪಟ್ಟೆಕಿ ಆದಿ ಲೇಸೆ . ²⁶ ಈ ಸುದ್ದಿ ಆ ದೇಶ್ಮುಲ ಅಂತ ಹಬ್ಬೆ. ²⁷ ಯೇಸು ಆನಿಂಚ ಪಾಯೇನಪ್ದು ಇದ್ರೂ ಗುಡ್ದೋಳು - ದಾವಿದುಡು ಕುಮಾರುಡ , ²⁸ ಕರುಣಿಯ್ಯಿ ಅನಿ ಕೂಸ್ಕೋನಿ ಯೇಸು ಎನ್ಕ ಪಾಯ್ರಿ. ಯೇಸು ಇಂಟ್ಕು ವಚ್ನಪ್ದು ಆ ಗುಡ್ದೋಳು ಯೇಸು ದೆಗ್ರುಕಿ ವಚ್ರಿ . ಯೇಸು ವಾಳ್ನಿ - ನಾನು ದೀನ್ನಿ ಸೇಸ್ತಾ ಅನಿ ನಂಬ್ತಾಲ ಅನಿ ಅಡ್ಗಿನ್ದಾಂಕು ವಾಳು - ಹೌನು , ಸ್ವಾಮೀ , ನಂಬ್ತಾಮು ಅನ್ರಿ. ²⁹ ಅಪ್ಡು ಯೇಸು ವಾಳ್ ಕನ್ನುಲ್ನಿ ಮುಟ್ಟಿ - ಮೀರು ನಂಬ್ನಟ್ಗೆ ಮೀಕಿ ಆವ್ನಿ ಅನೆ. ³⁰ ಅಪ್ಡು ವಾಳ್ಕಿ ಕನ್ಲು ವಚ್ಚೆ. ಮಲಿ ಯೇಸು ವಾಳ್ಕಿ - ಇದಿ ಯೋಳ್ಕು ಗೋತಾಗುಡ್ದು ಸೂಡoಡ್ರಿ ಅನಿ ಕಂಡಿತ್ಮಾಯಿ ಸೊಪ್ಪೇ. ³¹ ಆಯ್ತೆ ವಾಳು ಪಾಯಿ ಆ ದೇಶ್ಮುನೋನoತ ಯೇಸು ಸುದ್ದಿನಿ ಹಬ್ಬಿಚ್ಚ್ರಿ. ³² ವಾಳು ಪಾಯೇನಪ್ದು ದೈಮು ಪಟ್ಟಿನ ಒಕ್ಡು ಮೂಗುಡ್ನಿ ಯೇಸು ದೆಗ್ರುಕಿ ತೋಡ್ಕೊನೋಚ್ಚ್ರಿ. ³³ ದೈಮ್ ಇಡ್ಬಿಚ್ಚ್ಮಿಂದ ಆ ಮೂಗ್ದು ಮಾಟ್ಲಾಡೋಡ್ ಆಯೆ . ದಾನ್ಕಿ ಆ ಜನಲು - ಇಸ್ರಾಯೇಲುಲು ಜನುಮ್ಲ ಇಟ್ಟೆ ಕಾರ್ಯುಮ್ನಿ ಇಂತ್ವರ್ಕು ಯೋಳು ಸೂಡ್ಲೆದನಿ ಬೆರ್ಗಾಯ್ರಿ. ³⁴ ಹೇಯ್ತೆ ಪರಿಸಾಯ್ಲು - ವೂಡು ದೈಮುಲ ರಾಜುಡ ಸಹಾಯ್ಮಿಂಚಾನೆ ದೈಮುಲ್ನಿ ಇಡ್ಬಿಸ್ತಾಡು ಅನ್ರಿ. ³⁵ ಯೇಸು ಅನ್ನೀ ಊರ್ಲುನಿ ಹಳ್ಳಿಪಳ್ಳಿಲ್ನಿ ಸುತ್ಕೋನಿ ವಾಳ್ ಸಭಾ ಮಂದಿರುಮ್ಲ ಉಪದೇಶ್ಮು ಸೇಸ್ತಾ ಪರ್ಲೋಕ್ಮುರಾಜ್ಯುಮಿನ ಸುವಾರ್ತುಮ್ನಿ ಸಾರಿ ಸೊಪ್ತ ಅನ್ನಿ ತರ್ಮು ರೋಗಲ್ನಿ ಅನ್ನಿ ತರ್ಮು ನಪ್ಪಿಲ್ನಿ ವಾಸಿಸೇಸ್ತಾ ವಚ್ಚೆ . ³⁶ ಆಯ್ತೆ ಜನಲು ಗುಂಪುಲ್ನಿ ಸೂಸಿ ವಾಳು ಗೊರ್ರೋಡು ಲೇನಿನ ಗೊರ್ರುಲ ಅಟ್ಗ ಕೊರ್ಗಿ ಪಾಯ್ನಾರ್ಕದ ಅನಿ ವಾಳ್ ಮಿಂದ ಕನಿಕರ್ಮು ಪಡೆ . ³⁷ ಅಪ್ಡು ವಾಳ್ ಶಿಷ್ಯುಲ್ಕಿ - ಬೆಳೆ ಬಹಳ್ಮು , ಕೆಲ್ಸ್ಮೊಳು ಕೊಂಚ್ಮು, ³⁸ ದಾನ್ನಿಂಚ ಬೆಳೆ ಯಜ್ಮಾನುಡ್ನಿ - ನೀ ಬೆಳೆಕು ಕೆಲ್ಸ್ಮೊಲ್ನಿ ಅಂಪೀಯಾಲನಿ ಬೇಡ್ಕೊoಡ್ರಿ ಅನಿ ಸೊಪ್ಪೇ.