¹ ಮಲಿ ಯೇಸು ವಾಳ್ ಪನ್ನೆಂಡು ಮಂದಿ ಶಿಷ್ಯುಲ್ನಿ ಹತ್ರುಮ್ಕಿ ಪಿಲ್ಚಿ ದೈಮುಲ್ನಿ ಇಡ್ಬಿಚ್ಚೆಕು ಅನ್ನಿ ತರ್ಮು ರೋಗಲ್ನಿ ಅನ್ನಿ ತರ್ಮು ನಪ್ಪಿಲ್ನಿ ವಾಸಿ ಸೇಸೇಕು ವಾಳ್ಕಿ ಅಧಿಕಾರ್ಮು ಇಚ್ಚೆ ² ವಾಡು ಅಂಪಿಂಚಿನ ಅಪೋಸ್ತಲುಡನೆ ಪನ್ನೆಂಡು ಮಂದಿ ಪೇರುಲು ಯಾವ್ಯಾವಿ ಅಂಟೆ - ಮೊದ್ಲೋಡು ಪೆತ್ರುಡು ಅನ್ಬಿಚ್ಕೋನೆ ಸೀಮೊನುಡು , ವಾಡ್ ತೊಮ್ಬ್ದಾಯಿನ ಅಂದ್ರೆಯುಡು , ಜೆಬೆದಾಯುಡು ಕೊಡ್ಕಾಯ್ನ ಯಾಕೊಬುಡು , ವಾಡ್ ತೊಂಬ್ಡಾಯ್ನ ಯೋಹಾನುಡು , ಪಿಲಿಪ್ಪುಡು, ಬಾರ್ತೊಲೋಮಾಯುಡು, ³ ತೊಮುಡು , ಸುಂಕ್ಮು ಮತ್ತಾಯುಡು , ಅಲ್ಫಾಯುಡು ಕೊಡ್ಕಾಯ್ನ ಯಾಕೊಬುಡು , ಮತಾಭಿಮಾನುಡು ಅನೆ ಪೇರ್ಸಿಸ್ಕೊನಿನ ಸೀಮೊನುಡು ⁴ ಯೇಸುನಿ ಪಟ್ಟಿಚ್ಚಿನ ಇಸ್ಕರಿಯೂತ ಯೂದುಡು , ವೂಳೆ. ⁵ ಪನ್ನೆಂಡು ಮಂದಿಲ್ನಿ ಯೇಸು ಅಂಪಿಚ್ಚೆ . ಅಂಪಿಚ್ನಪ್ದು ವಾಳ್ಕಿ ಅಪ್ಪಣ್ಮುನಿ ಇಚ್ಚಿಂದೆಮಂಟೆ- ಅನ್ಯಜನ್ಮು ತೊಟ್ಕಿ ಪೋವದಂಡ್ರಿ , ಸಮಾರ್ಯುಮು ಊರ್ಲೇಕಿ ಕಾಲ್ ಪೆಟ್ಟೋದಂಡ್ರಿ , ⁶ ವೂಳ್ನಿ ಇಡ್ಸಿ ತಪ್ಪಿಚ್ಕೊನಿನ ಗೋರ್ರುಲ್ಲಾಕವುಂಡೆ ಇಸ್ರಾಯೇಲುಲು ಇಂಟ್ ತೊಟೋಳ್ ದೆಗ್ರುಕಿ ಪೊಂಡ್ರಿ. ⁷ ಪರ್ಲೋಕ್ಮು ರಾಜ್ಯುಮು ಸಮೀಪ್ಮಾಯೇ ಅನಿ ಸಾರಿ ಸೊಪ್ತಾ ಪೊಂಡ್ರಿ. ⁸ ರೋಗಿಲ್ನಿ ಸ್ವಸ್ತ್ಮು ಸೇಯಂಡ್ರಿ , ಸಚ್ನೋಲ್ನಿ ಬದ್ಕೀಯನ್ದ್ರಿ , ಕುಷ್ಟ್ಮು ಎಕ್ಕುಂಡೋಲ್ನಿ ಶುದ್ಧ್ಮು ಸೇಯಂಡ್ರಿ , ⁹ ದೈಮುಲ್ನಿ ಇಡ್ಬಿಯಂಡ್ರಿ , ಉಚಿತ್ಮಾಯಿ ಹೊಂದ್ನಾರು, ಉಚಿತ್ಮಾಯಿ ಇಯ್ಯoಡ್ರಿ . ¹⁰ ಮೀ ಹಮ್ಮಿಣಿಲ್ಲ ಚಿನ್ಮು ದುಡ್ಳುನಿ ದಾವ್ಕಿ ಹಸ್ಬಿನಿ ರೊಂಡು ಅಂಗಿ ಸೋಪ್ಪ್ಲು ಕಟ್ನಿ ಮೊದಲಾಯುಂಡೆವ್ನಿ ಸೌರಿಚ್ಕೊವದಂಡ್ರಿ. ಆಲುಡು ಅಂಬ್ಲಿಕಿ ಯೋಗ್ಯುಮಂತೆ. ¹¹ ಮೀರು ಯಾವ್ದೆ ಒಕ್ಟಿ ಊರ್ಕಿ ಲೇದು ಹಳ್ಳಿಕಿ ಸೇರ್ನಪ್ದು ಆನ ಯೋಗ್ಯುಲು ಯೋಳನಿ ವಿಚಾರಣ್ಮು ಸೇಸಿ ಮುಂದ್ರುಕಿ ಪಾಯೇ ಗಂಟ ವಾಳ್ಳಾನೆ ವುಂಡoಡ್ರಿ . ¹² ಆ ಇಂಟ್ನೋನ್ಕಿ ಪಾಯೇನಪ್ದು ಶುಭ್ಮಾವ್ನಿ ಅನಂಡ್ರಿ ¹³ ಆ ಇಂಟೋಳು ಯೋಗ್ಯುಲಾಯುಂಟೆ ಮೀ ಆಶಿರ್ವಾದ್ಮು ವಾಳ್ಕಿ ಆವ್ನಿ , ಆಯೋಗ್ಯುಲಾಯುಂಟೆ ಮೀ ಆಶಿರ್ವಾದ್ಮು ಮೀಕೆ ಎನ್ಕುಕಿ ರಾನಿ. ¹⁴ ಯೋಳಾರ ಮಿಮ್ಮುಲ್ನಿ ಸೇರ್ಪ್ಕೊಕುನ್ನನೂ ಮೀ ವಾಕ್ಯುಮುಲ್ನಿ ಇನ್ಕುನ್ನಾನು ಪಾತೆ ಮೀರು ಆ ಇಂಟ್ನಾವ್ನಿ ಆ ಊರ್ನಾವ್ನಿ ಇಡ್ಸಿ ಪಾಯೇನಪ್ದು ಮೀ ಕಾಲ್ಕಿ ಎಕ್ಕಿನ ದೂಳ್ನಿ ಝಾಡ್ಸಿಇಡಿಯಂದ್ರಿ . ¹⁵ ವಿಚಾರ್ಣ್ಮು ದಿನುಮ್ಲ ಅಟ್ಟೆ ಊರು ಗತಿ ಸೋದೊಮ್ ಗೊಮರುಮುಲ ಸೀಮೆಕಿಂತಾನು ಕಷ್ಟ್ಮು ಆಯುoಟಾದಿ ಅನಿ ಮೀಕು ಸತ್ಯುಮಾಯಿ ಸೊಪ್ತಾನು ¹⁶ ಸೂಡoಡ್ರಿ , ನಕ್ಕಲು ಜೊತ್ಲ ಗೊರ್ರನಿ ಅಂಪಿಚ್ನಟ್ಗ ನಾನು ಮಿಮ್ಮುಲ್ನಿ ಅಂಪಿಸ್ತಾನು . ದಾನ್ನಿಂಚ ಪಾಮ್ಲುಲಾಕ ಜಾಣ್ಲು ಪಾರಿವಾಳ್ಳಟ್ಗ ನಿಷ್ಕಪಟಿಲು ಆವಂಡ್ರಿ. ¹⁷ ಇದ್ಕಾಕುನ್ನ ಜನಲು ವಿಷಯುಮ್ಲ ಎಚ್ರುಗ ವುಂಡoಡ್ರಿ, ವಾಳು ಮಿಮ್ಮುಲ್ನಿ ನ್ಯಾಯ್ಮು ವಿಚಾರಣ್ಮು ಸಭೇಲ್ಕಿ ಎಲ್ಸ್ಕೋನಿ ಪಾತಾರು, ಮೀ ಸಭಾ ಮಂದಿರ್ಮ್ಲ ಮಿಮ್ಮುಲ್ನಿ ಕೊರಡೆಲಿಂಚ ಕೊಟ್ತಾರು. ¹⁸ ನಾ ನಿಮಿತ್ಮಾಯಿ ಮಿಮ್ಮುಲ್ನಿ ಅಧಿಪತಿಲು ಮುಂದ್ರುಕು ರಾಜುಲು ಮುಂದ್ರುಕು ಸಿಸ್ಕೋನಿ ಪಾತಾರು. ಇಟ್ಟೆ ವಾಳ್ಕು ಅನ್ಯಜನಲ್ಕು ಸಾಕ್ಷಿ ಆಯ್ತಾದಿ . ¹⁹ ಆಯ್ತೆ ವಾಳು ಮಿಮ್ಮುಲ್ನಿ ಒಪ್ಪಿಚ್ಚ್ನಪ್ದು ಎಟ್ಟ ಮಾಟ್ಲಾಡಲ , ಏಮಿ ಸೊಪ್ಪಾಲ ಅನಿ ಚಿಂತ ಸೇಯದಂಡ್ರಿ , ಸೊಪ್ಪೇ ಮಾಟ ಅ ಗಲ್ಗಿಕಿ ಮೀಕಿ ಸೂಚ್ನುಮು ಆಯ್ತಾದಿ. ²⁰ ಮೀರ್ಕಾದು , ಮೀ ತಂಡ್ರಿ ಆತ್ಮುಡೆ ಮೀ ಮುಖಾಂತ್ರುಮಾಯಿ ಮಾಟ್ಲಾಡ್ತಾಡು. ²¹ ಇದ್ಕಾಕುನ್ನ ಅನ್ನ ತೊಂಬುಡ್ನಿ , ತಂಡ್ರಿ ಕೊಡ್ಕ್ನಿ , ಸಾವ್ಕಿ ಒಪ್ಪಿಸ್ತಾರು , ಬಿಡ್ಳು ಕನ್ನೋಳ್ ಮಿಂದ ತಿರ್ಗಿ ಪಡಿ ವಾಳ್ನಿ ಸೊಂಪಿಸ್ತಾರು ²² ಮಲಿ ನಾ ಪೇರು ನಿಮಿತ್ಮು ಮಿಮ್ಮುಲ್ನಿ ಅಂದ್ರು ಪಗ ಸೇಸ್ತಾರು. ಆಯ್ತೆ ಕೊನೆಗಂಟ ತಾಳೋಳು ರಕ್ಷಣುಮ್ನಿ ಹೊಂದ್ಕೊಂಟಾರು . ²³ ಓಕ್ ಊರ್ಲ ಮಿಮ್ಮುಲ್ನಿ ಹಿಂಸ್ಮು ಪಡ್ಬಿಸ್ತೆ ಇಂಕೊಕ್ಟಿ ಊರ್ಕಿ ಪರ್ಪೂoಡ್ರಿ, ಮನುಷ್ಯ ಕುಮಾರುಡು ವಚ್ಚೆ ಪದ್ಗು ಮೀರು ಇಸ್ರಾಯೇಲ್ ಜನಲು ಊರ್ಲು ಸಂಚಾರ್ಮುನಿ ತೀರ್ಪೆಟ್ಲೆದು ಅನಿ ಮೀಕಿ ಸತ್ಯ್ಮಾಯಿ ಸೊಪ್ತಾನು . ²⁴ ಗುರುಕಿಂತ ಶಿಷ್ಯುಡು ಪೆದ್ದೊಡ್ ಕಾದು , ಧಣಿಕಿಂತ ಆಳು ಪೆದ್ದೊಡ್ ಕಾದು . ಗುರುಲಾಕ ಆಯೇದಿ ²⁵ ಶಿಷ್ಯುಡ್ಕಿ ಸಾಲು, ಧಣಿಲಾಕ ಆಯೇದಿ ಆಳ್ಕಿ ಸಾಲು. ವಾಳು ಇಂಟ್ ಯಜ್ಮಾನುಡ್ಕಿ ಬೆಲ್ಜೆಬೂಲ ಅನಿ ಪೇರ್ ಪೆಟ್ಮಿಂದ ವಾಡ್ ಇಂಟೋಲ್ನಿ ಏಮಂಟಾರು? ²⁶ ಆಯ್ತೆನು ವಾಳ್ಕಿ ಹೆದ್ರದಂಡ್ರಿ . ಮರಾಯುಂಡೆ ಯಾವ್ದೀ ವ್ಯಕ್ತ್ಮಾಕುನ್ನ ವುಂಡೆಟ್ಲೆ, ಆಕ್ಟರ್ಕಿ ರಾಲೆನಿನ ರಹಸ್ಯುಮು ಲೇದು. ²⁷ ನಾನು ಮೀಕು ಸೀಕ್ಟ್ಲಾ ಸೊಪ್ಪೆದ್ನಿ ಮೀರು ಎಲ್ಗುಲ ಸೊಪ್ಪಂಡ್ರಿ, ಮಲಿ ಶವ್ಲ ಇನಿಂದಾನ್ನಿ ಮಾಳುಗ್ಲು ಮಿಂದ ನಿಲ್ಪಡಿ ಸಾರಂಡ್ರಿ. ²⁸ ಇದ್ಕಾಕುನ್ನ ದೇಹುಮ್ನಿ ಸೊಂಪಿ ಆತ್ಮುನಿ ಸೊಂಪೆಕಾನೋಳ್ಕಿ ಹೆದ್ರೋದಂಡ್ರಿ , ಆತ್ಮುಮು ದೇಹ್ಮು ರೊಂಡ್ನಿನು ನರ್ಕುಮ್ಲ ಏಸಿ ನಾಶ್ಮುಸೇಸೋಡ್ಕಿ ಹೆದ್ರಂಡ್ರಿ. ²⁹ ದುಡ್ಡ್ಲಿಕಿ ರೊಂಡು ಗುವ್ವುಲ್ನಿ ಮಾರುಂಡೆದಿ ವುಂಡಾದಿ , ಆಯ್ತೆನು ಮೀ ತಂಡ್ರಿ ಚಿತ್ಮು ಲೇಕುನ್ನ ಒಕ್ಟಾವ್ನಿ ದುಗುಂಕಿ ಪಡೆಟ್ಲೆ. ³⁰ ಮೀ ತಲ್ಕೈ ಎನ್ಟುಕ್ಲು ಸಹ್ಮು ಅನ್ನಿ ಎಣಿಕ್ಮಾಯ್ನಾವಿ . ³¹ ಹೆದ್ರದಂಡ್ರಿ , ಜಾಸ್ತಿ ಗುವ್ವ್ಲ್ಕಿಂತ ಮೀರು ಹೆಚ್ನೋಳು . ³² ಅಟ್ತಾಯ್ತೆ ಯೊವ್ಡು ಮನುಷ್ಯುಲು ಮುಂದ್ರ ನಾನು ಯೇಸುವೊಡು ಅನಿ ಒಪ್ಕೊಂಟಾಡೋ , ನಾನು ಸಹ್ಮು ವಾಡ್ನಿ ನಾವೋಡು ಅನಿ ಪರ್ಲೋಕ್ಮುಲ ವುಂಡೆ ನಾ ತಂಡ್ರಿ ಮುಂದ್ರ ಒಪ್ಕೊಂಟಾನು . ³³ ಆಯ್ತೆ ಯೊವ್ಡು ಮನುಷ್ಯುಲು ಮುಂದ್ರ ನಾನು ಯೇಸುವೊಡು ಕಾದು ಅನಿ ಸೋಪ್ಕೊಂಟಾಡೋ ವ್ವಾಡ್ನಿ ನಾನುವೆ ಪರ್ಲೋಕ್ಮುಲ ವುಂಡೆ ನಾ ತಂಡ್ರಿ ಮುಂದ್ರ ನಾವೋಡ್ ಕಾದು ಅನಿ ಸೊಪ್ತಾನು. ³⁴ ಭೂಲೋಕ್ಮು ಮಿಂದ ಸಮಾಧಾನ್ಮು ಪುಟ್ಟಿಚ್ಚೆದಾನ್ಕು ವಚ್ನ ಅನಿ ನೆನಿಯದಂಡ್ರಿ , ಸಮಾಧಾನುಮ್ನಿ ಪುಟ್ಟಿಚ್ಚೆದಾಂಕು ನಾನು ರಾಲೇದು , ಖಡ್ಗ್ಮುನಿ ಏಸೇಕು ವಸ್ತಿ. ³⁵ ಎಟ್ಟಂಟೆ ಕೊಡ್ಕುಕು ತಂಡ್ರಿಕಿ , ಬಿಡ್ಕು ತಲ್ಲಿಕು , ಕೊಡಾಲ್ಕಿ ಅತ್ಕು ಭೇಧ್ಮು ಪುಟ್ಟಿಚ್ಚೆಕಿ ವಚ್ನ. ³⁶ ಇಟ್ಟೆ ಒಕ್ಡು ಮನುಷ್ಯುಡ್ಕಿ ವಾಡ್ ಇಂಟೋಳೆ ವೈರಿಲಾಯ್ತಾರು . ³⁷ ತಂಡ್ರಿ ಮಿಂದಾವ್ನಿ ತಲ್ಲಿಮಿಂದಾವ್ನಿ ನಾ ಮಿಂದ ಪೆಟ್ಟೆದಾನ್ಕಿಂತ ಹೆಚ್ಮಾಯ್ನ ಮಮತೆನಿ ಪೆಟ್ಟೋಡು ನಾಕಿ ಯೋಗ್ಯುಡು ಕಾದು , ಕೊಡುಕ್ಮಿಂದಾವ್ನಿ ಬಿಡ್ಮಿನ್ದಾವ್ನಿ ನಾ ಮಿಂದ ಪೆಟ್ಟೆದಾನ್ಕಿಂತ ಹೆಚ್ಮಾಯಿನ ಮಮತೆನಿ ಪೆಟ್ಟೋಡು ನಾಕಿ ಯೋಗ್ಯುಡು ಕಾದು . ³⁸ ಮಲಿ ಯೋವ್ಡಾರ ನಾ ಶಿಲುಬ್ನಿ ಸಿಸ್ಕೋನಿ ನಾ ಎನ್ಕ ವಚ್ಚೆದಿ ಹೊರ್ತು ನಾಕಿ ಯೋಗ್ಯುಡು ಕಾದು . ³⁹ ವಾಡ್ ಪ್ರಾಣುಮ್ನಿ ಕನ್ಕೊನ್ನೋಡು ದಾನ್ನಿ ಕಲ್ಸ್ಕೊಂಟಾಡು, ನಾ ನಿಮಿತ್ಮಾಯಿ ವಾಡ್ ಪ್ರಾಣುಮ್ನಿ ಕಲ್ಸ್ಕೊನೋಡು ದಾನ್ನಿ ಕನ್ಕೊಂಟಾಡು. ⁴⁰ ಮಿಮ್ಮುಲ್ನಿ ಸೇರ್ಪ್ಕೊನೋಡು ನನ್ನೀ ಸೇರ್ಪ್ಕೊನೋಡಾಯ್ನಾಡು ,ನನ್ನೀ ಸೇರ್ಪ್ಕೊನೋಡು ನನ್ನೀ ಅಂಪಿಚ್ನೋಡಿನಿನೆ ಸೇರ್ಪ್ಕೊನೋಡಾಯ್ನಾಡು. ⁴¹ ಪ್ರವಾದಿನಿ ಪ್ರವಾದಿ ಅನಿ ಸೇರ್ಪ್ಕೊನೋಡು , ಪ್ರವಾದಿಕಿ ವಚ್ಚೆತಕ್ ಪ್ರತಿಪಲ್ಮುನಿ ಹೊಂದ್ತಾಡು, ನೀತಿವಂತುಡ್ನಿ ನೀತಿವಂತುಡನಿ ಸೇರ್ಪ್ಕೊನೋಡು ನೀತಿವಂತುಡ್ಕಿ ವಚ್ಚೆ ತಕ್ಮು ಪ್ರತಿಪಲ್ಮುನಿ ಹೊಂದ್ತಾಡು . ⁴² ಮಲಿ ಈ ಸನ್ನೋಳ್ಳ ಒಕ್ಡುಕಿ ಯೇಸು ಶಿಷ್ಯುಡನಿ ಯೋವ್ಡಾರ ಓಕ್ ತಂಬ್ಗ್ಲ ಸನ್ನೂಳಾವ್ನಿ ತಾಗೇಕಿ ಇಸ್ಟೇ ವಚ್ಚೆತಕ್ಮು ಪ್ರತಿಪಲ್ಮು ವಾಡ್ಕಿ ತಪ್ಪೇಕೆಲೇದು ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು.