¹ ಸೂಡ್ನಿ ಅನಿ ಮೀ ದರ್ಮುಮು ಕಾರ್ಯಲ್ನಿ ವಾಳ್ ಮುಂದ್ರ ಸೇಯ್ಗೂಡ್ದು , ಸೂಡoಡ್ರಿ, ಅಟ್ಟೆ ಸೇಸ್ತೆ ಪರಲೋಕ್ಮುಲ ವುಂಡೆ ಮೀ ತಂಡ್ರಿ ಹತ್ರುಮು ಮೀಕಿ ಪಲ್ಮು ದೊರ್ಸೆಟ್ಲೆ . ² ನುವ್ವ ದರ್ಮುಮು ಇಚ್ಚೆನಪ್ದು ನೀ ಮುಂದ್ರ ಕೊಂಬೂದಿಯೋದ್ದು , ಜನಲಿಂಚ ಹೋಗ್ಳುಬಿಚ್ಚ್ಕೊವಾಲನಿ ಕಪಟಿಲೂ ಸಭಾ ಮಂದಿರ್ಮುಲಾನು ಬೀದ್ಲಾನು ಅಟ್ಟ ಸೇಸ್ತಾರು . ವಾಳುಕಿ ರಾಯ್ಬೇಕಾಯುಂಡೆ ತಕ್ಪಲುಮ್ನಿ ಹೊದ್ಕೊನಾಯೇ ಅನಿ ಮೀಕಿ ಸತ್ಯ್ಮು ಸೊಪ್ಪ್ತಾನು . ³ ನುವ್ವಾಯ್ತೆ ದರ್ಮುಮು ಇಚ್ಚೆನಪ್ದು ನುವ್ವ ದರ್ಮುಮು ಇಚ್ಚಿಂದಿ ಅಂತರಂಗ್ಮು ಆಯೆ ಅಟ್ಗ ನೀ ಕುಡ್ಮು ಸೈ ಸೇಸಿಂದಿ ಎಡ್ಮು ಸೇತ್ಮುಕು ಗೊತ್ತಾಕುನಟ್ಗ ವುಣ್ನಿ . ⁴ ಅಂತರಂಗುಮ್ಲ ನಡ್ಸೇದ್ನಿ ಸೂಸೆ ಮೀ ತಂಡ್ರಿ ನೀಕಿ ಪಲ್ಮಿಸ್ತಾಡು. ⁵ ಮಲ್ಲಿ ಪ್ರಾತ್ನುಮು ಸೇಸೆನಪ್ದು ಕಪಟಿಲ್ಲಾಕ ಸೇಯದಂಡ್ರಿ ಜನಲು ಸೂಡಾಲನಿ ವಾಳು ಸಭಾ ಮಂದಿರ್ಮ್ಲನು ಬೀದಿಚೌಕುಮ್ಲಾನು ನಿಲ್ಪಡ್ಕೋನಿ ಪ್ರಾರ್ತ್ನುಮು ಸೇಸೇಕಿ ಇಸ್ಟಂ ಪಡ್ತಾರು . ವಾಳು ವಾಳ್ಕಿ ವಚ್ಚೆ ತಕ್ಮು ಪಲುಮ್ನಿ ಹೊಂದ್ಕೊನಾಯೇ ಅನಿ ಮೀಕು ನಿಜ್ಮು ಸೊಪ್ತಾನು . ⁶ ಆಯ್ತೆ ನುವ್ವ ಪ್ರಾರ್ತ್ನುಮು ಸೇಯ್ಬೇಕಾಯ್ತೆ ನೀ ಎಕಾಂತ್ಮುಮಾಯಿನ ಕೋನ್ಳೇಕಿ ಪಾಯಿ ವಾಕ್ಲೆಸ್ಕೊನಿ ಅಂತರಂಗುಮ್ಲ ವುಂಡೆ ನೀ ತಂಡ್ರಿಕಿ ಪ್ರಾರ್ತ್ನುಮು ಸೇಯ್ಯಿ , ಅಂತರಂಗ್ಮುಲ ನಡ್ಸೇದ್ನಿ ಸೂಸೆ ನೀ ತಂಡ್ರಿ ನೀಕಿ ಪಲ್ಮು ಇಸ್ತಾಡು . ⁷ ಆಯ್ತೆ ಪ್ರಾರ್ತ್ನುಮು ಸೇಸೆನಪ್ದು ಅಜ್ನಾನಿಲುಲಾಕ ಸೊಪ್ಪಿನ್ದ್ನೆ ಉರುರ್ಕೆ ಸೊಪ್ಪೋದ್ದು,ವಾಳು ಜಾಸ್ತಿ ಮಾಟ್ಲುನಿ ಆಡ್ತೆ ಮೀ ಪ್ರಾರ್ತ್ನುಮ್ನಿ ದೇವುಡು ಇಂಟಾಡನಿ ನೆನ್ಸ್ಕೊಂಟಾರು. ⁸ ದಾನ್ನಿಂಚ ಮೀರು ವಾಳ್ ಲಾಕ ಆವ್ವದಂಡ್ರಿ. ಮೀರು ಮೀ ತಂಡ್ರಿನಿ ಬೇಡ್ಕೊನೆಕಿಂತ ಮುಂದ್ರನೆಮೀಕು ಎಮೇಮಿ ಅಗತ್ಯುಮನಿ ಯೇಸುಕಿ ತಿಲ್ಸಿಂದಿ. ⁹ ದಾನ್ನಿಂಚ ಮೀರು ಇಟ್ಟೆ ಪ್ರಾರ್ತ್ನುಮು ಸೇಯ್ಬೇಕಾಯುನ್ದೆದಿ ¹⁰ ವುಂಡೆ ಮಾ ತಂಡ್ರಿಡ, ನೀ ನಾಮುಮು ಪರಿಶುದ್ಮು ಅನಿ ಎಣಿಸಲ್ಪಡ್ನಿ. ಮೀ ರಾಜ್ಯುಮು ರಾನಿ. ನೀ ಚಿತ್ಮು ಪರಲೋಕ್ಮುಲ ನೆರ್ವೇರ್ಸೆನಟ್ಗ ಭೂಲೋಕ್ಮುಲಾನು ನೆರ್ವೆರ್ನಿ. ¹¹ ಮಾ ಅನುದಿನ್ಮು ಅಹಾರ್ಮುನಿ ಈ ಬೊದ್ದು ದಯಪಾಲಿಯಿ ¹² ಮಾಕಿ ತಪ್ ಸೇಸೋಳ್ನಿ ಮಾಮು ಕ್ಷಮಿನ್ಚ್ನಟ್ಗ ಮಾ ತಪ್ಪುಲ್ನಿ ಕ್ಷಮಿಂಚು . ¹³ ಶೋದನ್ಮ್ನೊನ್ಕಿ ಸೇರ್ಬಿಯ್ಕುನ್ನ ಕೇಡಿಂಚ ನನ್ನೀ ತಪ್ಪಿಯ್ಯಿ . ¹⁴ ಮೀರು ಜನಲು ತಪ್ಪುಲ್ನಿ ಕ್ಷಮಿಸ್ತೆ ಪರಲೋಕ್ಮುಲ ವುಂಡೆ ಮೀ ತಂಡ್ರಿ ಮೀ ತಪ್ಪುಲ್ನಿ ಕ್ಷಮಿಸ್ತಾಡು. ¹⁵ ಆಯ್ತೆ ಮೀರು ಜನಲು ತಪ್ಪ್ನಿ ಕ್ಷಮಿಚ್ಪಾತೆ ಮೀ ತಂಡ್ರಿನು ಮೀ ತಪ್ಪುಲ್ನಿ ಕ್ಷಮಿಚ್ಚೆಟ್ಲೆದು . ¹⁶ ಇದ್ಕಾಕುನ್ನ ಮೀರು ಉಪ್ವಾಸ್ಮು ಸೇಸೇನಪ್ದು ಕಪಟಿಲ್ಲಾಕ ಮಕ್ಮುನಿ ಸಪ್ಗ ಸೇಸ್ಕೊವದಂಡ್ರಿ. ವಾಳು ತಾನು ಉಪ್ವಾಸಿಲನಿ ಸೂಬಿಚ್ಚೆದಾನ್ಕಿ ವಾಳ್ ಮಕ್ಮುನಿ ವಿಕಾರ್ಮು ಸೇಸ್ಕೊಂಟಾರು . ವಾಳು ವಾಳ್ಕಿ ವಚ್ಚೆ ತಕ್ಮು ಪಲುಮ್ನಿ ಹೊನ್ದ್ಕೊನಾಯೆಅನಿ ಮೀಕಿ ನಿಜ್ಮಾಯಿ ಸೊಪ್ತಾನು . ¹⁷ ಆಯ್ತೆ ನುವ್ವ ಉಪ್ವಾಸ್ಮು ಸೇಸೆನಪ್ದು ತಲ್ಕಾಯ್ಕಿ ಅಂದ್ಮು ಏಸ್ಕೋನಿ ಮಕುಮ್ನಿ ಕಡ್ಕೋ. ¹⁸ ಇಟ್ಟ ಸೇಸ್ತೆ ನುವ್ವ ಉಪ್ವಾಸ್ಮುದಿ ಅನಿ ಜನಲ್ಕಿ ಕಾನ್ಕುನ್ನಾಪಾಯಿನು ಅಂತರಂಗ್ಮುಲ ವುಂಡೆ ನೀ ತಂಡ್ರಿಕಿ ನುವ್ವ ಉಪ್ವಾಸ್ಮುದಿ ಅನಿ ಕನ್ಬಿಚ್ಚ್ಕೊಂಟಾವು. ಅಂತರಂಗ್ಮುಲ ನಡ್ಸೇದ್ನಿ ಸೂಸೆ ನೀ ತಂಡ್ರಿ ನೀಕಿ ಪಲಂ ಇಸ್ತಾಡು. ¹⁹ ಭೂಲೋಕುಮ್ಲ ಗಂಟ್ಸೆಸ್ಕೊನಿ ಪೆಟ್ಕೊನದಂಡ್ರಿ , ಈನ ಅಂತು ಅದಿ ನುಸಿಪಟ್ಟಿ ಕಿಲ್ಬು ಎಕ್ಕಿ ಶೆಡಿ ಪಾತದಿ, ಈನ ದೊಂಗ್ಲು ಕನ್ನ ಕೊರ್ಸಿ ದೊಂಗ್ಲಿಸ್ತಾರು . ²⁰ ಆಯ್ತೆ ಪರಲೋಕುಮ್ಲ ಗಂಟು ಸೇಸ್ಕೊನಿ ಪೆಟ್ಕೊಂಡ್ರಿ.ಆನ ಆದಿ ನುಸಿ ಪಟ್ಟಿ ಕಿಲ್ಬ್ಮು ಎಕ್ಕಿ ಶೆಡ್ಪಾಯೇಟ್ಲೆದು, ಆನ ದೊಂಗ್ಲು ಕನ್ನ್ಮು ಕೊರ್ಸೆಟ್ಲೆ , ದೊಂಗಿಚ್ಚೆಕು ²¹ ಲೇದು ಗಂಟು ಉಂಡಿತ್ತಾವೆ ನೀ ಮನ್ಸು ಉಂಟಾದಂತೆ. ²² ಕನ್ನು ದೇಹುಮ್ಕಿ ದೀಪ್ಮಾಯಿಂದಿ , ಇಟ್ಟುoಡೆದಾನ್ಕು ನೀ ಕನ್ನು ನೆಟ್ಗುoಟೆ ನೀ ದೇಹ್ಮಂತ ಎಲ್ಗಾಯುಂಟಾದಿ. ²³ ಕನ್ನು ಶೆಡ್ದೆದಾಯುoಟೆ ನೀ ದೇಹ್ಮಂತ ಸೀಕ್ಟಾಯುಂಟಾದಿ . ಅಟ್ತಾಯ್ತೆ ನೀನೋನ್ಲ ವುಂಡೆ ಎಲ್ಗೆ ಸೀಕ್ಟಾಯ್ತೆ ಆ ಸೀಕ್ಟಿ ಎಂತನಚ್ಚು . ²⁴ ಇದ್ರೂ ಯಜ್ಮಾನ್ಲುಕಿ ಸೇವ್ಮುನಿ ಸೇಸೆಟ್ಲೆದು . ವಾಡು ಒಕ್ಡುನಿ ದ್ವೇಸಿಂಚಿ ಇನ್ಕೊಕುಡ್ನಿ ಪ್ರಿತಿಸ್ತಾಡು , ಲೇದು ಒಕುಡ್ನಿ ಹೊಂದ್ಕೊನಿ ಇನ್ಕೊಕುಡ್ನಿ ತಾತ್ಸ್ತಾರ್ಮು ಸೇಸ್ತಾಡು . ಮೀರು ದೇವುಡಿನ ಧನುಮ್ನಿ ಸೇವಿಚ್ಚೆಟ್ಲೆದು. ²⁵ ಈ ಕಾರ್ಣುಮಿಂಚ ಮಾ ಜೂಡುಕಾಯಿ ಏಮಿ ಊಟ್ಮು ಸೇಯಾಲ , ಏಮಿ ತಾಗಾಲ, ಮಾ ದೇಹ್ಮು ರಕ್ಷಣುಮ್ಕಿ ಏಮಿ ಏಸ್ಕೊವಾಲ ಅನಿ ಚಿಂತ್ಮು ಸೇಯದಂಡ್ರಿ ಅನಿ ಮೀಕಿ ಸೊಪ್ತಾನು . ಊಟ್ಮಿಕಿಂತ ಪ್ರಾಣ್ಮು ಬಟ್ಲುಕಿಂತ ದೇಹ್ಮು ಪೈನಾಯಿಂದಿಕದ . ²⁶ ಕಾಶ್ಮಿಂದ ಪಾರಾಡೆ ಗುವ್ವುಲ್ನಿ ಸೂಡoಡ್ರಿ, ಅವೀ ಬಿತ್ತೆಟ್ಲೆ ಕೊಸೇಟ್ಲೆ ಕಣ್ಜುಮ್ಲ ನಿಂಪಿ ಪೆಟ್ಕೊನೆಟ್ಲೆ ಅದಾವ್ನಿ ಪರಲೋಕ್ಮುಲ ವುಂಡೆ ಮೀ ತಂಡ್ರಿ ಅವುಲ್ನಿ ಸಾಕಿ ಸಲ್ವುತ್ತಾಡು, ಅವುಟ್ಲಿಕಿಂತ ಮೀರು ಹೆಚ್ಚ್ನೋಳುಕದ? ²⁷ ಚಿಂತ್ಮು ಸೇಸಿ ಸೇಸಿ ಓಕ್ ಮೊಳ್ಮು ಪೆರ್ಗೆದಿ ಮೀಲಾ ಯೋಳಿಂಚಾಯ್ತಾದಿ? ²⁸ ಇದ್ಕಾಕುನ್ನ ಮೀರು ಬಟ್ಳು ವಿಷಯುಮ್ಲ ಚಿಂತ್ಮು ಸೇಸೆದೆನ್ದ್ಗಿ ? ಅಡವಿಲ ಪೂವ್ಲು ಪೆರ್ಗೆ ರೀತ್ಮುನಿ ಯೋಚ್ನುಮು ಸೇಸಿ ತಿಲಿಯಂಡ್ರಿ, ಅವಿ ದುಡ್ಸೆಟ್ಲೆ , ನೂಲೆಟ್ಲೆ ²⁹ ಅದಾವ್ನಿ ಈ ಪೂವುಲ್ಲಾ ಒಕ್ಟ್ಕುವುಂಡೆಅಂತ ಅಲಾಂಕಾರಮು ಅರಸುಡೈನ ಸೊಲೋಮೊನುಡ್ಕಿನೂ ವಾಡು ವಾಡ್ ಸಕಲ್ಮು ವೈಭವ್ಮುವುನ್ನಪ್ಡುನು ವುಂಡ್ಲೆದನಿ ಮೀಕು ಸೊಪ್ತಾನು. ³⁰ ಎಲಾ, ಅಲ್ಪ್ಮು ವಿಶ್ವಾಸಿಲ , ಈ ಪೊದ್ದು ವುಂಡಿ ಪದ್ನುಕಿ ಪೈಗುಂತ ಪಾಲಾಯೇ ಅಡ್ವಿಲ ಕೊಸ್ವುಕಿ ದೇವುಡು ಇಟ್ಟ ಕಟ್ಟಿಸ್ತೆ ದಾನ್ಕಿಂತ ಎಂತೋ ಹೆಚ್ಮಾಯಿ ಮೀಕಿ ಕಟ್ಟಿಚ್ಚಿ ಇಸ್ತಾಡುಕದ. ³¹ ಇಟ್ಟುoಡೇ ದಾನ್ನಿಂಚ - ಏಮಿ ಊಟ್ಮು ಸೇಯಾಲ ಏಮಿ ತಾಗಾಲ ಏಮಿ ಏಸ್ಕೊವಾಲ ಅನಿ ಚಿಂತ್ಸೆಯದಂಡ್ರಿ. ³² ಇಟ್ಟುoಡೆದಾನ್ನಿಂಚ ಮೀರು ಮೊದ್ಲು ದೇವುಡು ರಾಜ್ಯುಮ್ಕಾಯಿ ನೀತಿಕಾಯಿ ತವಕ್ಮು ಪಡoಡ್ರಿ. ಇವಟ್ಲಿಂಚ ಅವನ್ನಿ ಮೀಕಿ ದೊರಕ್ತಾವಿ . ಪೆದ್ನು ವಿಷಯುಮ್ಲ ³³ ಚಿಂತ ಸೇಯದಂಡ್ರಿ ಪೆದ್ನು ದಿನ್ಮು ದಾನಿದ್ನಿ ದಾನ್ನೇ ಚಿಂತ ಸೇಸ್ಕೊಂಟಾದಿ. ಆ ಬೊದ್ದಿನ ಕಾಟ್ಮು ಆ ಬೊದ್ಗೆ ಸಾಲು ³⁴ ಇವನ್ನಿಟ್ಲಿಕಾಯಿ ಅಜ್ನಾನಿಳು ತವಕ್ಮು ಪಡ್ತಾರು . ಇದಂತ ಮೀಕಿ ಬೇಕಾಯಿಂದಿ ಅನಿ ಪರ್ಲೋಕ್ಮುಲ ವುಂಡೆ ಮೀ ತಂಡ್ರಿಕಿ ಗೊತ್ತುಂಡಾದಿ ಅಂತೆ.