¹ ಯೇಸು ಆ ಜನಾಲು ಗುಂಪುಲ್ನಿ ಕನಿ ಬೆಟ್ಟುಮ್ನಿ ಎಕ್ಕಿ ಕುಚ್ಕೋನ್ಮಿಂದ ಯೇಸುನ ಶಿಷ್ಯುಳು ಯೇಸುನ ಹತ್ತ್ರುಮ್ಕಿ ವಚ್ರಿ . ² ಯೇಸು ವಾಳ್ಕಿ ಉಪದೇಶ್ಮು ಸೇಸಿ ಸೋಪ್ಪಿಂದೆಮಂಟೆ ³ ಆತ್ಮುಲ ಬಡುವ್ಲಾಯಿಂಡೋಳು ದನ್ಯುಲು, ಪರಲೋಕ್ಮು ರಾಜ್ಯುಮು ವಾಳ್ದಿ. ⁴ ದುಖ್ಮು ಪಡ್ಸೋಳು ದನ್ಯುಲು, ವಾಳು ಸಮದಾನ್ಮು ಹೊಂದ್ತಾರು. . ⁵ ಶಾಂತುಲು ದನ್ಯುಲು, ವಾಳು ಭೂಮಿಕಿ ಬಾದ್ಯಲಾಯ್ತಾಲು. ⁶ ನೀತಿಕಿ ಆಕ್ಲಾಯಿ ಬಾಯರ್ನೋಳು ದನ್ಯುಲು, ವಾಳ್ಕಿ ತ್ರುಪ್ತಿಯಾಯ್ತಾದಿ. ⁷ ಕರುಣ್ಮುವುಂಡೋಳು ದನ್ಯುಲು ವಾಳು ಕರುಣ್ಮ್ ಹೊಂದ್ತಾಳು. ⁸ ನಿರ್ಮಲ್ಮು ಮನ್ಸೋಳು ದನ್ಯುಲು, ವಾಳು ದೇವುಡ್ನಿ ಸೂಸ್ತಾರು. ⁹ ಸಮದಾನ್ಮು ಪಡ್ಬಿಚ್ಚೋಳು ದನ್ಯುಲು, ವಾಳು ದೇವುಡು ಬಿಡ್ಡ್ಳನ್ಬಿಚ್ಚ್ಕೊಂಟಾರು. ¹⁰ ನೀತ್ಮುನ ನಿಮಿತ್ಮಾಯಿ ಹಿಂಸ್ಮುನಿ ತಡ್ಸ್ಕೊನೋಳು ದನ್ಯುಲು, ಪರಲೋಕ್ಮುರಾಜ್ಯುಮು ವಾಳ್ದಿ. ¹¹ ನಾ ನಿಮಿತ್ಮಾಯಿ ಜನಲು ಮಿಮ್ಮುಲ್ನಿ ನಿಂದಿಂಚಿ ಹಿಂಸ್ಮು ಪಡ್ಬಿಂಚಿ ಮೀ ಮಿಂದ ಶೆಡ್ ಶೆಡ್ ಮಾಟ್ಲ್ನಿ ಸುಳ್ಳಾಯಿ ಮೊಪ್ತೇ ಮೀರು ದನ್ಯುಲು. ¹² ಪಡಂಡ್ರಿ, ಉಲ್ಲಾಸ್ಮು ಪಡಂಡ್ರಿ , ಪರಲೋಕ್ಮು ರಾಜ್ಯುಮ್ಲ ಮೀಕಿ ಬಹಳ್ಮು ಪಲ್ಮು ಸಿಕ್ತಾದಿ, ಮೀಕಿಂತ ಮುಂದ್ರ ವುಂಡೆ ಪ್ರವಾದುಲ್ನಿ ಇಟ್ಟೆ ಹಿಂಸ್ಮುಪಡ್ಬಿಚ್ಚುಂಡ್ರೆ. ¹³ ಭೂಮಿಕಿ ಉಪ್ಪಾಯ್ನಾರು ಉಪ್ಪು ಸಪ್ಗಾಯ್ತೆ ದಾನ್ಕಿ ಇನ್ಕ್ಯಾವ್ದಾನಿಂಚ ಉಪ್ಪ್ಮು ರುಚಿ ವಸ್ತಾದಿ? ಜನುಲು ದಾನ್ನಿ ಆಕ್ಟರಿಕಿ ಏಸಿ ತೊಕ್ಕೆಕಿ ಆದಿ ಯೋಗ್ಯುಮು ವರ್ತು ಇಂಕ್ಯಾವ್ ಕೆಲ್ಸುಮ್ಕಿವಚ್ಚೆಟ್ಲೇ. ¹⁴ ಮೀರು ಲೋಕಂಕಿ ಎಲ್ಗಾಯ್ನಾರು. ಗುಡ್ದಮ್ಮಿಂದ ಕಟ್ಟುಂಡೆ ಊರು ಮರೆಯಾಯುನ್ದೆಟ್ಲೆ. ¹⁵ ಮಲ್ಲಿ ದೀಪ್ಮುನಿ ಅಂಟಿಚ್ಚಿ ಕೊಳಗ್ಮುನೋನ ಪೆಟ್ಟೆಟ್ಲೇ, ದೀಪ್ಮು ಸ್ತಂಬ್ಮು ಮಿಂದ ಪೆಡ್ತಾರಂತೆ. ¹⁶ ಅಪ್ಡು ಆದಿ ಇಂಟ್ಲವುಂಡೋಳ್ ಅಂದ್ರುಕಿಎಲ್ಗಿಸ್ತಾದಿ. ದಾನ್ಲಕ್ನೆ ಮೀ ಎಲ್ಗು ಜನಾಲು ಮುಂದ್ರ ಪ್ರಕಾಶ್ಮಿಯ್ನಿ. ಇಟ್ತಾಯ್ತೆ ವಾಳ್ ಮೀ ಮಂಚಿ ಕ್ರಿಯೇಲ್ನಿ ಸೂಸಿ ಪರಲೋಕ್ಮುಲ ವುಂಡೆ ಮೀ ತಂಡ್ರಿನಿ ಕೊಂಡಾಡ್ತಾರು. ¹⁷ ಮೋಶುಡಿನ ದರ್ಮಶಾಸ್ತ್ರುಮಾವ್ನಿ ಪ್ರವಾದಿಲು ವಚನಲ್ನಾಯಿನಿ ಸೀಸೇಸೆಕಿ ನಾನು ವಸ್ತಿ ಅನಿ ನೆನಿಯದಂಡ್ರಿ. ಸೀಸೇಸೆಕಿ ರಾಲೆ, ನೆರ್ವೆರ್ಸೇಕಿ ವಚ್ನ. ¹⁸ ಮೀಕಿ ಸತ್ಯುಮಾಯಿ ಸೊಪ್ತ - ಆಕಾಶ್ಮು ಭೂಮಿನು ಅಲ್ಸಿ ಪಾಯೇ ಗಂಟ ದರ್ಮಶಾಸ್ತ್ರುಮು ನೆರೆವೇರ್ತದಿ ಹೊರ್ತು ದಾನ್ನೋನಿಂಚ ಒಕ್ಕ್ ಸೊನ್ನಾಯಯ್ನಿ ಓಕ್ ಗುಡ್ಸಾವ್ನಿ ಅಲ್ಸಿಪಾಯೇಟ್ಲೆ. ¹⁹ ದಾನ್ನಿಂಚ ಈ ಸನ್ಮು ಸನ್ಮು ಆಜ್ನೆಲ್ನಿಯಾವ್ನಿ ಒಕ್ಟ್ನಿ ಮೀರ್ಸಿ ಜನಾಲ್ಕು ಅಟ್ಟೆ ಮೀರ್ಸೇಕಿ ಭೋದಿಚ್ಚೋಡು ಪರ್ಲೋಕ್ಮು ರಾಜ್ಯುಮ್ಲ ಬಹಳ್ಮು ಸನ್ನೋಡ್ ಅನ್ಬಿಚ್ಕೊಂಟಾಡು, ಆಯ್ತೆ ವಾಡೆ ಆ ಆಜ್ನುಲ್ಲಾಕ ನಡ್ಸ್ಕೋನಿ ಜನಲ್ಕು ಅಟ್ಟೆ ನಡ್ಯಾಲ ಅನಿ ಭೋದಿಚ್ಚೋಡು ಪರಲೋಕ್ಮು ರಾಜ್ಯುಮ್ಲ ಪೆದ್ದೊಡ್ ಅನ್ನ್ಬಿಚ್ಕೊಂಟಾಡು. ²⁰ ಮೀ ನೀತ್ಮು ಶಾಸ್ತ್ರಿಲ ಮಲ್ಲಿ ಪರಿಸಾಯರುಲ ನೀತ್ಮ್ಕಿಂತಾನು ಜಾಸ್ತಿದಿಆಯ್ಕುನ್ನಪಾತೆ ಮೀರು ಪರಲೋಕ್ಮು ರಾಜ್ಯುಮ್ಕಿ ಸೇರೆಟ್ಲೆ ಅನಿ ಮೀಕು ಸೊಪ್ತಾನು. ²¹ ನರಹತ್ಯುಮು ಸೇಯ್ಗೂಡ್ದು, ನರಹತ್ಯುಮು ಸೇಸೋಡು ನ್ಯಾಯ್ಮು ವಿಚಾರಣ್ಮ್ಕಿ ಗುರಿಯಾಯ್ತಾಡನಿ ಹಿರಕ್ಲುಕಿ ಸೊಪ್ಪಿಂದಿ ಅನಿ ಇನ್ನಾರಂತೆ. ²² ಆಯ್ತೆ ನಾನು ಮೀಕು ಸೊಪ್ಪೇದೆಮಂಟೆ - ಮೀ ಸಹೋದುರುಡು ಮಿಂದ ಕೋಪ್ಮುಸೇಸ್ಕೋನೆ ಪ್ರತಿಯೋಕ್ಡು ಮನುಷ್ಯುಡು ನ್ಯಾಯ್ಮುವಿಚಾರ್ಮ್ಕಿ ಗುರಿಯಾಯ್ತಾಡು, ವಾಡ್ ಸಹೋದುರುಡ್ನಿ ಸೂಸಿ ಛೀ ನೀಚುಡ ಅನ್ನೋಡು ನ್ಯಾಯ್ಮುಸಭೆಲಿನ ವಿಚಾರನೋನ್ಕಿ ಪಡ್ತಾಡು. ಮೂರ್ಕುಡು ಅನ್ನೋಡು ಅಗ್ಗಿ ನರ್ಕ್ಮುಕಿ ಗುರಿಯಾಯ್ತಾಡು. ²³ ದಾನ್ಕಾರ್ನ್ಮುಕಿ ನುವ್ವ ನೀ ಕಾಣಿಕ್ಮುನಿ ಯಜ್ನವೇದುಮು ಹತ್ರುಮ್ಕಿ ಎತ್ಕೊಚ್ನಪ್ಪ್ದು ನೀ ಸಹೋದರುಡು ಮನ್ಸ್ಲ ನೀ ಮಿಂದ ಏಮೋ ವಿರೋದ್ಮು ವುಂಡಾದಿ ಅನೇದಿ ನೀ ನೆನಪ್ಕಿ ವಸ್ತೆ, ²⁴ ನೀ ಕಾಣಿಕ್ಮುನಿ ಆ ಯಜ್ಞ್ಮುವೇದಿಮು ಮುಂದ್ರ ಇಡ್ಸ್ಪಾಯಿ ಮೊದ್ಲು ನೀ ಸಹೋದರುಡು ಸಂಗಡ್ಮು ಒಕ್ಟಾಯಿ ಆಮಿಂದ ವಚ್ಚಿ ನೀ ಕಾಣಿಕ್ಮುನಿ ಇಯ್ಯಿ. ²⁵ ನೀ ವಾದುಡು ಸಂಗಡ್ಮು ಇಂಕಾ ದಾವ್ಲವುನ್ನಪ್ದೆ ವಾಡ್ ಜೊತ್ಲೋ ಜಲ್ದಿ ಸಮದಾನ್ಮು ಸೇಸ್ಕೋ, ಲೇದಂಟೆ ಆ ವ್ಯಾದುಡು ನಿನ್ನಿ ನ್ಯಾಯದಿಪತಿಡ್ಕಿ ಒಪ್ಪಿಚೀನಿ, ನ್ಯಾಯಾದಿಪತಿಡು ನಿನ್ನಿ ಓಲೆಕಾರುಡು ಸೇತ್ಕಿ ಒಪ್ಪಿಂಚಿನಿ, ಅಪ್ಡು ನುವ್ವ ಸೇರೆಲ ಪಡ್ತಾವು. ²⁶ ನುವ್ವ ಓಕ್ ದುಡ್ಲುನಾವ್ನಿ ನಿಲ್ಬಿಚ್ಕೊಕುನ್ನ ಅಂತಾ ಸಲ್ಲ್ಬಿಚ್ಕೊನೆ ಗಂಟ ಆನಿಂಚ ವಚ್ಚೇಕೆ ಲೇದು ಅನಿ ನೀಕಿ ಸತ್ಯುಮಾಯಿ ಸೊಪ್ತಾನು ²⁷ ವ್ಯಭಿಚಾರ್ಮು ಸೇಯ್ಗೂಡ್ದು ಅನಿ ಸೊಪ್ಪಿಂದಿ ಅನಿ ಮೀರು ಇನ್ನಾರು ಅಂತೆ , ²⁸ ಆಯ್ತೆ ನಾನು ಮೀಕು ಸೊಪ್ಪೇದೆಮಂಟೆ- ಪರಾಡ್ದ್ನಿ ಸೂಸಿ ಮೊಯ್ಬಿಚ್ಚೆ ಪ್ರತೀ ಮನುಷ್ಯುಡು ಅಪ್ಡೆ ನೀ ಮನ್ಸ್ಲ ದಾನ್ ಜೊತ್ಲ ವ್ಯಭಿಚಾರ್ಮು ಸೇಸೋಡಾಯೆ. ²⁹ ಕುಡ್ಮು ಕನ್ನು ನಿನ್ನಿ ಪಾಪುಮ್ಕಿ ಸಿಕ್ಕೆಚ್ಚೆದಾಯ್ತೆ ದಾನ್ನಿ ಪೆರ್ಕಿ ಪಾಗೊಟ್ಟು, ನೀ ದೇಹ್ಮಂತ ನರ್ಕುಮ್ಲ ಪಡೆದಾನ್ಕಿಂತ ಅವಯಮ್ಲ ಒಕ್ಟಿ ಪಾಯೇದಿ ನೀಕಿ ಹಿತ್ಮುಕದ . ³⁰ ನೀ ಕುಡ್ಮು ಸೈಯಿ ನಿನ್ನಿ ಪಾಪ್ಮುಕಿ ಸಿಕ್ಕಿಚ್ಚೆದಾಯ್ತೆ ದಾನ್ನಿ ನರ್ಕಿ ಪಾರೆಯ್ಯಿ, ನೀ ದೇಹ್ಮಂತ ನರ್ಕುಮ್ಲ ಪಡೆದಾನ್ಕಿಂತ ಅವಯಮ್ಲ ಒಕ್ಟಿ ಪಾಯೇದಿ ನೀಕಿ ಹಿತ್ಮುಕದ. ³¹ ಇದ್ಕಾಕುನ್ನ ಪೆನ್ಡ್ಲಾಮ್ನಿ ಇಡ್ಸಿಡ್ಸೋಡು ದಾನ್ಕಿ ತ್ಯಾಗ್ಮು ಪತ್ರುಮ್ನಿ ಇಯಾಲನಿ ಸೊಪ್ಪಿಂದ್ದಂತೆ . ³² ಆಯ್ತೆ ನಾನು ಮೀಕಿ ಸೊಪ್ಪೆದೇಮಂಟೆ - ಹಾದ್ರುಮು ಕಾರ್ಣುಮುಕಾಕುಣ್ಣ ವಾಡ್ ಪೆನ್ಡ್ಲಾಮ್ನಿ ಇಡ್ಸಿಡ್ಸೋಡು ಆದಿ ವ್ಯಭಿಚಾರ್ಮು ಸೇಸೇಕಿ ಕಾರ್ಣ್ಮುಆಯ್ತಾಡು ಮಲ್ಲಿ ಮೊಗ್ದುನಿಡ್ಸುಂಡೆದ್ನಿ ಪೆನ್ಡ್ಲಿಸೇಸ್ಕೊನೋಡು ವ್ಯಭಿಚಾರ್ಮು ಸೇಸ್ಕೊನ್ನೋಡಾಯೇ. ³³ ಮಲ್ಲಿ ನುವ್ವ ಸುಳ್ಳಾಣಿನೆ ಪೆಟ್ಗುಡ್ದು, ನುವ್ವ ಪೆಟ್ಕೊನುಂಡೆ ಆಣುಲ್ನಿ ಕರ್ತುಡ್ಕಿ ಸಲ್ಲಿಯಾಲ ಅನಿ ಪೆದ್ದೊಳ್ಕಿ ಸೊಪ್ಪಿಂದಿ ಅನಿ ಇನ್ನಾರ್ ಅಂತೆ. ³⁴ ಆಯ್ತೆ ನಾನು ಮೀಕಿ ಸೊಪ್ಪೆದೇಮಂಟೆ ಆಣೆಲ್ನೆ ಪೆಟ್ಗೂಡುದು, ಆಕಾಶ್ಮಿಂದ ಆಣೆ ಪೆಟ್ಟದ್ದು , ಆದಿ ದೇವುಡು ಸಿಂಹಾಸ್ನುಮು . ³⁵ ಭೂಮಿಮಿಂದ ಆಣೆ ಪೆಟ್ಟೋದ್ದು ಅದಿ ದೇವುಡು ಪಾದಪೀಟ್ಮು . ಯೆರೂಸಲೆಮ್ಮಿಂದ ಆಣೆ ಪೆಟ್ಟೋದ್ದು ಆದಿ ಆ ಪೆದ್ದ ಅರಸ್ಮುಡ ಪಟ್ಟಣ್ಮಾಯಿಂದಿ. ³⁶ ನೀ ತಲ್ಕಾಯ್ಮಿಂದನೂ ಆಣೆ ಪೆಟ್ಕೊವದ್ದು , ನುವ್ವ ಒಕ್ಟಿ ಎನ್ಟುಕ್ಲುನ್ನಿನು ತೆಲ್ಲುಗ ಮಲ್ಲಿ ನಲ್ಲುಗನು ಸೇಸೆಕಾಯೇಲೇ. ³⁷ ಆಯ್ತೆ ನೀ ಮಾಟ ಹೌನಾಯಿಂಟೆ ಹೌನು ಕಾದು ಅಂಟೆ ಕಾದು ಅನಿ ವುನ್ದ್ಣಿ, ದೀನ್ಕಿಂತ ಜಾಸ್ತಿ ವಚ್ಚಿಂದಿ ಸೈತಾನುಡಿಂಚ ವಚ್ಚಿಂದಿ. ³⁸ ಕನ್ಕಿ ಪ್ರತಿಯಾಯಿ ಕನ್ನು ಪಂಡ್ಲಿಕಿ ಪ್ರತಿಯಾಯಿ ಪಂಡ್ಲುನಿ ಸೀಬಿಯಂಡ್ರಿ ಅನಿ ಸೊಪ್ಪಿಂದಿ ಅನಿ ಇನ್ನಾರಂತೆ. ³⁹ ಆಯ್ತೆ ನಾನು ಮೀಕು ಸೊಪ್ಪೆದೇಮಂಟೆ - ಕೆಡ್ಕುಡ್ನಿ ಎದ್ರುಬಿಯ್ಯೋದ್ದು . ಒಕ್ಡು ನೀ ಕುಡ್ಮ್ ಕೆನ್ನ್ಮಿಂದ ಕೊಟ್ತೆ ವಾಡ್ಕಿ ಇನ್ಕೊಕ್ಟಿ ಕೆನ್ನುನಿ ಇಯ್ಯಿ. ⁴⁰ ನೀ ಜೊತ್ಲ ವ್ಯಾಜುಮ್ನಿ ಆಡಿ ನೀ ನೋನಂಗಿನಿ ಸೀಸ್ಕೊವಲ ಅನೋಡ್ಕಿ ನೀ ಪೈನಂಗಿನಿ ಇಯ್ಯಿ. ⁴¹ ಒಕ್ಡು ಓಕ್ ಮೇಲ್ ದೂರ್ಮು ರಾ ಅನಿ ನಿನ್ನಿ ಪಟ್ಕೊಂಟೆ ವಾಡ್ ಜೊತ್ಲ ರೊಂಡ್ ಮೈಲಿಲು ಪೋ. ⁴² ನಿನ್ನಿ ಬೇಡೋಡ್ಕಿ ಇಯ್ಯಿ , ನೀಲಾ ಸಾಲ್ಮು ಇಚ್ಕೊವಾಲ ಅನಿ ವಚ್ಚ್ನೋಡ್ಕಿ ಮಕ್ಮು ತಿರ್ಗಿಚ್ಚ್ಕೊವದ್ದು . ⁴³ ನೀ ನೆರೆಯೋಡ್ನಿ ಪ್ರಿತಿಂಚಿ ನೀ ವೈರಿಲ್ನಿ ಹಗ್ಸೇಯಲ ಅನಿ ಇನ್ನಾರಂತೆ. ⁴⁴ ಆಯ್ತೆ ನಾನು ಮೀಕು ಸೊಪ್ಪೆದೇಮಂಟೆ- ಮೀ ವೈರಿಲ್ನಿ ಪ್ರಿತಿಯಂಡ್ರಿ , ಮಿಮ್ಮುಲ್ನಿ ಹಿಂಸ್ಮು ಪಡ್ಬಿಚ್ಚೋಲ್ಕಾಯಿ ದೇವುಡ್ನಿ ಪ್ರಾರ್ಥ್ಮು ಸೇಯನ್ದ್ರಿ . ⁴⁵ ಇಟ್ಟೆ ಸೇಸ್ತೆ , ಮೀರು ಪರಲೋಕ್ಮುಲ ವುಂಡೆ ಮೀ ತಂಡ್ರಿಕಿ ಬಿಡ್ಲಾಯ್ತಾರು . ಯೇಸು ಶೆಡ್ಡೋಳ್ ಮಿಂದಾನು ಮಂಚೋಳ್ ಮಿಂದಾನು ವಾಡ್ ಸೂರ್ಯುಡು ಮೂಡೆ ಅಟ್ಗ ಸೇಸ್ತಾಡು, ನೀತಿವಂತ್ಲು ಮಿಂದಾನು ಅನೀತಿವಂತ್ಲು ಮಿಂದಾನು ವಾನ್ ಕುರ್ಬಿಸ್ತಾಡು. ⁴⁶ ಮೀಕಿ ಪ್ರೀತೀನಿ ಸೂಬಿಚ್ಚೋಳ್ನೆ ಮೀರು ಪ್ರೀತಿಸ್ತೆ ಪಲ್ಮೇಮಿ? ಭ್ರಷ್ಟುಲು ಅಟ್ಟ ಸೇಸೇಟ್ಲೆದ . ⁴⁷ ಮೀ ಸಹೋದುರುಲ್ಕಿ ಮಾತ್ರುಮು ಮೀರು ಮರ್ಯಾದೆನಿ ಇಸ್ತೆ ಏಮಿ ಜಾಸ್ತಿ ಸೆಸ್ನಟ್ಗ ಆಯೆ ಅನ್ಯಜನುಲು ಅಟ್ಟೆ ಸೇಸೆಟ್ಲಾದ. ⁴⁸ ದಾನಿಂಚ ಪರಲೋಕ್ಮುಲ ವುಂಡೆ ಮೀ ತಂಡ್ರಿ ಯಾವ್ ದೊಷ್ಮು ಲೇನೋಳ್ ಆಯುಂಡೆ ದಾನಿಂಚ ಮೀರು ದೋಷ್ಮುಲೆನೋಳ್ಆಯುಂಡನ್ದ್ರಿ.