^{1 2 3} 1 ಮಲಿ ವಾಳ್ಕಿ - ಮೀಕಿ ನಿಜ್ಮಾಯಿ ಸೊಪ್ತಾನು , ಈನಾ ನಿಲ್ಪಡುಂಡೋಳ್ನೋನ ಕೆಲುವ್ಲು ದೇವುಡು ರಾಜ್ಯುಮು ಪ್ರಬಲ್ಮಾಯಿ ವಚ್ಚುಂಡೇದ್ನಿ ಸೂಸೆಗಂಟ ಸಚ್ಪಾಯೇಟ್ಲೆದು ಅನಿ ಸೊಪ್ಪೆ . 2 ಆರು ದಿನಾಲು ಆಯಿನ್ಮಿಂದ ಯೇಸು ಪೇತ್ರಡು ಯಾಕೋಬುಡು ಯೋಹಾನುಲ್ನಿ ಮಾತ್ರ ವಿಂಗಡ್ಮಾಯಿ ತೋಡ್ಕೋನಿ ಎತ್ರುಮಾಯಿನ ಬೆಟ್ಟಂಕಿ ಪಾಯೇ .ಆನ ವಾಳ್ ಕನ್ಳು ಮುಂದ್ರ ಯೇಸು ರೂಪ್ಮು ಬೇರೆಯಾಯೇ . 3 ವಾಡ್ ವಸ್ತ್ರಾಲ್ಲು ಬಹು ತೆಲ್ಲುಗ ಹೊಳುಸ್ತ ವುಂಡೆ , ಭೂಲೋಕ್ಮುಲ ವುಂಡೆ ಯಾವ್ ಅಗ್ಸುಡಾಯ್ತೆನು ಅಂತ ತೆಲ್ಗ ಸೇಸೆಕಾಯೇಟ್ಲೆ . ^{4 5 6} 4 ಇದ್ಕಾಕುನ್ನ ಎಲಿಯುಡು ಮೊಶೇಡು ವಾಳ್ಕಿ ಕನ್ಬಿಚ್ಕೋನಿ ಯೇಸು ಜೊತ್ಲ ಮಾಟ್ಲಾಡ್ತಾವುಂಡ್ರಿ . 5 ಅಪ್ಡು ಪೇತ್ರುಡು ಯೇಸುಕಿ - ಗುರುವಾ , ಮಾಮು ಇನ್ನೇ ವುಂಡೇದಿ ಮಂಚಿದಿ , ಮೂಡು ಪರ್ಣುಮು ಶಾಲೆಲ್ನಿ ಕಟ್ತಾಮು , ನೀಕೊಕ್ಟಿ ಮೋಶೆಕೊಕ್ಟಿ ಎಲಿಯುಡ್ಕಿ ಒಕ್ಟಿ ಅನಿ ಸೊಪ್ಪೆ . 6 ಏಮಿ ಸೊಪ್ಪಲ್ನೋ ತಿಲಿಕುಣ್ಣಾ ಇಟ್ಟ ಮಾಟ್ಳಾಡ್ರಿ . ವಾಳು ಬಹಳ್ಮಾಯಿ ಹೆದ್ರುಕೊನುಂಡ್ರಿ . ^{7 8} 7 ಅಂತ್ಪದ್ಗಿ ಮೋಡ್ಮು ವಚ್ಚಿ ವಾಳ್ಮಿಂದ ಕವಿಚ್ಚೆ . ಆ ಮೋಡ್ಮುನೋನಿಂಚ - ವೂಡು ಪ್ರಿಯುಡಾಯಿನ ನಾ ಕೊಡ್ಕು , ವೂಡ್ ಮಾಟ್ನಿ ಇನಂಡ್ರಿ ಅನಿ ಆಕಾಶ್ಮುವಾಣಿ ಆಯೇ . 8 ಪಕ್ಕನೆ ವಾಳು ಸುತ್ಲು ಸೂಸಿನಪ್ಡು ವಾಳ್ ಜೊತ್ಲ ಯೇಸುನೆ ಹೊರ್ತು ಅಪ್ಡಿಂಚ ಮಲ್ಯೋಳ್ನಿ ಕನ್ಲೇದು . ^{9 10} 9 ವಾಳು ಆ ಬೆಟ್ಮಿಂಚ ದಿಗಿ ವಸ್ತವುಂಡೆನಪ್ಡು ವಾಡು ವಾಳ್ಕಿ - ಮೀರು ಕನುಂಡೇದ್ನಿ ಮನುಷ್ಯಕುಮಾರುಡು ಸಚ್ಚಿ ಜೂಡಾಯಿ ಲೇಸಿ ವಚ್ಚೆಗಂಟ ಯೋಳ್ಕು ತಿಲ್ಬಿಯ್ಗುಡ್ದು ಅನಿ ಖಂಡಿತ್ಮಾಯಿ ಸೊಪ್ಪೆ . 10 ವಾಳು ಈ ಮಾಟ್ನಿ ಪಟ್ಟಿ ಸಚ್ಚಿ ಜೀವಿತ್ಮಾಯಿ ಲೇಸೇದಿ ಅಂಟೆ ಏಮಿ ಅನಿ ವಾಳ್ ವಾಳ್ನೋನ ಮಾಟ್ಳಾಡ್ಕೊನ್ರಿ . ^{11 12 13} 11 ಇದ್ಕಾಕುನ್ನ ವಾಳು - ಎಲಿಯುಡು ಮೊದ್ಲು ವಚ್ಚೇದಿ ಅಗತ್ಯುಮು ಅನೇದಾಯಿ ಶಾಸ್ತ್ರಿಲು ಸೊಪ್ತಾರೆ , ಇದಿ ಎಟ್ಟ ? ಅನಿ ಯೇಸುನಿ ಅಡ್ಗಿನ್ದಾಂಕಿ ವಾಡು - 12 ಎಲಿಯುಡು ಮೊದ್ಲು ವಚ್ಚಿ ಅಂತಾನು ತಿರ್ಗಿ ಸರಿಸೇಸೇದಿ ನಿಜ್ಮು . ಮನುಷ್ಯಕುಮಾರುಡು ವಿಷಯ್ಮಾಯಿ - ವಾಡು ಬಹು ಕಷ್ಟಲ್ನಿಅನುಭವಿಚ್ಚಿ ಹೀನೈಸಲ್ಪಡಾಲ ಅನೇದಾಯಿ ರಾಸಿಂದಿ , ಇದಿ ಎಟ್ಟ ? 13 ಆಯ್ತೆ ನಾನು ಮೀಕಿ ಸೊಪ್ಪೇದೆಮಂಟೆ - ಎಲಿಯುಡು ವಚ್ಚೆ , ಮಲಿ ವಾಡ್ ವಿಷಯ್ಮಾಯಿ ರಾಸುಂಡೆ ಪ್ರಕಾರ್ಮು ಜನಾಲು ತಮ್ ಮನ್ಸಿಕಿ ವಚ್ನಟ್ಗ ವಾಡ್ಕಿ ಸೇಸ್ರಿ ಅನೆ . ^{14 15 16} 14 ಆಮಿಂದ ವಾಳು ಉಳ್ಸಿನ ಶಿಷ್ಯುಲ ದೆಗ್ರುಕಿ ವಚ್ಚಿ ವಾಳ್ ಸುತ್ಲು ಜನಲು ಗುಂಪು ವುಂಡೆದಾನ್ನಿ ವಾಳ್ ಜೊತ್ಲ ಶಾಸ್ತ್ರಿಲು ತರ್ಕ ಸೇಸೆದಾನ್ನಿ ಕನ್ರಿ . 15 ಕೂಡ್ಲನೆ ಆ ಗುಂಪೋಳುಅಂದ್ರು ಯೇಸುನಿ ಕನಿ ಬಹು ಆಶ್ಚರ್ಯುಮು ಪಡಿ ವಾಡ್ ದೆಗ್ರುಕಿ ಪರ್ರೋಚ್ಚಿ ಯೇಸುಕಿ ವಂದಿಚ್ರಿ . 16 ಯೇಸು ಶಾಸ್ತ್ರಿಲ್ನಿ - ವೂಳ್ ಜೊತ್ಲ ಏಮಿ ತರ್ಕ ಸೇಸ್ತಾರು ? ಅನಿ ಅಡ್ಗಿನ್ದಾಂಕಿ ಆ ಗುಂಪ್ಲ ಒಕ್ಕುಡು - ^{17 18 19} 17 ಭೋಧಕುಡಾ , ನಾ ಕೊಡುಕ್ನಿ ನೀ ದೆಗ್ರುಕಿ ತೋಡ್ಕೋನಿ ವಸ್ತಿ , ವಾಡ್ಕೊಕ್ಟಿ ಮೂಗ್ ದೈಮು ಪಟ್ಟಿಂದಿ , 18 ಆದಿ ಯಾನ ವಾಡ್ ಮಿಂದ ವಸ್ತೆನು ವಾಡ್ನಿ ಪಡೆಸ್ತಾದಿ , ಅಪ್ಡು ವಾಡು ನೊರೆ ಪೋಸ್ತಾ ಕರಕರಗ ಪಂಡ್ಳು ಕೊರ್ಕುತ ಕುಂದಿ ಪಾತಾಡು . ದಾನ್ನಿ ಇಡ್ಬಿಯಾಲನಿ ನೀ ಶಿಷ್ಯುಲ್ಕಿ ಸೊಪ್ಕೊಂಟಿ , ವಾಳ್ ಸೇತ್ನ ಆವ್ಕುಣ್ಣ ಪಾಯೇ ಅನಿ ಉತ್ರುಮು ಇಚ್ಛೆ . 19 ಅಂದ್ಗೆವಾಡು - ಎಲಾ , ನಂಬಿಕ್ಮುಲೇನಿನ ಸಂತಾನ್ಮ , ನಾನು ಇಂಕೆಂತ ದಿನ್ಮು ಮೀ ಜೊತ್ಲ ವುಂಡುದ್ನು ? ಇಂಕೆಂತ ದಿನ್ಮು ಮಿಮ್ಮುಲ್ನಿ ಸಹಿಚ್ಕೊಂದ್ನು ? ವಾಡ್ನಿ ನಾ ದೆಗ್ರುಕಿ ಸೀಸ್ಕೋನಿ ರಾಂಡ್ರಿ , ಅನೇಕಿ ವಾಡ್ನಿ ಯೇಸು ದೆಗ್ರುಕಿ ಸೀಸ್ಕೋನಿ ವಚ್ರಿ . ^{20 21 22} 20 ಯೇಸುನಿ ಕನಿಂದ್ ತಕ್ಷಣ್ಮೆ ಆ ದೈಮು ವಾಡ್ನಿ ಬಹಳ್ಮಾಯಿ ಒದ್ದಾಡಿಚ್ಚೆಕಿ ವಾಡು ದುಗುಂಕಿ ಪಡಿ ನೊರ ಪೋಸ್ತಾ ಒದ್ದಾಡೆ . 21 ಯೇಸು ವಾಡ್ ತಂಡ್ರಿನಿ - ಇದಿ ವೂಡ್ಕಿ ವಚ್ಚಿ ಎನ್ನೀ ದಿನ್ಮಾಯೇ ಅನಿ ಅಡ್ಗ್ನಪ್ಡು ವಾಡು - ಸನ್ನಪ್ಡೇ ವಚ್ಚಿಂದಿ , 22 ಮಲಿ ವೂಡ್ನಿ ಸೊಂಪಾಲನಿ ಅಪ್ಡಪ್ಡೇ ಅಗ್ಲಾನು ನೂಳ್ಳಾನು ಪಡೇಸೆ , ನೀ ಸೇತ್ನ ಏಮಾರ ಆಯೆದಾಯ್ತೆ ಮಾ ಮಿಂದ ಕರುಣ್ಮು ಪೆಟ್ಟಿ ಮಾಕಿ ಸಹಾಯ್ಮು ಸೆಯ್ಯೀ ಅನೆ . ^{23 24 25} 23 ಯೇಸು ವಾಡ್ಕಿ - ನೀ ಸೇತ್ನ ಆಯೆದಾಯ್ತೆ ಅಂಟಾವಾ ? ನಂಬೋಡ್ಕಿ ಅಂತಾನು ಅಯ್ತಾದಿ ಅನಿ ಸೊಪ್ಪೆ . 24 ಕೂಡ್ಲನೆ ಆ ಸಿನೋಡು ತಂಡ್ರಿ - ನಂಬ್ತಾನು , ನಾಕಿ ನಂಬಿಕ್ಮು ತಕ್ವ ಆಯುಂಟೇನು ಸಹಾಯ್ಮು ಸೆಯ್ಯಿ ಅನಿ ಕೂಸಿ ಸೊಪ್ಪೆ . 25 ಅಪ್ಡು ಯೇಸು ಜನಲು ಗುಂಪು ಪರ್ರೋಚ್ಚೆದ್ನಿ ಕನಿ ಆ ದೈಮುನಿ ಗದ್ರಿಚ್ಚಿ - ಎಲಾ , ಶೌಟಿದಾಯಿನ ಮೂಗ್ ದೈಮಾ , ವೂಡ್ನಿ ಇಡ್ಸಿ ಪೋ , ಇಂಕ ಮುಂದ್ರ ಪಟ್ಕೊಗುಡ್ದು ಅನಿ ನಾನು ನೀಕಿ ಅಪ್ಪಣ್ಮು ಇಸ್ತಾನು ಅನೆ . ಅಪ್ಡು ಆದಿ ಅಬ್ಬರಿಚ್ಚಿ ವಾಡ್ನಿ ಒದ್ದಾಡಿಚ್ಚಿ ಇಡ್ಸಿ ಪಾಯೇ . ^{26 27} 26 ಆ ಸಿನೋಡು ಸಚ್ನಟ್ಗ ಪಡಿನ್ದಾನ್ನಿಂಚ ಬಹು ಜನಲು - ಸಚ್ಪಾಯೇ ಅನ್ರಿ . 27 ಆಯ್ತೆ ಯೇಸು ವಾಡ್ನಿ ಸೈಪಟ್ಟಿ ಲೇಪೇಕಿ ವಾಡು ಲೇಸಿ ನಿಲ್ಪಡೆ . ^{28 29} 28 ಯೇಸು ಇಂಟ್ಕಿ ವಚ್ನಪ್ಡು ಯೇಸು ಶಿಷ್ಯುಲು - ದಾನ್ನಿ ಇಡ್ಬಿಚ್ಚೆದಾನ್ಕಿ ಮಾಯಿಂಚ ಎಂದ್ಗೂ ಆವ್ಲೇದು ಅನಿ ಯೇಸುನಿ ಎಕಾಂತ್ಮುಲ ಅಡ್ಗೇಕಿ ಯೇಸು - 29 ಈ ಜಾತಿದಿ ದೇವುಡು ಪ್ರಾರ್ಥ್ನುಮು ಮಲಿ ಉಪವಾಸ್ಮುಯಿಂಚಾನೆ ಹೊರ್ತು ಬೇರೆ ಯಾವ್ದಿಂಚಾನು ಇಡ್ಸಿ ಪಾಯೇಟ್ಲೆದು ಅನಿ ವಾಳ್ಕಿ ಸೊಪ್ಪೆ . ^{30 31 32} 30 ಆನಿಂಚ ವಾಳು ಹೊರ್ಟಿ ಗಲಿಲಾಯ್ಮುನಿ ಪಾತವುಂಡ್ರಿ . ಇದಿ ಜನಲ್ಕಿ ಗೊತ್ತಾಗುಡ್ದು ಅನಿ ವಾಡ್ಕಿ ಮನ್ಸುಂಡೆ . 31 ಎಂದ್ಕಂಟೆ ವಾಡು ತನ್ ಶಿಷ್ಯುಲ್ಕಿ ಉಪದೇಶ್ಮು ಸೇಸ್ತಾ - ಮನುಷ್ಯು ಕುಮಾರುಡು ಜನಲು ಸೇತ್ಕಿ ಒಪ್ಪಿಚ್ಚಲ್ಪಡ್ತಾಡು , ವಾಳು ವಾಡ್ನಿ ಸೊಂಪ್ತಾರು , ಸೊಂಪಿನ ಮೂಡು ದಿನಾಲು ಮಿಂದ ಯೇಸು ಜೀವಿತ್ಮಾಯಿ ಲೇಸಿ ವಸ್ತಾಡನಿ ಸೊಪ್ಪೆ . 32 ವಾಳು ಆ ಮಾಟ್ನಿ ಗ್ರಹಿಚ್ಲೇದು , ಆಯ್ತೆ ವಾಡ್ನಿ ಅಡ್ಗೆದಾನ್ಕಿ ಅಂಜ್ರಿ . ^{33 34 35} 33 ಮಲಿ ವಾಳು ಕೆಪೆರ್ನೌಮಿಕಿ ವಚ್ರಿ . ಆನ ವಾಡು ಇನ್ಟ್ಲ ವುಂಡ್ನಪ್ಡು - ಮೀರು ದಾವ್ಲ ಏಮಿ ಮಾಟ್ಳಾಡ್ಕೊಂಟವುಂಟ್ರಿ ಅನಿ ಶಿಷ್ಯುಲ್ನಿ ಅಡ್ಗೇಕಿ ವಾಳು ಊರ್ಕುಂಡ್ರಿ , 34 ಎಂದ್ಕಂಟೆ ವಾಳು ದಾವ್ಲ ಒಕ್ಳುಕೊಕ್ಳು - ಮಾಲ ಯೋಡು ಹೆಕ್ವೋಡು ಅನಿ ವಾಗ್ವಾದ್ಮು ಸೇಸ್ಕೊನುಂಡ್ರಿ . 35 ಯೇಸು ಕುಚ್ಚೋನಿ ತನ್ ಪನ್ನೆಂಡು ಮಂದಿ ಶಿಷ್ಯುಲ್ನಿ ಪಿಲ್ಚಿ ವಾಳ್ಕಿ - ^{36 37} 36 ಯೋಡಾರ ಮೊದ್ಲೋಡಾವಾಲನುಂಟೆ ವಾಡು ಅಂದ್ರುಲ್ಲಾನು ಕೊನೆಯೋಡು ಅಂದ್ರು ಆಳು ಆಯುಂಡಾಲ ಅನಿ ಸೊಪ್ಪಿ ಓಕ್ ಸನ್ ಪಾಪ್ನಿ ಸೀಸ್ಕೋನಿ ವಾಳ್ ಮುಂದ್ರ ನಿಲ್ಬಿಚ್ಚಿ ಅಪ್ಕೋನಿ ವಾಳ್ಕಿ - 37 ಯೋಡಾರ ನಾ ಪೇರ್ಲಾ ಇಟ್ಟೆ ಸನ್ ಬಿಡ್ಳುಲ ಒಕ್ಟಿನಿ ಸೇರಿಚ್ಕೊಂಟೆ ನನ್ನೀ ಸೇರಿಚ್ಕೊನಟ್ಗಾಯೆ , ಮಲಿ ಯೋಡಾರ ನನ್ನೀ ಸೇರಿಚ್ಕೊಂಟೆ ನನ್ನಿಕಾದು ನನ್ನೀ ಅಂಪಿಚ್ಚಿನವಾಡ್ನೆ ಸೇರಿಚ್ಕೊನಟ್ಗಾಯೆ ಅನಿ ಸೊಪ್ಪೆ . ^{38 39} 38 ಯೋಹಾನುಡು ವಾಡ್ಕಿ - ಭೋಧಕುಡಾ , ಯೋಡೋ ಒಕ್ಡು ನೀ ಪೇರ್ನಿ ಸೊಪ್ಪಿ ದೈಮುನಿ ಇಡ್ಬಿಚ್ಚೇದ್ನಿ ಮಾಮು ಕನಿ ವಾಡು ಮಾಕಿ ಸೇರ್ನೋಡು ಆಯಿಂದಾನ್ನಿಂಚ ವಾಡ್ಕಿ ಅಡ್ಡಿ ಸೇಸ್ತ್ಮಿ ಅನಿ ಸೊಪ್ಪಿಂದಾಯಿ ಯೇಸು - 39 ವಾಡ್ಕಿ ಅಡ್ಡಿ ಸೇಯದಂಡ್ರಿ , ನಾ ಪೇರ್ ಮಿಂದ ಮಹತ್ನಿ ಸೇಸಿ ಏಕಾಏಕಿ ನನ್ನೀ ದೂಸಿಚ್ಚೋಡು ಒಕ್ಡೂ ಲೇದು . ^{40 41} 40 ಮಮ್ಮುಲ್ನಿ ಹೆದ್ರಿಯ್ಲೇನೋಡು ಮಾ ಪಕ್ಷ್ಮೋಡೇ . 41 ಮೀರು ಕ್ರಿಸ್ತುಡೋಳು ಅನಿ ಮೀಕಿ ಯೋಡಾರ ಓಕ್ ತಂಬ್ಗ ನೂಳ್ನಿ ಇಸ್ತೆ ವಚ್ಚೆತಕ್ಮು ಪತಿಫಲ್ಮು ವಾಡ್ಕಿ ತಪ್ಪೆಕೆಲೇದು ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು. ^{42 43 44} 42 ಮಲಿ ನಂಬೆ ಈ ಸನ್ನೋಳ್ಳಾ ಒಕ್ಡಿಕಿ ಯೋಡಾರ ಅಡ್ಡಿಯಾಯ್ತೆ ಅಟ್ಟೋಡು ಮೆಡ್ಕಾಯ್ಕಿ ಬೀಸೆ ರಾಯ್ನಿ ಕಟ್ಟಿ ವಾಡ್ನಿ ಸಮುದ್ರುಮ್ಕಿ ಏಸ್ತೆನು ವಾಡ್ಕಿ ಲೇಸು . 43 ಇದ್ಕಾಕುನ್ನ ನೀ ಸೈಯಿ ನಿನ್ನೀ ಪಾಪನ್ಕಿ ಸಿಕ್ಕಿಚ್ಚೆದಾಯ್ತೆ ದಾನ್ನಿ ಕತ್ರಿಚ್ಚಿಡಿ , ರೊಂಡು ಸೇತ್ಲುನ್ಡೋಡಾಯಿ ಆರ್ಲೇನಿನ ಅಗ್ಗಿಯಾಯಿನ ನರ್ಕುಮ್ಲ ಪಡೆದಾನ್ಕಿಂತ ಸೈ ಕಲ್ಸ್ಕೋನಿನೋಡಾಯಿ ಜೂಡ್ಲ ಸೇರೇದಿ ನೀಕಿ ಉತ್ತಮುಮು . ^{45 46} 45 ಮಲಿ ನೀ ಕಾಲು ನಿನ್ನೀ ಪಾಪ್ಮುಲ ಸಿಕ್ಕಿಚ್ಚೆದಾಯ್ತೆ ದಾನ್ನಿ ನರ್ಕಿ ಪಾಗೋಟ್ಟು , ರೊಂಡು ಕಾಲುಂಡೋಡಾಯಿ ನರ್ಕುಮ್ಲ ಏಬಿಚ್ಕೊನೆದಾನ್ಕಿಂತ ಕಾಲು ಕಳ್ಸ್ಕೊನಿನೋಡಾಯಿ ಜೂಡ್ಲ ಸೇರೇದಿ ನೀಕಿ ಉತ್ತಮುಮು . ^{47 48} 47 ನೀ ಕನ್ನು ನಿನ್ನೀ ಪಾಪ್ಮುಲ ಸಿಕ್ಕಿಚ್ಚೆದಾಯ್ತೆ ದಾನ್ನಿ ಪೆರ್ಕಿ ಪಾಗೋಟ್ಟು , ರೊಂಡು ಕಾಲುಂಡೋಡಾಯಿ ನರ್ಕುಮ್ಲ ಏಬಿಚ್ಕೊನೆದಾನ್ಕಿಂತ ಒಕ್ಟೆ ಕಂಡ್ಳುನ್ಡೋಡಾಯಿ ದೇವುಡು ರಾಜ್ಯುಮ್ಲ ಸೇರೇದಿ ನೀಕಿ ಉತ್ತಮುಮು . 48 ನರ್ಕುಮ್ಲ ವಾಳ್ನಿ ಕೊರ್ಕೆ ಪುರ್ಗ ಸಚ್ಚೆಟ್ಲೆದು , ಅಗ್ಗಿ ಆರೆಟ್ಲೇದು . ^{49 50} 49 ಪ್ರತಿಯೋಕ್ಡುಕಿ ಅಗ್ಗಿ ಅನೆ ಉಪ್ಪಿನ ಹದ್ಮು ಇಚ್ಚಲ್ಪಡಾಲ . 50 ಉಪ್ಪು ಮಂಚಿ ಪದಾರ್ಥುಮೆ , ಉಪ್ಪು ಸಪ್ಪೆಯಾಯ್ತೆ ದಾನ್ನಿ ಇಂಕ್ಯಾವ್ದಾನ್ನಿಂಚ ರುಚಿಗೊಳ್ಬಿಸ್ತಾರು ? ಮೀನೋನ ವುಂಡ್ನಿ , ಒಕ್ಳುಕೊಕ್ಳಿಕಿ ಸಮಾಧಾನ್ಮಿಂಚ ವುಂಡoಡ್ರಿ .