^{1 2 3 4} 1 ಆನಿಂಚ ವಾಡು ಲೇಸಿ ಒದಾಯ್ಮು ಪ್ರಾಂತ್ಯುಮ್ಕಿ ಯೋರ್ದೊನ್ ಏಟಿಂಚ ಅಕ್ಕಡ ಸೀಮೇಕು ವಚ್ಚೆ . ಆನ ಜನಲು ತಿರ್ಗಿ ಗುಂಪು ಗುಂಪಾಯಿ ವಾಡ್ ದೆಗ್ರುಕಿ ಕೂಡಿ ವಚ್ಚೇಕಿ ವಾಡು ತಿರ್ಗಿ ಎಪ್ಡ್ಳಾಕ್ನೆ ವಾಳ್ಕಿ ಉಪದೇಶ್ಮು ಸೇಸ್ತ ವುಂಡೆ . 2 ಅಪ್ಡು ಪರಿಸಾಯುಲು ಹತ್ರುಮ್ಕಿ ವಚ್ಚಿ ವಾಡ್ನಿ ಪರಿಕ್ಷಿಯಾಲನಿ ಯೋಚ್ನುಮಿಂಚ - ಒಕ್ಡು ಪೆಂಡ್ಳಾಮ್ನಿ ಇಡ್ಸಿಡ್ಸೇದಿ ಧರ್ಮುಮೋ ಎಟ್ಟ ಅನಿ ಅಡುಗ್ರಿ . 3 ವಾಡು ಅಂದ್ಗೆ - ಮೋಶೆ ಮೀಕಿ ಏಮಿ ಆಜ್ಞೆ ಇಚ್ಛೆ ಅನೇದಾಯಿ ವಾಳು - 4 ತ್ಯಾಗಪತ್ರಮ್ನಿ ರಾಸಿಚ್ಚಿ ದಾನ್ನೀ ಇಡ್ಸಿಡೋಚ್ಚು ಅನಿ ಮೋಶೆ ಅಪ್ಪಣ್ಮು ಇಚ್ಛೆ ಅನ್ರಿ . ^{5 6} 5 ಆಯ್ತೆ ಯೇಸು ವಾಳ್ಕಿ - ವಾಡು ಮೀ ಮಂಡುತನ್ಮುನಿ ಸೂಸಿ ಮೀಕಿ ಇಟ್ಟ ಆಜ್ನೆನಿ ರಾಸ್ಪೆಟ್ಟೆ . 6-7 ದೇವುಡಾಯ್ತೆನೋ ಸೃಷ್ಟಿ ಮೊದ್ಲಿಂಚಾನೆ ಮನುಷ್ಯುಲ್ನಿ ಸಿನೋಡು ಪಿಲ್ಲಾಯಿ ನಿರ್ಮಿಚ್ಚೆ ಅನಿನೂ ಈ ಈ ಕಾರ್ಣುಮಿಂಚ ಮೊಗೋಡು ತನ್ ತಲ್ಲಿ ತಂಡ್ರಿನಿ ಇಡ್ಸಿ ತನ್ ಪೆಂಡ್ಳಾಮ್ನಿ ಸೇರ್ಕೊನಿ ವಾಳಿದ್ರು ಒಕ್ಕೆ ಶರೀರ್ಮು ಆಯುಂಟಾರನಿನು ರಾಸಿಂದಿ . ^{7 8 9} 8 ಇಟ್ಟುನ್ಡೆದಾಯಿವಾಳು ಇಂಕ ಇದ್ರೂ ಕಾದು , ಒಕ್ಕೇ ಶರೀರ್ಮಾಯಿನಾರು . 9 ದಾನ್ನಿಂಚ ದೇವುಡು ಕೂಡಿಚ್ಚಿಂದಾನ್ನಿ ಮನುಷ್ಯುಲು ಅಗ್ಲೀಯ್ಗುಡ್ದು ಅನಿ ಸೊಪ್ಪೆ . ^{10 11 12} 10-11 ಇನ್ಟ್ಲ ವಾಡ್ ಶಿಷ್ಯುಲು ಈ ವಿಷಯುಮ್ಲ ಯೇಸುನಿ ತಿರ್ಗಿ ಅಡ್ಗ್ನಪ್ಡು ಯೇಸು ವಾಳ್ಕಿ - ತನ್ ಪೆಂಡ್ಳಾಮ್ನಿ ಇಡ್ಸಿ ಇಂಕೊಕುತ್ನಿ ಪೆಂಡ್ಳಿ ಸೇಸ್ಕೊನೋಡು ವಾಡ್ ಪೆಂಡ್ಳಾಮ್ಕಿ ದ್ರೋಹಿಯಾಯಿ ವ್ಯಭಿಚಾರ್ಮು ಸೇಸ್ನೋಡಾಯಿನಾಡು , 12 ಮಲಿ ಪೆಂಡ್ಳಾಮ್ ದಾನ್ ಮೊಗುಡ್ನಿ ಇಡ್ಸಿ ಬೇರೊಕ್ಕುಡ್ನಿ ಪೆಂಡ್ಳಿ ಸೇಸ್ಕೊಂಟೆ ಆದಿ ವ್ಯಭಿಚಾರ್ಮು ಸೇಸೇದಿ ಆಯಿಂದಿ ಅನಿ ಸೊಪ್ಪೆ . ^{13 14} 13 ಆಮಿಂದ ಕೆಲುವ್ಲು ವಾಳ್ ಸನ್ ಸಿನೋಳ್ನಿ ಯೇಸುಯಿಂಚ ಮುಟ್ಟಿಯಾಲನಿ ವಾಡ್ ದೆಗ್ರುಕಿ ಎತ್ಕೊಚ್ಚೇಕಿ ಶಿಷ್ಯುಲು ವಾಳ್ನಿ ಗದ್ರಿಚ್ರಿ . 14 ಆಯ್ತೆ ದಾನ್ಕಿ ಯೇಸು ದಾನ್ನಿ ಕನಿ ಕೊಪ್ಮು ಸೇಸ್ಕೋನಿ ವಾಳ್ಕಿ - ಬಿಡ್ಳುನಿ ನಾ ದೆಗ್ರುಕಿ ತೋಡ್ಕೋನಿ ರಾಂಡ್ರಿ , ಅವುಟ್ಲಿಕಿ ಅಡ್ಡಿ ಸೇಯದಂಡ್ರಿ , ದೇವುಡು ರಾಜ್ಯುಮು ಇಟ್ಟೋಳ್ದೆ . ^{15 16} 15-16 ಮೀಕಿ ಸತ್ಯುಮಾಯಿ ಸೊಪ್ತಾನು , ಯೋಡು ಶಿಶುಭಾವ್ಮಿಂಚ ದೇವುಡು ರಾಜ್ಯುಮ್ನಿ ಅಂಗಿಕರಿಚ್ಚೇಟ್ಲೇದೋ ವಾಡು ದಾಂಟ್ಲ ಸೇರೇಕೆ ಲೇದು ಅನಿ ಸೊಪ್ಪಿ ಅವುಟ್ಲುನಿ ಅಪ್ಕೋನಿ ಅವುಟ್ಲು ಮಿಂದ ಸೈ ಪೆಟ್ಟಿ ಆಶೀರ್ವದಿಚ್ಚೆ . ^{17 18 19} 17 ವಾಡು ಹೊರ್ಟಿ ದಾವ್ ಪಟ್ಟಿ ಪಾಯೇನಪ್ಡು ಒಕ್ಡು ಪರ್ಪಾತ ವಾಡ್ ಎದ್ರುಕಿ ವಚ್ಚಿ ಮೊಣಕಾಲೂರಿ - ಮಂಚಿ ಭೋಧಕುಡಾ , ನಾನು ನಿತ್ಯ ಜೂಡ್ಕಿ ಬಾದ್ಯಸ್ಥುಡಾವಲಂಟೆ ಏಮಿ ಸೇಯಾಲನಿ ವಾಡ್ನಿ ಅಡ್ಗಿ ಯೇಸು ವಾಡ್ಕಿ - 18 ನನ್ನೀ ಮಂಚೋಡನಿ ಎಂದ್ಗೂ ಸೊಪ್ತಾವು ? ದೇವುಡೋಕ್ಕುಡೆ ಹೊರ್ತು ಮಲ್ ಯೌಡು ಮಂಚೋಡ್ ಕಾದು . 19 ನರಹತ್ಯುಮು ಸೆಯ್ಗುಡ್ದು , ವ್ಯಭಿಚಾರ್ಮು ಸೆಯ್ಗುಡ್ದು , ದೊಂಗ್ಲಿಯ್ಗುಡ್ದು , ಸುಳ್ಳು ಸಾಕ್ಷಿನಿ ಸೊಪ್ಗುಡ್ದು , ಮೋಸ್ಮು ಸೆಯ್ಗುಡ್ದು , ನೀ ತಲ್ಲಿ ತಂಡ್ರಿನಿ ಸನ್ಮಾನಿಯಾಲ ಅನೆ ದೇವುಡಾಜ್ಞೆಲು ನೀಕಿ ಗೊತ್ತುಂಡಾವಿ ಅಂತೆ ಅನಿ ಸೊಪ್ಪೆ . ^{20 21 22} 20 ವಾಡು ವಾಡ್ಕಿ - ಭೋಧಕುಡಾ , ನಾನು ಸನ್ನಪ್ಡಿoಚಾನು ಇವಂತನಿಕು ಸರಿಯಾಯಿ ನಡ್ಸ್ಕೋನಿ ವಚ್ನಾನು ಅನಿ ಸೊಪ್ಪೇಕಿ ಯೇಸು ವಾಡ್ನಿ ದೃಷ್ಟಿಚ್ಚಿ ಸೂಸಿ ಪ್ರೀತಿಚ್ಚಿ ವಾಡ್ಕಿ - 21 ನೀಕಿ ಒಕ್ಟಿ ತಕ್ವಾಯಿಂದಿ , ಪೋ , ನೀ ಬದುಕ್ನಂತ ಅಮ್ಮಿ ಬಡುವ್ಲ್ಕಿ ಇಯ್ಯಿ , ಪರ್ಲೋಕ್ಮುಲ ನೀಕಿ ಸಂಪತುಂಟಾದಿ, ನುವ್ವ ವಚ್ಚಿ ನನ್ನೀ ಹಿಂಬಾಲಿಯ್ಯಿ ಅನಿ ಸೊಪ್ಪೆ . 22 ಆಯ್ತೆ ವಾಡು ಹೆಕ್ವ ಆಸ್ತಿವುಂಡೋಡಾಯಿಂದಾನ್ನಿಂಚ ಈ ಮಾಟ್ಕಿ ಮಕ್ಮು ಬಾಡ್ನೋಡಾಯಿ ದುಖ್ಮಿಂಚ ಹೊರ್ಟಿಪಾಯೇ . ^{23 24 25} 23 ಅಪ್ಡು ಯೇಸು ಸುತ್ಲು ಸೂಸಿ ತನ್ ಶಿಷ್ಯುಲ್ಕಿ - ಧನವಂತುಲು ದೇವುಡು ರಾಜ್ಯುಮ್ಲ ಸೇರೇದಿ ಎಂತೋ ಕಷ್ಟ್ಮು ಅನಿ ಸೊಪ್ಪೆ . 24 ಶಿಷ್ಯುಲು ವಾಡ್ ಮಾಟ್ಲುನಿ ಇನಿ ಬೆರ್ಗಾಯ್ರಿ . ಯೇಸು ತಿರ್ಗಿ ವಾಳ್ಕಿ - ಬಿಡ್ಲಾ , ದೇವುಡು ರಾಜ್ಯುಮ್ಲ ಸೇರೇದಿ ಎಂತೋ ಕಷ್ಟುಮು . 25 ಐಶ್ವರ್ಯವಂತುಡು ದೇವುಡು ರಾಜ್ಯುಮ್ಲ ಸೇರೆದಾನ್ಕಿಂತ ಒಂಟ ಸೂದಿ ಕನ್ಲ ನುಗ್ಗಿ ಪಾಯೇದಿ ಸುಲುಭ್ಮು ಅನಿ ಸೊಪ್ಪೆ . ^{26 27 28} 26 ಈ ಮಾಟ್ಕಿ ವಾಳು ಇಂಕಂತ ಆಶ್ಚರ್ಯುಮು ಪಡಿ - ಇಟ್ಟುoಟೆ ಯೋಳ್ಕಿ ರಕ್ಷಣ್ಮಾಯ್ತಾದಿ ಅನಿ ವಾಳ್ ವಾಳ್ನೋನ ಸೊಪ್ಕೊನೇಕಿ ಯೇಸು ವಾಳ್ನಿ ದೃಷ್ಟಿಚ್ಚಿ ಸೂಸಿ - 27 ಇದಿ ಮನುಷ್ಯುಲ್ಕಿ ಆಸಾದ್ಯುಮು , ದೇವುಡ್ಕಿ ಅಸಾದ್ಯುಮು ಕಾದು , ದೇವುಡಿಕಿ ಅಂತನು ಸಾದ್ಯುಮೆ ಅನೆ . 28 ಪೇತ್ರುಡು ವಾಡ್ಕಿ - ಇಗೋ , ಮಾಮು ಅಂತ ಇಡ್ಸಿಡ್ಸಿ ನಿನ್ನೀ ಹಿಂಬಾಲಿಚ್ನಾಮು ಅನಿ ಸೊಪ್ಪೆದಾನ್ಕಿ ಪ್ರಾರಂಬಿಚ್ಚೇಕಿ ಯೇಸು - ^{29 30 31} 29-30 ಮೀಕಿ ಸತ್ಯುಮಾಯಿ ಸೊಪ್ತಾನು , ಯೋಡು ನೀ ನಿಮಿತ್ಮು ಸುವಾರ್ತುಮು ನಿಮಿತ್ಮು ಇಂಟ್ನಾವ್ನಿ ಅನ್ದೊಂಬುಳ್ನಿ ಆವ್ನಿ ಅಕ್ಕಶೆಲ್ನಾವ್ನಿ ತಲ್ಲಿನಾವ್ನಿ ತಂಡ್ರಿನಾವ್ನಿ ಬಿಡ್ಳುನಿ ಆವ್ನಿ ಭೂಮಿನಿ ಆವ್ನಿ ಇಡ್ಸಿ ಇಡ್ಸ್ನಾಡೋ ವಾಡ್ಕಿ ಇಪ್ಡು ಕಾಲುಮ್ಲ ಇಲ್ಲೂ ಅನ್ನ ತೊಂಬ್ಡು ಅಕ್ಕ ಶೆಲ್ಲ ತಲ್ಲಿ ಬಿಡ್ಳು ಭೂಮಿ ಇವಂತನು ಹಿಂಸೇಲು ಸಹಿತ್ಮಾಯಿ ನೂರಂತ ಸಿಕ್ಕೆ ಸಿಕ್ತಾವಿ , ಮಲಿ ಮುಂದ್ರ ಲೋಕ್ಮುಲ ನಿತ್ಯ ಜೂಡು ದೊರುಸ್ತಾದಿ . 31 ಆಯ್ತೆ ಬಹು ಮಂದಿ ಮೊದ್ಲೋಳು ಕಡೆಯೊಳಾಯ್ತಾರು , ಕಡೆಯೋಳು ಮೊದ್ಲೋಳಾಯ್ತಾರು ಅನಿ ಸೊಪ್ಪೆ . ^{32 33 34} 32 ವಾಳು ಯೆರೂಸಲೇಮು ದಾವ್ನಿ ಪಟ್ಟಿ ಪಾಯೇನಪ್ಡು ಯೇಸು ವಾಳ್ ಮುಂದ್ರ ಪಾತವುಂಡೆ . ವಾಳು ಸೂಸಿ ಬೆರ್ಗಾಯ್ರಿ , ವಾಡ್ ಎನ್ಕ ವಚ್ಚೋಳು ಭಯ್ಮುಪಡೋಳಾಯ್ರಿ . ಅಪ್ಡು ವಾಡು ತನ್ ಪನ್ನೆಂಡು ಮಂದಿ ಶಿಷ್ಯುಲ್ನಿ ತಿರ್ಗಿ ತೋಡ್ಕೋನಿ ಮುಂದ್ರ ವಾಳ್ಕಾಯೇದ್ನಿ ಸೊಪ್ಪೆದಾನ್ಕಿ ತೊಡ್ಗೀ ವಾಳ್ಕಿ - ಸೂಡoಡ್ರಿ , ಮಾಮು ಯೆರೂಸಲೇಮಿಕಿ ಪಾತ ವುಂಡಾಮು . 33 ಮಲಿ ಮನುಷ್ಯು ಕುಮಾರುಡ್ನಿ ಮಹಾಯಾಜಕುಲು ಮಲಿ ಶಾಸ್ತ್ರಿಲ ಸೇತ್ಕಿ ಪಟ್ಟಿಸ್ತಾರು . 34 ವಾಳು ವಾಳ್ಕಿ ಮರಣ್ಮು ದಂಡೆನಿ ವಿಧಿಚ್ಚಿ ವಾಡ್ನಿ ಅನ್ಯುಲು ಸೇತ್ಕಿ ಒಪ್ಪಿಸ್ತಾರು . ವೂಳು ವಾಡ್ನಿ ಅಪಹಾಸ್ಯುಮು ಸೇಸ್ತಾರು , ವಾಡ್ ಮಿಂದ ಊಸ್ತಾರು , ವಾಡ್ನಿ ಕೊರಡೆಲಿಂಚ ಕೊಟ್ತಾರು , ಸೊಂಪಿ ಏಸ್ತಾರು . ವಾಡು ಮೂಡು ದಿನಾಲು ಮಿಂದ ಜೀವಿತ್ಮಾಯಿ ಲೇಸಿ ವಸ್ತಾಡು ಅನಿ ಸೊಪ್ಪೆ . ^{35 36 37} 35 ಅಪ್ಡು ಜೆಬೇದಾಯುಡು ಬಿಡ್ಳಾಯಿನಿ ಯಾಕೋಬುಡು ಯೋಹಾನುಡು ವಾಡ್ ದೆಗ್ರುಕಿ ವಚ್ಚಿ ವಾಡ್ಕಿ - ಗುರುಲಾ , ಮಾಮು ಒಕ್ಟಿನಿ ಅಡುಕೊಂಟಾಮು , ದಾನ್ನಿ ಮಾಕೊಸ್ಕರ್ಮು ನಡ್ಬಿಚ್ಚಿ ಇಯ್ಯಾಲನಿ ಸೊಪ್ರಿ . 36 ವಾಡು ವಾಳ್ನಿ - ಮೀಕೇಮಿ ನಡ್ಬಿಚ್ಚಿಯಾಲನಿ ಅಡ್ಗೇಕಿ ವಾಳು - 37 ನೀಕಿ ಮಹಾ ಪದವಿ ವಚ್ನಪ್ಡು ಮಾಲ ಒಕ್ಕುಡು ನೀ ಕುಡುಮ್ ತೊಟ್ಲಾನು ಇಂಕೊಕ್ಡು ಎಡುಮ್ ತೊಟ್ಲಾನು ಕುಚ್ಚೋನಟ್ಗ ಮಾಕಿ ಅನುಗ್ರಹುಮು ಸೇಯಾಲ ಅನ್ರಿ . ^{38 39 40} 38 ಆಯ್ತೆ ಯೇಸು ವಾಳ್ನಿ - ಮೀರು ಬೇಡ್ಕೊನಿಂದಿ ಏಮನಿ ಮೀಕಿ ತಿಳ್ಚೆಟ್ಲೆ , ನಾನು ತಾಗೆ ಪಾತ್ರುಮ್ಲ ತಾಗೇದಿ ಮೀಯಿಂಚಾಯ್ತಾದಾ ? ನಾಕಾಯೇ ದೀಕ್ಷಾಸ್ನಾನುಮ್ನಿ ಹೊಂದೇದಿ ಮೀಯಿಂಚಾಯ್ತಾದಾ ಅನಿ ಅಡ್ಗೇಕಿ ವಾಳು - ಆಯ್ತಾದಿ ಅನ್ರಿ . 39 ಅಪ್ಡು ಯೇಸು ವಾಳ್ಕಿ - ನಾನು ತಾಗೆ ಪಾತ್ರೆಲ ತಾಗ್ತಾರು , ನಾಕಾಯೇ ಸ್ನಾನುಮು ಮೀಕಾಯ್ತಾದಿ , 40 ಅಂಟೆ ನಾ ಕುಡುಮ್ ತೊಟ್ಲಾಯ್ತೆನು ಎಡುಮ್ ತೊಟ್ಲಾಯ್ತೆನು ಕುಚ್ಚೋನಟ್ಗ ಅನುಗ್ರಹುಮು ಸೇಸೇದಿ ನಾದ್ಕಾದು , ಆದಿ ಯೋಳ್ಕನಿ ಸಿದ್ಮು ಪಡಿಚ್ಚಿಂದೋ ವಾಳ್ಕಿ ಸಿಕ್ತಾದಿ ಅನಿ ಸೊಪ್ಪೆ . ^{41 42} 41 ಉಳ್ಸಿನ ಪದಿ ಮಂದಿ ಶಿಷ್ಯುಲು ದೀನ್ನಿ ಇನಿ ಯಾಕೋಬುಡು ಯೋಹಾನುಡು ಮಿಂದ ಕೊಪ್ಮಿಂಚ ಲೇಸ್ರಿ . 42 ಯೇಸು ವಾಳ್ನಿ ಹತ್ರುಮ್ಕಿ ಪಿಲ್ಚಿ ವಾಳ್ಕಿ - ಜನಲ್ನಿ ಆಳೋಳುಅನಿಅನ್ಬಿಚ್ಕೊನೋಳು ವಾಳ್ ಮಿಂದ ಅಹಂಕಾರ್ಮಿಂಚ ದೊರೆತನ್ಮು ಸೇಸ್ತಾರು , ಮಲಿ ವಾಳ್ಳಾ ಪೆದ್ದೋಳು ಬಲತ್ಕಾರ್ಮಿಂಚ ಅಧಿಕಾರ್ಮು ನಡ್ಬಿಸ್ತಾರು ಅನಿ ಮೀರು ತಿಳ್ಚ್ನಾರಂತೆ , ^{43 44 45} 43 ಆಯ್ತೆ ಮೀಲಾ ಅಟ್ಟುoಡ್ಗುಡ್ದು , ಮೀಲಾ ಪೆದ್ದೊಡಾವಾಲನುಂಡೋಡು ಮೀ ಸೇವಕುಡಾಯುಂಡಾಲ , 44 ಮೀಲಾ ಮೊದ್ಲೋಡಾವಾಲನುಂಡೋಡು ಅಂದ್ರು ಆಳಾಯುಂಡಾಲ . 45 ಮನುಷ್ಯುಕುಮಾರುಡು ಸಹ್ಮು ಸೇವೆ ಸೇಬಿಚ್ಕೊನೆದಾನ್ಕು ರಾಲೇದು , ಸೇವೆ ಸೇಸೆದಾನ್ಕು ಅನೇಕುಲ್ನಿ ಇಡ್ಬಿಚ್ಕೊನೆದಾನ್ಕಾಯಿ ತನ್ ಪ್ರಾಣುಮ್ನಿ ಈಡು ಇಚ್ಚೆದಾನ್ಕು ವಚ್ಚೆ ಅನಿ ಸೊಪ್ಪೆ . ^{46 47 48} 46 ಆಮಿಂದ ವಾಳು ಯೆರಿಕೊವಿಕಿ ವಚ್ರಿ . ಯೇಸು ವಾಳ್ ಶಿಷ್ಯುಲ್ನಿ ಬಹು ಜನಲು ಗುಂಪು ಆ ಊರಿಂಚ ಹೊರ್ಟಿ ಪಾತವುಂಡೆನಪ್ಡು ತಿಮಾಯುಡು ಕೊಡ್ಕಾಯಿನ ಬಾರ್ತಿಮಾಯುಡು ದಾವ್ ಮಗ್ಗುಲ್ಲಾ ಕುಚ್ಚೋನುಂಡೆ . 47 ವಾಡು ಗುಡ್ಡೋಡು ಬಿಕ್ಷುಡು . ಈ ಮಾರ್ಗುಮಾಯಿ ಪಾಯೋಡು ನಜರೇತಿನ ಯೇಸು ಅನಿ ವಾಡು ಇನಿ - ದಾವಿದುಡು ಕುಮಾರುಡಾ , ಯೇಸುವಾ , ನನ್ನೀ ಕರುಣಿಯ್ಯಿ ಅನಿ ಕೂಸ್ಕೊನೆದಾನ್ಕು ಪ್ರಾರಂಭಿಚ್ಚೆ . 48 ಅನೇಕುಲು- ಊರ್ಕುಂಡು ಅನಿ ವಾಡ್ನಿ ಗದ್ರಿಚ್ಚೆಕಿ ವಾಡು - ದಾವಿದುಡಾ ಕುಮಾರುಡಾ , ನನ್ನೀ ಕರುಣಿಯ್ಯಿ ಅನಿ ಇಂಕಂತ ಕೂಸ್ಕೊನೆ . ^{49 50} 49 ಅಪ್ಡು ಯೇಸು ನಿಲ್ಪಡಿ - ವಾಡ್ನಿ ಪಿಲಿಯಂಡ್ರಿ ಅನೇಕಿ ವಾಳು ಆ ಗುಡ್ಡೋಡ್ನಿ ಪಿಲ್ಚಿ - ಧೈರ್ಯುಮುಂಡ್ನಿ , ಲೆಯ್ಯಿ , ನಿನ್ನಿ ಪಿಲ್ಸ್ತಾಡು ಅನ್ರಿ . 50 ವಾಡು ತನ್ ಹೊದಿಕೆನಿ ಸೀಸಿ ಏಸಿ ತಟ್ಟನೆ ಲೇಸಿ ಯೇಸು ದೆಗ್ರುಕಿ ವಚ್ಚೆ . ^{51 52} 51 ಯೇಸು ವಾಡ್ನಿ - ನಾನು ನೀಕಿ ಏಮಿ ಸೇಯಾಲನಿ ಕೊರ್ತಾವು ಅನಿ ಅಡ್ಗೇಕಿ ಆ ಗುಡ್ಡೋಡು - ನಾಕಿ ಕನ್ಲು ವಚ್ಚೆ ಅಟ್ಗ ಸೇಯಾಲ , ಗುರುವಾ , ಅನೆ . 52 ಯೇಸು ವಾಡ್ಕಿ -ಪೋ , ನೀ ನಂಬುಕ್ಮೆ ನಿನ್ನಿ ಸ್ವಸ್ಥ್ಮು ಸೇಸಿಂದಿ ಅನಿ ಸೊಪ್ಪೆ , ತಕ್ಷಣ್ಮೆ ವಾಡ್ಕಿ ಕನ್ಲು ವಚ್ಚೆ , ವಾಡು ಆ ದಾವ್ಲ ಯೇಸು ಎನ್ಕ ಪಾಯೇ .