^{1 2 3} 1 ಯೇಸು ಆನಿಂಚ ಹೊರ್ಟಿ ವಾಳ್ ಊರ್ಕಿ ವಚ್ಚೆ , ಶಿಷ್ಯುಲು ಯೇಸು ಎನ್ಕೆ ವಚ್ರಿ . 2 ಸಬ್ಬತ್ ದಿನ್ಮು ವಚ್ನಪ್ಡು ವಾಡು ಸಭಾಮಂದಿರುಮ್ಕಿ ಪಾಯೇ ಉಪದೇಶ್ಮು ಸೇಸೆದಾನ್ಕಿ ಪ್ರಾರಂಭಿಚ್ಚೆ . ಅಂದ್ರು ಇನಿ ಅತ್ಯಾಶ್ಚರ್ಯುಮು ಪಡಿ - ವೂಡ್ಕಿ ಈ ಮಾಟ್ಳು ಯಾನಿಂಚ ವಚ್ನಾವಿ ? ವೂಡು ಪಡ್ಸುಂಡೆ ಆ ಜ್ಞಾನುಮು ಏಮಿ ? ವೂಡ್ ಸೈಯಿಂಚ ಇಟ್ಟೆ ಮಹತ್ಕಾರ್ಯಲು ಆಯೇದಿ ಏಮಿ ? ವೂಡು ಆ ಬದಗಿಡು ಕದಾ . 3 ವೂಡು ಮರಿಯಳು ಕೊಡ್ಕು ಕದಾ . ಯಾಕೋಬುಡು ಯೋಸೆಯಾಯಿನ ಸೀಮೊನುಡು ವೂಳ್ ಅನ್ನ ಕದಾ . ವೂಡ್ ಶೆಲ್ಗಾಳು ಈನ ಮಾಲ ವುಂಡಾರು ಕದಾ ಅನಿ ಮಾಟ್ಳಾಡ್ಕೋನಿ ಯೇಸು ವಿಷಯ್ಮಾಯಿ ಬೇಸರ್ಮುಸೇಸ್ಕೊನ್ರಿ . ^{4 5 6} 4 ಯೇಸು ವಾಳ್ಕಿ - ಪ್ರವಾದಿ ಬೇರೆ ಯಾನುಂಟೆನು ವಾಡ್ಕಿ ಮರ್ಯಾದೆ ವುಂಡಾದಿ , ಆಯ್ತೆ ಸ್ವದೇಶ್ಮುಲಾನು ಸ್ವಂತ ಜನುಮ್ಲಾನು ಸ್ವಂತ ಇನ್ಟ್ಲಾನು ಮಾತ್ರ ಮಾರ್ಯಾದೆ ಲೇದು ಅನಿ ಸೊಪ್ಪೆ . 5 ಯೇಸು ಆನ ಕೆಲುವ್ಲು ಮಂದಿ ರೋಗಿಲು ಮಿಂದ ಸೈಪೆಟ್ಟಿ ಸ್ವಸ್ಥುಮು ಸೇಸಿಂದೆ ಹೊರ್ತು ಬೇರೆ ಯಾವ್ ಮಹತ್ಕಾರ್ಯುಮ್ನಿ ಸೇಸೆದಾನ್ಕಾವ್ಲೇದು . 6 ವಾಳು ತನ್ನೀ ನಂಬ್ಕುಣ್ಣ ಪಾಯಿಂದಾನ್ಕಿ ವಾಡು ಆಶ್ಚರ್ಯುಮು ಪಡೆ . ^{7 8 9} 7 ಯೇಸು ಹಳ್ಳಿಪಳ್ಳಿಲ್ನಿ ಸುತ್ಕೋನಿ ಉಪದೇಶ್ಮು ಸೇಸ್ತಾ ವಚ್ಚೆ .ಮಲಿ ಪನ್ನೆಂಡು ಮಂದಿ ಶಿಷ್ಯುಲ್ನಿ ಹತ್ರುಮ್ಕಿ ಪಿಲ್ಚಿ ವಾಳ್ನಿ ಇದ್ರಿದ್ರಾಯಿ ಅಂಪಿಚ್ಚೆಕಿ ಆರಂಭಿಚ್ಚೆ . ಅಂಪಿಚ್ಚೆನಪ್ಡು ವಾಳ್ಕಿ ದೈಮ್ಲು ಮಿಂದ ಅಧಿಕಾರ್ಮು ಇಚ್ಚಿ - 8 ಕಟ್ಟ ಹೊರ್ತು ದಾವ್ಕಿ ಏಮಿ ಸೀಸ್ಕೋನಿ ಪೋವದಂಡ್ರಿ , ಬುತ್ತಿ , ಹಸಿಭ , ಹಮ್ಮಿಣಿಲ ದುಡ್ಲು ವದ್ದು , ಶೋಪ್ಪುಲ್ನಿ ಮೆಟ್ಕೋನಿ ಪೋವಚ್ಚು . 9 ರೊಂಡು ಅಂಗಿಲ್ನಿ ಏಸ್ಕೊವದಂಡ್ರಿ ಅನಿ ಅಪ್ಪಣ್ಮು ಇಚ್ಛೆ . ^{10 11} 10 ಇದ್ಕಾಕುನ್ನ ಯೇಸು ವಾಳ್ಕಿ - ಮೀರು ಯಾನಾರ ಓಕ್ ಇಂಟ್ಳ ದಿಕ್ಕೊನಪ್ಡು ಆ ಸ್ಥಳ್ಮಿಂಚ ಪಾಯೇಗಂಟ ಅನ್ನೇ ವುಂಡಂಡ್ರಿ . 11 ಮಲಿ ಯಾವ್ ಸ್ಥಳ್ಮೊಳಾಯ್ತೆನು ಮಿಮ್ಮುಲ್ನಿ ಸೇರ್ಬಿಚ್ಕೊಲೇಕ್ಪೋತೆನು ಮೀರು ಸೊಪ್ಪಿಂದಾನ್ನಿ ಇನ್ಕುನ್ನಪಾತೆನು ಆ ಸ್ಥಳುಮಿಂಚ ಪಾಯೇನಪ್ಡು ಕಾಲ್ಕಿ ಎಕ್ಕಿನ ದೂಳ್ನಿ ಒದ್ರಿಡಂಡ್ರಿ , ಆದಿ ವಾಳ್ಕಿ ಸಾಕ್ಷಿಯಾಯುಂಡ್ನೀ ಅನಿ ಸೊಪ್ಪೆ . ^{12 13} 12-13 ವಾಳು ಪಾಯಿ ಜನಲಿಕಿ - ದೇವುಡು ತೊಟ್ಕಿ ತಿರಿಕೊವಾಲನಿ ಸಾರಿ ಅನೇಕ್ಮು ದೈಮ್ಲುನಿ ಇಡ್ಬಿಚ್ಚಿ ಅನೇಕ್ಮು ರೋಗಿಲ್ಕಿ ಅಂದ್ಮು ಏಸಿ ವಾಸಿಸೇಸ್ರಿ . ^{14 15} 14 ಮಲಿ ಅರ್ಸುಡಾಯಿನ ಹೆರೋದುಡು ಯೇಸು ಸುದ್ಧಿನಿ ಇನೆ . ಎಂದ್ಕಂಟೆ ವಾಡ್ ಪೇರು ಪ್ರಸಿದ್ಧಿಯಾಯೇ , ಮಲಿ ಜನಲು ವಾಡ್ ವಿಷಯುಮ್ಲ ಸ್ನಾನಿಕುಡೈನ ಯೋಹಾನುಡೇ ತಿರ್ಗಿ ಬದ್ಕಿವಚ್ನಾಡು , ದಾನ್ನಿಂಚ ಮಹತ್ಕಾರ್ಯಲ್ನಿ ನಡ್ಬಿಚ್ಚೆ ಶಕ್ತಿಲು ವಾಡ್ಲ ವುಂಡಾವಿ ಅನಿ ಸೊಪ್ತವುಂಡ್ರಿ . 15 ಕೆಲುವ್ಲು ವೂಡು ಎಲಿಯುಡು ಅನಿನು ಕೆಲುವ್ಲು - ವೂಡು ಎನ್ಕ ಪ್ರವಾದಿಲಾಕವುಂಡೆ ಓಕ್ ಪ್ರವಾದಿ ಅನಿನು ಸೊಪ್ರಿ . ^{16 17} 16 ಆಯ್ತೆ ಹೆರೋದುಡು ಯೇಸು ಸುದ್ದಿನಿ ಇನಿ - ನಾನು ತಲಕೈ ಹೊಸಿನ ಯೋಹಾನುಡೆ ತಿರ್ಗಿ ಬದ್ಕಿ ವಚ್ನಾಡು ಅನೆ . 17 ಹೆರೋದ್ಯುಡು ತಾನು ಪೆಟ್ಕೊನುಂಡಿನ ಹೆರೋದ್ಯಿದಿ ನಿಮಿತ್ಮು ಯೋಹಾನುಡ್ನಿ ಪಟ್ಟಿ ಚಪ್ಪಿಚ್ಚಿ ಸೆರೇಲ ಕಟ್ಟಿ ಏಬಿಚ್ಚೆ .ಆ ಹೆರೂದ್ಯಿದಿ ಹೆರೋದುಡು ಅನ್ನ ಆಯಿನ ಪಿಲಿಪ್ಪುಡು ಪೆಂಡ್ಳಾಮು .ಯೋಹಾನುಡು ಹೆರೋದುಡ್ಕಿ - ^{18 19 20} 18 ನೀ ಅನ್ನ ಪೆಂಡ್ಳಾಮ್ನಿ ಪೆಟ್ಕೊನುoಡೆದಿ ಧರ್ಮುಮು ಕಾದು ಅನಿ ಸಾಪ್ತಾವುಂಡೆ . 19 ದೀನ್ಕಿ ಹೆರೋದ್ಯಿದಿ ವಾಡ್ ಮಿಂದ ದ್ವೇಷ್ಮು ಪೆಟ್ಕೋನಿ ವಾಡ್ನಿ ಸೊಂಪಿಬಿಯಾಲನುಂಟೆನು ಆವ್ಕುಣ್ಣ ಪಾಯೇ . 20 ಹೆರೋದುಡು ಯೋಹಾನುಡ್ನಿ ನೀತಿವಂತುಡನಿ ದೇವುಡುಭಕ್ತುಡನಿ ತಿಳ್ಸಿ ಅಂಜ್ಕೋನಿ ವಾಡ್ಕಿ ಯಾವ್ ಅಪಾಯ್ಮು ರಾಕುಣಟ್ಗ ಪೆಟ್ಟುಂಡೆ . ಇದ್ಕಾಕುನ್ನ ಯೋಹಾನುಡು ಸೊಪ್ಪಿಂದಾನ್ನಿ ವಾಡು ಇನ್ನಪ್ಡು ಮನುಸ್ಲ ಬಹು ಗಲಿಬಿಲಿ ಪುಟ್ತೇನು ವಾಡ್ ಮಾಟ್ನಿ ಸಂತೋಷ್ಮಿಂಚ ಇಂಟ ವುಂಡೆ . ^{21 22} 21-22 ಇಟ್ಟುoಡೆದಾಯಿ ದಾನ್ಕಿ ಅನುಕೂಲ್ಮಾಯಿನ ದಿನ್ಮು ವಚ್ಚೆ , ಎಟ್ಟಂಟೆ ಹೆರೋದುಡು ತಾನು ಪುಟ್ಟಿನ ನಾಡ್ಲ ಪ್ರಭುಲಿಕು ಸಹಸ್ರಾಧಿಪತಿಲ್ಕು ಗಲಿಲಾಯ್ಮು ಸೀಮೆ ಮುಖ್ಯಸ್ಥುಲ್ಕು ಔತಣ್ಮುನಿ ಸೇಬಿಚ್ನಪ್ಡು ಹೆರೋದ್ಯಿದಿ ಬಿಡ್ಡ ನೋನ್ಕಿ ವಚ್ಚಿ ನಾಟ್ಕ್ಮು ಸೇಸಿ ಹೆರೋದ್ಯುಡ್ನಿ ವಾಡ್ ಜೊತ್ಲ ಪಂಕ್ತಿಲ ಊಟುಮ್ಕಿ ಕುಚ್ಚೋನುಂಡೋಳ್ನಿ ಮೆಚ್ಚಿಚ್ಚೆ . ಅರ್ಸುಡು ಆ ಪಿಲ್ಕಿ - ಬೇಕಾಯುಂಡೇದ್ನಿ ಅಡಿಕೋ , ಇಸ್ತಾನು . ^{23 24 25} 23 ನುವ್ವ ನನ್ನೀ ಏಮಿ ಅಡಿಕೊಂಟೇನು ಸರಿ , ನಾ ರಾಜ್ಯುಮ್ಲ ಅರ್ಧ್ಮು ರಾಜ್ಯುಮ್ನಿ ಅಡ್ಗ್ತೇನು , ನೀಕಿ ಇಸ್ತಾನು ಅನಿ ಆಣೆ ಪೆಟ್ಕೋನಿ ಸೊಪ್ಪೆ . 24 ಅಪ್ಡು ಆದಿ ಆಕ್ಟರ್ಕಿ ಪಾಯಿ - ನಾನು ಏಮಿ ಅಡ್ಕೊಂದ್ನು ? ಅನಿ ತನ್ ತಲ್ಲಿನಿ ಅಡ್ಗಿದಾನ್ಕಿ ಆದಿ - ಸ್ನಾನಿಕುಡೈನ ಯೋಹಾನುಡು ತಲ್ಕೈನಿ ಅಡಿಕೋ ಅನೆ . 25 ತಕ್ಷಣ್ಮೆ ಆದಿ ಅರಸುಡು ದೆಗ್ರುಕಿ ಅವಸೃಮಿಂಚ ವಚ್ಚಿ - ಈ ಕ್ಷಣ್ಮುಲಾನೇ ಸ್ನಾನಿಕುಡೈನ ಯೋಹಾನುಡು ತಲಕೈನಿ ಪರಾತಿಲಾ ನಾಕಿ ಚಪ್ಪಿಚ್ಚಿಯಾಲನೇ ನಾ ಕೋರಿಕ್ಮು ಅನಿ ಆರ್ಕೆ ಸೇಸ್ಕೋನೆ . ^{26 27 28 29} 26-27 ಅಂದ್ಗೆ ಅರಸುಡು ಬಹುದುಖ್ಮು ಪಡ್ರೀ ತಾನು ಪೆಟ್ಕೊನಿನ ಆಣುಲು ನಿಮಿತ್ಮಾಯಿ ತನ್ ಪಂಕ್ತಿಲ ಕುಚ್ಚೊನುನ್ಡ್ನೋಳ ನಿಮಿತ್ಮಾಯಿ ದಾನ್ನಿ ಅಸಡ್ಡೆ ಸೇಸೆದಾನ್ಕಿ ಮನ್ಸ್ಲೇಕುಣ್ಣ ತಕ್ಷಣ್ಮೆ ತನ್ ಪೈಗಾವ್ಲಿನ ಸಿಪಾಯಿಲ್ಲಾ ಒಕ್ಕುಡ್ಕಿ - ನುವ್ವ ಪಾಯಿ ಯೋಹಾನುಡು ತಲಕೈನಿ ಎತ್ಕೊಚ್ಚಿಯ್ಯಿ ಅನಿ ಅಪ್ಪಣ್ಮು ಇಚ್ಚಿ ಅಂಪಿಚ್ಚೆ , 28 ವಾಡು ಪಾಯಿ ಸೆರಇಂಟ್ಲ ವಾಡ್ ತಲಕೈನಿ ಎತ್ಕೋನಿ ಪರಾತಿಲ ಎತ್ಕೊಚ್ಚಿ ಆ ಪಿಲ್ಕಿ ಇಚ್ಚೆ .ಆ ಪಿಲ್ಲ ದಾನ್ನಿ ದಾನ್ ತಲ್ಲಿಕಿ ಇಚ್ಚೆ . 29 ಯೋಹಾನುಡ ಶಿಷ್ಯುಲು ಈ ಸಂಗತಿನಿ ಅಡ್ಗ್ನಪ್ಡು ವಾಳು ವಚ್ಚಿ ವಾಡ್ ಶವಾನ್ನಿ ಮೋಸ್ಕೋನಿ ಪಾಯಿ ಸಮಾದಿಲ ಪೆಟ್ರಿ . ^{30 31 32} 30 ಇಕ್ಡಿಕಿ ಅಪೋಸ್ತಲುಲು ವಾಡ್ ದೆಗ್ರುಕಿ ವಚ್ಚಿ ವಾಳು ಸೇಸಿಂದಾನ್ನಿ ಉಪದೇಶ್ಮು ಸೇಸಿಂದಾನ್ನಿ ಅಂತ ವಾಡ್ಕಿ ತಿಳ್ಬಿಚ್ಚೇಕಿ ವಾಡು ವಾಳ್ಕಿ - 31 ಮೀರು ಮಾತ್ರುಮು ವಿಂಗಡ್ಮಾಯಿ ಅಡ್ವಿಕಿ ವಚ್ಚಿ ಕೊಂಚ್ಮು ಆಕ್ಲಾರ್ಬಿಚ್ಕೊಂಡ್ರಿ ಅನಿ ಸೊಪ್ಪೆ . ಎಂದ್ಕಂಟೆ ಬಹಳ್ಮು ಮಂದಿಲು ವಸ್ತಾ ಪಾತಾ ವುಂಡಿಂದಾನ್ನಿಂಚ ವಾಳ್ಕಿ ಊಟ್ಮು ಸೇಸೆದಾನ್ಕು ಅವಕಾಶ್ಮು ಸಿಕ್ಲೇದು . 32 ಅಪ್ಡು ವಾಳು ದೋಣಿಲಾ ಹೊರ್ಟಿ ವಿಂಗಡ್ಮಾಯಿ ಅಡ್ವಿಕಿ ಪಾಯ್ರಿ . ^{33 34} 33 ವಾಳು ಪಾಯೇದಾನ್ನಿ ಬಹು ಜನಲು ಕನಿ ವಾಳ್ ಗುರ್ತ್ನಿ ಪಟ್ಟಿ ಅನ್ನೀ ಊರ್ಲಿಂಚ ಕಾಲುನಡ್ಗೆ ಆಯಿ ಪಾರಿ ವಾಳ್ಕಿಂತ ಮುಂದ್ರ ಆನ ಸೇರ್ರೀ . 34 ವಾಡು ಆಕ್ಟರ್ಕಿ ವಚ್ಚಿ ಬಹು ಜನಲು ಗುಂಪ್ನಿ ಕನಿ ವೂಳು ಗೊರ್ರೋಡು ಲೇನಿನ ಗೊರ್ಲುಲಾಕ ವುಂಡಾರೆ ಅನಿ ಕನಿಕರ್ಮು ಪಡಿ ವಾಳ್ಕಿ ಬಹಳ್ಮು ಉಪದೇಶ್ಮು ಸೇಸ್ತವುಂಡೆ . ^{35 36} 35-36 ಅಂತ್ಪದ್ಗಿ ಬಹಳ್ಮು ಪೊದ್ದಾಯಿಂದಾನ್ನಿಂಚ ವಾಡ್ ಶಿಷ್ಯುಲು ವಾಡ್ ದೆಗ್ರುಕಿ ವಚ್ಚಿ - ಇದಿ ಅಡ್ವಿ , ಇಪ್ಡು ಪೊದ್ದು ಹೆಕ್ವಾಯೇ , ಈ ಜನಲ್ಕಿ ಅಪ್ಪಣ್ಮು ಇಯ್ಯಿ , ವೂಳು ಸುತ್ಲು ವುಂಡೆ ಹಳ್ಳಿಪಳ್ಳಿಳ್ಕಿ ಪಾಯಿ ವಾಳ್ ಊಟುಮ್ಕಿ ಏಮಾರ ಕೊನ್ಕೊನ್ನಿ ಅನಿನ್ದಾನ್ಕು ಯೇಸು - ^{37 38} 37-38 ಮೀರೇ ವಾಳ್ಕಿ ಊಟುಮ್ಕಿ ಇಯ್ಯಂಡ್ರಿ ಅನಿ ಉತ್ರುಮಿಚ್ಚೆ . ಅಂದ್ಗು ವಾಳು - ಮಾಮು ಪಾಯಿ ಇನ್ನೂರು ರುಪಾಯ್ಲಿಕಿ ರೊಟ್ನಿ ಕೊನ್ಕೋನಿ ವಾಳ್ಕಿ ಊಟುಮ್ಕಿ ಇಯ್ಯಾಲ್ನೋ ? ಅನಿ ಅಡ್ಗೇಕಿ ವಾಡು - ಮೀಲಾ ಎನ್ನೀ ರೊಟ್ಳುನ್ಡಾವಿ ? ಪಾಯಿ ಸೂಸ್ಕೋನಿ ರಾಂಡ್ರಿ ಅನೆ . ವಾಳು ತಿಲ್ಚ್ಕೋನಿ ವಚ್ಚಿ - ಐದು ರೊಟ್ಳು ರೊಂಡು ಶಾಪ್ಲು ಅನ್ರಿ . ^{39 40 41} 39-40 ಅಪ್ಡು ಯೇಸು ವಾಳ್ಕಿ - ಅಂದ್ರು ಪಸ್ರುಕೊಸ್ವುಮಿಂದ ಪಂಕ್ತಿ ಪಂಕ್ತಿಯಾಯಿ ಕುಚ್ಚೋನ್ನಿ ಅನಿ ಅಪ್ಪಣ್ಮು ಇಚ್ನಪ್ಡು ಜನಲು ಪಂಕ್ತಿಕಿ ನೂರ್ಲಾಕ ಯಾಬೈಲಾಕ ಸಾಲುಸಾಲಾಯಿ ಕುಚ್ಚೋನ್ರಿ . 41 ಆಮಿಂದ ಯೇಸು ಆ ಐದು ರೊಟ್ಳು ರೊಂಡು ಶಾಪ್ಲುನಿ ಸೀಸ್ಕೋನಿ ಆಕಾಶ್ಮು ತೊಟ್ಗಿ ಸೂಸಿ ದೇವುಡು ಸ್ತೋತ್ರುಮು ಸೇಸಿ ಆ ರೊಟ್ಳುನಿ ಇರ್ಸಿ - ಮೀರು ಜನಲ್ಕಿ ಪಂಚಂಡ್ರಿ ಅನಿ ಶಿಷ್ಯುಲು ಸೇತ್ಕಿ ಇಚ್ಚಿ ಆ ರೊಂಡು ಶಾಪ್ಲುನಿ ಅಂದ್ರುಕು ಪಂಚಿಚ್ಚೆ . ^{42 43 44} 42-43 ವಾಳಂದ್ರು ಊಟ್ಮು ಸೇಸಿ ತ್ರುಪ್ತುಲಾಯ್ರಿ . ರೊಟ್ಳು ತುಂಡ್ಲುನಿ ಶಾಪ್ಲು ತುಂಡ್ಲುನಿ ಕೂಡಿಚ್ಚಿನ್ದಾಯಿ ಪನ್ನೆಂಡು ಪುಟ್ಟಿಲು ನಿಂಡೆ . 44 ಊಟ್ಮು ಸೇಸ್ನೋಳು ಐದು ಸಾವ್ರಾಲು ಮೊಗೋಳು . ^{45 46 47} 45 ಇದಾಯಿನ್ಮಿಂದ ಯೇಸು ತನ್ ಶಿಷ್ಯುಲ್ಕಿ - ನಾನು ಈ ಜನಲು ಗುಂಪ್ನಿ ಅಂಪಿಚ್ಚಿ ಇಡ್ಸೆ ಅಂತ್ಪದ್ಗಿ ಮೀರು ದೋಣಿನಿ ಎಕ್ಕಿ ಮುಂದ್ರಾಯಿ ಅಕ್ಡ ದಡುಮ್ಕಿ ಬೇತ್ಸಾಯಿದ್ಮುಕಿ ಪೋಂಡ್ರಿ ಅನಿ ಬಲ್ವಂತ್ಮು ಸೇಸೆ . 46 ಯೇಸು ಜನಲ್ಕಿ ಅಪ್ಪಣ್ಮು ಇಚ್ಚಿನ್ಮಿಂದ ಪ್ರಾರ್ಥ್ನುಮು ಸೇಸೆದಾನ್ಕಾಯಿ ಬೆಟ್ಟುಮ್ಕಿ ಪಾಯೇ . 47 ಪೊದ್ದು ಮುಳ್ಗಿನ್ಮಿಂದ ದೋಣಿ ಸಮುದ್ರುಮು ದೆಗ್ರ ವುಂಡೆ , ಯೇಸು ಒಕ್ಡೇ ದಡುಮ್ಲ ವುಂಡೆ . ^{48 49 50} 48 ಎದ್ರು ಗಾಲಿ ಬೀಸ್ತವುನ್ಡೀದಾನ್ನಿಂಚ ಶಿಷ್ಯುಲು ಪುಟ್ಟಿ ಏಸಿ ಏಸಿ ಒದ್ದಾಡೆದಾನ್ನಿ ಯೇಸು ಕನಿ ಹೆಕ್ವ ತಕ್ವ ರಾತ್ರಿ ನಾಲ್ಗ್ನೆ ಜಾವುಮ್ಲ ಸಮುದ್ರುಮು ಮಿಂದ ನಡ್ಸಿ ವಾಳ್ ತೊಟ್ಗಿ ವಚ್ಚಿ ವಾಳ್ನಿ ದಾಟಿ ಮುಂದ್ರುಕಿ ಪೋವಾಲನುಂಡೆ . 49 ಸಮುದ್ರುಮು ಮಿಂದ ನಡ್ಸೆ ಯೇಸುನಿ ಕನಿ ದೈಮು ಅನಿ ಭಾವಿಚ್ಚಿ ಅಬ್ಬರಿಚ್ಚಿ ಕೂಸೇ , ವಾಳಂದ್ರು ಯೇಸುನಿ ಸೂಸಿ ತತ್ತರಿಚ್ರಿ . 50 ಯೇಸು ತಕ್ಷಣ್ಮು ವಾಳ್ನಿ ಮಾಟ್ಲಾಡಿಚ್ಚಿ ವಾಳ್ಕಿ - ದೈರ್ಯುಮಾಯುಂಡನ್ಡ್ರಿ , ನಾನು , ಅಂಜೋದಂಡ್ರಿ ಅನಿ ಸೊಪ್ಪೆ . ^{51 52} 51 ಆಮಿಂದ ಯೇಸು ದೋಣಿನಿ ಎಕ್ಕಿ ವಾಳ್ ದೆಗ್ರುಕಿ ವಚ್ಚಿನ್ಮಿಂದ ಗಾಲಿ ನಿಲ್ಚ್ಪಾಯೇ . ಅಪ್ಡು ವಾಳು ವಾಳ್ನೋನ ಬಹಳ್ಮಾಯಿ ಬೆರ್ಗಾಯ್ರಿ . 52 ಎಂದ್ಕಂಟೆ ವಾಳು ರೊಟ್ಟ ವಿಷಯುಮ್ಲ ಮಹತ್ಕಾರ್ಯುಮ್ನಿ ಗ್ರಹಿಚ್ಚ್ಲೇದು , ವಾಳ್ ಮನ್ಸು ರಾಯಾಯುಂಡೆ . ^{53 54 55} 53 ವಾಳು ಸಮುದ್ರುಮ್ನಿ ದಾಟಿ ಗೆನೆಜರೆತ್ ದೇಶ್ಮು ದಡುಮ್ಕಿ ಮುಟ್ಟಿ ದೋಣಿನಿ ಕಟ್ರಿ . 54-55 ವಾಳು ದೋಣಿಯಿಂಚ ದಿಗಿ ತಕ್ಷಣ್ಮೆ ಜನಲು ಯೇಸು ಗುರುತ್ನಿ ಪಟ್ಟಿ ಆ ಸೀಮ್ಲಾಅಂತ ಪಾರಡ್ತ ಪೈಲಾ ನೆಟ್ಗೆಲೇನಿನೋಳ್ನಿ ದೋಲಿ ಮಿಂದ ಏಸ್ಕೊನಿ ಯೇಸು ಯಾನ್ಯಾನ ವುಂಡಾಡನಿ ಅಡುಗ್ರೋ ಆನ್ ಆನ್ಕು ಸೀಸ್ಕೋನಿ ಪಾಯ್ರಿ . ⁵⁶ 56 ಯೇಸು ಯಾವ್ ಗ್ರಾಮಲ್ಕು ಯಾವ್ ಊರು ಹಳ್ಳಿಲ್ಕು ಪಾಯ್ನೋ ಆನೋಳು ರೋಗಿಲ್ನಿ ಪೇಟೆಲ್ಲಾ ಪೆಟ್ಟಿ - ನೀ ಬಟ್ಳು ಗೊಂಡೆನಾಯ್ತೆನು ಮುಟ್ಟಿಯಾಲನಿ ಯೇಸುನಿ ಬೇಡ್ಕೊನ್ರಿ , ಯೇಸುನಿ ಮುಟ್ನೋಳನ್ದ್ರು ಸ್ವಸ್ಥ್ಮಾಯ್ರಿ .