^{1 2} 1.ಆನಾ ಸೇರ್ನಾವಾಳoದ್ರುಲೇಸಿ ಆತುಡ್ನಿ ಪಿಲಾತುಡ ದೇಗ್ಗರ್ಗಿ ತಿಸ್ಗಾನಿ ಪಾಯಿ-ಊಡು ತಾನೇ ಕ್ರೀಸ್ತುಡನ 2.ಒಕ್ಕ ಅರಸುಡೈನಾನನಿ ಸೋಪ್ತಾ ಕೈಸರುಡ್ಗಿ ತೆರಿಗೆಇಗುಡ್ದನಿ ಬೋದಿಸ್ತಾ ಮಾ ದೇಶಮೊಳ ಮಂಸು ಸೆಡ್ಪೆದಾನ್ನಿ ಮಾಮು ಸೂಸ್ನಾಮು ಅನಿ ಆತುಡ ಪೈನಾ ದೂರು ಸೋಪ್ಪೆದಾನ್ಗಿ ತೊಡಗ್ನಾಳು. ^{3 4 5} 3.ಪಿಲಾತುಡು ಆತುಡ್ನಿ ನುವ್ವ ಯೆಹೂದ್ಯಲ ಅರಸುಡು ಹೌನೋ ಅನಿ ಸೋಪ್ಪಾಲು ಆತುಡು- 4.ನುವ್ವೇ ಸೋಪ್ನಾವು ಅನಿ ಉತ್ತರಂ ಇಚ್ಚಾಡು.ಪಿಲಾತುಡು ಮಹಾಯಾಜಕುಲ್ಗು ಜನಾಲ್ ಗುಂಪ್ಗು-ಈ ಮಾನುಷ್ಯಡ್ಲಾ ನಾಕಿ ಯಾವ ಅಪರಾಧಮು ಕಂಬಿಚ್ಚಟ್ಲೇದು ಅನಿ ಸೋಪ್ನಾವು. 5.ದನ್ಗೆ ವಾಳು-ಗಲಿಲಾಯಂಲಾ ಪ್ರಾರಂಭಂಸೇಸಿ ಈನ್ತಂಕ ಯೂದಾಯ ಸೀಮೆಲಂತ ಊಡು ಭೋಧನೆ ಸೇಸ್ತೆ ಜನಲ ಮನಸ್ನಿ ಕದಲಿಸ್ತಾಡು ಅನಿ ಇಂಕ ಒತ್ತಿ ಸೋಪ್ನಾಡು. ^{6 7} 6.ದೀನ್ನಿ ಪಿಲಾತುಡು ಇನಿ-ಈ ಮನುಷ್ಯಡು ಗಲಿಲಾಯಂಮೋಡೆ ಅನಿ ವಿಚಾರಿಚ್ಚಿ 7.ಊಡು ಹೆರೋದುಡ ಅಧಿಕಾರಂಗಿ ಲೊಗಪಡಿ ಅನಿ ತಿಳ್ಸಾಗನಿ ಆತುಡ್ನಿ ಹೆರೋದುಡ ದೇಗ್ಗರ್ಗಿ ಅಮ್ಪಿಚ್ನಾಡು.ಹೇರೋದುಡು ಆ ದಿವಸಂಲಾ ಯೆರುಸಲೇoಲನೆ ಉನ್ನಾಡು. ^{8 9 10} 8.ಹೇರೋದುಡು ಯೇಸುನಿ ಸೂಸ್ನಾಪ್ದು ನಿಂಡ ಸಂತೋಷಂಪೋಡ್ನಾಡು;ಯಂದ್ಗಂಟ್ಟೆ ಆತುಡ ವಿಷ್ಯಂಗ ಅನೇಕ ಸಂಗತಿಲ್ನಿ ಇನಿಂದಾನಿಂಕ ಆತುಡ್ನಿ ಸೋಡಾಲನಿ ನಿಂಡ ಕಾಲಂನಿಂಕ ಅಪೇಕ್ಷಿಚ್ಚಾಡು.ಆತುಡ್ನಿoಕ ಯವ್ವಡೈನಾ ಒಕ್ಕ ಸೂಚಕ ಕಾರ್ಯಮೈಯದಾನಿ ಸೋಡಾಲನಿ ನಿರೀಕ್ಷಿಚ್ಚಾಡು. 9.ಆಯ್ತೆ ವಾಡು ಅನೇಕ ಮಾಟ್ಲ್ನಿಂಕ ಆತುಡ್ನಿ ಪ್ರಶ್ನೆಸೇಸಿನ್ದಾಂಗು ಆತುಡು ವಾಡ್ಗಿ ಏಮಿ ಉತ್ತರಂ ಇಲೇದು. 10.ಮಹಾಯಾಜಕುಲ್ಗು ಶಾಸ್ತ್ರೀಲ್ಗು ನಿಲ್ಚಗನಿ ಆತುಡಪೈನ ನಿಂಡ ಬಲಂಗ ದೂರು ಸೋಪ್ತಾವುoಡ್ರಿ. ^{11 12} 11.ಕೊನ್ಗಿ ಹೇರೋದುಡು ತನ್ನ ಸಿಪಾಯಿಲ್ನಿ ಕೂಡ್ಗಾನಿ ಆತುಡ್ನಿ ತಿರಸ್ಕರಿಚ್ಚಿ ಹಾಸ್ಯಂಸೇಸಿ ಶೋಭಯಮಾನಂಆಯ್ನಾ ಉಡುಪ್ನಿ ಎಬಿಚ್ಚಿ ಪಿಲಾತುಡ ದೇಗ್ಗರ್ಗಿ ತಿರ್ಗಿ ಅಂಪಿಚ್ಚಿಚ್ಚಾಡು. 12.ಅದೇ ದಿನಂಲಾ ಹೆರೋದುಡು ಪಿಲಾತುಡು ಒಕ್ಕಳಿಕೋಕ್ಕಳು ಸ್ನೇಹಿತುಲೈನಾಳು;ದಾನ್ಗಿಂತ ಮೊದ್ಲು ವೈರಿಲೈoಡ್ರಿ. ^{13 14} 13.ತರುವಾತಂ ಪಿಲಾತುಡು ಮಹಾಯಜಕುಲ್ನಿ 14.ಅಧಿಕಾರಿಲ್ನಿ ಪ್ರಜೆಲ್ನಿ ಒಟ್ಟಂಗ ಪಿಲ್ಬಿಚ್ಚಿ ವಾಳ್ಗಿ-ಈ ಮನುಷ್ಯಡು ಪ್ರಜೆಲ್ನಿ ತಿರ್ಗಿಪೋಡಟ್ಟ ಸೇಸ್ತಾಡು ಅನಿ ಊಡ್ನೀ ನಾ ದೇಗ್ಗರ್ಗಿ ತಿಸ್ಗಾವಚ್ಚಾರುಕದ ;ಮೀಳು ಊಡಪೈನಾ ತಿಸ್ಗಾವಚ್ಚನ ದೂರ್ಲಾ ವಿಷ್ಯಂಗ ನೀನು ಮೀ ಮುಂದ್ರ ವಿಚಾರಣೆಸೇಸ್ನಾ ಊಡ್ಲಾ ಒಕ್ಕ ತಪ್ಪೈನನಾಕಿ ಕಂಬಿಚ್ಚಲೇದು. ^{15 16 17} 15.ಹೇರೋದುಡ್ಗೈನ ಕಂಬಿಲೇ; ವಾಡು ಊಡ್ನೀ ಯನ್ಕಿತಿರ್ಗಿ ಮಾ ದೇಗ್ಗರ್ಗಿ ಅಮ್ಪಿಚ್ನಾಡುಕದ.ಊಡು ಮರಣಂದಂಡನ್ಗಿ ಯೋಗ್ಯಂಮೈನದ್ದೆಮೋ ಸೇಸ್ನೋಡ್ಕಾದನಾಯ. 16.ದಾನ್ನಿಂಕ ನೀನು ಊಡ್ನೀಕೊಟ್ಬಿಚ್ಚಿ ಉಡ್ಸುಸ್ತಾನು ಅನಿ ಸೋಪ್ನಾಡು. ^{18 19} 18.ಆಯ್ತೆ ವಾಳು-ವಾಡ್ನಿ ಸoಪಿಚ್ಚಿ ,ಮಾಕಿ ಬರಬ್ಬುಡ್ನಿ ಉಡ್ಸಿ ಅನಿ ಒಟ್ಟಂಗ ಕೂಸ್ನಾಳು. 19.ಈ ಬರಬ್ಬುಡ್ನಿ ಆ ಪಟ್ಟಣoಲಾ ನಡ್ಸನಾ ಒಕ್ಕಾನೋಕ್ಕ ದಂಗೆಯ ನಿಮಿತ್ತಮೈ ಕೊಲೆ ನಿಮಿತ್ತಮೈಯು ಸೇರೆಲಾ ಎಸ್ನಾಳು. ^{20 21 22} 20.ಪಿಲಾತುಡು ಯೇಸುನೀ ಉಡ್ಬಿಚ್ಚಾಲನಿ ಮನುಸು ಉಲ್ಲವಾಳ್ಳವಾಡೈ ತಿರ್ಗಿ ವಾಡ ಜೊತ್ಲ ಮಾಟಾಡ್ನಾಡು. 21.ಆಯ್ತೆ ವಾಳು-ವಾಡ್ನಿ ಶಿಲುಬೆಗಿ ಎಬಿಚ್ಚು,ಶಿಲುಬೆಗಿ ಎಬಿಚ್ಚು ಅನಿ ಕೂಸ್ತಾವುoಟಾರು. 22.ವಾಡು ಮೂಡ್ನೆಸಾರಿ-ಯಂದ್ಗು?ಸೆಡ್ಡೆದೇಮಿಸೇಸ್ನಾನು?ನೀನು ಊಡ್ಲಾ ಮರಣದಂಡನಾನ್ಗಿ ತಕ್ಕ ಅಪರಾಧಮೆಮೊ ಸೂಡ್ಲೆದು;ದಾನಿಂಕ ಊಡ್ನೀಕೊಟ್ಟಿಚ್ಚಿ ಉಡ್ಸಿಉಡ್ಸ್ತಾನು ಅನಿ ವಾಳ್ಗಿ ಸೋಪ್ನಾಡು. ^{23 24 25} 23.ಆಯ್ತೆ ವಾಳು ಪೆದ್ದ ಕೂಸಾಟ್ಮು ಸೇಸ್ತಾ-ವಾಡ್ನಿ ಶಿಲುಬೆಗಿ ಎಬಿಚ್ಚಾಲಾನಿ ಅಡಿಕ್ಕಾನಿ ಬಲ್ವಂತಂ ಸೇಸ್ನಾಳು;ವಾಳ ಕೂಸಾಟ್ಮು ಗೆಲ್ಚಿoದ್ದಿ. 24.ಪಿಲಾತುಡು-ಮೀಳು ಅಡಿಕ್ಕನಟ್ಲೇ ಕಾನಿ ಅನಿ ನಿರ್ಣಯೆಚ್ಚಿ 25.ದಂಗೆ ಕೊಲೇಲಾ ನಿಮಿತ್ತಂಗ ಸೆರೆಇಂಟ್ಲಾ ಪೋಡ್ನ ಆ ಮನುಷ್ಯಡ್ನೀ ವಾಳು ಅಡಿಕ್ಕಂಟಉನ್ನ ಪ್ರಕಾರಂ ಉಡ್ಸಿಚ್ಚಿ ಯೇಸುನಿ ವಾಳ ಚಿತ್ತನುಸಾರoಗ ಒಪ್ಪಿಚ್ನಾಡು. ²⁶ 26.ವಾಳು ಆತುಡ್ನಿ ತಿಸ್ಗನಿ ಪಾತುನ್ನಪ್ದು ಸೇನ್ನಿಂಕ ವಸ್ತುಂಡ ಕುರೇನೆಪಟ್ಟಣಂನ ಸೀಮೋನನವಾಡು ಪೊಟ್ಟಿ ಶಿಲುಬೆನಿ ವಾಡ ಪೈನಪೆಟ್ಟಿ ಯೇಸುನ ಯಂಕ ಮೊಸ್ಗನಿ ವಚ್ಚಅಟ್ಟ ಸೇಸ್ನಾರು. ^{27 28} 27.ಜನಲು ಸ್ತ್ರೀಯಲುಪೆದ್ದ ಗುಂಪಯ್ಯಿ ಆತುಡ ಯಂಕ ವಚ್ಚಾರು.ಆ ಸ್ತ್ರೀಲು ಎದಕೊಟ್ಗoಟ್ಟ ಆತುಡ ವಿಷಯಂಲಾ ಗೋಳಾಡ್ತಾ ಉಂಡ್ರಿ. 28.ಯೇಸು ವಾಳ ಕಡ್ಗಿ ತಿರ್ರಿಕ್ಕಾನಿ-ಯೆರುಸಲೆಮ್ನ ಸ್ತ್ರೀಲೇ,ನಾಗೊಸ್ಕರಂ ಎಡoಡ್ಡಿ,ಮಿಕೊಸ್ಕರಂ ಮೀ ಬಿಡ್ಲಗೊಸ್ಕರಂ ಎಡoಡ್ಡಿ. ^{29 30 31} 29.ಯಂದ್ಗoಟ್ಟೆ ಬಂಜೇಲು ನಿಂಡ್ಮನಸಿಕಾಗುನ್ನವಾಳು ಪಾಲ್ತಾಗ್ನವಾಳು ಧನ್ಯಲು ಅನಿ ಜನಲು ಸೋಪ್ಪ ದಿನಲು ವಸ್ತಾವಿ. 30.ಆ ಕಾಲಮ್ಲಾ ಜನಲು-ಕೊಂಡ್ಲೇ,ಮಾ ಪೈನಪೊಡoಡ್ಡಿ;ಗುಡ್ಲೇ,ಮಮ್ಮಲ್ನಿ ಮುಸ್ಗಂಡ್ಡಿ ಅನ್ನಾರು. 31.ಮಾನು ಪಚ್ಚಿದೈನಪ್ದು ಇಂತಂತ ಸೇಸ್ತೆ ಮಾನು ಎಂಡಿನಪ್ಡು ಎಮ್ಕಾವಚ್ಚು?ಅನ್ನಾಡು. ³² 32.ಆತುಡ ಜೊತ್ಲಾ ಸಂಪ್ಪೆದಾನ್ಗೈ ದುಷ್ಕರ್ಮಿಲೈoಟ್ಟೆ ಬೇರೆ ಇದ್ದರ್ನಿ ತಿಸ್ಗನಿ ಪೈನಾರು. ^{33 34} 33.ವಾಳು ಕಪಾಲಮನ ಸ್ಥಳಂಗಿ ವಚ್ನಪ್ದು ಆನ ಅತುಡ್ನಿ ಆ ದುಷ್ಕರ್ಮಿಲ್ನಿ ಶಿಲುಬೆಗಿ ಎಸ್ನಾರು,ಒಕ್ಕಡ್ನಿ ಆತುಡ ಕುಡ್ದಿಕ್ಕಿ ಒಕ್ಕಡ್ನಿ ಎಡಂತಟ್ಟು ಎಸ್ನಾಳು. 34.ಅಪ್ಡು ಯೇಸು ತಂಡ್ರಿಯೇ,ವಾಳ್ಗಿ ಕ್ಷಮಿಚ್ಚು ;ವಾಳು ಎಮ್ಸೇಸ್ತಾಮನಿ ತೆಲಿಗುನ್ನ ಅನ್ನಾಡು.ಆಮಂಕ ಆತುಡ ಬಟ್ಟಲ್ನಿ ಪಾಲುಸೇಸಿ ಚೀಟು ಎಸ್ನಾಳು.ಜನಲು ಸೂಸ್ತಾ ನಿಲಚ್ಗನ್ನಾರು. ³⁵ 35.ಇದಿಕಾಗುನ್ನ ಅಧಿಕಾರಿಲು ಹಾಸ್ಯಂಸೇಸಿ-ವಾಡು ಮಲೊಕ್ಕಳ್ನಿ ರಕ್ಷಿಚ್ಚಾಡು;ವಾಡು ದೇವುಡರ್ಪಗನ್ನಕ್ರೀಸ್ತುಡು ಆಯoಟ್ಟೆ ತನ್ನನ್ನಿ ತಾನೇ ರಕ್ಷಿಚ್ಗನ್ನಿ ಅನ್ನಾರು. ^{36 37 38} 36.ಸಿಪಾಯಿಲು ಆತುಡ್ನಿ ಹಾಸ್ಯಂಸೇಸ್ನಾಳು;ವಾಳು ಆತುಡ ದೇಗ್ಗರ ವಚ್ಚಿ ಪುಲ್ಪು ಮದ್ಯಮ್ನಿ ಸೂಪಿಚ್ಚಿ- 37.ಮೀಳು ಯೆಹೊದ್ಯಲ ಅರಸುಡೈoಟ್ಟೆ ನಿನ್ನಿ ರಕ್ಷಿಚ್ಗೋ ಅನ್ನರು. 38.ಇಂತೆಕಾದನಿ ಆತುಡ ಪೈನ್ಲ- ಊಡ ಯೆಹುದ್ಯಲ ಅರಸುಡು ಅನ್ನೈ ಒಕ್ಕ ವಿಳಾಸಂಉಂಡ್ಯ. ^{39 40 41} 39.ತೂಗೆಸ್ನ ಆ ದುಷ್ಕರ್ಮಿಲ ಒಕ್ಕಡು ಆತುಡ್ನಿ ದೂಷಿಚ್ಚಿ-ನುವ್ವ ವಚ್ಚಕಾಪೈಯ್ಯ ಕ್ರೀಸ್ತುಡುಕಾದೇ,ನಿನ್ನಿ ರಕ್ಷಿಚ್ಕೋ,ನನ್ನಿ ರಕ್ಷಿಚ್ಚು ಅನಿ ಸೋಪ್ಪಿನ್ದಾಂಗು 40.ರೊಂಡ್ನೆದೈ ವಾಡ್ನಿ ಗದರಿಚ್ಚಿ-ನುವ್ವ ಅದೇ ದಂಡನೆಲಉಂಡ್ನಪ್ದು ದೇವುಡ್ಗಿ ದಡ್ಸಲೆದೋ? 41.ನೀನಂತು ನ್ಯಾಯಾಂಗ ದಂಡನೆಲಾಉಂಡಾಮು,ಮಾಮು ಸೇಸಿನ್ದಾಂಗು ತಕ್ಕ ಪ್ರತಿಫಲoನಿ ಹೊಂದ್ತಾ ಉಂಡಾಮು;ಈತುಡೈನ ಕಾದೆಮೋ ಸೇಯ್ಲೇದು ^{42 43} 42.ಅನಿ ಸೊಪ್ಪಿ-ಯೇಸುವೆ,ನುವ್ವ ನೀ ರಾಜ್ಯಂನೀ ಪಡ್ಸ್ನವಾಡೈ ವಚ್ಚಪ್ದು ನನ್ನು ನೆನಪಿಚ್ಕೋ ಅನ್ನಾಡು. 43.ಅಂದ್ಗೆ ಯೇಸು- ಈ ಪದ್ದೆ ನಾ ಜೊತ್ಲಾ ಪರದೈಸಿಲಉಂಟಾವು ಅನಿ ನೀಕಿ ಸತ್ಯಂಗ ಸೋಪ್ತಾನು ಅನಿ ಉತ್ತರಂಇಚ್ಚಾಡು. ^{44 45} 44.ಇಂತಿಟ್ಲಾ ಹೆಚ್ಚುಕಡ್ಮಿ ಮಧ್ಯಾಹ್ನಆಯಾ. 45.ಅಪ್ಪಡ್ನಿoಕ್ಕ ಸೂರ್ಯಡು ಕಾಂತಿಗುಂದಿ ಮೂಡು ಘಂಟ ತನ್ಕ ಆ ದೇಶಂನ ಪೈನಂತ ಸೀಗ್ಟಿಮೂಸುಂಡೆ;ಇದಿಕಾದನಿ ದೇವಾಲಯಂನ ತೆರೆಯ ಮದ್ಯ ಹರ್ಸಿ ಪಾಯ. ^{46 47} 46.ಆಮಂಕ ಯೇಸು-ತಂಡ್ರಿಯೇ,ನಾ ಆತ್ಮಮ್ನಿ ನೀ ಸೇತ್ಗಿ ಒಪ್ಪಿಚ್ಚಿಸ್ತಾನು ಅನಿ ಮಹಾಧ್ವನಿನಿಂಕ ಕೂಸ್ನಾಡು;ದೀನ್ನಿ ಸೂಪ್ಪಿನ ಪೈನಾ ಪ್ರಾಣಂ ಉಡ್ಸನಾಡು. 47.ಶತಾಧಿಪತಿಯು ನಡ್ಸನಾ ಸಂಗತಿನಿ ಸೂಸಿ-ಈ ಮನುಷ್ಯಡು ಸತ್ಪುರುಷುಡೆ ನಿಜo ಅನಿ ದೇವುಡ್ನೀ ಕೊಂಡಾಡ್ನಾಡು. ^{48 49} 48.ಈ ಸೂಸೆಕೈ ಕೂಡಿವಚ್ಚಿನ ಜನಲಂದ್ರು ನಡ್ಸ್ನಾ ಸಂಗತಿನಿ ಸೂಸಿ ಎದಕೊಟ್ಗಂಟ ಯನ್ಕಿತಿರ್ಗಿ ಪೈನಾರು. 49.ಇದಿಕಾಗುನ್ನ ಆತುಡ ಪರಿಚಿತಿವಾಳoದ್ರು ಗಲಿಲಾಯಂನಿಂಕ ಆತುಡ ಯನ್ಕ ವಚ್ಚುಂಡ್ಡ ಸ್ತ್ರೀಯಲು ದೂರಂಲಾ ನಿಲ್ಚಿ ಈ ಸಂಗತಿಲ್ನಿ ಸೂಸ್ತಾವುoಡ್ರಿ. ^{50 51} 50-51.ಅರಿಮಥಾಯoಮನ ಯಹೂದ್ಯಲದೊಕ್ಕಟಿ ಪಟ್ಟಣಂನಾ ಒಕ್ಕ ಮನುಷ್ಯಡುಂಡಾಡು;ವಾಡ ಪೇರು ಯೋಸೆಫಡು.ವಾಡು ಹಿರೀಸಭೆವಾಡು,ಉತ್ತಮುಡು,ಸತ್ಪುರುಷುಡು,ದೇವುಡ ರಾಜ್ಯಂನಿ ಎದುರ ಸೂಸ್ತಾವುಂಟಾಡು;ಹಿರೀಸಭೆವಾಳ ಆಲೋಚನೆಗು ಕೃತ್ಯಂಗು ಸಮ್ಮತಿ ಪಟ್ಟುoಡ್ಲೇದು. ^{52 53} 52.ವಾಡು ಪಿಲಾತುಡ ದೇಗ್ಗರ್ಗಿ ಪಾಯಿ ಯೇಸುನ ದೇಹಾಂನಿ ತಾನ್ಗೀ ಇಚ್ಬಿಯಾಲನಿ 53.ಬೇಡ್ಗನಿ ದಾನ್ನಿ ದಿಗ್ಬಿಚ್ಚಿ ನಾರುಮಡಿಲಾ ಸುತ್ತಿ ಬಂಡೆಲಾ ತೊಡ್ನ ಸಮಾಧಿಲ ಪೆಟ್ಟಾಡು.ದಾನ್ಲಾ ಅನ್ವರ್ಗು ಯವಲ್ನು ಪೋನ್ಗಬೆಟ್ಟುoಡ್ಲೇ. ^{54 55 56} 54.ಆ ದಿನಂಮು ಸೌರಣೆಯ ದಿನಂಆಯನ್ದೆ; ಮಲಿ ಸಬ್ಬತ್ ದಿನಂ ಪ್ರಾರಭಂಆಯಕ್ಕಿ ಕೊಂಚ್ಚಂಪದ್ದು ಮಾತ್ರಉಂಡೆ. 55.ಇಟ್ಟುಡಾಗ ಗಲಿಲಾಯಂನಿಂಕ ಆತುಡ ಜೊತ್ಲಾ ವಚ್ಚಿನ ಸ್ತ್ರೀಯಲು ಜೊತ್ಲಾ ಯನ್ಕೆಪಾಯಿ ಆ ಸಮಾಧಿನಿ ಆತುಡ ದೇಹಾಂಪೆಟ್ನಾ ರೀತಿನಿ ಸೂಸಿ ಯನ್ಕಿತಿರ್ಗಿ ವಚ್ಚಿ ಪರಿಮಳದ್ರವ್ಯಲ್ನಿ ಸುಗಂಧತೈಲಂನಿ ಸಿದ್ದಂಸೇಸ್ಗಾನ್ನಾರು.