¹ Pasninam, setolah Sabat, saat menjelang gage, pade ari petame minggu onan, Maria Magdalena wan Maria an laen pogi engkai meliat posaran onan. ² Wan, meliat, tejadiam gompa bumi an bosar kerene malaikat Duate turon tanggai surga, menjuhak wan menggulingan batu onan, lopasnan dudok di pucoknye. ³ Pemuheannye bagaikan kilat wan pokoyannye puteh bagaikan salju. ⁴ Kerene rase golak tehadapnye, sidak an menjage onan teguncang wan menjadi macam urang-urang mati. ⁵ Wan, malaikat nonan bekate ke betine-betine onan, "Gowok golak kerene doan tohu kalau kolai menulos Yesus an udah disalibkan. ⁶ Nye'e cade ade di se'en kerene Nye'e tolah bangket macam an dikatean-Nye. Ayok liat am tompat Nye'e, melelangkai. ⁷ Ocak am pogi wan padahan murid-murid-Nye bahwe Nye'e udah bangket tanggai antare urang mati, wan liat, Nye'e melohok'i di'i ke Galilea. Di so'on, kolai bakal meliat Dia. Peratianam, doan udah mengateanye ke di'i. ⁸ Wan, sidak ocak-ocak meninggolan posaran onan juan kegelak'an wan sukecite bosar; wan bekojot engkai meonjoktohu an onan ke mured-mured-Nye . ⁹ Wan,liat, Yesus menemui sidak wan bekate, "Salam!" Lopas, sidak menjuhak ke Yesus, menyonggam pehe-Nye, wan menyombah-Nye. ¹⁰ Lopasnonan, Yesus betutor ke sidak, "Gowok golak; pogi wan beritohukanlah sepedulor-sepedulor-Doan engkai pogi ke Galilea, wan di so'on, sidak bakal meliat Doan. ¹¹ Sementare sidak pogi, bebeyepe penjage pogi ke kute wan memborektohu domong-domong kepale tontang semue hal an tolah tejadi. ¹² Wan, ketike sidak di kumpulan besesame padangan tetuhe-tetuhe. Setolah berundeng, lopas sidak meenji'i banyak duet ke padangan penjage onan, ¹³ wan beromong, "Kateanlah, Mured-mured Yesus menjuhak pade malam ari wan mengolet-Nye saat urang koai idok.' ¹⁴ Wan, jike hal inen kedongaian oleh gubernur, urang koai bakal meyakenkannye wan meulahdi'i cade comas. ¹⁵ Make, sidak menerime duet onan wan melakuan macam an tolah dipadahi ke sidak; wan peromongan onan agek tesobar di antare urang Yahudi sampai ari oyen. ¹⁶ Lopasnonan, kesebolas mured pogi ke Galilea, ke buket an tolah ditujuk'an Yesus ke sidak. ¹⁷ Ketike sidak meliat-Nye, sidak menyombah-Nye. Kliagak, bebeyepe ragu-ragu. ¹⁸ Lopas, Yesus menjuhak wan bekate ke sidak, "segale kuase tolah dionjok ke-Doan, di surga maupon di bumi. ¹⁹ Kerene onan, pogi am wan muredkanlah semue bangse, baptiskanlah sidak dalam name Bapa, wan Anak, wan Roh Kudus, ²⁰ ajarkanlah sidak engkai mehantek semue an Doan perintahan kedi'i; wan liatam, Daon selarat besesame di'i, bahkan sampai ke akhir zaman.