¹ Dah oyen, ketike gage menjuhak, semue domong kepale wan padangan tetuhe-tetuhe bangse onan meutek keputusan besesame mengenei Yesus engkai mehukom mati Nye'e. ² Wan, sidak mengobat Yesus, lalu meumbai wan menyerahan-Nye ke Gubernur Pilatus. ³ Ketike Yudas, an menyerahan Yesus, melihat bahwe Yesus ditentuan hukuman, nye'e meyese menyosal wan memulangan 30 kopeng pirak ke domong-domang kepale wan padangan tetuhe-tetuhe, ⁴ katenye, "Doan tolah bedusekerene darah an cade besalah." Kaliagak, sidak bekate, "Ape urusanye juan urang koai? Onan urusandi'i" ⁵ Wan, Yudas menikaman kopeng-kopeng pirak onan ke dalam Bait Allah wan meninggolannye. Lalu, nye'e pogi wan mengantong di'inye ⁶ Kliagak, domong-domong kepale meutek kopeng-kopeng pirak onan wan betutor, "cade dibonaran engkai menoyohnye dalam perbendaharaan kerene inin adelah harge darah." ⁷ Make, sidak meutek keputusan besesame wan juan duet onan, sidak memboli tanah tukang kenceng sebagai tompat kuburan engkai urang-urang asing. ⁸ onan am sobabnye, tanah onan dibsobot Tanah Darah' sampai ari oyen. ⁹ Juan demikian am, gonap am ape an dikatean Nabi Yeremia: "Dahonan , sidak meutek 30 kopeng pirak, Onanam harge engkai di'i-Nye an tolak dikirean oleh urang-urang Israel. ¹⁰ Sidak menggunean 30 kopeng pirak onan engkai memboli tanah tukang kenceng, macam an tolah Duate perintahan kedoan. ¹¹ Dahoyen, Yesus bediri di hedopan Gubernur wan Gubernur betakon ke-Nye'e, "Apekah Engkau Raja urang Yahudi?" Sahut Yesus,''Ya, macam an kolai romongan.'' ¹² Kliagak, ketike Nye'e ditudoh oleh domong-domong kepale wan padangan tetuhe, Nye'e cade menyaout ape pon. ¹³ Lopasonan, Pilatus betutor ke-Nye'e, Apekah Engkau cade mendongai betape banyaknye sidak menudoh Engkau?" ¹⁴ Namun, Yesus cade menyaout Pilatus, bahkan sutek tuduhan pon sehingge Gubernur onan sangat heran. ¹⁵ Dahoyen, pade setiap ari raye, Gubernur biase membebosan bagi urang rami, seurang tahanan an dikehondak'i oleh sidak. ¹⁶ Pade wayah onan, sidak punye seurang tahanan an tekonal, an disobot Barabas. ¹⁷ Jadi, ketike urang rami bekumpol, Pilatus betakon ke sidak, "sape an kayen kehondak'i engkai doan bebasan, Barabas atau Yesus, an disobot Kristus?" ¹⁸ Sobab, Pilatus tohu bahwe kerene iri, sidak tolah menyorahan Yesus kenye'e. ¹⁹ Ketike Pilatus tongah dudok di kurusi pengadilan, bininnye mengirem posan kenye'e, "gowok lakuan ape pon tehadap Urang bonar onan. Sobab, doan tolah menderite banyak hal ari oyen dalam mimpi kerene Nye'e. ²⁰ Kliagak, domong-domong kepale wan padangan tetuhe meyakinan urang rami engkai meminte Barabas wan mebunoh Yesus. ²¹ Gubernur betakon ke sidak, "an mene tanggai kedu'e urang onan an kayen kehondak'i engkai doan bebosan bagi kayen? Dan, sidak bekate ,"Barabas!" ²² Pilatus betutor ke sidak," Kalau camonan, ape an haros doan lakuan juan Yesus, an di sobot Kristus?" Sidak semue betutor "Salibkan Dia!" ²³ Wan, Pilatus betakon "Meape? Nye'e tolah melakuan kejohatan ape?" Kliagak, sidak beciak'an lobeh bogai lagek, "Salibkan Dia!" ²⁴ Ketike Pilatus meliat bahwe nye'e cade menyelosaian ape pon, malah kerusuhan mulai tejadi, nye'e meutek aek wan mebasok kukotnye di hedopan urang rami ona wan betutor, "Doan cade bessalah pucok darah Urang inen. Onan urusandi'i surang!" ²⁵ Wan, semue urang onan menyauot, "Darah-Nye ade pucok urangkoai wan bebiak-bebiak urangkoai!" ²⁶ Lopas, Pilatus mebebosan Barabas bagi sidak wan setolah mencambuki Yesus, Pilatus menyorahan Dia engkai disalibkan. ²⁷ Lopas nan , padangan tentare gubernur meumbai Yesus ke markas kediyoman gubernur wan mengumpulan seluroh pasukan Romawi mengelileng Dia. ²⁸ Sidak melopasan pokoyan Yesus wan memakaiyan jubah ungu ke-Nye'e. ²⁹ Wan, seudah meanyam sebutek mahkota beduri besame-same, sidak memakaian di kepale Yesus, sebatang poreng pade kukot kanan-Nye, wan besujod di hedopan-Nye'e, wan mengejek Dia, romong sidak, "Salam Raja urang Yahudi!" ³⁰ Sidak meludahi-Nye, meutek poreng onan, lalu memungkalnye ke kepale-Nye. ³¹ Setolah sidak mengejek Dia, sidak melopasan jubah ungu onan tanggai Yesus, wan memakaian-Nye surang, wan meumbai-Nye pogi engkai menyalibkan-Nye. ³² Ketike padangan tentare onan keluar, siadak menemui seurang laki-laki tanggai Kirene an bename Simon. Sidak memakse Simon engkai memikol salib Yesus. ³³ Wan, ketike sidak tibe di sutek tompat an bename Golgota, an berati "Tompat Tengkorak", ³⁴ sidak meonjok-Nye anggur engkai di minom an di campor juan empodu, wan setolah meyesenye, Nye'e cade hondak meminomnye. ³⁵ Ketike sidak menyalibkan Yesus, sidak membagi-bagian pekoyan-Nye di antare sidak jauan membuang undi. ³⁶ Lopasnan, dudok wan meleliati-Nye di so'an. ³⁷ Wan, di pucok kepale-Nye, sidak memasang tudohan tehadap-Nye, "OYANAM YESUS, RAJA URANG YAHUDI." ³⁸ Pade saat onan, ade du'e penjohat an disalibkan besesame juan Yesus. Seikok di sebolah kanan wan an seikok di sebolah kibe. ³⁹ Wan, urang-urang an lalu menghujat Dia sambel menggeleng-gelengan kepale, ⁴⁰ wan betutor, "Engkau an bakal merobahan Bait Allah wan membangunnye ulang dalam tiige ari, selamatan am di'i-Mu seurang! Jike Engkau Anak Allah, turunanam tanggai salib onan!" ⁴¹ Macamonan juge domong-domong kepale, besesame ahli-ahli Taurat, wan padangan tetuhe-tetuhe meejek Yesus, kate sidak, ⁴² Nye'e menyelamotan urang laen, tetapi Nye'e cade bise menyelamotan Di'i-Nye seurang. jike Nye'e adelah Raja Israel, biarlah Nye'e turon tanggai salib onan ninam wan kite bakal pecaye ke-Nye'e ⁴³ Nye'e pecaye ke Allah, make biaram Allah menyelamotan Nye ninam, jike Allah mekehondak'i-Nye. Kerene Nye'e seurang mengatean ' Doan adelah Anak Allah.''' ⁴⁴ Padangan pejabat an disalibkan juan Dia juge me'ejek-Nye ⁴⁵ Ninam, tanggai wayah keonam, kegolapan pucok wayah sembilan. ⁴⁶ Kire-kire, pade wayah kesembilan, Yesus berseru juan suare an bogai, kete-Nye, "Eli,Eli, lama sabakhtani?" an artinye, "Allah-Ku, Allah-Ku, mengape Engkau meninggolan Aku?" ⁴⁷ Wan, bebeyepe tanggai sidak an bediri di so'on, ketike sidak mendongai onan, sidak beromong, "urang inen tongah menalau Elia." ⁴⁸ Tibe-tibe, seikok tanggai sidak bekojot, wan meutek bunge karang, membasahinye juan anggur asam, wan mengobatnye pade sebutek poreng, wan meonjoknye ke Yesus engkai diminom. ⁴⁹ Kliagak, an selobehnye beromong, "ayom kite liat, apekah Elia bakal menjuhak engkai menyelamotan-Nye. ⁵⁰ Wan Yesus berseru sebakal lagek juan suare bogai wan menyerahan Roh-Nye. ⁵¹ Wan, liat, tirai dalam Bait Allah rarak menjadi du'e butek, tanggai pucok sampai ke babah, wan bumi beguncang, wan batu-batu tebolah. ⁵² Posaran-posaran tebukak, wan rami bukang urang-urang suci an tolah mati dibangkitkan. ⁵³ Wan, setolah keluar tanggai posaran-posarannye Yesus, sidak tamak ke kute suci wan mempeliatan di'i ke rami urang. ⁵⁴ Dahoyen, kepale pasuk'an, wan sidak an besesame juannye mengawasi Yesus, ketike sidak meliat gompa bumi wan segale hal an tejadi inen, menjadi sangat golak wan bekate, "Banar, Nye'e adelah Anak Allah!" ⁵⁵ Di so'on, ade rami betine an meliat tanggai jowoh, an memogi'i Yesus tsnggai Galilea engkai melayani Dia. ⁵⁶ Di antare sidak ade Maria Magdalena, Maria indai Yakobus wan Yusuf, serete indai tanggai biak-biak Zabedeus. ⁵⁷ Ketike ari mule malam, menjuhak am seurang an kaye tanggai Arimatea bename Yusuf, an juge tolah menjadi mured Yesus. ⁵⁸ Nye'e pogi ke Pilatus wan meminte bukang Yesus. Lalu, Pilatus memerintahan supaye bukang Yesus dionjok ke Yusuf. ⁵⁹ Wan, Yusuf meutek bukang Yesus, wan membungkos-Nye juan bonang linen an beroseh, ⁶⁰ wan memelangkaian-Nye dalam posaran an baharu, punyenye'e seurang, an udah nye'e gali pade buket batu. Lalu, Yusuf menggulingan sebuah batu bosar ke lawang posaran onan wan pogi. ⁶¹ Wan, di so'on, ade Maria Magdalena wan Maria an laen tongah dudok di hedopan posaran onan. ⁶² Pade ari kolamnye, yeonan ari seudah persiopan engkai Sabat, domong-domong kepale wan urang-urang Farisi dikumpulan ke hedopan Pilatus. ⁶³ Sidak bekate, Tuan, urang koai ingat bahwe ketike si pengerampot onan lagek hidop, Nye'e kale beromong, 'Setolah tige ari, Doan bakal bangket lagek.' ⁶⁴ Kerene onan, perintahkanlah supaye posaran onan di jage sampai ari an ketige, kalau-kalau mured-mured-Nye mungken menjuhak wan mengolet-Nye, wan bekate ke urang rami, 'Nye'e udah bangket tanggai antare urang mati.' Wan, pengerampot an teraker inen bakal lobeh johat tanggai an petame ⁶⁵ Pilatus beromong ke sidak, " kolai mempunyei penjaga. Pogi, jage am sebagaimene an kolai ketohui." ⁶⁶ lopas sidak pogi wan mengamanan posaran onan besesame juan regu penjage, serete menyegel batu penutop posaran.