¹ Momang tolah dilaporan bahwe ade perzinaan diantare kolai, perzinaan an bahkan cade ade diantare bangse-bangse loyen, yeonan ade urang meutek bini apangnye. ² Wan, kolai sombong! cadekah seharosnye kolai justru berduke supaye urang an melakuan perbuatan inen disingkiran tanggai antare kolai? ³ Momang, secare jasmani doan garak, tetapi doan hader dalam roh. Wan, doan tolah menjatuhkan ukoman pucok urang an melakuan hal onan, seolah-olah doan hader. ⁴ Dalam name Duate Yesus, ketike kolai berkumpol, wan doan besesamedi'i dalam roh juan kuase Duate kite, Yesus, ⁵ doan tolah memutusan engkai menyerahan urang inen ke Iblis engkai kebinasaan dagengnye supaye rohnye bise diselamatan pade ari Duate. ⁶ Kesombongandi'i onan cade boyek. Cade tohukah kolai bahwe sediket ragi saje bakal meragikan seluroh adonan? ⁷ Beresihanlah semue ragi an lambat supaye kolai menjadi adonan baharu, macammene momang kolai cade betulak. Sobab, Kristus, Domba Paskah kite, udah disemboleh. ⁸ Kerene onan, ayok'am kite merayean pesta onan, ukan juan ragi an lambat, ukan tanggai ragi keburukan wan kejohatan, melainan juan roti cade beragi tanggai kemurnian wan kebonaran. ⁹ Doan menules kedi'i dalam suratdan: gowok begaol juan urang-urang cabul. ¹⁰ Maksoddan, ukanlah juan urang-urang cabul di dunie inen, urang-urang serakah, padangan penipu, atau jaun padangan penyombah behale. Jike benonan, kolai seharosnye keluar tanggai dunie inen. ¹¹ Amon, kanninam doan menulesan kedi'i, gowok begaol juan urang-urang an disobot dulor jike nye'e adelah urang cabul,serakah,penyombah berhala, pemfitnah, pemabok, atau penipu. Bahkan, gowok makan juan urang macam onan. ¹² Sobab, apekah urusandan menhakimi sidak an ade dalam jemaat? ¹³ Amon, Allah an bakal menghakimi sidak an di luar jemaat. Kerene onan, userlah urang an melakuan kejohatan tanggai antare kolai.