¹ Kinkini, a dhaor kami nang aman varhaoh ti nung tu na ro nu Amfipolis nang Apoliniya, ama ruva un ro ku Tasalonika, a tek kami nang ku ranghao ku tutunu ko Yahudawa ku ma rim. ² Bulus, un jataranu ku yi, ima jarayi nang yaon, an re iku rene ana Sabbaci na tar a sin dinni nang yaon awori inyyara-ivur. ³ Ima sin wonoze inyyara-ivur imi a gura sin mise yaon awoh kuma mura woh Kristoh i ninghe-inung ivurah a gura cho awori nang a yhaor ami ama kizi. Ima vereh woh, "Yesoh uru umi nang in sin wa'ah nang a yini ire ku Kristoh." ⁴ Arong a Yahudawa ami ama rume nang a vereh ami, an reh an ku mane-tih nang Bulus nang Silas, ken nang rifighi ri gbgwaki ri Helenawa ami aku rene-suwhu ama reneh, nang arong annyyhowo azongoni ami ama gbwaki u-gbwaku umi uzaku re u chunu. ⁵ A mazakuguranu, a Yahudawa ami ama zaku rih u-rumenu-ko-suwhu, a war ku woh ripuvu ri ri nang yaon, ama zika arong a yhaorr a rumi a mi a yih-yaon awori un kasuwa, a gura konkoro rirong rifighi re yhaor, an re an ku reneh riyowo rin puru ro kumi. An re an ku jarayaon unnyaku un rara ku Jason, a ma sin ringh'i woh an chidda Bulus nang Silas a wori-inung a ja'a yaon nang a yhaor. ⁶ A mazakuguranu, a dhaor kami nang ama rotoh zuwa yaon, ama kokone Jason, nang a rong a rikommina a rumi a ja'a yaon nang a yami nang kuro kumi ku ri a nasara na yaon, a seri i wum a sin vervene awoh, "A yhaor ara ami ama chone urukuyah a vandereh kun, ama nang gura ruva ina kini. ⁷ Ayhaor ara ami nang Jason ima sere yaon a seri utuma-umi u zaku ri a kumuru-ku-muranu ku Kaisar; a ku vere woh pirong uwomo irim, umi ireh Yesoh." ⁸ Na suwhu na rifighi re yhaor ami, nang na a-yami nang kuro kumi kuri a nachara na yaon, na ma cho a dhaor kami nang ama pokoro anang ara. ⁹ A mazakuguranu, a madorkoni a dhaor kami nang a yami nang kuro kumi kuri a nachara na yaon a rene Jason nang a manzu a yhaor ami an ro ikorwho u-taraka, an reh an ku jao-yaon an jara yaon. ¹⁰ A tuk-ka-tuk kami rikommina re-yhaor a rumi mi ama rene Bulus nang Silas an jara yaon un Biriya. A dhaor kami nang ama rava a tek kami, ama ka ningh'e un rangh'ao ku tutunu ku Yahudawa. ¹¹ Na kini, a Yahudawa a ra a mare ayhaor u chang'wu a pirka ari inung un Tasolinika awar ku woh ama sere avah ami nang na suwhu na yaon na sang, a sin kitara inyyara-ivur ayira na sang awar kuwoh an rek boko manang mana mari ken. ¹² Awar ken, ayhaor a dung a wori inung u yaon ama rume a nasuwhu na yaon, nang arong anyyhowo mu Helenawa nang a sing pokse nang yaon, nang arong a rumi a dun. ¹³ A mazakuguranu, a dhaor kami nang a Yahudawa mu Tasolinika mu ma yaotaoke awoh Bulus isin gura sin wa'ah avah a Siri un Biriya, an kana ite'ghe mi a zuku-ura, a gura chone na suwhu na rifighe re yhaor. ¹⁴ An re nang mazaku nazeh dhaor, rikommina re yhaor a rumi an rene Bulus i jar yhi un mana ku gbwaki, a mazakuguran Silas nang Timoti ama zomo ite'yhe mi. ¹⁵ A yhaor ami ama sin jitara Bulus ama yaongaorao yih aka rava un ro ku Atina. A dhaor kami nang ama nama guru yaon, Bulus ima miya yaon awoh an ka miya Silas nang Timoti awoh an reneh raokaorao a ruva nang yih. ¹⁶ Na kini, a dhaor kami nang Bulus iroti sin suksah yaon un Atina, kasuwhu kayi kan wono yih awar kuwoh kuro kumi kuma koro nang an-kisiri. ¹⁷ Awar ken i dinni inung un ranghao ku tutunu nang Yahudawa nang a manzu ami aku tutu-Asiri, nang inung un kasuwa nang ayami ama zuwa a tih a yaon a tek kami. ¹⁸ A mazakuguranu, a rong Abikuriyawa nang Sitokiyawa aru yao ama mana nang yih. Arong ama vereh, "Yemmi nang piya riyowo uru i sin ringh'i woh i vereh?" A manzu an vereh woh, "Ire kin ne piyami i sin kangh'a yhaor a woh a dorkoro an kisiri a jaon," awar ku woh i sin wa'ah Yesih nang u chonu a wori i nung a yhaor ami ama khao. ¹⁹ An re an ku zika Bulus a ja'ah yih a tek ku temenu ku Ariyopagus, a seri nang yih a woh, "Pen rene woh ti yaotaokeh u misenu u pas uru ui nang pima sin vervene? ²⁰ A war kuwoh pi sin yendeze an kusu mu mi mure a jaon a maruva a toh a wuri. Awar ken ti sin ringh'i woh ti yaotaokeh yemmi ku reh ku dinni-yaoh ku an kusu muna." ²¹ (Na kini, Atinawa na sang nang a jaon ami a zomi ite'eyhi mi ama sin wuna a dhaor ka yaon a zaku seri irangmwa vah ku misi boko ku poksoni ki rangma ki pas.) ²² An re Bulus iku yaozaone a teteh ku Ariyopagus a vereh woh, "A yini a yhaor mu Atina, in tirkini-woh in re a yami a sin dorkoroni un rina o dini a na pette na sang. ²³ Awar kuwoh ken na im ma sin jara a sin ranghzaoh an kusu mu tutunu mu yin, in ma zuwa rirong ripik rimi nang ama nyakara innyara iri, "A Makana nang Kasiri Kami a Zaku Yaoh Kan." Awar ken, ki kusu ki mi nang i sin tutu nang kun un zah yao, kin nang im sin wa'ah-yi ni. ²⁴ Kasiri kami kama napsa urikuyah nang an kusu na sang mu mi mu ri inung u kun, awar ku woh ire Pikarma pizoh nan ka jaos, e ku zaku zomo inung unwata kumi nang na chara na suwa. ²⁵ vah na chara na yhaor nan riseh yih utuma, kin ne iku si ringh'i iringmwa, awar ku woh yih a ritih riyih eku ro yhaor, nang kuvoh, nang an kusu na sang mo taka. ²⁶ A wori nang piyhaor uraoh ima chidda a mayenzi ma yhaor na sang a war ku woh an zonzono izoh a mayenzi mu rikuyah, awar woh ima yaozaone yaon na dhaor nang na kumuru na mi nang an ka zomo. ²⁷ awar ku woh an riseh un-ringh'u o Siri, vah an ka gita a zuwa yih. Inung ken, i zaku rangani nang a yhaor na sang a marandaoh-marandaoh. ²⁸ Awar ku woh inung u yih nang ti sin voh a gura sin jara a gura rim, ken na pirong iwori a yasiva a yin ima vereh, 'Ti gura reh nono na yih.' ²⁹ Awar ken na tire nono na Siri, kuma muri rih awoh ti kasu ka dinni woh Kasiri ka ri neh zinariya, vah azurfa, vah kukwang-an kusu mumi nang piyhaor e ku napsa a tipamba ti yi. ³⁰ Awar ken, Kasiri kama chuwune a yizi a kan nang a dhaoar u za yaoh, a mazakuguranu na kini i sin vervene nang a yhaor na sang awoh ana teyh'e na sang an kuvuruwo. ³¹ Mo wana ken a war ku woh ima rene a tuk ka mi nang en temene urikuyah inung un yaozao-raom, ana chara na piyhaor umi nang ima zika. Kasiri kama ro uyaozaonu o vere kan nang piyhaor uru a makana nang ayhaor a marandao, awar ken nang ka chone yih a wori nang a yhaor a mi ama kizi." ³² Na kini a dhaor kami nang a yhaor a rumi mo Atina mo pokoro a vereh u chonu o yhaor ami nang ama kizi, arong an vataze Bulus; a mazakuguranu arong ami ama vereh, "Ten gura pokoro vu a manang mana." ³³ A madorkoro ken, Bulus ima jara yi a jiyaon mim. ³⁴ A mazakuguranu arong a yhaor a rumi ama manuwo nang yi a gura rume a suwhu, nang Diyonisiyas umi i wori Ariyopagus, nang pirong pinyyhowo umi iri rizayi Damaris, nang arong ami ama ri nan yaon.