¹ Na kini inung Ikilisiya u Antakiya, Amari arong anabawa nang a miseni yhaon amare Barnabas, Saminu (ummi na aku kangde yhi awol Baki), Lukiyas piya u kurane, manayan (kumina ka Hirudus piwomoh, nang Shawulu. ² Adhaor kami nang ama sin rukse a Tita ugwaki tiwomoh nang kuyira ken Mazir marip man vereh, ''Taranim a Barnabas nang shawulu, an risen utuma umi nang ma kangde yhaon.'' ³ Kadhaor kami nang aruru yira ken, ka tanzu Kasiri, anreh anku tasaza na chara na yhaon ana rumi arah, anreh anku tuma yhaon. ⁴ Anreh Barnabas nang Shawulu an rume nan Mazir marip anreh anku jarayhaon un Salukiya, u chonu a wori atehemi anreh ankunighe un wasa ama kana u tsibirin kubrus. ⁵ Adhaor kami nang ama nighe inung un rho ku Salamis areh ku misse avereh a Siri inung un ranghao ku tutunu ma Yahudawa. An gura ri Yahaya Markus isin kanna yhaon . ⁶ Adhaor kami nang ama nizze ama stibirin nasang amajahari u Bafusa, anreh anku zuwa pirong u tatun kumi ku seri mayive o Yahudawa icutti, rizayi riyhi akuwoh Bar-yash'a. ⁷ Piya u mayine uruh ekuri nang Mukaddas, sarjiyas Bulus, umi imare piya yhao. Piyar uruh i tanzana Barnabas nan Shawulu, awarkuwoh ima suni i pokoro avereh asiri. ⁸ Ama Alimas ''piya a mayive '' (kinang ama vandare rizayi riyhi) ima rise umusu; ima yelli-yelli i vandare a mukaddashi uruh inung a riving. ⁹ Anreh shawulu, umi nang amaku gura kangde yhi awoh Bulus, i kori nang Mazir marip, i tirkiri yhi na gwakane. ¹⁰ avereh, ''pighi pivezene upi sifu, pi kori cutti nan a nang a yenni. pi zahvusu ankusu murip penka zah ku jighi usisi ku nang arip a Titah ugwaki, penka jiyhim? ¹¹ Na kini tirkiri, kachara ka Titah ugwaki kari nanpu, kuma pen wana pirumuh. Penka zahku veghe a nyii adhaor ka cunnu. ''anreh iku righi izoh un Alimas nang marini, anreh ikura jara asin ripsi ayhaor an pur yhi nachara. ¹² Anreh Mukaddashi iku reghe ikusumi ke wana, irume, awarkuwoh ima ra seri ammina ku misenu u Tituh ugwaki. ¹³ Na kini Bulus nang ijam iyhi ama napsana un Bafusa anre ku ruvah Bariyata inung un Bamfiliya. Anreh Yuhana iku jigi yhaon mini anaoghao Urshalima. ¹⁴ Bulus nang ajami an vharha un Bariyata anreh ku ruvah un Antakiya ama yinzi mu Bisidiya. Anreh anku nighe inung amajami'a atuk kasabar a zohmoh. ¹⁵ Kadhaor kami nang ima ruruh u karatu umateh nang amabawa, aya gwakazi a majami'a atumah yhaon a vereh akuwoh, ''ina kunini, inang inrih nang arong utumuh unirghane asuwu amajagari nang ayhaor ara in vereh ni. ¹⁶ Anreh Bulus iku cho anre iku zhamkpwa achara kayhi; i vereh, ''ina rumi Isra'ila nang aya nan Kasiri kama tutini, pokorni. ¹⁷ Kasiri ka yhaor arah Isra'ila kama chanka atitih arene yhaon an wana ayhaor adun adhaor kami nang ama zonzi ama yinzi mu Masar, inung atiwomoh ima cidda yhaon inung ama yinzi mami. ¹⁸ Amajagari atiwa a kiri-anas ima rih nang yhaon inung arimi. ¹⁹ Adhaor nan ima ruruh tiyitiri tima rho manazi-vak inung amayinzi mu Kan'ana, ima rhoa a yhaor awuri a mayinzi mayhaon asa an rise ugado. ²⁰ Anang ara nasang ama wana kini inung atiwa madari-manas ana kiri-ishi. A madorkoroni anang ara, Kasiri kama rhoa yhaon Alikalai amakaravah adhaor ka Sama'ila anabi. ²¹ Anreh ayhaor ami anku rivi uwoh aruh yhaon piwomoh, anreh Kasiri kanku rhoa yhaon Saul pivezene u Kish, piyhaor inung ativervene ti Biliyaminu, iwan piwomoh atiwah akiri-anas. ²² A madorkononi kenang Kasiri kama cune yhi inung atiwomoh, anreh kan ku chone Dauda iwan yhaon piwomoh. Amare awar ka Dauda nang Kasiri kama vereh, umma zuwa Dauda pivezene u Yesse iwan piyhaor umi irim a suhwuu, ummi eku riseh ikusu kimi nang unsuni. ²³ Ama ruvah un naok ku piyhaor uruh Kasiri kama yende Isra'ila a piyu waska, Yesoh, kenang ima vereh in riseh. ²⁴ Anang arah ama semu rah wanza adhaor,a mazongoni unruvu u Yesoh i ruvah, Yahaya ima semu migha u baptisma ku tuba amajahari nang ayhaor Isra'ila. ²⁵ Kenang Yahaya ima sin rusuh utumah uyhi, i vereh, ''in kunyen awoh mini inveh wammi? in zahkure piyami. Inka pok, pirong en ruvah atini kanang, araka ana vinah na yhi manka zahku susku cuhune.'' ²⁶ Ina konawi, nohnoh nu rinah Ibrahim, nang nami na rii nan ayini nami nasin bauta asiri, areh nang awuri nang avereh ara uceto nang ama yendi rih. ²⁷ Awarkuwoh ayah zomtoko ku urshalima, nang aya gwakazi ayhaon arotoma tirkiriyhi, anreh kuma korene avereh anabawa ami nang aku dorkoro Nyara ko ariki asabar aku temene yhi. ²⁸ Duk nan ken ama rotoh ma zuwa ikusu kima rene ukha ku yhi, ama rene Bilatus iwuna yhi. ²⁹ Adhaor kami nang ama ruruh ankusu mumi nang ama nyakara amajaghari nan yhi, anreh anku toddo yhi atih a nome yhi inung unsek. ³⁰ Anreh Kasiri kanku chone yhi inung ama kinuruh. ³¹ Ama nyen yhi anatuk a dun nang ayami ama cira nang yhi inung un Galili amakana Urshalima. Ayhaor arah areh ayu wa'awhuyaoh uyhi amajagari nang a yhaor. ³² Na kini tiku sin misini ama vervene marip mumi nang Kasiri kama vereh a majagari nan atitih. ³³ Ima korene irih, nohnoh na yhaon, un cunenu u Yesoh izoh. kennang ama nyakara inung un zabura o vak: pireh pivezene unang, ueru umma wana titah upi. ³⁴ Riving ruwoh ama chone yhi inung ama kinuru awarkuwoh ripum ri yhi rin kasu vozoh, Kasiri kama vereh inung unrina uruh; Man rhoa ini mavur agura zikine ama vervene amajagari nang Dauda. ³⁵ Kikusu ke rene igura vereh inung un zabura, penka zahku jighii mavur mapu man rehe uvozuh. ³⁶ Awarkuwoh adhaor kami nang Dauda ima rukse asiri tiwomoh inung ama sana ma yhi, i nomoh anmarah; Ama nome yhi nang aputih anreh ripumh ri yhi rinku vozoh. ³⁷ A mazakuguranu piya nang Kasiri kama chone yhi izoh ima rotoh ma vozoh. ³⁸ Na kini inka yhao, ina koni awar ka piyhaor uruh asin misini u yafe ki vang. ³⁹ Awarka yhi piya erume ama veskene yhi inung ankusu mumi nang mateh ma Musa manka zahku veskene yhi. ⁴⁰ Na kini vasanani nang ankusu mumi nang anabawa ama vereh mun kasu wana anatih ayhin. ⁴¹ Reheni, ayhini avonoruh, anreh inkura seri amina anreh inku wanta; Awarkuwoh nseri utumah anatuk ayhin, utumah umi nan inang ka zahka rume, ko pigha ini.'' ⁴² Kenang Bulus nang Barnabas ama jara yhaon, Anreh ayhaor ami an tanzanayhaon awoh angura verveh avereh ami arah ana sabar uguru. ⁴³ Adhaor kami nang ama ruruh a zohm amajami'a, A Yahudawa na gwakane nang a yami ama rotih inung ati Yahudanci amadorkoro Bulus nang Barnabas, ama verun yhaon awoh ankarim inung a mavur masiri. ⁴⁴ Ana sabar uguru, kinne ku rho kumi nasang kuma kunsu-suwoh asa an pokoro ama vervene ma titah ugwaki. ⁴⁵ Kadhaor kami nang a Yahudawa ama reghe rifighi re yhaor, anreh kura pok ripovuh ren kusu mumi nang Bulus ima verveneh anreh anku sura yhi. ⁴⁶ Anreh Bulus nan Barnabas an vereh un zah ukhau akuwoh, ''Mu rip kuwoh ma vervene ma siri man kare kikusu ke zohn ke vereh amajagari nang ayhini. U nyen kuwoh imma nurkara man ama ranghani nang ayhini, anreh inku tirkiri atih ayhin awoh in rotoh ma hama u zuwa u voh ku zah marara, regheni, ten vandurwoh nan al'umai. ⁴⁷ Na kini kenang Kasiri kama verun wuri, akuwoh, 'Imma renini iwana anpeze inung un al'umai, asa in yende u ceto inung ama rho ma gwakazi mu rikuya'. ⁴⁸ Kenang Al'umai ama pokoro kini, ama ra gharhanao anreh kura cangha ma vervene masiri. Kenang a yhaor na gwakane ama chanka uvoh kuza mararah ama rume. ⁴⁹ Ma vervene ma siri ranguruwoh nasang ama yinzi mami. ⁵⁰ Anreh a Yahudawa anku nirhane yhaon na suwhu amajagari nan a nyoho amatini, nang a rumi ami azohngoni ama rho mami. Anang arah ama chone azaba amajagari nang Bulus nan Barnabas anreh anku thangha ne yhaon ama rasa mu rho. ⁵¹ Anreh Bulus nang Barnabas anku pkakgde mavutuh mana vina na yhaon. Anreh anku jarayhaon un rho ikoniya. ⁵² Agbekseni ami ra kori nang righarhao nang mazir marip