¹ Ɓitalshi tǝ naa tǝ mbutarghǝn gaam a guŋsu tǝ mǝn varaŋsǝ yaatl, tǝ mbǝrshi waashii nǝ laaghǝ mbuni gyo. ² Ɓitalshi tǝ ver gon hŋ, tǝ gaa zarse tǝ laaɓ tǝpi gwaasǝŋ, tǝ ndǝr tǝ zhiɗ mbutarghǝn gaam a zarsǝ ɓuruk. ³ Durghǝ tu ɓaanndǝŋ myaani ngǝtn wopm mǝ ga yi nǝ mǝn ɓitalghǝn tǝ mǝn laaɓkǝn hŋ. Maa ta gǝm tǝpii mǝ naai nǝ monsǝ ghǝ gya ngǝtn ngǝ mbiighǝn raa tǝ wumngǝn wusni ghǝ dlii. Maa rii gha giɓkǝ kuskǝ ngǝtn tǝ kashi. Maa ta yi malari mii nyaŋngas dloŋsǝ wopm. ⁴ Bet tǝ gii ɗaŋ shiɗshiɗi ghǝ Cogn Murghǝ kaɓkǝn wopm tǝ suughǝni wos nǝ durghǝ mǝrǝ zaar a mbwaaɗi ⁵ baa ata yi nǝ durghǝ laa ghǝ zarghǝ zaari ɗaŋ maa fi hŋ, beɗ tǝ gii nǝ gwaanndǝ wos ǝŋ ata kaɓmi. A kaɓmi wopii a te coɓkǝn ngǝ ɓwaaghǝ muuri tǝ sularghǝn wopm tǝ sularghǝn wopm nǝ muuri kǝ zhipti var. ⁶ Cogn shin mi zhipti var mǝn tǝ tughǝni a te Yesu Ɓorghǝn kǝ Cogn Murghǝ kaɓkǝn wopm. ⁷ A ta fi gin nǝ durghǝ yo tu, ɗa kaari ǝŋ myaa tu kaɓkǝnii a gyaal wos ma naai nǝ mǝn cighǝn duul wos agiɓkǝ mbiighǝn ɗa raai nǝghǝ ndok ndoki. ⁸ Vii gin nǝ ngǝtn ngǝ kaɓkǝni. Myaa suu aa wul vii sǝriiɗ a dulgaam ngǝrshi gyagin, nǝ durghǝ yo tu ɓurug mǝn yo ɗaŋ tǝ caa raa a Cogn tǝ moɓ fighǝn laa ghǝ ndaraani ɗaŋ Cognvon gǝm a ken waasǝŋ. Ngǝrshi gyagin ci ndaraara tǝ ɓakmi a zarsǝ ɓuruk. ⁹ Beɗ tǝ gii ɓǝǝlghǝ tǝ sǝrɗkǝn yer kǝ mberni tǝ laaɓkǝn wusuli tǝ tliiti yer tǝ wutlǝŋngǝn nǝ durghǝ mborki . Ngershi gyagin citǝ ɓakmi tǝ dei hŋ. ¹⁰ Nyaŋngasǝn ɓuruk muryo ɗaŋ ca lǝǝr ɓǝǝlghǝn ɗi a dlei waan, ɗa kaari ɗaŋ kaa baŋ tǝ tǝpm namboŋ ko tǝpm mbǝtlǝm. ¹¹ Yisǝŋǝi tu daashi gii a gǝm tǝpm mbunii, ca fi kuskǝ ngǝtn aa ndatar gamashii. ¹² A kili yo ɗaŋ mǝ ta shin Artimas ko Tikikus ɓaskǝ, vaaghǝɗi aa tum Nikobolis, ɗani ghannda ma suu mǝ ɗu gǝfǝɗ. ¹³ Fi motlak a shin Zinas ɗi, gyo ɗaŋ nǝ ngamndi a ngerghǝn vii, tǝ Apollos, a datǝpm yo ɗaŋ tǝ naa nǝ ngǝtn won hŋ. ¹⁴ A naa ciɓ zarsǝ wopm tǝ kuuɓ tǝ tu gama waasǝŋ a fighǝn ngǝtn ngǝ ndaraani ɗaŋ ta kaɓ gama waasǝŋ ngai kǝ motl motli nǝ yo ɗaŋ fi tsǝtnngǝn ɓenndǝmi hŋ. ¹⁵ Ɓuruk gyagyo ɗaŋ mi cimshi caa wurughǝ. Wuru gya mǝn suughǝn wopm ɗa a giɓkǝ caaghǝn raa. Gyaal tǝ naa ɓaski ɓuruk.