¹ Beɗ tǝ gii kon ngǝtn yo ɗaŋ yi taŋ taŋ tǝ mborki ghǝ caaghǝn raa. ² A naa ciɓ ndosaŋsǝ mǝmmonci tǝ naa nǝ mǝn ngaɓkǝn gaam, mǝn zinzini, mǝn ɗakkǝn ɗa, mǝn naghaɗkǝn a giɓkǝ caaghǝn raa, a giɓkǝ suughǝn tǝ dmngǝn vwaa. ³ Cikkǝn ndosaŋsǝ guɗi tǝ ngaɓ gamawaasǝŋǝi: tǝ vartǝ , mǝn konngǝn zaar hŋ. Tǝ naa nǝ mon a tlyaghǝn zhak darndu dǝn hŋ. Tǝ giɗ ngǝtn ngǝ ndaraani, ⁴ durghǝ yo tu tǝ giɗ mǝrghǝ guɗi gha saghaɗkǝn tǝ suu gya tur waasǝŋ tǝ mǝǝri waasǝŋ. ⁵ Tǝ zhiɗ shi ghai tǝ naa nǝ mǝn saghaɗkǝn, mǝn raaghǝ mbuni, mǝn lyaaghǝn dlǝŋsǝ waasǝŋ. Tǝ fi ngǝrshi gya gin durghǝ yo tu gǝgn ngǝ Cogn tǝ verghǝrghǝni hŋ. ⁶ Tǝ cig ɗa, aa tlyaa moɗ mǝrghǝ monci tǝ naa nǝ mǝn ɗakkǝn ɗa. ⁷ A ko tǝpi gyo sular gama nǝ murghǝ giɗkǝn laa ghǝ ndaraani, a giɗkǝni waa, giɗ numngǝn zaar, tǝ zinzini. ⁸ Ko ngǝtn konngǝn yo ɗaŋ yi byaatl byaatl, yi tǝ ngǝtn verghǝni hŋ, nǝ durghǝ yo ɗaŋ yaa gaa gǝǝɓ tǝ vik Cogn tǝ tlya ndzuun, nǝ durghǝ yo tu aaa tu kuskǝ ngǝtn won ɗaŋ wo kon a dulgaam wopm hŋ. ⁹ Monsǝ tǝ laaɓ mǝ dǝ waasǝŋ a giɓƙǝ ko nii. Tǝ caa shi polghǝn, tǝ sǝrɗ yer cimshi hŋ. ¹⁰ Tǝ ci mǝǝr hŋ. A bamvii gii, tǝ zhiɗni ɓuruk caaghǝn raa kǝ mbuni, durghǝ yo tu tǝ ɓumtsǝ giɗkǝn wopǝnnii a dulgaam Cogn murghǝ kaɓkǝn wopm. ¹¹ Durghǝ tu gyaal ghǝ Cogn aa mbwaaɗi a dulgaam zarsǝ ɓurug. Caa zhiɗ ml gha yaŋngaskǝn kusuŋsǝ ngǝtn fighǝn tǝ ngǝtn ngǝ mbiighǝn raa kǝ ɗǝgn. ¹² Caa zhiɗ mi gha tsǝtnngǝn tǝ ɗakkǝn, tǝ zaari zaari a giɓkǝ tǝpm Cogn a wusuli gin. ¹³ Ɗaŋ migha ɓuɓkǝn tu mǝ kaɓ shiɗshiɗi ghǝ gaaghǝn yir, tǝ mannghǝn Daaghǝ dǝn Cogn wopm tǝ murghǝ Kaɓkǝn Yesu Ɓorghǝn kǝ Cogn. ¹⁴ Yesu ta vǝr gamashi nǝ dur wopm, durghǝ yo tu tǝ kaɓmi wopii ɗi a ɓurug ngǝtn ngǝ waari, tǝ sular mi nǝ mǝn ndzǝkkǝn, durghǝ gamas, zarsǝ kǝ ɗaɗdaɗaɗ gyagyo ɗaŋ citǝ wokwoki fighǝn gya ngǝtn ngǝ ndaraani. ¹⁵ Wul vi tlyaa tlyaa aa tlyaa moɗ ngǝrshi gyagin. Ddǝr ngǝrshi gyagin tǝ ɗeɓaɗ vartǝ, aa gaa gon tǝ mbatsakkǝ hŋ.