¹ Bulus, mon Cogn, tǝ murghǝ shinngǝn Yesu gi ɗaŋ nǝ Ɓorghǝnni, nǝ caaghǝn raa tu kinǝ zarsǝ kǝ ɓwaaghǝn Cogn tǝ yisǝŋngǝn caaghǝn raa ɗaŋ akaɓi nǝ Coŋes. ² Gya gin cigha giɓkǝ mbighǝn ɗa raai nǝ ghǝ ɓanngǝn hŋ tu Cogn, gyo ɗaŋ ca nga mberni hŋ, a caa ɗa raai ɓanndǝŋ. ³ A kili ges, a giɗ vi wos tǝ shinngǝnwos ɗaŋ a caa vwati tu mǝ kon. Ma fi gi tǝ kaɓkǝn Cogn murghǝ vuumngǝn wopm ɗeɓaɗ. ⁴ Gin nǝ ghǝ Titus, ŋaa mbuni a giɓkǝ caaghǝn raawopm. Gyal, gwanndǝ tǝ mbutarghǝn raa a lǝɓ Dawpm Cogn tǝ gi ɗaŋ nǝ ɓorghǝnni Yesu murghǝ vuumngǝn wopm. ⁵ Nǝ durghǝ gin ǝnnda mǝ gaaghǝi Karita duryo tu a ndǝr ngǝrshi gya goni ɗaŋ ta yugnngarshi hŋ, a ndǝr a bwaa mǝn varaŋsǝvkǝ sǝɗkǝn vi ɗa ɓuruk dǝllǝŋsǝ yatles ɗaŋ gi ɗaŋ mǝ fuughǝ. ⁶ Ciɓ zarghǝ var tǝ naa nǝ muryo ɗaŋ wofi ngǝtnngǝ caaghǝn vii hŋ, mughǝ gǝɗ namboŋ, tǝ mǝǝri yo ɗaŋ caa fi ngǝtn mbuni tǝ fighǝn ngǝtn yo ɗaŋ ta caashi vi tǝ ngǝtn yo ɗaŋ wo naa tǝ kuskǝn hŋ, tǝ ɗakkǝ ngaɓkǝn gaam hŋ. ⁷ A na ciɓ munvarghǝ mǝn laaɓkǝn, a daan wos kǝ yaalghǝn ɗa nǝ viin Cogn, tǝ na nǝ wuryo ɗaŋ ta tu ngǝtnngǝ konngǝn ɓastǝ hŋ. ɓak tǝ naa nǝ murghǝ coɓ coɓi vii tǝ ɗakkǝn morghǝn raa hŋ. tǝ na nǝ muryo ɗa caa tliitǝ swaaɗ hŋ, tǝ murghǝ tlyaaghǝn ɗuu hŋ, tǝ murghǝ shisher ghǝn zarsǝ mǝn hŋ, tǝ murghǝ swaari hŋ. ⁸ Bamvii cik tǝ naa nǝ murghǝ kaɓkǝn sǝmmbǝrsǝ, tǝ fikamndǝ tǝ mǝn fighǝn ngǝtn mbuni, Cib tǝ na nǝ murghǝ ɓitalghǝn ndaara, fighǝn ngǝtn wusni, tǝ fighǝn ngǝtnngǝ Coŋes, tǝ naa nǝ murghǝ ngaɓkǝn gamashi. ⁹ Tǝ naa nǝ murghǝ ngaɓkǝn ngǝtn yo ɗaŋ tǝ giɗ tǝ ghai tlya tlyaa, nǝghǝ yo ɗaŋ wo tlya moɗ gya gon tǝ giɗkǝn ndaara tǝ ndǝr gya gyo ɗaŋ caa nyaŋngas tǝ. ¹⁰ Nǝ duryo tu zarsǝ mǝn janndalghǝn ci ɗa monnda, ɓan ɗaŋ gya gyo ɗaŋ ta sǝrǝshi wasǝŋǝi hŋ. vii wasǝŋ nǝ ghǝ ɓenndǝmi. Caa mor zarsǝ tǝ ndǝr maalarshi. ¹¹ A ngaɓ ciɓ mǝ ɗakshi ghai. Caa giɗ ngǝtn yo ɗaŋ a ndaara tǝ giɗ hŋ nǝ duryo tu, nǝ tughǝnngǝ ndzun tǝ basaŋ dǝn zarsǝ mǝni ɗeɓaɗ. ¹² Namboŋ a giɓi wasǝŋ,ɗaŋ cinǝ murghǝ sa'aɗkǝn, wul tu, ''Kirawa cinǝ mǝnvaraŋsǝ mberni, tǝ mǝn mbǝllǝ tǝ kusǝŋsǝ tluŋsǝ namtsǝ, zarsǝ ghǝ shaaɓ tǝ cighǝn ngǝtn ɗaŋ a moɓ vwa wasǝŋ.'' ¹³ Vii gin yi jom jomi, ndǝr shi wasǝŋǝi a baŋshi duryo tu tǝ tlyai a caghǝn raa wasǝŋ. ¹⁴ Ga raa wa a tlutn ghǝ Yahudawa tǝ mborki zarsǝ yo ɗaŋ tǝ sughǝɗ ngǝtnngǝ jom jomni hŋ. ¹⁵ Gya gyo ɗaŋ citǝ ndzǝkkǝn, koni yi ndzǝk ndzǝk. Beɗ tǝ gi gyagyo ɗaŋ ci tǝ ndzǝkkǝn tǝ caghǝn raa hŋ, koni nǝ ngǝtnngǝ nyaŋ. Nǝ duryo tu raa wasǝŋ tǝ ɓitalghǝn wasǝŋ nǝ ɓotǝghǝn. ¹⁶ Caa wultu taa yisǝŋ Coŋǝi, beɗ tǝ gi tǝ ci vighai a te fighǝn kusǝŋsǝ ngǝtn. Tǝ naa nǝ ngǝtnngǝ nyaŋ tǝ wum kǝǝm hŋ.Tǝ yisǝŋ shi a fighǝn ngǝtn ghǝ mbuni won hŋ.