¹ Nǝ Bulus, dǝllǝk murghǝ shinngǝnni kǝ zar hŋ, nǝ kǝ te laaghǝ kǝ na zaar hŋ, beɗ tǝ gi nǝvte laaghǝ Yesu ɗaŋ nǝ ɓorghǝni tǝ kǝ Cognvob Daashes yan ɗaŋ a shisher Yesu ɗi a mǝni gya gi ɗaŋ taa mǝǝshi, ² tǝ ɓuruk gya yasatn ɗaŋ mii cimshi nǝ kǝ Ikilisiya kǝ yatl Galanti. ³ Shiili tǝ naaki mǝn, tǝ raa wusni kǝ Daawopm Cognvon tǝ Daadǝn Yesu ɗaŋ nǝ Ɓorghǝnni, ⁴ Yan ɗaŋ a vǝr gaamashi nǝ durghǝ kusǝŋsǝ ngǝtn wopm nǝ duryo tu tǝ ɗya tǝ nyawalarmi wopiɗi, gyo ɗaŋ yigha suughǝni raa kǝ Daawopm tǝ kǝ Cognvon wopm, ⁵ zǝkkǝni nǝ ndok ndoki tǝ kǝ ndaok ndoki tǝ naa tǝ mǝn, tǝ naa cik. ⁶ Caa kosarǝm ɗaŋ kigha sughǝn kaar kyaɗ cik a muri gi ɗaŋ a cimki wani a te gyal kǝ yan ɗaŋ nǝ ɓirghǝnni. A kosarǝm ɗaŋ kii ɓaski sughǝni kaar a vik gon ɗa kǝ mari. ⁷ Gin yin tu caa wul tu vii wusni gon ɗa mari hŋ, beɗ tǝ gi gya gon ciɗa ɗaŋ taa caa ki a vuui, caa suu tǝ sughǝɗ vik wusni kǝ gi ɗaŋ nǝ Ɓorghǝni. ⁸ Beɗ tǝ gi nǝ myaani, nǝ zhipti shinngǝni Cogn a dlamɗi tsogn gaami ya fuuki vik wusni gon, yan gi ɗaŋ mǝǝ taa fuuki ǝŋ tǝ laŋǝi. ⁹ Ɗaŋ gi ɗaŋ mǝ ta wul keni, yi cik kǝn ɗaŋ ɗaŋngǝni mya wul tu, '' ǝŋ gon won ya fuuki vik wusni won yan nǝ gi ɗaŋ kǝǝ taa kaɓ ɓasmi wopi hŋ.. tǝ laŋǝi.'' ¹⁰ Yin tu mya ŋalni kaɓkǝni a zarsǝ ko Cognvon naa? Mya suu mǝ finǝ ǝŋ yan mya mbǝrǝm tu tǝ polni zarsǝ mǝni mon yan ɗaŋ nǝ ɓorghǝni hŋ. ¹¹ Gya yesatn.. yan tu mya suu a yisǝŋǝi tu, vik wusni ɗaŋ mya koni nǝ vik wusni kǝ zaar hŋ. ¹² Mǝ ta kaɓɗi a zaar won hŋ, beɗ ɗaŋ tǝǝ taa giɗ mǝni ghai hŋ. Bamvi gi, Yesu ɗaŋ nǝ ɓorghǝnni ǝŋ a taa zhiɗɗǝm ngai. ¹³ Kaa taa wuni tsǝtnngǝnetn kǝ keni alaaɓkǝni kǝ Yahudawai, gyo ɗaŋ mǝ taa yaa fir forǝm mǝn laaɓkǝni Covnvon mǝn hal ngaa yali, mǝ taa yaa mbǝrǝm tu mǝ datsǝ tǝ nii. ¹⁴ Maa taa latsǝi ɗonngai a laaɓkǝnni naa Yahudawai ɗaŋ mǝ ta moɓ gya sursatn monnda.. a giɓkǝ mǝn wopm. Gi yan a taabyi shoŋngǝnni kǝ kashetn nǝ durghǝ ngǝtnngǝ ɓanndǝŋi kǝ gya daawopm. ¹⁵ Beɗ tǝ gi ɗaŋ Cognvon yan ɗaŋ a byak mi mari tun a giɓ vwaa naa gǝtn yan ɗaŋ a cim a te gyalwos, ¹⁶ a taa poltǝ ghai tǝ giɗ kuni woshes ɗi ɓasǝm, yan tu ma ŋalar tǝ a dlǝk mǝn yo ɗaŋ nǝ Yahudawa hŋ, swaaɗ kyaɗ mǝ ta wulni vi a tluu tǝ voraŋ hŋ. ¹⁷ Mǝ ta tlii Ueshelima a mǝn yo ɗaŋ tǝ ta yinǝ dǝllǝŋsǝ mǝn shinngǝnni a kenati hŋ. Bamvi gi mǝ taa tlii Arabiya kǝnnda mǝ ta sum Dimaskus. ¹⁸ Kǝnnda ɗaŋ voni mayi ta latsǝi mǝ ta tlii Urshelima tu mǝ ta yisǝŋ Kefashi, mǝ ta tsǝtn ɗatǝ dǝn nǝ kǝ mbuɗkǝn dzuɓ tliti nandam. ¹⁹ Beɗ tǝ gi mǝ yel dǝllǝŋsǝ mǝn shinngǝnni gya gon ɗa hŋ she Yakubu, yeskǝ Daadǝn. ²⁰ A ngǝtnyo ɗaŋ mǝ dlyaaɗki mǝn mya fuuki kǝrǝŋ kǝrǝŋ a kenngǝ Cognvon tu mya ngaani mbyerni hŋ. ²¹ Kǝnnda mǝ ta tlii a te yatl ghǝ Siriya. ²² Mǝn Ikilisiya kǝ yan ɗaŋ nǝ ɓorghǝnni kǝ Yahudiya hal ghǝnnɗi ta taa daɗ tǝ yisǝŋ mi taŋ taŋ hŋ. ²³ Tǝǝ ta wumni kurum ɗaŋ caa wul, ''Muri ɗaŋ a kilibwon a ta ya vǝrmi forǝm yan ɗaŋngǝnni caa ŋalar vik caaghǝn raa, gyo ɗaŋ a ta mbǝrti tu tǝ datsǝ tii.'' ²⁴ Nǝ durghǝ gi tǝǝ ta ya zhim Cognvon nǝ duratn.