¹ Myaa suu aa yisǝŋ durghǝ yo ɗaŋ me tlya buŋngǝni nǝ durghǝ waan,nǝ durghǝ gya gyo ɗaŋ ci Laudukiya tǝ gya gonvmonnda ɗaŋ a te lǝɓ dli ta yi yel yiratn. ² Mǝ fi la nǝ durghǝ yo tu raa waasǝŋ tǝtu tlyaaghen moɗii a te lǝɓ kǝǝmngǝn waasǝŋ a giɓkǝ suughǝn hal a ɓurug tughǝn tǝ yisǝŋngǝn ngǝ sǝǝr kǝ jomjomni ghǝ Cogn, yaan nǝ Ɓorghǝn kǝ Cogn. ³ A giɓi wos kǝn ɗeɓaɗ fuŋ ngǝ saghaɗkǝn tǝ yisǝŋngǝn tǝ waaɗ kai. ⁴ Mǝ kon gin nǝ durghǝ yo tu gon tǝ mor ki tǝ vik morghǝn hŋ. ⁵ Ko ɗan tu mitǝ kyaani hŋ a giɓkǝ , beɗ tǝ gii mitǝ kyaani agiɓkǝ zhipti. Ca polǝm mǝ yelki a tsǝtnngǝn ndaraara tǝ tlyaaghǝn kǝ caaghǝn raa waan a giɓkǝ Ɓorghǝn kǝ Cogn. ⁶ Ɗaŋ gyo ɗaŋ kǝ kaɓ Ɓorghǝn kǝ Cogn Daadǝn, tsǝtǝm a giɓi wos. ⁷ Daɗǝnni tǝ tlyaaghǝn a giɓi wos, nalǝnni a duuli wos, daɗǝnnii a giɓkǝ caaghǝn raa ɗaŋ gyo ɗaŋ tǝ kuuɓki ghai yi, aa ndǝr aa yughǝi a giɓkǝ nyaarghǝn. ⁸ Ɗaghǝn ɗa gon tǝ mor ki gha te tǝpm ngǝ yisǝngǝn tǝ morghǝn ghǝ ɓenndǝmi a daɗ kǝ wusuli ghǝ zarsǝ tǝ kǝ gya ngǝtn ngǝ ɗǝgn ɗaŋ nǝghǝ Ɓorghǝn kǝ Cogn hŋ. ⁹ Durghǝ tu a giɓi wos kǝn ɓurug yugnngǝn Cogn bǝli a te dli. ¹⁰ Kyaani gwaan kitǝ yugnngǝn a giɓi wos. Yaan ci keni a ko vartǝ gyo tǝ guŋndu gyo. ¹¹ A giɓi wos ǝŋ tǝ ta sǝrǝ ki, tǝ sǝrǝghǝn yo ɗaŋ zaar fi hŋ, a te dliighǝn laaɗ kǝ dli, beɗ tǝ gii a sǝrǝghǝn kǝ Ɓorghǝn kǝ Cogn. ¹² Tǝ ta gii ki waani tǝ yaani agiɓkǝ Baptisma, a giɓi wos beɗ kǝn tǝ ta shisher ki waanii a te lǝɓ caaghǝn raa a giɓkǝ vartǝ Cogn, gyo ɗaŋ a ta shishertii ɗi a mǝn mǝskǝn. ¹³ A kili yo ɗaŋ kǝ tayi nǝ mǝskǝn a giɓkǝ kuskǝ ngǝtn waan, sǝrǝghǝn a te dli, gyo ɗaŋ kǝ yir hǝŋǝi, a ta surki waanii tǝ rai tǝ yaani ndǝr dlaa mi ɗeɓaɗ loŋsǝ kusuŋsǝ ngǝtn wopm mǝnii. ¹⁴ A ta saaɗ dlyaaɗkǝn ngǝ kusuŋsǝ ngetn laaɓkǝni waan, tǝ gya mborki yo ɗaŋ caa gaa gǝǝɓ tǝ myaani. A dlii tii ɓurug ndǝr daɗ tii gha hǝmmbǝli. ¹⁵ A caa gyaa vatǝi tǝ gya guŋndu a ca shi ndzuun a yir ghǝ zarsǝ a dǝǝl ndǝr fi mbarzanyi a dul gama waasǝŋ a te lǝɓ hǝmmbǝli. ¹⁶ Nǝ durghǝ gii gaan gon tǝ nger ki vii mǝn a cighǝn ko tlyaghǝn, ko a dulgaam ngǝ dzaŋ ngǝ nelak ko lǝpm muuri, ko a dulgaam gya dzaŋ ngǝ Wolngi hŋ. ¹⁷ Gya gin nǝ gya zhipti ghǝ ngǝtn yo ɗaŋ ta man, beɗ tǝ gii ɓwaaghǝn ngǝrshes nǝ Ɓorghǝn kǝ Cogn ¹⁸ Gaan gyo ɗaŋ ca suu mbutarghǝ gaam tǝ mbuughǝn ngǝ zhipti shinngǝn Cogn tǝ nger ki vii mǝn hŋ, aa ndǝr aa naa ɓakmi waanii hŋ. Daashi gii ca ndani a gya ngǝtnyo ɗaŋ a yeli a ndǝr naai nǝ murghǝ mbitǝ gaam a ɓitalghǝn wos kǝ dli. ¹⁹ Ci nǝ kaŋngǝn tǝ gaames hǝŋ. A te gaames ghǝn ɗeɓaɗ dies tǝ gya guuri wos, tǝ gya dlyaŋri wos cinǝ kaŋngǝn lǝɓ namboŋ, caa ndǝr tǝ fi laa; caa luu tǝ luughǝni yo ɗaŋ Cogn a vǝr. ²⁰ Ǝŋ yaan kaa mǝǝshi tǝ Ɓoghǝn kǝ Cogn a mborki ghǝ ɗǝgn nii ca kya tsǝtn ɗaŋ kutu kyaa laaɓni ngǝtn ngǝ ɗǝgn: ²¹ "Ɓak ngaɓ hǝŋ, ko aa wumi hǝŋ, ko aa tǝǝni hǝŋnye?" ²² Ɓurug ngǝrshi gyagin ɓanngǝn waasǝŋ nǝ malarghǝn ǝŋ yaan cigha fighǝn laa tǝ yaŋshi a daɗkǝ gya mborki tǝ giɗkǝni zarsǝ. ²³ Mborki gya gin citǝ saghaɗkǝni yo ɗaŋ tǝ bwaalarɗi a te suughǝn laaɓkǝn ngǝtn ngǝ dli. Beɗ tǝ gii ci tǝ ɓakmi won a dulgaam ngǝtn yo ɗaŋ dli ca suu hǝŋ.