¹ Bulus dǝllǝ ghǝ murghǝ Shinngǝn Cogn a te lǝɓ suughǝn Cogn tǝ Timotawus yes wopm, ² a mǝn caaghǝn raa tǝ yestǝ wopm kǝ mbuni a giɓkǝ Ɓorghǝn kǝ Cogn; gyagyo ɗaŋ ci Kolisi. Gaan gyaal tǝ naa tǝ kyaani tǝ raaghǝ wusni ɗi a Cogn Daadǝn wopm. ³ Mya nyaar Cogn mǝn Daaghǝ Daadǝn wopm Yesu Borghǝn kǝ Cogn, mya ndǝr mǝ kara Cogn nǝ kyaani ko kili gyo. ⁴ Maa wum nǝ caaghǝn raa waan a giɓkǝ Ɓorghǝn kǝ Cogn Yesu tǝ suughǝni won ɗaŋ kǝ yir nǝɗeɓaɗ gyagyo ɗaŋ cinǝ byakkǝn nǝ durghǝ Cogn. ⁵ Ki tǝ suughǝni gin nǝ durghǝ raa fǝɗi a ggghǝn raa yo ɗaŋ tǝ ki mǝnɗi Tsognvon gaami. Kaa wum a dulgaam gaaghen raa gin kǝ feɗi nǝ jomjomi, tǝ vik wusni, ⁶ gyo ɗaŋ a man ki mǝn. Vi wusni gin cogha guurghǝn,cigha luughǝn ɓeɗ a ɓurug ɗǝgn. Cigha fighen cig a ciɓi waan ɓeɗ ɓaanndǝŋ a kili yo ɗaŋ kǝ wum tǝ kǝ ndǝr kǝ kuuɓ a dulgaam gyaal Cogn tǝ jomjomni. ⁷ Gin nǝ vik wisni yo ɗaŋ kǝ kuuɓ ɗ gha Abafaras, naa nyaari kam murghǝ laa wopm agiɓkǝ buŋngǝni , gyo ɗaŋ cinǝ mon ngǝ jomjomni kǝ Ɓorghǝn kǝ Cogn a bamvo wopm. ⁸ Abafaras aa fuu mi suughǝni waan a giɓkǝ zhipti var. ⁹ Nǝ durghǝ suughǝni gin, ngaɓkǝn ɗi a dzaŋ yo ɗaŋ mǝ wum cik, mǝǝ gaa karaghen Cogn nǝ dur waanhŋ. Myaa yi kaea tu aa tu yugngǝnii tǝ yisǝŋngǝn ngǝ suughǝni wos a giɓkǝ ɓurug saghaɗken tǝ yisǝŋngǝn. ¹⁰ Maa fi tǝ karaghǝn Cogn tu aa tsǝtn taŋ taŋ a ken ngǝ Daadǝn ko a tǝpi gyo ɗaŋ wo mbaa tǝ raa mǝn. Ma fi tǝ karaghǝn Cogn tu aa guur ndaraara ngǝtnngǝ ndaraani gyo, aa ndǝr aa luu a yisǝŋngǝni Cogn ¹¹ Mya kara Cogn tu aa tu tlyaaghǝn moɗii a ko tlyaaghǝni gyo a daɗ kǝ vartǝ ghǝ zhimngǝni wos hal a dumngǝni vwaa tǝ morghǝn raa kǝ ndok ndoki. ¹² Myaa kara Cogn tu aa nyaar Daaden mǝn tǝ polghǝni, gyo ɗaŋ a ca kǝ tu ɓakmi a dul kǝ mǝn caaghǝn raa a giɓkǝ lǝɓ yaali. ¹³ A vummi qopii ɗi gha guŋndu ghǝ ɗǝgn ndǝr sur mi gha guŋndu ghǝ naa nyaari Kuni Wos. ¹⁴ A te lǝɓ kunes kǝn mǝ tu kaɓkǝni, dlaaghǝni loŋsǝ kuskǝ ngǝtn wopm ¹⁵ Kunesǝŋ cine taghǝn ngǝ Coghǝi ɗaŋ caa yel tǝ hǝŋǝi. Yaan cinǝ gami ghǝ ɗeɓaɗ ngǝtn ɗaŋ tǝ ndǝr. ¹⁶ Durghǝ yo tu a te lǝɓ wos ǝŋ tǝ tu ɗeɓaɗ gya ngǝtn ɗaŋ tǝ ndǝr, gya gyo ɗaŋ ci Tsogn gaami tǝ gya gyo ɗaŋ cigha ɗǝgn, gya gyo ɗaŋ caa yeli hǝŋ. Ko ɗaŋ kǝ guŋsǝ ko guŋndu, ko goɓnati, ko vartǝ, ɗeɓaɗ gya ngǝtn yaani ghǝn a ndǝrsh, yaŋshi beɗ nǝ durghǝ wos. ¹⁷ Ɓaandǝŋ a ta yi ɗa ghǝnnda ɓurug gya ngǝtn a te lǝɓ wos beɗ ǝŋ ɗeɓaɗ ko nii tu ngaɓkǝn lǝɓ namboŋ ¹⁸ Yaan cinǝ gaam ngǝ dlies, viin laades yaan cinǝ ghǝ keni tǝ gami ghǝ ɓurug mǝn mǝskǝn,nǝ durghǝ gii citǝ lǝɓ kǝkeni a ɗeɓaɗ ko nii. ¹⁹ Durghǝ tu ata pol Cogn tu ɗeɓaɗ yugnngǝni wos tǝ tsǝtn a giɓi wos, ²⁰ tǝ ndǝr tǝ ɓumtsǝ ko nii a te kuni wos tǝ tsetn a giɓi wos. Cogn lǝǝr raa ghǝ wusni ɗi a te ghǝ voraŋ ghǝ hemmbǝli wos. Cogn mbumtsǝ ko nii nǝ gamas, ko gya ngǝtn ɗaŋ cigha ɗǝgn, ko togn gaami. ²¹ A kili gon, kyaani beɗ kǝǝ tayi nǝ sǝmmbǝrsǝ a Cogn, mǝn nyaŋkǝn wos beɗ a giɓkǝ raa tǝ fighǝn ngǝtn ngǝ kuushi. ²² Beɗ tǝ gii ɗaŋngǝnin aa ɓumtsǝ ki waanii a te lǝɓ mǝskǝn wos a dli. A fi gin nǝ durghǝ yo tu tǝ sur ki tǝ ndzǝkkǝn, mǝn yo ɗaŋ citǝ mǝǝgn hǝŋ, tǝ mǝn yo ɗaŋ tǝ caashi vii hŋ a ken wos, ²³ ǝŋ kyaa ci ken a giɓkǝ caaghǝn raa, kǝ daɗii, kǝ ndǝr kǝ dlǝǝrii, kǝ ndǝr kǝ gya hŋ a raa feɗi waan kaɓkǝ gaaghǝn raa a vik wusni yo ɗaŋ tǝ kon nǝ ɓuruk ko zaari gyo ɗaŋ tǝ ndǝr a yaatl kǝ tsogn gaami. Gin ngǝn nǝ vii wusni yo ɗaŋ myan Bulus mǝ naai nǝ mon. ²⁴ Ɗaŋngǝni caa polǝm a buŋngǝnetn nǝ dur waan. A dlietn maa yugn ngǝtn yo ɗaŋ a naa buŋngǝni ghǝ Ɓorghǝn k ǝ Cogn nǝ durghǝ dli wos gyo ɗaŋ yaan ngǝn ci viin laadi. ²⁵ Nǝ durghǝ viin laadi ghǝn mǝ naai nǝ mon, a daɗkǝ laa yo ɗaŋ Cogn vǝrǝm nǝ dur waan, nǝ durghǝ yugnngarghǝn shinngǝn ngǝ Cogn. ²⁶ Gin nǝ waaɗi ghǝ jomjomni ɗaŋ a ta yi nǝ waaɗkǝn hal nǝghǝ gya voni tǝ gya wusuli. Beɗ tǝ gii ɗaŋngǝni taa ɓǝl tii a gya gyo ɗaŋ tǝ caa raai ɓastǝ. ²⁷ Ɓashi ghǝn Cogn taya suu tǝ ɓǝl fyali ghǝ zhimngǝn kǝ waaɗi kǝ jomjomnin nii a dlei ghǝ mǝn ɗegn. Tǝ zhiɗ tu Ɓorghǝn kǝ Cogn ǝŋ cigha gibi waan, raa ghǝ feɗi ghǝ zhimngǝn yo ɗaŋ wo mani. ²⁸ Gin nǝ yaan gyo ɗaŋ myaa bǝl tii. Myaa sǝǝɗ vii ko zaari gyo mǝndǝr mǝgiɗ ko zaari gyo ghai tǝ ɗeɓaɗ yisǝŋngǝn durghǝ yo tu mǝ gaa ko zaari gyo yugn yugn a giɓkǝ Ɓorghǝn kǝ Cogn. ²⁹ Tǝ gin ngǝn mya fi laa tǝ sughǝn taas ɗa a daɗkǝn tlyaaghǝn wos gyo ɗaŋ ca fi laa a giɓetn tǝ vartǝ wos.