¹ Bulus dǝllǝ ghǝ shinngǝn kǝ Yesu Ɓorghǝn kǝ Cogn,a te ghǝ fighǝn kǝ Cogn a dulgaam mbiighǝn a raa kǝ rai ɗaŋ yigha Yesu Ɓorghǝn kǝ Cogn, ² tlǝghǝn Timotaawus naa ghǝ naa suughǝni: gyaal gwaanndǝ tǝ raa ghǝ wusni ɗaŋ a ɓwaaɗi a Cogn Daa ghǝ Daadǝn wopm Yesu Ɓorghǝn kǝ Cogn ³ Mya nyaar Cogn gyo ɗaŋ mya mbuutǝ ɓaandǝŋ a gya jiɗatn tǝ raa kaɗ kaɗ ɗaŋ mya ɓital. ⁴ Ɗaŋ mya ɓital tǝ zhelǝm waa, mya caa raa mǝ yelghǝ,durghǝ yo tu mǝ yughǝi tǝ polgheni. ⁵ Taa ɓitalǝm nǝ durghǝ caaghǝn raavwa naa jomjomni, gyo ɗaŋ tlǝtǝres yigha jiɗwa Lois tǝ Naagwaa Afiniki,mǝndǝr mǝ yisǝŋǝi kǝrǝŋ kǝrǝŋ tu yigha raa waa ɗaŋ. ⁶ Gin ngǝn ci dei. yo ɗaŋ mya ɓitalghǝ aa batl vǝrhgǝn ɓem kǝ Cogn ɓaskǝ a te nyongǝn taasatn. ⁷ Durghǝ yo tu nǝ raa ghǝ vǝrtǝ ghǝn Cogn taa mi hǝŋ, beɗ tǝ gii kǝ vartǝ tǝ suughen tǝ ngaɓkǝn gaam. ⁸ Nǝ durghǝ gii ci ndzuun a dulgaam tlyaghen zha adul gaam Daadǝn wopm hǝŋ, ko myan, Bulus, ɗaŋ mi Jaarum nǝ dur wos. A bamvii gii mbǝfghǝi aa buŋ nǝ durghǝ nǝdurghǝ vi wusni a te vartǝ lǝ Cogn. ⁹ Nǝ Cogn ǝŋ a wummi , a cimmi saɗ cimngǝn kǝ ndzǝk ndzǝki. Avii gin nǝ durghǝ laa wopm hǝŋ, beɗ tǝ gii nǝ durghǝ ɓumtsǝghǝn wos tǝ gyaal wos a vǝr mi ngǝrshi gyagin a giɓ Yesu Ɓorghǝn kǝ Cogn ghǝnnda kili kǝ keni. ¹⁰ Beɗ tǝ gii kaɓkǝn Cogn aa mbwaaɗi a bwaaghǝn Yesu Ɓorghǝn kǝ Cogn murghǝ kaɓkǝn wopm. Nǝ yaan Ɓorghǝn ke Cogn ǝŋ a lǝǝr ɓanngǝn mǝskǝn ɗi a ndǝr lǝǝr rai ɗi ɗaŋ nǝghǝ ɓanngǝni hŋ a lǝɓ yaali a te vii wusni. ¹¹ Nǝ durghǝ gin te ta bwaam nǝ murghǝ konngǝn vik wusni dǝllǝ ghǝ murghǝ shinngǝn, Mallǝm. ¹² Tǝ dyak gin nguŋ mya ndǝr mǝ buŋ nǝ ngǝrshi gyagin. Beɗ tǝ gii mǝ ci ndzuun hǝŋ , nǝ durghǝ yo tu maa yisǝŋ tii, yaan ɗaŋ mǝ caa raa ɓastǝ. A tlyaam raa mǝnii tu wo ɗya gaa ngǝrsi gii ɗaŋ mǝ gaa ɗaŋ mǝ gaa a taas woshii hal dzaŋ gii. ¹³ Gaa ngǝtn yo ɗaŋ kǝ kuuɓ kǝ vik caaghǝn raa ɗaŋ kǝ wumi ɓasǝm, a te caaghǝn raa tǝ suughǝn ɗaŋ cigha Yesu. ¹⁴ Ngǝtn ngǝ mbuni yo ɗaŋ yo ɗaŋ Cogn gaa ghǝ mǝn tlyaa tii a te zhipti var ɗa caa tsǝtn ɓasmi wopii. ¹⁵ Yisǝŋǝi tu, ɗeɓaɗ gyagyo ɗaŋ caa tsǝtn Asiya taa su kaarii ɓasǝm. A giɓi gya gin nǝ gya Fijalas tǝ Harmajanas. ¹⁶ Daadǝn tǝ yel gwaandatn dǝn ngǝ Onifiras, nǝ durghǝ yo tu caa yi ɓitalǝm a ta ndǝr wum ndzuun maraŋgusatn hǝŋ. ¹⁷ Ɗa bamvii gii kili gii ɗaŋ a ta yiɗi Roma, a ta ŋalǝm nǝ naa jomjoni, a ta ndǝr tu mii. ¹⁸ Gaa Daadǝn tǝ ca tǝ tu giɗkǝn ɓaste a dzaŋ gii. Ɓurug a tǝpm yo ɗaŋ a somǝm ngai yaatl Afisa, kaa yisǝŋǝi kǝrǝŋ kǝrǝŋ.