¹ Tǝ cik kyaani guɗ viin vǝrǝn gya tuurwan gamawan. Fin cik nǝ durghǝ tu ko mǝn monci gya gon caa nyaŋngas wummngǝn ves, ² nǝ durghǝ ves hŋ, raa guɗi wasǝŋ tǝ morshiɗi. Duryo tu taa yel ndaraghǝn riighǝn wan tǝ mbutarghǝn gaam. ³ Gaan ndǝrghǝn dlii wan tǝ naa a duuli hŋ, ɗaŋ gya nalghǝn gaam, tǝ ngǝtn puuskǝ nzǝkkǝni, ko lǝŋsǝ ndarani hŋ. ⁴ A bamvi gi, fin tǝ giɓ raa wan, tǝ ndaraghǝn gii ɗaŋ caa ɓan hŋǝi kǝ zhipti ghǝ sho shoo tǝ kǝ kyalaki, gyo ɗaŋ a moɓ zǝkkǝn a ken Cogn. ⁵ Duryo tu cikkǝn guɗ kǝ ndzǝkkǝni tǝǝ taa caa lǝŋsǝ tlǝɓǝr wasǝŋ a datǝpi gin. Tǝǝ ta yir raa feɗi a Cogn tǝǝ ndǝr tǝǝ vǝr gamawasǝŋ a gya tuurwasǝŋ. ⁶ Cikkǝn Saratu ta sǝǝ kǝǝm Ibrahim yi ndǝr cimtǝ tu daadǝn wos. Ɗaŋngǝni ki nǝ mǝǝri wos kǝn kya fi ngǝtn ndaara kẹ ndǝr kǝ ci vǝrtǝ shisherghǝn raa hŋ. ⁷ Cikkǝn kyaani beɗ, mǝnmonci tsǝɗǝn tǝ guɗi wan tǝ yisǝŋngǝni tu guɗi tǝ tlyaa hŋ. Zhimǝnshi ɗaŋ gya kamndǝ ghǝ cighǝn duul vǝrghǝn rai. Fin gin durghǝ tu karaghǝn Cogn wan tǝ ɗak wumngǝni hŋ. ⁸ A ɓanngǝni, ɓuruk wan, raa wan tǝ naa namboŋ, tǝ raa gwanndǝ, suun dlǝŋsǝ wan, tǝ fighǝ mbuuni tǝ mbutarghǝn gaam. ⁹ Sularǝn kuushi tǝ kuushi, ko verghǝn tǝ verghǝn hŋ. A bamvi gi, cinken tǝ gǝmngǝn mbuuni nǝ dur gin ǝŋ tǝ cimki, duryo tu a ci ɗuul shiɗshiɗi. ¹⁰ Muryo ɗaŋ caa suutǝ giɗ suughǝn raai tǝ yel dzaŋ gya gi ndararai wo ɓǝǝl riisǝŋ wos tǝ konngǝn kuskǝ ngǝtn tǝ vii wos a konngǝn ɓyerni. ¹¹ She tǝ ɓǝǝl tǝ tǝ kuskǝ ngǝtn tǝ fi ngǝtn yo ɗaŋ yi ndaara. Tǝ ŋal raa wusni tǝ ɗeɓaɗ raa wos. ¹² Yir Daadǝn caa yel mǝn mbuuni, kǝǝm wos caa raa ndǝr wum karaghǝn wasǝŋ. Beɗ tǝ gi yir Daadǝn caa gaa gǝǝɓ tǝ mǝri fighǝn kuushi.'' ¹³ Nuughǝn ci gyo ɗaŋ wo fighǝ kuskǝ ngǝtn kǝn kyaa mbii raa wan tu ka fi ngǝtn mbune? ¹⁴ Beɗ tǝ gi kǝn kyaa ɓuŋ nǝ durghǝ mbuni, a mbaaki. Cinǝ vǝrtǝ ngǝtn yo ɗaŋ caa ci vǝrtǝ wos hŋ shisherǝn raa hŋ. ¹⁵ A bamvi gi, warǝn Daadǝn Ɓorghǝn kǝ Cogn raa wan tǝ ndzǝkkǝni ko dzaŋngi gyo mbǝrǝnki a sun ɓuruk gyo ɗaŋ caa ceɗki nǝ dyak yo ɗaŋ ki tǝ raa feɗi a Cogn. Fin gin tǝ ɓokkǝn vii hŋ tǝ mbuutarghǝn gaam. ¹⁶ Naan tǝ ɓitalghǝn mbuuni duryo tu zarsǝ gya gyo ɗaŋ tǝǝ ver raa mbuuni wan a giɓ Ɓorghǝn kǝ Cogn tǝǝ ci ndzuun duryo tu caa kon vi malarghǝn dulgamawasǝŋ ɗaŋ tu kǝ yi nǝ mǝn fighǝn kusǝŋsǝ ngǝtn. ¹⁷ A moɓ ndaraghǝn, ǝŋ Cogn ya suu a raa wos, tu a buŋ nǝ fighǝn ngǝtn mbuuni a bamvii fighǝn kuushi. ¹⁸ Ɓorghǝn kǝ Cogn ta tlyaa forǝm tǝpm namboŋ cinǝ mbuuni a tlya forǝm nǝ mbuuni hŋ, durghǝ tu tǝ lǝǝrǝmiɗi a Cogn. A dluu tǝǝ ta ɗuti, beɗ tǝ gi a te zhiɓti a ta shishi. ¹⁹ Tǝ zhiptes, ata tlǝn fuu vii wusni zhipti gya gii ɗaŋ ɗaŋngǝnni ci jarumi. ²⁰ Tǝǝ ta yi nǝ mǝn ɗakkǝn wumngǝn kǝǝm kili gi ɗaŋ dumngǝn dwa Cogn ta yi ɓasshi ɓuɓkǝn jinndu Nuhui, a jinndi nalghǝn zhirgi, Cogn ta ndǝr vum zarsǝ njwaan raai tantan a zhes. ²¹ Gin ǝn nǝ ci giɗkǝn baɓtisma ɗaŋ a vumki ɗaŋgǝnni yin ɗaŋ coɓkǝn mǝǝŋngǝ dlii dlaaghǝn hŋ, beɗ tǝ gi yin ɗaŋ cimngǝn kǝ raa mbuuni a Cogn a te shishi ghǝn Yesu Ɓorghǝn kǝ Cogn. ²² Ɓorghǝn kǝ Cogn cigha te taas zaarighǝ Cogn. A tai tsogn. Zhipti shinngǝn Cogn, gya mǝn vartǝ, tǝ mǝn tlyaaghǝn taa vǝr gamawasǝŋ ɓastǝ shaŋ taŋ.