¹ Gususku, na tarne kun yaganaucin, i ɗak rama Səku wara na rami kun, wara kwa gənu kwar;i nakun aɗau. ² Darik ramak herr təku, kwa ba rra da riwu, kwa jib ramo na awayu wara na dlami kun wazək gu, kwa bar jirewa binən vatku. ³ Atəro be wara naji dikun gu be sukur bəlan wara iye na gənu gaɗa Masipu mutu gaɗa aibawa darik rama Bebəl. ⁴ Nda dabgəna aci, da tlən gəri aku yuwan kwan inji Bebəl. ⁵ Masipu pakeu i Kepas, zam i pukuraucin guma ayawo shirin. ⁶ zam aci da pakai i yaganaucin wara a dusku na danamak vaɗ i lakwtu gayi. Gawakshi zam na aaro, amman jigaɓ vədənakshi i yuwan. ⁷ Zam da pakai i Yakubu, daku gu i mawanaucin mak. ⁸ Da akugu mak da pakai i iyu, kakə i matkam wara nda 'yawu i lakwtu ɗəga bai. ⁹ Ii ro gaji mawanaucin nən iyu. Ii na batabai nda ɗaurayu ma mawanak gaɗa na barə bone i coci Səku. ¹⁰ Amman da rik herr Səku na dlaɓən ga be na dlaɓu. herr gəri kə kunu ga kə vatku bai. Gaɗa kasən, na dlam wana tlapar wara ɗəkana kakshi. Gusku yaye ii bai, amman herr Səku wara a kunu ga. ¹¹ Dasən ko iyu ko akshi, ja dlam wazək kun ke kwa bari jirewa. ¹² Gususku in kwa dlam wazək tlayi Masipu da kunuk ndawa gamtak nən, nda dlam nana jigaɓ da kunu kun aramo ma na tlayi da kunu mutu bai? ¹³ Amman in na tlayi da kunu mutu binən, ashe Masipu tla bai; ¹⁴ inde Masipu tlabinən, wazək wa mak vatku, iman kun cham vatku. ¹⁵ Zam nda bana wa ndak papiya iɗak Səku, gaɗa wa dlam na papiya iɗak Səku, ma tlatla na Masipu amman tlatla ci bai. ¹⁶ Inde nda tlatla gamtatin binən, Masipu Masipu ke nda tlatla bai; ¹⁷ inde nda tlatla Masipu binən, iman kun a dlaɓan gara vatku gusku yaye kwa kunu aipa kun. ¹⁸ Wate ndawa wara mutu a kunu Masipu kambetə nakshi ke. ¹⁹ Harr i kunuk arro təku rugara wa na awayu gəshi i kəmatəku i kun Masipu nen, wa dlaɓə nawa mak bi kanjino. ²⁰ Amman gususku Masipu tlan gəri da kunuk gamtak ndawa tən, nən kə sukur da kunuk nda mutu. ²¹ Mutu deu darik nəngaiwa tənu, tlayi da mutu ke deu darik nəngaiwa. ²² Kakə tike gamtak darik Adamu, kasən ke tike dlaɓən gəri baci arro i kunk Masipu. ²³ Amman tike i kunuk duvu gəri; Masipu matkam kə sukur, se na ndawa wara kə masipu a dlaɓa nakshi na arroi lakwtu katayi gəri. ²⁴ Wate a dlaman gara dadəgəru, lakwtu wara Masipu a barna garva i Səku Afək. Su lakwtu wara aci a bizhga na linok garva mak na kərmai. ²⁵ Aci ro a jiba dlama garva harr se aci katena nda kurə gəri i dəɗa zəgər gəri. ²⁶ Makurə gəri wara nda dləmtau daku nən atu ne mutu. ²⁷ "Aciro takɗəna be tawanke i dəɗa zəgər gəri." Amman lakwtu nda ramma "Aci takɗəna be tawanke." Atəro da zəgaya ma sutku nəɓkə na nən wara mpa betawanke i dəɗa gəri bai. ²⁸ Lakwtu nda bari ci be tawanke i dəɗa gəri, lakwtu ne Wungu na aɗa gəri, a bar na aɗa gəri i nən wara tanke a dəɗa gəri, su a wakata gaɗa Səku Afək a dlaɓa i kunuk tanke na tanke. ²⁹ In kasən binən nda tən a dlama gəmo i ndawa wara dlam baptisma i nən gamtak? In ndawa wara mutu tla bai samsam, nda dlamek shi baptisma i tam? ³⁰ A dlaɓa nana wa dlaɓi kunuk fau lakwtu tawanke? ³¹ Ɗa tlanu wai kaa na miya mutu, su tabbas ka kəmə i kunaci wara i na atu i kunuk Masipu Məgənyi. ³² Na səkunu na tam daku lawan nəngaiwa, na dlam tləri na bi pata təku i kunuk Afisus nən, in gamtatin tla binən? "Wata washi, atəro amzharu wa mutu nawa." ³³ Nda ləvata kun bai, "Gaɓshashin ndawa a dləməɗ nda gəsh bəlan." ³⁴ A dlamina na ankal! Kwa dlam mbasu adalta! Kwa ta kəma na aipu bai. Jigaɓ kun na zəgaya Səku bai. Na ram sau gaɗa na zhirwə kun. ³⁵ Amman nən ɗagai a rama ma, "A dlama nana gamtak da tli, akshi a nina zadak təko tawan?" ³⁶ Kun na zəgaya bai! Be wara kwa zəgəmu a ɓanda vəra bai se mutu nən. ³⁷ Be wara kwa zəgəmə nən a dlaɓa təka bai amman zadak ne. A dlaman gara alkama ko be ɗagai dama. ³⁸ Amman Səku a bar dawu təka wara aci cikɗu i zadak tawanke a bar dici təka gəri. ³⁹ Təka tawanke zada gayi, gaɗa kasən na tləwi təka nəngaiwa na tləwi təka kə vaya, na tləwi təka ɗutatin, zam na vənakau. ⁴⁰ Zam na təka kə dusku na təkakin kə duniya. Amman kərmai təka kə dusku zam dama na kərmai kə duniya cam. ⁴¹ Na kərmai dama kə afa kuru na kərmai kə təra, na kərmai kə gəshawu. Atəro gəshawu gayi dama na gəshawu ɗagai i kərmai. ⁴² Kasən ke tlatlək ndawa damadama da mutu. Be nda zəgəmu a mutu nakshi wara tla nakshi a mutu bai. ⁴³ Nda zəgəmu bəlan bai amman tla i kunu kərmai. Nda zəgəmu i kunu kəmangar da tli i kunu garva. ⁴⁴ Nda zəgəmu i təka nəngaiwa da tli i təka Nunuwa səku. In na təka wara wa lawan gu təku, to na təka kə Nunuwa Səku. ⁴⁵ Kasən ke da tarna, 'Nən kə sukur Adamu dlaɓən gəri na arro." Adamu kə akau bari arro i kunu Nunuwa Səku. ⁴⁶ Amman kə Nunuwa Səku da sukur bai amman kə nəngaiwa se Nunuwa Səku. ⁴⁷ Nən kə sukur kə duniya nda dlamaci da gagai. Kə mashirin da dəsku. ⁴⁸ Kakə nən wara nda dlam da kunu gagai cam kakə ndawa wara nda dlamakshi da gagai, kasən ke nən da dusku a dlaɓa kakə ndawa da dusku. ⁴⁹ Kakə wara wa ma gənawa gənən da kunu gagai wa mana gənawa gənən kə dusku. ⁵⁰ Gususku na rame kun yaganaucin, iɗa təka na dədəm a dému gadota Səku bai, ko gayi a dləməɗ da gadoci wara a dləməɗ bai. ⁵¹ Aikina! Na rame kun jirewa da dəɓsa: Wa mutu bai amman mak wa palta nawa. ⁵² Wa palta nawa gususku, i kunu wɗak daa, i fiya makəm ke dakau. Makəm guro a dlamak adərr, gamtatin a tlayi na təraɓu bai, nda palta na wa. Təka kə təraɓu təku nda ɗawa ditu wara kə təraɓu bai, təka wara a mutu nda ɗawa ditu wara mutu bai. ⁵⁴ Amman lakwtu wara təka təraɓu nda ɗawa ditu wara a təraɓu bai, zam lakwtu wara təka a mutu nda ɗawa dawu wara mutu bai, wate ani kakə wara nda tarnu maya, "Nda ntəna mutu i kunu kənasar" ⁵⁵ "Mutu ənda kənasar kəm arawan? Mutu ənda yaɓa kem?" ⁵⁶ Yaɓə mutu nən aipu, awayu aipu nən linok. ⁵⁷ Amman godeta kə Səku, wara bari wa kənasar da rik Masipu Yeso. ⁵⁸ Wate, yaganaucin ganai, arɗina bəlan kwa daba bai. Fatawanke kwa dlam wana i Məgənyi gaɗa kwa zəgadu wana kun i kunu ̱Məgənyi kə vatku bai.