¹ Kaba taktaka tamno hausgi ham zau, ham yo an bukɗo bu. A hete ki tong jakɗa mene Ndeyi ki so lah Gyam. ² Ki tintil bille banoi. A lei genga haushi andi roh zau, yo onshe milla shida dir bollo, lei terei yiya. Kuma roi me kika darangta ana yaklu ona jire ne. ³ Andi kine la'angtu bu a dom. Jakɗak mene Ndeyi ki so lah gyam a ɗeiya tong gyabani, ana ɗaha si me a boute ni. ⁴ Amoya huskanni, suni me a ɗeiya bo ɗahasu. ⁵ Andi kine beɗi bu, a daltu banok hiotila ko hanok hoti bu kika Bomu Abano Ndeyi a haska zuni. A ina mene har bo ernoto. ⁶ Taktaka ano, ''Mammaye eni yardu ne ki jire. Bomu Abano, Ndeyi yo kelui Bu,uno Nabi, sarko taktakanni a tamik ana ɗaha si ei yo hele ki naso bu.'' ⁷ Moyi ne isno ki nasobu, a barka ne ngo na ɗabkok eni lalauna wonses e. ⁸ Nen Yahaya ne, en kolko mene moiko arei mamaye. Jajim yong kolko ne moiko zuni, nami ne ngete dom sheke taktaka yo tamno ei maye'e kika ɗo ne ini ɗonshu. ⁹ Ana ''Ko ei ka'a bu; ne en zobko bunga yo ɗabshe eni lalauna wonses e. Iɗonshu gyam Ndeyi.'' ¹⁰ Ano ta ''Ko he eni ei yo hele lalauna wonses bu, kika sarti intonem. ¹¹ Ngoi na andi jire bu, si te dom ki yaklu jireni. Noi na ishe ei zina bu to dom ki yabta kanni. Ngoi na an jire a to dom ki ina jire. Ngoi na bu'uno, a to dom ki bu'uci. ¹² "Moyi! Ne isno ki naso bu. ladano a gyeno, ne saka nki lei lo jajim ruta yo si iko. ¹³ Nen Alfa ki omega, bo tono ki tekteke, zala har ya ki tatakanni. ¹⁴ Ana barka ne maye yo bu, ushe suɓangsu ɗo zuni ye ɗo toi ki tong roh zau. Me zuni ro tong garku ki bo dumɓi ni. ¹⁵ Ahena andi adinshe, ana dobo, ana bauta ki goro, ana azah, ana duga zau, shaf ki ngoi yo dalo ɗo rutangta yaklu jire. ¹⁶ Ne en, Yeso ne sarneno taktakanno ɗo shei ɗaku ei maye e kika ban Ndeyi ne an shori ki tirɓak Dauda, janjas ka baɗi so a talku. ¹⁷ Kelui Bu'uno ki Marko zuni ta, ''Dati'' Eri na ngoi kolko ani ta ''Dati.'' shaf ngoi na akolshe kizi, ki shaf ki ngoi na dalo, eri ɗo ye ham zau bo sarei. ¹⁸ Ne sheida ki shaf ki ana kola eni ei yo hele lalauna wongses e; Na ngoi sawidgo a kasu, Ndeyi sawenidi aloba yo tueno a tong lalauna. ¹⁹ Na ngoi sikta ki tong lalauna ki tong eni ei yo goni hele tong lalauna wonses e, Ndeyi siktenitik raboni ki tong roh zau ki tong gargui bu'uno, yo turangko tong lalaunas e. ²⁰ Si ngoi na sheiditko ei maye e angko ta ''Wo'o! Ne isno an naso bu.'' Amina! Nditi, Bomu Abano Yeso! ²¹ Barkak Bomu Abano Yeso Ndeyi; Ki lei ngoi yiya ki dalakku. Amina.