¹ Ne kolko wunduk ɗolyaɓaɓak hawok ban Ndeyia anshek malekaku babilo mamaye, "Ndan huke ka eli woka babilo yo yabtenok tili Ndeyi 'e." ² Maleika yo tonoi duko huke woka ni ka eli morkoi disa ki hoɗa heteno zu algi'i yo an suba ei riya, ki mamaye joma dom subai 'e. ³ Maleika yo bolo hukenok hawok wokani tong haushi, nami ɗeyinni dom kit shida dom ngoi matini kin lei shida 'yak zau yo tong haushi a matinni. ⁴ Maleika yo kunu hukek tong wokani haushi ki godo ham; nami matinsu dom. ⁵ Ne kolko maleikai ham anshe, "Ko a ruta jire-Ngoi to anni kauso ke yo onzi, ngoi Bu'uno-ki ka ko ikom sherya mamaye. ⁶ Ki ka nzuni hukeno dom ana ona jire ki yo nabaku, ko oninsu dom ɗo nzuni se; Woiyko subak nzuni." ⁷ ne kolko badar lapko, "Ka'a, Bomu Abano Ndeyi, yo mene ka leilo, sheryakoi jire ke zina." ⁸ Maleika yo hoɗo huka wokani ka hoti, ke onatoti goititik algi shaf yesi. ⁹ Goitansuk yesi kolno yami mani nzuni some eni yabta sun Ndeyi, yo an gyeɗo ka aloba mamaye 'e. Nzuni tubanko bu na ma naman ko ka Ndeyi. ¹⁰ Nami maleika yo baɗhuke wokani ka mene ei riya, tutuɗu ke hatik bei ɗeino mene ni. Nzuni ha'ashe ka linsonsu ki ka kolya ki yesi'e. ¹¹ Some eni yabta ka Ndeyi ɓaɓa ki bo hoɗa ki keɓe si su. Meshaf ki kai kuɗankok tubu ka ei nzuni 'yanko. ¹² Maleika yo ba'ashimoɗi huka wokani tong haushi na'ako hausi, Yufiretus, ke ham to hoini ki ka ɗo ramte billa ma'inshei a dutuk bo jeni. ¹³ Ne moiko kelui disa kunu yo subani kit dindi hetenok tong bo diragon, ki nabi'i ngadar. ¹⁴ Nzuni sinkau yo ishe 'yak monmoni. Nzu hete marshe gya mai dunya shafto ɗo dahe nzuni ka zehe yo hitik kesi na'ako yo Ndeyi. ¹⁵ ("Moi ne ndutu kit a shiri! Ngoi a deino gesai an barka, ngoi ramtitko zugonni ki kada hete zugoni sarei kada moi sik 'yak kawa.") ¹⁶ Znuni mokano nzuni ka zehe a bei's so wundate Armagiddon ki bo Ibraniyaku. ¹⁷ Jo maleika yo babilo huka wokani tong hibla. Ɗolyas na'ako hetenok tong ban Ndeyik ytong mene, a anshe, "Takato!" ¹⁸ An talku talkate ki girim so Ndeyi, ki didide eli yam, dididek elis wallak lei siya tun ki ɗeinokm nga ka elididek eli wonse na'ako yam. ¹⁹ Gyabanis ma'ato lakta bo kunu, eli gyabani ngata. Nami Ndeyi dib Babila na'ako nami oni gyabanis so'oto gyerwale ngamnok ham inabis yankok tong yabteno tili ni. ²⁰ Lei shida dinkiris siya boi'to, ke gosho ke biya moyankom bu. ²¹ Goshos manekshi, wuransu, an ɗodak bi kunu, ngatanko ɓaɓa ka algi. Nzuni huflanko Ndeyi ki ka alobas leito ndaɗoi.