¹ Moyangko 'ei modik baba, mandus so'oto hatkok katok hoti, tere ke a elelik shekento, alyahuk jenjaku babilo baba kato. ² An hawo, a zugont bele kika a ka burunto a tong yam ki le'i. ³ Kaba a moishe 'ei modik baba: Moyi! An sammas so'oto dei na'ako an ka babilo ki balu bimmad, an liuliu so ka babilo kaato. ⁴ Hatanni damatkok modik tong kunuk jenjakui baba kasinsu eli. Diragon woi erko dom mandus a ka buruntos 'e, kika na te le'ikoi a ha'atik lantoi 'e. ⁵ Te le'iko lagorzo, yo a ina mene ka dunya shafto ki zawa oyu. Gorangkok lai mokini gem Ndeyi ki njagdanni. ⁶ Mandus me gunato tong riya be is Ndeyi ramteto kika a ito yino so sommodi 1,260. ⁷ A jajumniy kesi hinda baba. Mika'ilu ki Malekakuni 'yangko kesik diragon, moishe diragon ye 'e ki malekakuni 'yangko kesik nzuni. ⁸ Diragon me an gedo so a tina gedosu bu. Kika ka a, si ki malekakuni sauwango wena be'i baba bu. ⁹ Moishe olano diragon woi na'akoi ki malekakuni eli, wato jerok samma woi a wunda si ta ibilis do Singkau yo a youtanta dunya shafto. ¹⁰ Kaban kolshe dolyas so'oto gedo tong baba: "Kauso wangu ndinto, gedo, ki mene Ndeyimmu ki gedok Kiristi. Gyaro olangkok a ngadar ka biya mui a eli-si yo a ngadar kasu dom Ndeyi bedik hoti. ¹¹ Tangko gedo kanni kika dom Lah Gyam ki sheidak eninsu, gyemaro ndaltangko zau su bu, har bo mato. ¹² Kika ka a, 'ya kuyu, baba ki ana deino hawosu. Me titikuk dunya ki haushi kika ibilis urno gemangku. Ngamnok yabtenok tili yam, kika manoti sommodini kina shim. ¹³ Diragon ye do moiko olini eli, moishe roko mandu wonses so le'iko lagorzoi 'e. ¹⁴ Me onangko ma shulis na'ako bolok mandus 'e kika do gunato riya be is ramtanto. A wondiy a sena ham yesi yo sommodi shim, yo gogoli ki yo goli-a jajumniy an sammas bu. ¹⁵ Sammas le'eno ham ki bonto kit 'yak haushi, ndalo godo worinto. ¹⁶ Eli me zofto sara. Eli aha bonto satkok haushis diragon le'enok boniy 'e. ¹⁷ Diragon ye yabtak tilik mandus 'e, nduko do 'e kesik kine biyanto mayei dahangko bille Ndeyi ke jo ngahangkok sheida ka Yeso. ¹⁸ Moishe diragon ye nduko erko ka yaya bo haushi.