¹ Ne onhsengku doka woi a dom Ndeyi ki Kiristi Yeso, yo a ina sheryak ana mato ki ana zau, kika hindani ki mene ni; ² I wazu. Ramti zugongko lei atong yam lei atong zei. Gilli an eni Ndeyi ki habri ki shutantu. ³ Sommoɗi isno biya ndalta shutantu. So jire bu. Me kika ka'a zuni a daha malumshe kasu a shutantesu. A ka eiyo tilinsu ndalo a hanta anshensu ei kumansu ndalo. ⁴ Zuni a wanglitik kumansu ki gem a shutantansu yo jire, me zuni masu kola dintir yo sarei. ⁵ Me koi ko1mate hakali ka lei miya ko daure tong bone; ko 'e ruta a somos zei ko kamte rutan ko. ⁶ Me ki neno sommodi shim. Sommodino wuyanni. ⁷ Nen iko kakayano so jire; ke takatko ken gofkok jire; ke zakko ona jireno. ⁸ Zanotik kelikeli so tili modi, yo bomu a bano, tili modin ko ina sherya, a ono a hosi wansi. Me ne'e moda no bu, me shafki biyai a geshe mesheni. ⁹ Ngar tilinko ko nditu gemano kalau. ¹⁰ Me Dimas a de'ino. Si a ndalta ei tong dunya a gonni Tassalonika. Ke Kariskis nduni Galatiya, Titus me ndunni Dalmatiya. ¹¹ Luka moda bi a gemano. Barteti Markus ko nditu ki si kika si isheno ruta. ¹² Nen sarko Tikikus a Afisus. ¹³ Ko mokino gadono son wusno a Taruwasa a gya Karbus, ko mokinnoti na ko isno, shaf ki lalauna harki lalauna wonsis. ¹⁴ Iskandari a gizo ngarnoti ei disa a kanno. Bomu yo tong ɓaɓa a tuhe si kit shida yo si ino. ¹⁵ Kome zi hankali ki si, kika si a shanak enimu shei. ¹⁶ Ki bo tono nen deita kanno me andi ngoiyo beino bu ki bo ka'a lei goiyiya jijon no. Nen ndalo kada a masu 'ya woi a kasu bu. ¹⁷ Me bomu yo tong ɓaɓa a gemano,ke ona gedo, kika ki gemano eni Ndeyi ngami to kika shaf ki biyai Yahudaku bu a koli ta biskeno. ¹⁸ Bomu walti no shafki rutai disa ke wangino ki bo menei yo ɓaɓa. Nama kanni ɗeyi an bo erno to bu. Amina. ¹⁹ Ko lakɗe Biriskila ki Akila ki ban Onisifurus. ²⁰ Arastus a ɗeino a Korinti, me wusingo Turufinus a Militus a golla. ²¹ Me ngar tilinko ko nditu kafi huzo. Yabulus a zugonto lakɗa koi, me ke ka'a Budis ki LInus ki Kalafidiya shaf ki biya mu. ²² Bomu a bano ɗeyi ki kelun ku. Tili moɗi ɗeyi ki nguni.