¹ Kauso aka ndishe Bomu a bano Yeso Kiristi ki dahinmu be'i moɗi mu ɗeyi ki si: mu dolshe nguni, yagyanaku, ² Ta gnu damte bu ke mamaye jukte ku hankalibu, ko ka kelu, ka sarni, ɗo ki gyem tureshi yo a ndishe gyemamu, yo a anshe ta hosi meshe bomu a bano ndinni. ³ Ngu de'i ngo bo'ita nguni ki lei lahai yiya bu. kika hoti woiye a ndutu bu kaba hotik ngete ndino, na ke maitanko ngo a dafshe uhe bui ye, lah mato. ⁴ woi'e sine yo gaba yo a namshe kanni a ka shaf eiyo a wunda Ndeyi lei eiyo a namsheni kanni. ki beinis si deishe ban Ndeyi. ⁵ Ngu zumanko bu ɗo ta ne'e gyamku nen angku 'e mamaye? ⁶ Kauso ngu manankoti eiyo ngeni, kika a tam si a jajum yo zina. ⁷ Kika ko kauso ei bunkeno yo an uhe bu kato ruta, me andi ngoi yo'oto yo ertini kabana namanko si. ⁸ A tama ngoi a ɗafshe uhe bu, ngoi so bomu a bano Yeso a duga ki hiblai boni. Bomu a bano a mata si bo 'ya bu ho'oko hili hoti mesheni. ⁹ Ngoi a ɗafshe uhe bu me a ndutu a ka ruta sinkau shafki geɗo 'yak tamya, 'yak dobok ngadar, ¹⁰ Shafki eni bo'yo so an jire bu. Ei mamaye a deya yo biyai bo'isu, kika zuni biskanko a ndaltui jire bo ɗo wanginsu. ¹¹ Kika woiye'e Ndeyi sarinsu ana rutanta rerei kika zuni on jire kato. ¹² Kika ka'a a isu sherya, ki mamaye yo ku ɗankok ona jire. ¹³ Me mu kunna Ndeyi lei tomiya, Yagenaku ndalta ki bomu a bano ndalo. kika Ndeyi zaba koi ngoi tono aka ona jire kika waltu kelui bu'uno ki ona jire. ¹⁴ Woi ei zofko si waund nguni a gemani don ngu wangle ki biska eni Ndeyi so mu 'yanko kik ngu we namakak bomu a bano Yeso Kiristi. ¹⁵ Kika ka'a, biyamu, era ki jire, ngaha eiyo onzi yo shutanku, lei a tong eni nama tureshe. ¹⁶ Kauso bomu a bano Yeso Kiristi ki kanni ki Ndeyi bomu Ndamuni omu kola zei yo anbo ernoto bu ki geɗok zugo so nditu ka tili moɗi, ¹⁷ Kola zei ngamte hak tili mu ki ruta ki eniy zina.