¹ Bulus a ɗeino kusa Kiristi Yeso ki bo ndaltu Ndeyi yo wangumu ki Kiristi Yeso 'yak dibnammu, ² Ki TImoti, lah yo jire a tong ona jire: Tili moɗi, jig-yayi, ki ɗeinok lahiya ki gem Ndeyi Boti ki Kiristi Yeso Bomu a bano. ³ Kit yon sauwa anshenko ko 'e ki bon gonno Makidoniya ta ko duk sheke a Afisa ko anik biya ma'ato kada zuni shutante Adak biyai maɗɗi bu. ⁴ Kada yabte ɗeino ka kola somok zurya bu. A moktu shana ki habta be'i erno ka a ramta eni Ndeyi, ki be'i ona jire. ⁵ Kauso ei a anshe ka uhe sine ndaltu ki tong bu'unok tili, ko ruta ei zina ka ei disa, ki gyem ona jire so jire. ⁶ Ma'ato taban suk ka billa wanglansu ko la eni sarei. ⁷ Nzuni ndalanko ɗeyi malumshe uhe, me gananko ei zuni anshe bu ɗo ma erangko kanni. ⁸ Me mu manankoti ta uhei zina na ngo iko rutak si ka bille. ⁹ Ki bong manakoti ta uhe a bo ngoi ishe ruta zina bu, me bo ana 'yaklu ɗaha uhe,ana jukta be'i, biyai mananko Ndeyi bu ki ana zunhu, ki biyai anan Ndeyi bu ki biyai wanglansu ki be'i ona jire. 'Yan kote bo biyai a dukshentik bosu ki nonsu, ana guda zau, ¹⁰ ana aza, ana aza gorzok gorzo manduk mandu, ana shira biya,ana rerei, sheida rerei ki lei ei miya yo a gahak shutui jire. ¹¹ Woiye'e ki nama eni Ndeyi yo an barka, yo an nzuba eniy tong tili. ¹² Ne kunnak Kiristi Yeso Bomu a bano. Si ono geɗo, kika si manoti nen ina ei si ano, ke zofko ne'e tong rutani. ¹³ Onzi anshe disa ka Kiristi a maita biyai a ɗafshe si, a gutta biya. Me ne biska jikyayi ki bo nen iko ei mamaye ki yaklu mantu ki yaklu onajire. ¹⁴ Me tili moɗi bomu a bano ngamtino ki ona jire ki ndaltu so hawak Yeso Kiristi. ¹⁵ Sarni woi ne gitik ershe kanni ke gitik biska, Yeso Kiristi ndino tong dunya wange ana zunhu. Nen wallak leilo zunhu. ¹⁶ Me kika ka'a onano jikyayi, ki gyamano, nen yo tono, a tong habri Yeso Kiristi. iko ka'a ɗon ɗeyi 'yak tamya gyam biyai onani jire ɗo we zau so an bo ernoto bu. ¹⁷ Kauso woi ma'i zama, yo a matabu, biya gita moya si bu, Ndeyi moɗabi, mene ki nama ka lei tomiya. Amina. ¹⁸ Ne zeshengko eni woiye'e domko, Timoti, lah no, nen ishe woi kit yo eni Nabaku anangko katko, ɗo ko 'e washis zina, ¹⁹ ei woi kika ko we ona jire ki tili moɗi. Biyai ma'ato kuɗangkok ei woi eransu kuɗangkok marshe ka ona jire. ²⁰ Kit mi Himinayus ki Iskandari, yon ongko nzunik sinkau ɗo kada zuni shutantesu yaklu ona jire bu.