¹ O̱kese̱ o̱li ange̱li rii eda si ame̱n si arivbo̱ vbie̱ me̱n, o̱ saan gboo bi ikrisita. O̱za vbi e̱kpeto̱ba si Oise̱le̱bua bi si o̱li ovbioghogho, ² la vare shan vbi idanmi esese̱ si oee si o̱li okpe̱vbo. Vbi obo̱ eveva si o̱li eda lii oran si arivbo ri, o̱mi ikperan igbeva o̱do̱dan, ukin ukin lo̱ re mii ikpa so̱i Ebe si o̱li oran vbi o̱la lo̱ ya re̱ nwin eli uhumuroo egbe daan. ³ Eo̱ kha ke e̱n evbo. E̱kpeto̱ba si Oise̱le̱bua bi Ovbioghogho lo̱ lo̱ e vbi o̱li okpe̱vbo, ayio̱uhumi so̱i lo̱ yo gai. ⁴ Elo̱ mii e̱o so̱i, eni so̱i lo̱ ii ain vbi e̱hai. ⁵ Aso̱n kha chie evbo̱; ei ke mo̱n emi ni yain lo̱ ri uvbaemi si urukpa u, da uvbaemi si ovo̱n, erimidi O̱lo̱mo̱e̱n li Oise̱le̱bua o̱lo̱ vbae o̱ vbi ain. Elo̱ e vbi e̱ghe̱ re̱le̱ re̱le̱. ⁶ O̱li ange̱li re̱ o̱ me̱, "Ema ri uduo̱ bi ata li khi eli eta, O̱lo̱mo̱e̱n li Oise̱le̱bua si eli etin si elo̱mie̱o, yi ange̱li so̱i lo̱i re̱ vbie̱ ayio̱uhumi so̱i, emi la lo̱ ruan oise̱te gbe na." ⁷ "Ghogho! I lo̱ tua vare! Ihianba i khi si o̱lo̱ re o̱vbi eli eta si atakpoto̱ si o̱li ebe na." ⁸ Me̱me̱n li Ijo̱ni li ho̱in li gbo mii emi na. ebi re̱ ho̱in li re̱ miain, I si e̱ke̱in me̱ run vboto̱, ebi o̱li ange̱li da muzan li re̱ gai o̱li ange̱li lo̱ ri eli emina vbie̱ me. ⁹ O̱ re̱ e̱me̱, "E vbi ina, ayio̱uhumi elabe̱ li u ba e̱, bi imio̱n li imo̱he li ekhe̱n imie̱o, de ba eni ain o̱ re̱ o̱ vbi eta si o̱li ebe na. Gi Oise̱le̱bua." ¹⁰ O̱ re̱ o̱ me̱, "E ri akan o̱ vbi atakpoto̱i si o̱li ebe na, e ri e̱ghe̱ ke si ke̱ e an. ¹¹ O̱lo̱ ya uata, zo̱i ya totobo̱ ri aiuata so̱i shan, o̱lo̱ gbi iwuan si ue̱e̱n, zo̱i ya totobo̱ vbi agbiiwuan si ue̱e̱n so̱i. O̱li uata, zo̱i ya uata so̱i shan. O̱lo̱ fuain, zo̱i totobo̱ ya e vbi o̱fuan." ¹² "Ghogho! I vade e̱yin e̱yan, I haoga me̱ ri vbo̱ debaa me̱, li lo̱ re̱ ie̱n ga li o̱do̱de ze̱n elabi obia lo̱ biai. ¹³ Me̱me̱n i khi alfa bi omega o̱lo̱ o̱kpao bi o̱lo̱ kpuokho, ibe̱e̱re bi ire̱so ¹⁴ Ihianba i khi si elo̱ ho̱o̱ e̱un si ain a, lei re̱ meti za vbi oran si arivbo̱ e, lo̱i shan vbi eli unu khue̱de̱ ovbi o̱li okpe̱vbo. ¹⁵ Ewa le ri vbi oee, elo̱ zi imaghe, elo̱ gboghe̱e̱, elo̱ gbiubi, elo̱ gi areo̱ bi elo̱ mo̱n ihume̱ke̱n yi e̱he̱n li yan gbo ro̱i u. ¹⁸ I ri o̱se̱e̱ i o̱vbo̱ kho̱ o̱lo̱ iu lo̱ ho̱n o̱li eta si atakpoto̱i isi o̱li ebe na, o̱ia kha re̱ baa i, Oise̱le̱bua lo̱ hianbaa ugbeu lavin o̱ vbi o̱li ebe na ni ain. ¹⁹ O̱ia ke hian vbi eta lavin o̱ vbi o̱li ebe si atakpoto̱i re, Oise̱le̱bua lo̱ nyin o̱lo̱ se̱i o̱ vbi oran si arivbo̱ bi okpe̱vbo lo̱fuan la vin emi vbo̱hio̱ so̱i vbi o̱li ebe na. ²⁰ O̱li o̱ri o̱se̱e̱ o̱ vbi eli emi na o̱i 'Hee! Ivade e̱nye̱nyan. "Amin! Vare O̱lo̱mo̱e̱n li Jesu! ²¹ Li ihianba si O̱lo̱mo̱e̱n Jesu e vbo̱ yi eia ere̱me̱n. Amin.