⁴ Ange̱li o̱zi ea kui emi lo̱ rio̱i vbi itasa o̱vbi e̱da bi uhume̱da, ere̱ chie̱n e̱re. ⁵ I ho̱in khi ange̱li isi o̱li ame̱n o̱i, "O̱lo̱ uata yo̱n i li u, o̱lo̱ rivbo̱, lō e vbo̱ ghe o̱li o̱fuain- erimidi khi ui ighae̱zo̱n si eli mi na. ⁶ Erimidi khi eri yain kpo̱n e̱re si eli emieho̱n bi elo̱mie̱o kuo̱ vbi oto̱. Uri e̱re li ain nwuo̱n. Emi lo̱ eo̱ vbo̱ ni ain o̱n." ⁷ I ho̱in khi ikpe̱kpe̱soisa, ri eanye̱ re, "Iyo̱o̱, O̱lo̱mo̱e̱n Oise̱le̱bua lo̱ gba, ighae̱zo̱n se̱e̱ isata bi iuata. ⁸ Ange̱li o̱zi ele za kui o̱lo̱ ri vbi itasa so̱i o̱ vbi o̱e̱e̱n, a ri ehe o̱ vbo̱ nai lo̱i re̱ ri erain too eia a. ⁹ O̱li erain lo̱ tohia voi voi too i ain a, yan roo uroo obe yi eni si Oise̱le̱bua, lo̱ mo̱n utotomi vbi uhumo̱n eli ugbeu na. Ei o e̱ke̱n da lei ri okhae nai. ¹⁰ Ange̱li o̱zi ihie̱n o̱ kui itasa so̱i o̱ vbi ukhumi e̱kpeto̱ba si o̱li eamogo, aso̱n o̱ re voo e̱ghe̱ oba̱ so̱i. Yan ii oe̱mi siain, ¹¹ erimidi si utomi bi e̱mai, ei kpe̱ ama oe̱ke̱in vbi emi leu. ¹² Ange̱li o̱zi ehan kui itasa so̱i, kuo vbi e̱ke̱in o̱li eda lokhua, Si Ufretis. Ame̱n so̱i kakai hioi, lo̱ ire̱ e̱nhi ukpode̱ khe̱ eli ije le lo̱ za vbi ebi o̱e̱e̱n o̱za me̱re vare. ¹³ I mii eti ea lei fuan li ain u bi e̱kee li an za vbi unu si eli idrago̱ni dianre, bi o̱lo̱ mie̱o si e̱he̱n. ¹⁴ Etin si esun yain u, li yan ui ae̱e̱n si onyiunu a. Yain dianre bun ije si o̱li agbo̱n na ere̱me̱n li yain si ain koko khe̱ okho̱in, vbi ukpe̱de̱ lo khua si Oise̱le̱bua lo̱gbai le̱. ¹⁵ Ri e̱o o̱vbi oto̱! "I vade bii oi! Ihianba o̱ yi o̱lo̱ ri vbi ekhe̱e̱, lo̱ kui e̱un so̱i o̱ vbi egbe, lo̱ kha ri ubaan dianre, lai re̱ za ghoo ebi e̱kho̱i ro̱i gbale̱koo." ¹⁶ E huai ain koko vbi ebae cho̱i Amagido̱n vbi uroo Ihibru. ¹⁷ Ange̱li o̱zi ihio̱n za kui itasa so̱i dianre o vbi efio. Urun za vbi e̱ke̱n ite̱mpo dianre yain bi o̱li ekpeto̱ba o̱ re̱ o̱i, "O̱ foi!" ¹⁸ Ihian bi o̱ hian, okhumi o̱so, oisokhumi o̱ de, ukpeghemoto̱ lo̱be de baa, ukpeghemoto̱ lo̱ le̱ ela se̱ mie̱n ghe obo̱ li mamai li eia re̱ ri vbi o̱li uhumoto̱i na. ¹⁹ A hin o̱li okpe̱vbo o̱vbi odi ea, eli okpe̱vbo si eli uhumuroo de kua. O̱kese̱, Oise̱le̱bua za e Ibabilo̱ni lokhua re, o za ri e̱nyo̱n lari iriae̱ke̱n si ivbae̱o so̱i e̱he̱n nai. ²¹ O̱ko̱eda lerivbo̱ dahoia, ai ke mii o̱ko̱ o̱soo̱so. ²⁰ Amin ikpido le gbalo̱, bi an khua go̱o̱n zavbi okhumi di oto̱ rekuo̱ vbi egbe si eia. Yan khue Oise̱le̱bua o̱ vbi o̱li ugbeu si ikpido erimidi khi o̱li ugbeu o̱ kho̱o̱.