¹ O̱na i khi are̱vbie̱ isi Jesu li Oise̱le̱bua re̱ nai lo̱i re̱ vbie̱ elo̱ yian uhumi, vbi emi lalo̱ mie̱n o̱i se̱ te̱ gbe na. O̱ ro̱i vbie̱ shan vbi obo si ange̱li so̱i yi ayio̱ uhu mi so̱i li Ijo̱ni. ² Ijo̱ni ri o̱se̱ e i o̱ vbi eta si Oise̱le̱bua bi o̱se̱ e̱ la re̱ nai vbi o̱hio̱ si Jesu Kristi, vbi emi ere̱me̱n lo̱ mie̱n. ³ Ihianba o̱ yi o̱lo̱ ko̱ o̱i dianre bi o̱lo̱ daeho̱n si eta si atakpoto̱i na, bi o̱lo̱ ri emi lavin o̱vbo̱ u, erimidi khi e̱ghe̱ ke si ke̱ ean re. ⁴ Ijo̱ni re̱ yi ekhe̱n iwowo ihio̱n le ri vbi Asia. E̱seo̱he̱n i evbo̱ yi vba bi o̱fure lo̱ za vbi isi o̱lo̱ri vbo̱, lo̱ e vbo̱ bi o̱lo̱ lo̱ chie vare, bi lo̱ za vbi etin ihio̱n vare lian ri vbi isao si e̱kpete o̱ba. ⁵ Bi, lo̱ za vbi obo̱ si Jesu Kristi, lo̱ ui o̱se̱e̱ isi ata, o̱lakpao vbia za vbi elo̱u re, bi o̱lo̱ ei ekhe̱n ije isi o̱lagbo̱na shan. Re̱ yi yo̱in lo̱ hume̱nke̱n i mai lo̱ ri e̱re so̱i faan mai vbi o̱kho̱o̱. ⁶ O̱re̱ mai chie̱n ije bi ohe̱in li Oise̱le̱bua so̱i bi Erah-o̱khai bi utotomi o̱ re̱ yo̱i re̱le̱ re̱le̱. Ise̱. ⁷ Kae̱o a, o̱ vade vbi e̱ke̱n oghuu si okhumi, e̱o ere̱me̱n lo̱ mio̱in, gbo khi elo̱ so o̱i o̱gan vbi efe̱n, uhumumo si o̱lagbo̱n na lo̱ vie̱ o̱ vbi erimidi so̱i. Iyo̱o̱, Ise̱. ⁸ Me̱me̱n ni khi alfa bi omega ." Iyo̱ li o̱lo̱mo̱e̱n li Oise̱le̱bua tai, "yo̱in isi e̱yan, isi o̱lo̱kpao rivbo̱ bi yio̱n lo̱ lo̱ vare, o̱lo̱khuaele̱." ⁹ Me̱me̱n li Ijo̱ni, li omio̱n vba li o̱mo̱he lo̱ de ba vba oya vbi ioya bi e̱ghe̱ o̱ba bi azie̱n egbe le ri vbi e̱ke̱n i Jesu-o̱ e vbi o̱ko̱e̱da lae cho̱i Ipatmos, erimidi si ata si Oise̱le̱bua bi ari o̱se̱e̱ i o̱ vbi e̱mo̱n Jesu. ¹⁰ I ri vbi e̱ke̱n Etin vbi ukpe̱de̱ si O̱lo̱mo̱e̱n. I za ho̱n khi ukpurun khue vbi uokho me̱n lo̱ roo bi otukoi. ¹¹ O̱re̱o̱i, "Vin emi lu lo̱ mie̱n o̱ vbi ebe, lu lo̱ huan yi iwowo ihio̱n-re̱yi E̱fisu, reyi Ismaina, re̱yi Ipagamum, re̱yi Itiyatira, re̱yi Isadis, re̱yi Ifiladefia bi ure̱yi Ilaodesia." ¹² I fi egbe deli egbe li re̱ e̱n urun isi o̱lo̱ ti eta ne̱ me̱n ho̱n, i ke fi egbe deli egbe i za gho emi ihio̱n la ri igolu e̱he̱n la hua urukpa o̱. ¹³ Vbi esese̱ si emi la hua urukpa o̱, o̱li o̱ u bi ovbi o̱ia rivbaan, lo̱ kui e̱un liwoo lo̱ voo oe̱ o̱ vbi egbe, o̱ fi ukpo̱ gbe̱le̱ lo̱ dan bi igolu shan vbi idanma rare. ¹⁴ Eto si uhumi so̱i o̱funan bi uhouu o̱ fuan bi amikpido, bi e̱o so̱i o̱ u bi oe̱ mi si erain. ¹⁵ Awe̱ so̱i o̱ u bi e̱umin la kalo̱a le̱se̱n, elabi eumi la za vbi okpije̱n nwun dianre. Urun so̱i o̱ roo bi ame̱n lo̱ bun lo̱ la za vbi okhumudo di oto̱i re. ¹⁶ O̱mo̱n ikpan e̱hie̱n ihio̱n vbi obo̱dio̱n so̱i, agada lo̱ wun vbi odeva pie̱pie̱ o̱za vbi unu so̱i dianre, o̱me̱o so̱i o̱ u fae bi e̱ghe̱ si ovo̱n o vbae kpankpan. ¹⁷ I ke mio̱in, i za de fi o̱ i vbi awe̱ bi o̱lo̱ uu. O̱za nwin obo̱dio̱n so̱i o̱ me̱n vbi egbe, o̱re̱ o̱i "Elo fe̱n, me̱me̱n i khi o̱lo̱ o̱kpao bi o̱lo̱ kpuokho. ¹⁸ Bi o̱lo̱ rivbo̱, e ri uu, ama ka e̱o a, I rivbo̱ re̱le̱ re̱le̱. I mo̱n iko̱ko̱ si euu bi isi idi. ¹⁹ O̱hio̱ si o̱na, vin emi lu mie̱n o̱ vbi oto̱i, o̱lo̱ vbi si e̱nyan bi o̱lo̱lo̱ ruan vbi ikpuo okho isi o̱na. ²⁰ Emi si uhe egbe vbi o̱hio̱ si ikpan e̱hie̱n ihio̱n lu mie̱n vbi obodio̱n me̱n bi emi la hua urukpa o̱ ihio̱n la ri igolu e̱he̱n, ikhi; Eli ikpan e̱hie̱n ihio̱n li khi ekhe̱n angeli isi iwowo vbo di ihio̱n, emi la hua urukpa o̱ lo̱ gbo vbi ihio̱n, o̱vbi eli iwowo ihio̱n."