¹ "Vin o̱na yi ange̱li lo̱ ri vbi asikoko si iwowo vbi Efiso̱s: Ena i khi eta si o̱lo̱ ri obo̱dio̱n nwin ikpae̱hie̱n ihio̱n mo̱e̱n, lo̱ gbo shian vbi use si emi ihio̱n lari igolu e̱he̱n la hua urukpa o̱. ² "I e̱n obia lu biai, bi ebi u i ri utotomi bia bi ozie̱n se̱e̱. I e̱n khi umeti mo̱n ozie̱n si eia lebe. I e̱n khi udan mi ele echi egbian apo̱sto gho, le i vbi ain, lu gaze khi eia si e̱he̱in yain u. ³ "I e̱in khi umo̱n ozie̱n, khi uzukpe oya vbi erimidi si eni me̱n, khi o̱i se̱ e̱ e̱. ⁴ Ama, I mo̱n emi li e̱n re̱ u, uke sin emi lukpao hume̱nke̱n io̱n o̱vbi oto̱i. ⁵ E ere, ebi uzade. O e̱ke̱in, lu ya chie wee ebi ui kpao be̱e̱. Su mo̱n ioe̱ke̱n de lu e̱n I lo̱ vare ye̱ li re̱ nwin oran si urukpa se̱e̱ sho̱ vbi eko̱ so̱i re. ⁶ Ama, umo̱ o̱na; Umo̱n ikho̱ e̱ke̱n yi obia si ekhe̱n Nikoletan, li gbo kho̱ eke̱n ni. ⁷ Vba zi o̱lo̱ mo̱n ukpeho̱n da eho̱n o̱ vbi emi li Etin o̱ta yi asikoko si iwowo. O̱lo̱ khu okho̱in, I lo̱ ri ehee nai re̱ fan e vbi oran isi arivbo̱, lo̱ ui ufun vbi egbe si Oise̱le̱bua. ⁸ Vin o̱na yi angeli lo̱ ri vbi asikoko si Iwowo vbi Ismaina; "Ena i khi eta si o̱lo̱ u khi yo̱in li khi o̱kpao bi o̱kpuokho, o̱lo̱ uu lo̱ che chie̱n o̱lo̱ rivbo. ⁹ I e̱n ioya se̱e̱ bi e̱so̱n luri, ama eri u fei. I e̱n akhue e̱ shan si eia le o̱i khi ekhe̱n Ijiu li ain u, be̱ ei vbi ain, Isinagogu isi esun lian u. ¹⁰ Ezi ofe̱n nwue̱n vbi ioya lu lo̱ e o̱i te̱e̱ gbe na. Ka e̱o; Esun o̱ lo̱ ghe hua eso vbi use vba kuo̱ vbi ighan, lai re̱ dan mavba gho, vba lo̱ oya shan vbi ikpe̱de̱ igbe. Mo̱n adiudu an se̱ vbi ukpe̱ di uu, i lo̱ nwin uvbi erun oje si arivbo̱ na. ¹¹ Zi elo̱ mo̱n ukpeho̱n da eho̱n si emi li Etin o̱ ta yi asikoko si Iwowo. Elo̱ khuo kho̱in kha che min o̱riaa si euu si ugbo̱ zeva. ¹² "Vin o̱na yi ange̱li si asikoko si iwowo vbi Ipegamum; 'Ena i khi eta si o̱lo̱ mo̱n agada lo̱ nwun vbi odeva: ¹³ '"I e̱n ebu a dia , ebi o̱ukhi ekpeto̱ba isi esun ri. O̱re̱ ri iyo̱, ufi obo̱ nwun eni me̱n khekhe. I e̱n khi usio̱in khi umo̱n adiudu an vbi me̱n, re khi e̱ghe̱ si Antipasli ose̱e̱ ise̱ me̱n o̱li diudu an, la gbei vbi usee vbba, vbi ebi o̱u khi esun o̱ dia. ¹⁴ Ama i mo̱n emi eso kue̱i li ue̱n u; Umo̱n eso vban li ain fi obo̱ mwin emi li Ibalam vbie, lo̱ vbie̱ Ibalak lo̱ i re̱ chie̱n igbangobo̱ yi ivbi Izre̱li, le i re̱ ya emae la re̱ uabo yi ireo̱ bi lei ya gbooghe̱e̱. ¹⁵ I yo̱ u gbo i mo̱n elo̱ fi obo̱ nwin emi li ekhe̱n inikolaitan o̱vbie̱. ¹⁶ Oe̱ ke̱in, si yo̱! Sii uo eke̱in, i lo̱ iare̱ ye̱ e̱je e̱je, I lo̱ ri agada lo̱ ri me̱n vbi unu, kpa yi ain kho̱n e̱n. ¹⁷ Vba zi o̱lo̱ mo̱n ukpeho̱n mo̱n idaeho̱n yi emi li Etin o̱ ta yi asikoko isi iwowo. Ke re̱ yi o̱lo̱ khuokho̱in, i lo̱ nwin emae lo̱ yegbehee nai, bi udo lo̱ fuan la vi eni lo̱gbo̱n o̱n, eni li o̱o̱vbee kha e̱n, so̱i vbi o̱lo̱ mo̱n di eni." ¹⁸ "Vin o̱na yi ange̱li isi asikoko si iwowo si Itaitira, "Ena ikhi eta si ovbi Oise̱le̱bua, lo̱ mo̱n e̱o bi o e̱mi si erain, bi awe̱ lo̱u bi oze lari emi gboo; ¹⁹ I e̱n obia lu biai; Ihume̱nke̱n se̱ bi adiudu an bi ugami bi ozie̱n egbe se̱. I e̱n khi obia lu biai o̱gbon na o̱le̱ obia lu kpaobia. ²⁰ Ama, i mo̱n o̱na li ko̱o̱ re̱khae̱n: Usi o̱kposo lae cho̱i Ijezibe̱li ke̱ egbe, lo̱ e chie egbo̱i ohe̱in lo̱kposo. O̱ri emi lo̱ vbie te̱e̱ ekhe̱n ayio̱ uhumi se̱ me̱n o vbi elo̱gboghe̱, li ain ya gbo re̱ emae la re̱ uabo yi ire o̱. ²¹ I ri ehe nai re̱ oe̱ke̱in, ama o̱i ho lo̱ire̱ deli obo̱ vbi ue̱n si oghe̱e̱. ²² ka e̱o a! I lo̱ fio̱ de gbe vbo to̱i li emiami, i nwin io ya lo khua yi eli yain re̱ gba gboghe̱e̱, sokpa khi yain deli obo̱ vbi ue̱n si ain. ²³ I lo̱ gboo ivbi o̱i ulo, li asikoko si iwowo ere̱me̱n re̱ e̱n khi me̱me̱n li ya guali aoo bi udu. Ebi vba vba o̱do̱de i wee, li lo̱ i re̱ na vba. ²⁴ Ama, re̱yi elo̱ ko̱re vbi Itaitira, eia no̱i lei re̱ ovbi o̱li avbie̱ emi na, lei e̱n emi li eso o̱ echo̱i, emi lo̱ dimin isi esun, i e̱ vba, "I ke maa ihua lo̱ khuai o̱vbe na vba." ²⁵ Ebo̱ re̱ izegbe, vba lo̱ fi obo̱ nwo̱in toto se̱ vbi ivare. ²⁶ O̱lo̱ khuo kho̱in, lo̱ gbo bia ebi i bia se̱ vbi ire̱so, i lo̱ ri ashe̱ nai o̱ vbi uhumi isi uhumora le buin. ²⁷ Ukpora si oto̱in lo̱ lo̱ re̱ ain shan, o̱lo̱ gboo iain kuo̱ vbi ese̱se̱mi elabi ue̱n han me̱n lari owe̱ ma. ²⁸ Elabi ghei mio̱in mie̱n vbi obo̱ si Erame̱n, I yo̱ i lo̱ gbo i nwin ukpan ehie̱n si egbia nai. ²⁹ Vba zi o̱lo̱ mo̱n ukpeho̱n daeho̱n li emi li Etin o̱ ta yi asikoko si iwowo.