¹ Ako, si Santiago, nag-alagad sa Dios ug ako ulipon sa Dios pinaagi kang Ginoong Jesu-Cristo. Ako misulat niining sulat sa 12 ka mga tribo sa Judio nga misalig kang Cristo ug nga nagkatibulaag sa tibuok kalibotan. Ako mangumusta kaninyong tanan. ² Akong kauban nga mga magtutuo, isipa kini nga usa ka butang sa dako nga kasadya sa dihang inyong masinatian ang nagkadaiyang matang sa mga kalisod. ³ Sabta ingon nga kamo mosalig sa Dios diha sa mga kalisod, sila motabang kaninyo sa paglahutay bisan pa sa daghang mga kalisod. ⁴ Paglahutay sa mga kalisod hangtod sa kataposan, aron nga kamo makasunod kang Cristo sa tanan nga paagi. Unya dili kamo mopakyas sa paghimo ug maayo. ⁵ Kung ang matag-usa kaninyo nanginahanglan nga masayod kung unsa ang himoon, tugoti siya nga mangayo sa Dios, ug mohatag siya nga madagayaon ug dili masuko ni bisan kinsa nga mangayo. ⁶ Apan sa dihang kamo mangayo sa Dios, salig kaniya nga motubag kaninyo. Ayaw pagduhaduha nga siya motubag ug motabang kaninyo, tungod kay ang katawhan nga mapadayunon sa pagduhaduha ang Dios dili mosunod kaniya, sama sa balod sa dagat nga ginatayhop paadto ug pabalik pinaagi sa hangin ug sa ingon dili makapadayon ngadto sa samang padulngan. ⁷ Sa pagkatinuod, ang tawo nga nagduhaduha kinahanglan nga dili maghunahuna nga ang Ginoong Dios magbuhat sa tanang butang nga ilang gihangyo kaniya nga pagabuhaton. ⁸ Kay sila ang katawhan nga wala makahukom kung sila mosunod kang Jesus o dili mosunod kang Jesus. Kini nga mga tawo dili mobuhat sa mga buhat nga ilang gisulti. ⁹ Ang mga magtutuo nga mga kabos kinahanglan nga maglipay tungod kay ang Dios nagpasidungog kanila. ¹⁰ Ug ang magtutuo nga datu kinahanglan nga maglipay nga ang Dios nagpaubos kanila, nga makatabang kanila sa pagsalig ni Jesu-Cristo, tungod sila ug ang ilang pagkadatu molabay lamang, sama sa mga bulak nga mangalaya. ¹¹ Sa dihang ang adlaw mosubang, ang makasunog nga kainit sa hangin mopauga sa mga tanom ug hinungdan nga ang mga bulak mangatagak ug dili na mahimong matahom. Sama sa bulak nga mangamatay, ang datu nga mga tawo mahimong mangamatay samtang sila magtigom ug salapi. ¹² Ang Dios magpasidungog niadtong makalahutay sa mga pagsulay, tungod ang Dios maganti kanila pinaagi sa paghimo kanila nga buhi hangtod sa kahangtoran, sama sa iyang mga saad nga himuon alang sa tanan nga nahigugma kaniya. ¹³ Sa dihang kita matintal sa pagpakasala, Dili kita maghunahuna nga ang Dios ang mitintal kanato, tungod kay ang Dios dili buot nga maghimo ug daotan, ug siya dili magtintal sa matag-usa nga magbuhat ug daotan. ¹⁴ Apan ang matag-usa buot nga maghimo ug daotan, ug ila kining himuon, sama nga sila nahulog ngadto sa usa ka bitik. ¹⁵ Pagkahuman niana, ang ilang daotang panghunahuna maoy mohatod kanila sa paghimo ug sala, ug kini nga sala mokuha sa ilang hunahuna hangtod nga kini maglaglag kanila. Unya, sa dihang ang daotang tinguha matigom, ang sala matawo, kana gipasabot nga ang tawo nga makabuhat ug sala mahimo lamang nga mapasaylo pinaagi kang Jesus. Ug sa dihang ang sala maghimo sa tinuod nga sangpotan, ang kamatayon moabot, ang kamatayon sa lawas ug ang kamatayon sa espiritu, buot ipasabot nga ang makasasala gibulag gikan sa Dios hangtod sa kahangtoran. Bugtong si Jesus lang ang makaluwas kanato gikan niining kataposang kamatayon. ¹⁶ Akong isig kamagtutuo nga akong gihigugma, undanga ang paglimbong sa inyong kaugalingon. ¹⁷ Matag tinuod maayo ug hingpit nga gasa nga moabot gikan sa Dios ang Amahan, nga atoa sa langit. Siya tinuod nga Dios nga naghatag kanato ug kahayag. Ang Dios dili mausab sama sa gibuhat nga mga butang nga mausab, sama sa landong nga makita ug mawala. Ang Dios dili mausab ug siya kanunay maayo! ¹⁸ Ang Dios mipili nga ihatag kanato ang espirituhanong kinabuhi sa dihang kita mosalig sa tinuod niyang mensahe. Busa karon mga magtutuo diha kang Jesus himoa ninyo nga kamo ang una nga katawhan nga adunay tinuod nga espirituhanong kinabuhi, nga bugtong si Jesus lamang ang naghatag. ¹⁹ Akong kauban nga mga magtutuo nga akong gihigugma, kamo nasayod nga ang matag-usa kaninyo kinahanglan nga magtinguha sa pagpaminaw sa tinuod nga mensahe sa Dios. Kinahanglan nga kamo dili magdalidali sa pagsulti kung unsa ang anaa sa inyong kaugalingon nga panghunahuna, o dali dayon masuko, ²⁰ tungod kay sa dihang kita masuko dili nato mabuhat ang matarong nga mga butang nga buot ipabuhat sa Dios nganhi kanato. ²¹ Busa hunonga ang pagbuhat sa tanang matang sa daotan, ug pagpaubos sa pagdawat sa mensahe nga itanom Dios diha sa inyong kinasuloran, tungod kay siya makahimo sa pagluwas kaninyo kung inyong dawaton ang iyang mensahe. ²² Buhata kung unsa ang mando sa Dios sa iyang mensahe. Dili lamang sa pagpaminaw niini, tungod kay ang mga tawo nga maminaw lamang niini ug wala mituman niini sayop nga ang Dios moluwas kanila. ²³ Pipila sa mga tawo nakadungog sa mensahe sa Dios apan wala magbuhat kung unsa ang iyang gisulti. Sila sama sa pipila ka mga tawo nga mitan-aw sa ilang dagway sa salamin. ²⁴ Bisan siya mitan-aw sa iyang kaugalingon, siya milakaw palayo sa salamin ug dihadiha dayon nalimtan niya kung unsa ang iyang panagway. ²⁵ Apan ang ubang tawo mitan-aw pag-ayo sa mensahe sa Dios, mahingpit ug ang katawhan gihimong gawasnon sa kinaugalingon sa pagbuhat kung unsa ang buot nga ipabuhat sa Dios kanila. Ug kung magpadayon sila sa pagsuta sa mensahe sa Dios ug dili lamang sa pagpamati niini ug unya kalimtan kini, apan buhata kung unsa ang gisulti sa Dios nga ipabuhat kanila, ang Dios magapanalangin kanila tungod sa kung unsa ang iilang gibuhat. ²⁶ Pipila sa mga tawo naghunahuna nga sila misimba sa Dios ug husto, apan nabatasan nila ang pagsulti ug daotan nga pulong. Kadtong mga tawo sayop ang paghunahuna nga sila misimba sa Dios sa husto. Ang tinuod sila misimba sa Dios sa walay pulos. ²⁷ Usa ka mga butang nga gisulti sa Dios kanato nga buhaton ang pag-atiman sa mga ilo ug sa mga balo nga nag-antos sa tumang kalisod. kadtong mibuhat niana, ug niadtong wala naghunahuna o nagbuhat sa malaw-ay sama niadtong wala mituman sa Dios, tinuod nga nagsimba sa Dios, nga atong Amahan, ug giuyonan sila sa Dios.