¹ ಹಪ್ತಾರ್ ಅಗಡಿಯಾರ್ ದಾಡೋ ವಜಿ ಅಂದಾರೋ ರಜು ಅವಜನಾ ಓ ಬೀರೇ ತಯ್ಯಾರ್ ಕಿದೇಜೆ ಅತ್ತರೆರ್ ತೆಲೆನ ಸೇಲೇನ್ ಮಸಾಣೆಕನ್ ಆಯೇ . ² ಮಸನೆ ಮುಂಡಾಗ್ ರಜಕೋ ಭಾಟಾ ವತ್ಲಾಮೇಲೆ ಜೇನ್ ದೇಕನ್ ಮಾಯಿಗಿ . ³ ಪಣ್ ಪ್ರಭೂ ಯೇಸುರ್ ಜೀವ್ ಡಾ ಉನೇನ್ ದಕಾಯೋಕೊನಿ . ⁴ ಜೆರ್ಕಾಣ್ ಉನೇನ್ ಕಾಂಯಿ ಕಳಿಕೊಯಿಜನಾ,ಝೂoಕ್ರೆಜಕೋ ಲತ್ತಾ ಪೇರ್ಮಲೇಜಕೋ ದೀ ಆದ್ಮಿ ಅನಾಸಕೆರ್ ಉನೇರ್ ಡಾoಯಿ ಹುಬ್ರೇಗೆ. ⁵ ಓ ಚಮಕನ್ ಮಾತೋ ಹೇಟ್ ನವಾಲಿದಿ ;ಜನಾ ಉ ಬಂಚ್ ರೋಜೇನ್ ತಮ್ ಕಸೇನ ಮರ್ಗೆಜೆಮಾಯಿ ದೂoಡ್ ರಿಚೋ ? ⁶ ಉ ಅತ್ತ ಚೇನಿ ಉ ಉಟನ್ ಆಯೋಚ ಉಜ್ಜಿ ಗಲಿಲಯಮಾರಜನಾ, ⁷ ಮನಕ್ಯಾರ್ ಬೇಟಾ ಪಾಪಿವಾಳೂರ್ ಹಾತೇಮಾ ಹವಾಲ್ ವೇನ್ ಸಿಲ್ವಾರ್ ಉಪ್ರಮರನ್ ತಿನ್ ದಾಡೆಮಾ ಉಟುಚು ಕನ್ ಉ ತಮೆನ ಕೋಜಕೋ ವಾತ್ ಹರ್ದೆ ಲಿಯಾವೋ ಕನ್ ಉನೇನ್ ಕೆ . ⁸ ಜನಾ ಓ ಓರ್ ವಾತೆ ಹರ್ದೆಲಿಯಾನ್ , ⁹ ಮಸಾಣಿಕನ್ನೆತಿ ಪರನ್ ಜಾನ್ ಎ ವಾತೇನ್ ಘ್ಯಾರೆ ಚೆಲಾವುನ್ ಲಾರೇರ್ ಸೇನ್ ಮಾಲಂ ಕಿದಿ. ¹⁰ ಎ ವಾತೇ ಅಪೋಸ್ತಲೂನ ಕಿಜಕೋ ಕುಣ್ ಕತೋ ಮಗ್ದಲೆನ್ ಮರಿಯಾ ,ಯೋಹಾನ್ನಳ್ ,ಯಾಕೊಬೇರ್ ಯಾಡಿ ಮರಿಯ ,ಉನೇತಿ ರಜಕೋ ದುಸ್ರಿ ಬೀರೇ. ¹¹ ಪಣ್ ಉನೇರ್ ವಾತೆ ಇನೇರ್ ನಂಜ್ರಾಮಾ ವೆಂಡಿ ವಾತೆರ್ ನೈ ದಕಾಯಿ ಜೆರ್ವಾಸ್ ಎ ಉನೇರ್ ವಾತೆ ಮಾನೆಕೊನಿ . ¹² ಪಣ್ ಪೆತ್ರು ಉಟನ್ ಮಸಾಣೆಕನ್ನ ದಾಸನ್ ಜಾನ್ ನವನ್ ದೇಕತೆಖಂ ನಾರೇರ್ ಲತ್ತಾ ಅತ್ರಾಜ್ ನಾಳಿ ದಕಾಯೇ ಉ ದಿಟ್ಟೋ ಜೇರ್ ಕಾಮೇರ್ ಕಾಣ್ ವಿಚಿತ್ತರ್ ಪಡ್ತೋ ಘರೇನ್ ಡಗರೋಗೋ. ¹³ ಇದೇಕ್ ,ಓ ದಾಡೆಮಾಜ್ ಉನೇಮಾ ದಿ ಆದ್ಮಿ ಯರುಶಲೆಮೆತಿ ಪಾಂಚ್ ಕೋಸ್ ಘಣಂ ರಜಕೋ ಎಮ್ಮಾಯಿ ಕನ್ ಕಜೆ ಎಕ್ ಗಾಮೆನ ಜಾವತೇರ ¹⁴ ಚಾಲಿಜೆ ಎ ಸೇವಾತೆರ್ ಕಾಣ್ ಎಕೇನ್ ಎಕ್ ವಾತೆ ಕರ್ತೆರ ; ¹⁵ ಓ ವಾತೆಕರ್ತೆ ಮತ್ರೋ ಕರ್ತೆರ ಜನಾ ಯೇಸು ಉಜ್ ಡಾoಯಿ ಆನ್ ಉನೇತಿ ಸದಾ ಚಾಲೋ . ¹⁶ ಪಣ್ ಓನ ಓ ವಳಕೆಕೊನಿಜು ಉನೇರ್ ಆoಕಿ ಬುರಾಗಿ . ¹⁷ ತಮ್ ಚಾಲ್ತೆ ಎಕೇನ್ ಎಕ್ ಕೆಲೋಜಕೋ ವಾತೆಕಾಂಯಿ ಕನ್ ಪೂಚೋಜನಾ ಓ ರೋವಣೆ ಮುಂಡೆತಿ ಹುಬ್ರೇಗೆ . ¹⁸ ಉನೇಮಾ ಕ್ಲೆಯುವ್ ಕಜಕೋ ಯರುಶಲೆಮೆಮಾರೆನ್ ಎ ದಾಡುಮಾ ಓತ್ತ ವೆಗೊಜಕೋ ಖಬರೇ ,ವಾತೆ ತು ಎಕ್ ಲೋಜ್ ವಳಕೆಸನಿ ಕಾಂಯಿ ?ಕನ್ ಓನ್ ಪೂಚೋ . ¹⁹ ಉ -ಓ ಕುಣಸ್ ಕನ್ ಉನೇನ್ ಪೂಚೋ ಜನಾ ಓ -ನಜರೆತೇರ್ ಯೇಸುರ್ ಬಾರೆಮಾರ್ ಖಬರ್ ;ಉ ದೇವೆರ್ ಮುoಡಾಗೆ ಕಾಮೆಮಾನ್ ವಾತೇಮಾ ಜೋರ್ ಚಜಕೋ ಭಕ್ತಿದಾರ್ ವೇನ್ ರ . ²⁰ ಅಪಣ್ ಮೋಟೋ ಯಾಜಕೋ ಹಕಂದಾರ್ ಓನ್ ಸಿಲುವಾರ್ ಸಜಾನ್ ಹವಾಲ್ ಕರ್ಲೆನ್ ಸಿಲ್ವಾಪರ್ ಘಲಾಯೋಕೋ ತೋನ ಮಾಲಂ ಚೆನಿ ಕಾಂಯಿ ? ²¹ ಇಸ್ರಾಯೇಲೆನ್ ಚೋಡಾಯೇವಾಲೋ ಈಜ್ ಕನ್ ಹಂ ಕೆಲೇನ್ ರೇ ಅತ್ರಾಜ್ ಕೋನಿ ಎ ವಾತೆ ವಿಜೆನ್ ಆಜೇತಿ ತಿನ್ ದಾಡ್ ವೆಗೆ . ²² ಪಣ್ ಹಮೆಮಾ ಥೋಡ್ ಸೇಕ್ ಬೀರೆ ಸವಾ ವಜ್ಜೆಕ್ ದಾಡ್ ಮಸಾನೇಕನ್ ಜಾನ್ ಓರ್ ಜೀವ್ ದಕಾಯೋಕೊನಿಜು ಆನ್ , ²³ ಥೋಡ್ ಸೇಕ್ ದೇವೆರ್ ²⁴ ಸೊಜಾ ಉನೇನ್ ದಕಾನ್ ಉ ಬಂಚಾನ್ ಚಕನ್ ಕೇಕನ್ ಹಮೇನ ಮಾಲಮಕಿದಿ ;ಜನಾ ಹಂ ಬಿ ವಿಚಿತ್ತರ್ ಪಡೆ. ²⁵ ಉ ಅಕ್ಕಲ್ ಚೆನಿಜಕೋ ,ಭಕ್ತಿದಾರ್ ಕಜಕೋ ವಾತೇ ಮಾನೆಕೊನಿಜಕೋ ಘಟ್ಟೋ ದಲ್ಲೆವಾಳ್ . ²⁶ ಕ್ರಿಸ್ತೂ ಹನು ವೆಲಾಪಡನ್ ಮಹಿಮಾಮ ಜಾಯೇರ್ ಜರೂರ್ ಕೋನಿ ಕಾಂಯಿ ಕನ್ ಉನೇನ್ ಕೇನ್, ²⁷ ಮೊಶೇನ್ ಸೇ ಭಕ್ತಿದಾರ್ ಕನ್ನೇತಿ ಸೇ ಲಕಣಿಮಾ ಓರ್ ಕಾಣ್ ಚಜಕೋ ವಾತೇರ್ ಅದೊಡೆನ್ ಉನೇನ್ ಮಾಲಂ ಕಿದೋ. ²⁸ ಅತ್ರಾಮಾ ಓ ಜಾರೆಜಕೋ ಗಾಮೆರ್ ಡಾoಯಿ ಓ ಆಯೇ ;ಜನಾ ಉ ಉಜ್ಜಿ ದಸ್ಸೇಕೋ ಘಣಮ್ ಜಾರೋಜು ದಿಸಾಯೋಜನಾ , ²⁹ ಓ -ಸಾಂಜ್ ಪಡೇನ್ ಆವ್ಗಿ ದಾಡೋ ಡುಬ್ಗ್ ಹಮೇರ್ ಜತಾಮಾಜ್ ರಕೇನ್ ಓನ್ ನೋರಾಕಿದೆ ,ಜೆರ್ವಾಸ್ ಉ ಉನೇತಿ ಸದಾ ರೇನ್ ಗಾಮೆಮಾ ಡಗರ್ ಗೋ . ³⁰ ಉ-ಉನೇತಿ ಸದಾ ಖಾನೋ ಖಾಯೇನ ಬೇಟೋಜನಾ ಎಕ್ ಬಾಟಿನ್ ಝಾಲ್ಲೇನ್ ಸ್ತೂತಿ ಕರನ್ ಓನ್ ತೊಡನ್ ಉನೇನ್ ವೆಟೋಜನಾ, ³¹ ಉನೇರ್ ಅಂಕಿ ಖೋಲಾಗಿ ,ಓ ಓನ್ ವಳಕ್ ಲಿದೆ ಜನ ಉ ಉನೇನ್ ದಕಾವಜು ಡಗರ್ ಗೋ . ³² ಜನಾ -ಉ ವಾಟೆಮಾ ಹಮಾತಿ ವಾತೆ ಕರ್ತೋ ಲಕಣಿ ಆಪಣಿನ್ ಮಾಲಂ ಕರ್ತ್ತೋರಜನಾ ಅಪಣ್ ದಲ್ ಅಪಣಿಮಾ ಉಕಳ್ ರೋತೋ ಕೋನಿ ಕಾಯಿ ?ಕನ್ ಎಕೇನ್ ಎಕ್ ಕೇಲಿದೆ. ³³ ಉ ಘಡಿಮಾ ಓ ಉಟನ್ ಯರುಸಲೆಮನ್ ಫರನ್ ಗೊಜನಾ ಘ್ಯಾರೆ ಚೇಲಾನ್ ಉನೇತಿ ಸದಾ ರಜಕೊನ್ ಭಳನ್ ಆನ್, ³⁴ ಪ್ರಭು ಸಾಸಿಜ್ ಉಟನ್ ಸಿಮೊನೇನ್ ದಕಾಯೋ ಕನ್ ಕೇತೆರ. ³⁵ ಓ ಎನ್ ಸಾಮಳನ್ ವಾಟೆಪರ್ ಚಾಲಿಜಕೋ ವಾತೆ ತೊಡೋಜನಾ ಉ ಉನೇನ್ ಕು ಮಾಲಂ ಕಿದೇ . ³⁶ ಓ ಹನಾ ವಾತೆ ಕರ್ತೆರಜನಾ ಉ ಉನೇರ್ ವಚ್ಚಾ ಹುಬ್ರೇನ್ ತಮೇನ ಶಾಂತಿ ವೆಜಾಕನ್ ಉನೇನ್ ಕೋ . ³⁷ ಪಣ್ ಓ ಹಾಯಿ ಕರನ್ ಚಮಕ್ ಜಾನ್ ಉನೇನ್ ಭೂತ್ ದಕಾಯೋಕನ್ ಕೇಲ್ ದೇ . ³⁸ ಜನಾ ಉ -ತಮ್ ಕಸೇನ್ ಚಮಕ್ ರೆಚೋ ತಮಾರ್ ದಲ್ಲೇಮಾ ಸಂದೇಕ್ ಆಯೇರೋ ಕಸೇನ್. ³⁹ ಮಜ್ ಉ ಕನ್ ಕೇನ್ ಮಾರ್ ಹಾತೆನ ಮಾರ ಟಾoಗೆನ್ ದೇಕೋ ;ಮನ ಝಾಲನ್ ದೇಕೋ ಮನ್ ಚಜು ತಮ್ ದೇಕ್ ರೆಜಕೋ ಹಡ್ಕಾನ್ ಬೋಟಿನ್ ಭೋತೆನ ರೇನಿ ಕನ್ ಕೇನ್, ⁴⁰ ಓರ್ ಹಾತೆನನ್ ಟಾoಗೆನ್ ಉನೇನ್ ದಕಾಳೋ . ⁴¹ ಪಣ್ ಓ ಖುಶಿತಿ ಉಜ್ಜಿ ವಿಸ್ವಾಸನ ಕರಜು ವಿಚಿತ್ತರ್ ಪಡ್ತೆರ ;ಜನಾ ಉ ಅತ್ತ ತಮಾರ್ ಡಾoಯಿ ಕಾಂಯಿತೋಯಿ ಖೋರಾಕಿ ಚೇನಿಕಾಂಯಿ ?ಕನ್ ಉನೇನ್ ಪೂಚೋ . ⁴² ಬೊಂಜ್ ಕೋ ಮಚಿ ತುಕ್ದಾ ಓ ಓನ ⁴³ ಉ ಓನ್ ಲೇಲೇನ್ ಉನೇರ್ ಮುoಡಾಗ್ ಖದೋ . ⁴⁴ ಜನಾ ಉ ಮೊಷೆರ್ ಧರಂಶಾಸ್ತ್ರೆಮಾ ಭಕ್ತಿದಾರೇರ ಪುಸ್ತಕೆಮಾ ಕಿರ್ತನೆಮಾ ಮಾರಕಾಣ್ ಲಕಮೆಲೆಜಕೋ ಸೇವೇಣು ಕನ್ ಮತಮಾರ್ ಡಾoಯಿ ರೂಜನಾ ತಮೆತಿ ಕೋಜಕೋ ವಾತೆ ವೇಗಿಕನ್ ಉನೇನ್ ಕೊ . ⁴⁵ ಜನಾ ಓ ಲಕಣಿ ಮಾಲಂ ಕರ್ಲಜು ಉನೇರ್ ದಲ್ ವಗಾಡನ್, ⁴⁶ ಕ್ರಿಸ್ತೂ ಫರನ್ ತಿನ್ ದಾಡೆಮಾ ಮರ್ಗೆಜೆಮಾಯಿತಿ ಉಟಚ ಕೆನ್, ⁴⁷ ಯರುಶಲೆಮೆತಿ ಸೇ ಜನೂಮಾ ಓರ್ ನಾಮೇಪೇರ್ ಉಜ್ಜಿಕ ದಲ್ಲೇನ್ ಪಾಪ್ ಫಿಟೆರ್ ಪ್ರಚಾರ್ ಕರಾವಕನ್ ಲಕ್ ಮೇಲೆಚ . ⁴⁸ ಈ ವಾತೆನ್ ತಮಜ್ ಗವಾಯಿ . ⁴⁹ ಇದೇಕ್ ಮಾರ್ ಬಾಪ್ ವಚನ್ ದಿನೋಜಕೋನ ತಮಾರ್ ಉಪರ್ ದೆಮಲ್ ರೋಚೂ .ತಮ್ ಉಂಚೆತಿ ಜೋರ್ ಲೆಲೋಜೆಲಗು ಶೇರೆಮಾ ರೋಕನ್ ಉನೇನ್ ಕೋ . ⁵⁰ ಉ ಬೆತೆನಿಯಲಗು ಉನೇನ್ ಲೇಜಾನ್ ಹಾತ್ ಪಾಡನ್ ಉನೇನ ಅಶಿಸ್ ದಿನೋ. ⁵¹ ಉನೇನ್ ಆಶಿಸ್ ದೇರೋಜನಾ ಉ ಉನೇಮಾಯಿತಿ ನಾಳಿವೆನ್ ಸ್ವರ್ಗ್ ಲೋಕೆನ್ ಉಪ್ಡಾಗೋ. ⁵² ಓ ಓನ್ ಧೋಗ್ ದೇನ ಘಣ್ ಖುಷಿತಿ ಯರುಷಲೆಮೆನ್ ಪರನ್ ಜಾನ್ ⁵³ ಚೊಡೆನಿಜು ದೆವಳೇ ಮಾರೇನ್ದೇವೆನ್ಅರಜ್ ಕರ್ತೆರ .