ዋድማካ ውር ጊታይ ክርስቶስ ይዕሲዮጝ ሃፑክ 1 ኢየሱስ ኩያ እያጝካ ፎላጝ ¹ ቴዎፍሎስ ዮ፤ ኢየሱስ ከኣሽክዬኔ ከእርርሲዬኔ ካርሲዮጝ ፓይላ ሃቶክያ ከወርቀት ባናኒ ካሌሜኑጝ፤ ² ይንዻ ሌይ ሃምካ ሹ እንካ ኡፎጝ ናንዳካ ውር ጊታይ ዕድዮጝ ከታካ መንፈስካ ባሪዮ ሃኤርጎ እን ኣዬ እንግኑጝ። ³ ከኦካ ዴምኔን ጩዋ እሺ ኩኔ ኣዬ እያይ፤ ሜይሼ እንግን ክያጃ ጁዋኑዬ፤ ከክያጝካ ሹ ኦይታምዻ ሳስክዬ ሳስክዬ ጌዬን ኦግዬይዬ ሜይሼያ እንግን ናንዳካ ጌጳሞካ ባሪዮ። ⁴ ኣኔንባ ከእንግን ኡፌኔ ዋይሼ እንግን እያጜ፤ ኤርጊታ፤ ኦይድኬ ኢየሩሳሌም ቱሌን፤ ኣይባዬ እን ኣን ሃሓሳወዬ የዋይቶጝ ካሊባ ቃቦ እን ባባ ኣይኖጝ፤ ⁵ ዮሐንስ ዱቅያ ከሙዋዌ፤ ዬ እየው ከሹ ጩዋማ ጩዋ የዱቅናባ[ ከመንፈስ ቅዱስ]። ⁶ እንግንዻ ጋኔንባ ፑኡሺምኔ ቆቤኔ ሺጝ፤ ታቹጝ ዮ፤ ጌጳሞካ ውርካ እስራኤል ከሹ እን ከዋሼ ሪቦጝ ሃጋኒዬ? ጋንሼና። ⁷ እሺዻ ዋይሼ እንግን እያጝ፤ ባባ ከጌጳሞ ኔኒ ከሹ እን ቱሙዬዬ ወይ ዋዳዬ ከእባጅቶጝ ካኒ ጋይኬን እየው፤ ⁸ ኣይባዬ ሹካጝ መንፈስካ ቅዱስ ጎብሼ እየውጝ የጌያባ ሌንሲኔን፤ ከኦካ ኢየሩሳሌም፣ ከኦካ ይሁዳዬ ሰማሪያዬ ፓይላ፤ ሌይ ሃም ፔን ዶክዮጝ የማቲያባ ማኝ ናኒ። ⁹ ክያጄ እን ጩዋ ቶይባዬ ኩያ ፎላ ዾዮክ፤ ሉፍዻ ዲካ እሺ ከኦካ ካርቡ ጊዬይ። ¹⁰ እሺ ከሹ እን ኩዮጝ ሁቤኔ ቶይ ፎላዬ፤ እየዎ፤ ውር ዻ ጊታኬና ኪሚ ኣፓላ ፎልቼን ሉጉድ ጎራ ኦካ ቆጩር ጊዬይ፤ ¹¹ ዋይሼ እንግን እያጝዻ፤ እየው ውርካ ገሊላዮ ፤ የቶይና ፎላዬ ሃኦ የጎሪንቴ ኦጙጝ? ይን ከኦጉዩ ኩይ እያጝካ ፎላዬ ኢየሱስ እን የቶይቶጝ፤ ከሊኪ ኮትሼ እያጝካ ፎላዬ የጌይቶጝ ከዴንታ እጝ ዋክባ። ¹² ጩዋ ከኦካ ጋግ እን ሺጜ ደብረ-ዘይቱጝ ዋክሼያ እያጝካ ኢየሩሳሌሙጝ፤ ጋግ እንዻ ከኦካ ኢየሩሳሌም ዹካትሽ ጉዋር ካሹ እንካ ሶጵሳጝ። ¹³ ሹ እን ሁሉኬ ኦካ ከተማ እኑጝ ኮትሼያ ሃምካ ቶኦ ኑጝ ቆቦጝ፤ ጊታይዻ ሃጊታጝካ ጴጥሮስ፣ ዮሐንስ፣ ያዕቆብ፣ እንድርያስ፣ ፊልጶስ፣ ቶማስ፣ በርተሎሜዎስ፣ ማቴዎስ፣ ውዋካ እልፍዮስ ያዕቆብ፣ ስምዖን እን ሺጜ ቀናኢዬ ውዋካ ያዕቆብ ይሁዳዬ። ¹⁴ ጊታይ ፓይላ ከሃኣጛኔ ከጁዋ ኢየሱስ ማሪያሜ ፕር ጋይኬ ጪኒጋኔ ማቲኬ ጋጝ ሻን ክየም ሻን ክየሜ ጱዺሼኬኔ ቁዋቅትሼ ጋኔን ይሁኔን። ¹⁵ ከኦካ ሹዋን ጊታይ፤ ጴጥሮስ ዾር ኦካ ጫቃንካ ጪኒጌን ጊታይ ኣይ ዽብ ክየሜ ሳልታሜ፤ ¹⁶ ሺጝ እያጝ፤ ጪኒጌን ናኒ ዮ፤ ናንዳካ ውር ጊታይ ጎሚ ኢየሱሱጝ ናንዳካጝ የኣይቴ ውርካ እንግን ጁኸ ጆሌኑጝ ናንዳካ ይሁዳ፤ መንፈስ ቅዱስ ሌምሼ እን ሃሳወ ከቶካ ዳዊቱጝ ክያጃካ ወርቀት ናንዳካጝ ካኣኔ ሙኒኔኑጝ፤ ¹⁷ እሺ ኮምሼ ከኡዋው ክየምጵኔ ኦካ ዋድማጝ ጌይ ባሊዬ ጊያ። ¹⁸ ውሩጝ ናንዳካ ዋድማ ጋራ እን ኔኑጝ ከኣንቲቲ እን ካሺዮጝ ኡዋሩጛ ዳሊ፤ ጩዋ ቶኬ ማሪ ኔኒ ዳሊዬ ሩዋ ኔኒ ጳቃ ጫቃን፤ ኣንቲቲካ ክያጝዻ ኡፑቴና፤ ¹⁹ ይንዻ ዋያ ከኦካ ውር ጊታይ ቆቤን ኢየሩሳሌም ፓይላ፤ ዳሊ እንዻ ከቶግ ጊዬይ ሺጝ ኣክሊዳማዬ ሺዋ፤ ሆኮል ኔኒዻ ሺጝ ዳሊካ ኒያቡ። ²⁰ ጴጥሮስዻ ከዻይሼን ሺጝ እያጝ፤ ከወርቀትካ ይያሪ» «ባር ናኒ ካኣይ ማም እያይ፤ ውር ኬናካ ኡፔዻ ካማር ጌዬን፤ ፕር ጌጳሞ ኔኒ ውር እንቃ ካቦባዬ ቶኳ። ²¹ ዬ ኢየሱስ ሁሉኬ ጫቃን ጉዋዩ ክያኒዬ ከሹ እን ቱሌዬ ፓይላ፤ ከኦካ ውር ጊታይ ኣኔን ጫቃን ጉዋዩጝ ውር ክየም ዎሺሽባ እድዬን፤ ²² ይንዻ፤ ከርሲኬ ዱቅኔንካ ዮሐንሴ ሌይ ሃም ኣይ ሹ እን ኢየሱስ ካጌዬኬ ኦጉዋዩ ዋናዬ ካካሞጝ ኣይባ ኬና ካኣኔ፤ ናንዳካ ኦ ከኦካ ውር ጊታጝ ክየም ካማቲዬ ከኡዋው ማኝካ ናሹጜኑጝ ዎሺሽባ። ²³ ዬ እን ሺጜ ኢዮስጦስ፤ እን ሺጜ በርሲያን ቦፓይኔያ ዮሴፌ ማቲያሴ እንግን ዻዋን፤ ²⁴ ሺጝ እያጜ ይወና፤ ታቹጝ ዮ፤ እን የእባጅያ ሻንካ ውር ፓይላ፤ ከኦካ ውር ዻዋን ግታጝ እጝ እን የእድዮጝ ዹዋልባዬ ²⁵ ይሁዳ ኦይዴ ራቅ ኔኒዬ ኩዮጝ ናንዳካ ዋድማጜ ሐዋሪያ ማቲዬኔ ጌጳሲያ ኦካ ራቁጝ። ²⁶ ጩዋ ፓቅሼያ እንግን [ዕጣ ዕጣዻ ቱልሼያ ማቲያስ፤] ኮማ እሺዻ ከኦካ ሐዋሪያ