¹ Ko gonyasɛ jaga kaesar Agustas nɔŋa ka kozoye eeza loja Romi gho. ² (Ko nyini atoyenesa woyine esegeyɛɛ wassa kuirinias enine gabhanja Syira.) ³ Ko eeza bhaɛ ɔzɔ katamɛnɛ ghee gho ko kagazi saara. ⁴ Ko Yosebh ko nɔnɔ ʉg katama Nazaret aɛ Galila gho, ko Yudhia ko katama Betelemi Daudhi gho, gaaji nɔnɔ a eeza ko kessa Daudhi. ⁵ Ko nɔnɔ ako ŋanyana ko kagazi saara ko Mariam ghɔnɛa wa ka kughɛ nɨnɛ ko kɔlɔndaɛ erru. ⁶ Ko wassi nɔgɔ ŋanɨ ate ŋanyana gho, saatija ka kuyutaɛ erru igiya. ⁷ Ko nɔnɔ uyuka erruja majɛ ɛnɛ au. Ko nɔnɔ ughum nɔnɔ rumma ko abhagi nɔnɔ kodhiteja ,gaaji keyia ka kazaŋuse dha ibhitɛ. ⁸ Ko bhalɨŋa nyana eeza ugayɛ azza abhagi bala ojhonu ko kebhegi azza ghee. ⁹ Ekota Alanɔ ujugo nɔgɔ , ko shallizena Alanɔ azaŋaŋ ŋieta nee ko nɔgɔ ɔzɔŋɔldɛ. ¹⁰ Ŋa ekogi iye nɔgɔ, “Ŋa aŋolinu, eeza bhaɛ kato lemunda. ¹¹ Ko wassai katama Daudhi gho wa kuyutagʉŋ ugga ʉrghuyogi; ko nɔnɔ a kiristo Alan. ¹² Ko jegi aghɨnyi kɨdhɨ elyɛ ŋieta noo.Ko kɨdhɨ ugga ajɔanu errushi kaghum rummize ko kabhagi kodhiteja. ¹³ Ko shaɔhʉŋ eeshi mele matɛ iya tamuo daune itiyandɛ ko eko , ko alai Tamu ko iyɛzɔ, ¹⁴ “Kodhoŋi Tamua daune ,ko ghanɔn lʉza ŋai kaɔ ŋieta ko eeshi elemunye nɔnɔ gho. ¹⁵ Ko wassi eko adhɛtɛ nɔgɔ ko ayɛ tamua daa gho, eeza abhɛkɛ azza anɔ nɨgɛ, “kɛnɛ kɔzɔ Betelema ko kijhɛzɔ ghɨnyi jegi amɛ gho ,iyaa wa osine Alanɛ agga. ¹⁶ Ko nɔgɔ ɔzɔ ketire ko ojhoya Mariam ko Yosebh ko erru iyaa wa kabhagi kodhiteja. ¹⁷ Ko wassi nɔgɔ ijhɛzɔ nɔnɔ gho ,nɔgɔ atahan nɔŋa wa kose nɔgɔ ko errushi nyini. ¹⁸ Ko iyaa asɨnɛ bhaɛ awashie gaa wa osee eeza abhɛkɛ azza nɔgɔ. ¹⁹ Ko Mariam ɛzɛr rʉkʉlɛɛza ko nɔŋi jegi ; ko kagha nɔgɔ bhaɛ sinɨsa nɨndɛ gho. ²⁰ Ko eeza abhɛkɛ azza abhɔdhanɛ lemunendɛ ko odhoŋi Tamu ghɨnɛ jegi bhaɛ asɨnɛ ko ijhese gho,dambija bhalɨ kosɨne nɔgɔ gho. ²¹ Ko gonyasɛ ɛnɛ tʉrge gho, a wassi ko saatishi ka ketejhaɛ nɔnɔ lɛgɛrɛny gho, ko nɔnɔ kagate saarshi kane Yeso ,saara a kane ekote nɔnɔ woyi ŋa kɔlɔnda gho. ²² Ko wassi saatija nee hur ko dhemioga ko dhɛmɛnɛsa muse adhishaɛ gho, Yosebh ko Mariam izɛ nɔnɔ Yerusalem ko kelde nɔnɔ Alan. ²³ (Ŋieta akanni dhemioga ko dhɛmɛnɛsi Alanɔ gho, “Orroa ɛnɛ au majɛ ma kɛlsa ŋieta Alanɔ.) ²⁴ Ko dambija ɔsɔanɛ dhemioga ko dhɛmɛnɛsa Alanɔ gho, eeza ma uduleno: “Ugga ma uduluyu yɛlla gami bhibhi dha dhɔgɔlɛa yɛllanu ɛnɛ ramma.” ²⁵ Ko ŋanyana ɔlɔ eeshi aɛ Yeruselama kane Saimeon , nɔnɔ a eeshi shallɛ tana Tamuo gho.Ko nɔnɔ arɛ saatija kɛlaɛ Tamu Isirael , ko nɔnɔ kʉlɔja Tamuo hɔrɛ aɛ ŋieta nɨndɛ. ²⁶ Ko nɔnɔ osee kʉlɔja Tamuo hɔrɛ unda kɨdhɨ ŋa arzie woyi aji Alan kiristo ŋa ijhe gho. ²⁷ Ko nɔnɔ ʉgɛ kʉlɔja Tamuo hɔrɛ kessa Yehudhan gho ŋereja .Wassi ŋanɛ ko manyɛ aʉnanɛ erru Yeso ko kimɨse nɔnɔ gaa ko dambija adhime dhemioga ko dhɛmɛnɛsa Yehudhanu gho, ²⁸ Ŋa Saimeon abɔa nɔnɔ ko alae Tamu ko iye ²⁹ “Dhɔrɔgisa Alanɔ, dambhija ɔsɔanɛ gho,kɛnɛ gaarta nunde kirr ghanɔnɔna. ³⁰ Ko kɛɛrɛa ghande bhaɛ ijhɛzɔ dhɔrɔgisa nunde. ³¹ Ghɔnɛa unda amɨ ko else eeza bhaɛ. ³² Taŋagi kɛnɛ kɛla ŋaɛnɛ Yehudhan ko shallizen kaɔ ŋieta ko eeza ghunde Isiraeli.” ³³ Ko erru manyɛ ko ŋanɛ awashie ɔsɔanesa ko nɔŋa ghɨndɛ. ³⁴ Ŋa Saimeon umuyug nɔgɔ ko iye mariam yanya nɨndɛ:“Errushi nyini adhere ko kimɨ eeshi mele kalashagɔ ko kɔdhɔŋa eeshi mele Isiraeli ,ko kɛla aliyaga kɨdhɨ ŋa kalakamanɛ nɔnɔ. ³⁵ Ko ezedhinesa kulugunya ko sinezɨa mele kɨdhɨ ubhunyayɔ.ko mashasha kɨdhɨ adhugunye sinezɨa ghoo. ³⁶ Ko ŋanyana ɔlɔ eeza ɔtɔtɔgi nɔŋa Tamuo,Anna, sedheja bhanuel,iyaa ko uzuga ɛnɛ Ko nɔnɔ kote ko iyeʉrda ko abhagi ko eeza nɨndɛ harato tʉrgɛrɛ ko nɔnɔ iye kayazɛ ɔrrɔ. ³⁷ Ko nɔnɔ aɔ ee kilyoŋ ko ŋieti harato enine eeza-uwhe ko uwhe ko nɔnɔ ŋa adhɔdhɔ kessa Yehudhan Tamuo hɔrɛ,adhɔl ko ala Tamu magi bhali ko ³⁸ Ko akʉna ŋieta nee saatija nyana,ko nɔnɔ anye Tamu shallisɛ ko ali nɔŋa errujo ŋieta ko eeshi ashinye woyi gho bhaɛ ko kato hur Yerusalema. ³⁹ Ko wassi Yosebh ko Mariam uturta ghɨna wa adhimme dhemioga ko dhɛmɛnɛsa Alanɔ gho, nɔgɔ obhojha Galilia katama nee Nazaret. ⁴⁰ Ko erru izilia ko iye abbo; ko ɔdhɔdhɔg, ko ibhizi ghurghursɛzɛ ko muyugenesa Tamuo aɛ ŋieta nɨndɛ. ⁴¹ Ko haraza ŋanɛ ko manyɛ ayɛ Yerusalema ko kurgumɛ wassa woyine Isiraela. ⁴² Ko wassi nɔnɔ ɔlɔ harato ɔmɔzɔ ko ramma gho, nɔgɔ ayɛ rugumɛa dambija tuga ayɛ dhidhi gho. ⁴³ Ko wassi rugumɛ iyeʉrda gho,ŋanɛ ko manyɛ obhojha ɔl, ko Yeso dha ɔdhɔzɛ hurto Yerusalema gaaji nɔgɔ ŋaaghayɛ. ⁴⁴ Ko wassa nyana awɔyɛ nɨgɛ bhaɛ gho, nɔgɔ annɛ awɔyɛ kaarɨ ŋa nɔgɔ aghataɛ esheline ŋieta ko bhɛnɛna ghee ko ŋieta ko dehunyena ghee. ⁴⁵ Ko wassi nɔgɔ ŋa kojoya nɔnɔ gho ,nɔgɔ obhodhi Yerusalema ko esheli nɔnɔ. ⁴⁶ Ko gonyasɛ ɛnɛ iyo gho nɔgɔ ojoya nɔnɔ kessa Yehudhanu Tamuo hɔrɛ aɛ ŋereja kɛrghɛna dhemioga gho,isirar nɔgɔ ko aghin nɔgɔ ghɨnesha. ⁴⁷ Ko eeza wa asɨnɛ nɔnɔ bhaɛ awashie sɨgɛsi nɨndɛ gho ko nɔŋɛ abhɔdhanɛ nɨnɛ gho. ⁴⁸ Ko wassi ŋanɛ ko manyɛ ijhese nɔnɔ gho, nɔgɔ awashie, ko ŋanɛ iye nɔnɔ , “Dhola nande , unda amise agga hulley kenya? Baba nunde ko anda kesheliŋɛ unda ɔrrɔ.” ⁴⁹ Ko nɔnɔ aghɨn , “Aɛnɛ ugga eshelyaŋu anda gho? Ugga ŋa aghayo anda keni kaɔ kessa baba gho?” ⁵⁰ Ko nɔgɔ ŋa asɨnɛ gaa wa osee nɨnɛ nɔgɔ. ⁵¹ Ko nɔnɔ ɔzɔ ko nɔgɔ Nazareta ko ɔzɔŋɔlɛ nɔgɔ. ko ŋanɛ ɛzɛr ghɨnyi jegi bhaɛ sɨnisa nɨndɛ gho. ⁵² Ko Yeso izilia ghutghurja ko toŋolinesa nɨndɛ gho. Ko lemunenesa Tamuo gho ko ɛzɛ eezu gho