¹ v 1 በሰርዴስ አንዳ ቤተ ክርስቲያን መላአይካይ ዋኸ ባር ጣፍ፤ሳቭአቸ እእግዜር መንፈስቪ ሳቭአቸቭ ሆሆ በኧጅኋ ኧጠበጠ ሁዳ ዋኸ ይቭር ፤ሜናኽ ኧሂር ።ኧሹቩኋ ባአያ አነኸ ፤ዘንጋኋ ጭን ሞድኸ ። ² ህመኸ ኧኸረሜ ቃዠ ባር፤ኢዎድሜ ማአ ኧሰንአ ኧተነፈ ሁዳ አቁሟሙር፤ሜናኸ ብእግዜር ምዬ ሙርአ ሂንተ አነከሁንዳ ። ³ ባቴ ኧቴኤፐርኸንቪ ኧሰምአኸንቭ ሁዳ ዝግድ ፤ቴኤዘዝቭ ንስሃቭ ግቭአ ።ቃዠ ባባኸ ጭን ኧፈንገያኸ ኧቫአቨኸዴ ፤በቭር ግዚየቭ ኧቫአቨኸኸ አትሂርካ ። ⁴ ዘንጋኋ ጭን ሁጅርሁኖዋ አናሰነሁዋ ቀሪ ሰቭ በሰርዴስ ታኸቭ አኖዉዋ ፤ሁኖም ጓድ ሁጅር ተኸደይተዉዋታ ቲያቭ እማቲ ያርቴ እመዳ ኧሁኖዋ ኧቴፑት አኖዳን አአር ። ⁵ አመረ በትሸኮወወ ሁዳ ኤኤምቭ ኧሁኖመኸ ጓድ ህጅር ኢትኸተርኬ፤ኢያቭ ባአቦመኛዪ በመላአይካቭ ኢፍቲ ኧምሰክርነዴ ፤ሹቩሞኋ ኧዘላለም አያ ሂተቩዋ ኢረቩርታ ሰቭ ተጣፍኰ መጣፍ አፈእኩዳ ። ⁶ ኢሰቭአካ እንዝር አነንዳ መንፈስ ኧቤተክርስቲያን ኢዝሬኩዳ ሁዳ ኧስቭአ ። ⁷ በፍላድልፊያ አንዳ ቤተክርስቲያን መለአይካይ ዋኸ ባር ጣፍ፤ቅዱስቪ ዉረቭ ኧኸረ ፤ኧዳዊትሜ ቁልፍ በኧጅኋ ኧጠበጠ ሁዳ ዋኸ ይቭር ፤ሁዳ ኧከፈደን ሁዳ አትቨኋ ዪእኲ አይኸነዳ፤ኧዘጋንቭ ሁዳ አትቨኋ ኢከፍትኲ አይኸነዳ። ሜናኸ ኧሂር እኩ አትቨኋ ዪኢኲ አይኸነ ኧትከፈደ ኡፎቻ ቢኢፍታሄ አትሸከቭሁ ። ⁸ አቅማኸ ቀሪ አአር ኧኸረኸ ኧሂር ማንኝእ ቀሪ አአር ቢኸርቭ ቃርኛ ኢየኸ ፤ሹቭመኛ አኸታኸዳ ። ⁹ ኡኩ አይሁድ ታይሆርሙ አይሁድንረ ዩዉርታ ኦጀ ኢኢጅታ ኧሴጣንቭ ማቨረተኘ ኧሆሩዋ ሁኖዋ አሄ ሜኤተዉዋታ በኧግራሄ ኢሰጉጁዋኸ ፤ኢያቭ ኧረመድከኸ ኢሂሩዋኸ ኢንአኬ፤ ¹⁰ በፋራይህነድ ትብኤተኸ ትትሸከቨኸ ኤኤዘዝከ እዝዝ እእየሄ ኧኸሬ ፤ኢያቭ ባአርዳ ፎር ኢረዉርታ ሁኖዋ ኢፈትንኮዋይ ቲቭአካ ኧፈተና ሳአት እእየኸዴ። ¹¹ ካች ባይተሁ ኧቫአኬ ፤ማንኝእሞኋ አክሊላኸ አይወስድቨኸኸ አነነኸዳ ወሄ ዘንጋ አትቭአ ጥጥ። ¹² አመረታ በትሸኮወወ ኤኤመሁዳ በጎይታኛይ ቤተ መቅደስ ዋኘድ ኢንአኩዴ፤ተህሜ ስርም አይዋአካ። ኧጎይታኛይ ሹቭቪ ኧጎይታመኛይ ከተማ ሹቩ ሁድቭ ተጎይታኛይ ኢወትካ ኧወዪየ ኢየሩሳሌሚ ሹቩ በሁዳ ፎር ኧጠፍኬ፤ወያ ሹቭመኛ በሁዳ ፎር ኧጠፍኬ። ¹³ ኢሰቭአካ እንዝር አነንዳ መንፈስ ኧቤተ ክርስቲያን እንእ ይቭኩዳ ሁዳ ኧስቭአ ። ¹⁴ በሎዶቅያ አንዳ ቤተ ክርስቲያን መላአይካይ ዋኸ ባር ጣፍ፤ አሚን ኧኸረሁዳ ፤እመኸቭ ኧታአመረዪ አይፈጥርቭ ምስክር ኧኸረ ፤እእግዜርሜ ፍጥረት ዳኘ ኧኸረሁዳ ዋኸ ይቭር ፤ ¹⁵ ዝዛ ዌ ሞእ አኸርኸኸ ሜናኸ ኧሂር፤ዝዛ ዌ ሞእ ተኸርኸ ኢሳሬ ባንደ ። ¹⁶ ባቴ እመኸ ልብጭ ኧዋኸ አአር ባኸሬ ሞእ ዌ ዝዛ ኧኸርሄ ኧኸሬ ታአፉኛ ኢትፍ ባይተሁ ኤኤተሁ ኧቃሽኸዴ ። ¹⁷ ደንገኘንሁ እንእቭ አአር አነኒ አታአርቭ አያትሲኤዳ ትቭር ፤ዘንጋኋ ጭን ጉርማሳ ፥አታአር ኤነን ፥ዚጋ፥ፉርጥቪ ፥እንጭማኸ ኧኸርኸኸ አቲሂርካ ። ¹⁸ ህመኸ ኧኸረሜ ደንገኘ ትኸረኸ ብእሳድ ኧረጠረ ወርቅ ትሲየኸ፤እንጭማኸ ኧኸርኸኸ ቀቨጣኸ አይትረከቨኸ ጓድ ሁጅር ትትኸተርመኸዪ፤ኦዥትቭ ኢኸነኸኸ ኤኤራኸ ቅባት ትተኧፓኸ ኧቨህርኸ ። ¹⁹ ኢያ ኧረድኮታሁና ኧቨኧችዎዋ ፤ኧቀጣቭ ።ህመኸ ኧኸረሜ ጃድባር ፤ንስሃቭ ግቭአ ። ²⁰ እኩ በወረጀ ተሸኮሁ ሳቃ ኧደርግ ፤ማንኝእሞኋ ቃርኛ ሲቭኧተ ሳቃ ሁዳ ቢከፍትኒ ኧሁዳይ ጊቭኧተሁ ተሁድቭ ኧቨርአኬ ፤ሁድቭ ቲያ ኢቭርአኬ። ²¹ ኢያ ኤመሁ ተሸከሁታ ታአቦኛ እማቲ በሁዳይ ዙፋን ኧቸናሁመኸ ፤ኤመታ ኢትሸከቭካ ሁዳቭ ቲያ እማትሜ በዙፋንኛ ፎር ኢቸናኸ ኢንአኩዴ። ²² ኢሰቭአካ እንዝር አነንዳ መንፈስ ኧቤተ ክርስቲያን ኢዝሬኩዳ ሁዳ ኧስቭአ።