¹ «በኤፌሶን ቤተ ክርስቲያን አንዳ መላአይካይ ዋኸ ባር ጣፍ፤ ሳቭአቸ ሆሆ በቀነ ኧጅኋ ኧጠበጠ፤በሳቭአቸቭ ኧወርቅ መቅረዝ ግት ኢትዥቫፐርካ ሁዳ ዋኸ ይቭር ፤ ² ሜናኸ ቂጭናማኸዪቪ ፋራይሂነድማኸ ኧሂር ሙጥጥቭ ሁኖዋ ኧሳሬ ባአሴ ቁስ ባይተኸ አቸኧኸኖኸ ፤ኪሸረኘ ታይሆርሙ ኪሸረኘንረ ዩዉርታቭ ሁኖዋ ምረመርኸኖምታ አሰተኘ ሆርሙታ ኧረከኸኖኸ ኧሂር። ³ እመኸቭ አትቭ በፋራይሂነድ ተፓኸ ኧትሸከቭኸመኸዪ ኧሹቩመኛ ትትቭር ስቃያ ኧቴኤፐርኸኸ ኧሂር ፤በዋዳ እንእ ኢኢኒየ አምባኸዳ። ⁴ ቢኸርቭ ጭን ኧጠራቨኸዳ ዘንጋ አነኒ፤ ሁድቭ አአወተራቸ ንመጃኸ ቸኧኸ ። ⁵ ባቴ ተኧቲ ኧወተእኸኸ አጫምጥ ፤ንስሃቭ ግቭአታ ኢኢፍቲ ቲንአኩ ኧረፐረ ሜና ኧንአ ፤ንስሃ ባገፓኸ ፤ሜኤተሁ መቅረዛኸ ቴኤድዃይ ኧወስድቨኸዴ። ⁶ ዘንጋኋ ጭን ኢኢድነኸዳ ዋ ወሄ ዘንጋ አነነኸ ፤ኢያ ኧጥራኩዳ ኧኒቆላ ሰቪ ሜና አኸቭ ጠናኸ ። ⁷ እንዝር አነንዳ ሁዳ እንእ ፤መንፈስ ኧቤተ ክርስቲያን እንእ ኢዝሬኩዳ ሁዳ ኧስቭአ፤አመረ በትሸከዎወ ሁዳ ኤኤመ ሁዳ እንእ ብእግዜሪ ጄነት ታንዳ እንእ ግዚየ አያ ቢዪንአካ ቡስር ኢቨርአኸ ኤኩዴ ። ⁸ «በሰርምኔስቭ አንዳ ቤተክርስቲያን መላአይካይ ዋኸ ባርቭ ጣፍ፤ ኢቆርሽኮዳዪ ያርእወዳቭ ኧኸረ ፤ሞደ ኧረፐረዪ አያቭ ኧኸረሁዳ ዋኸ ይቭር ፤ ⁹ ስቃያማኸዪ ዚግነድማኸ ኧሂር ፤ቢኸርቭ ጭን ደንገኘንኸ አይሁድ ባሆሩዋሜ አይሁድንረ ቲዩሩዋ ሹዋኸ ያአፎታ ሁኖዋ ኧሂር ፤ሁኖዋ ጭን ኧሴጣን ማቨረተኘኖዋ ። ¹⁰ ተዋ ቀጥወ ቢሰርአቨኸዳ መከራ አትፍሬ። እኩ ሴጣን ኢፈትንሁዋይ አታታሁዋ ቦኦሁኔ ያቲኢኪድሁዋቴ ፤አስር ቀረቭ መከራ ቲቴኤፖርቴ ኧዉዲ ስን ኧታአመርኸ አአር ህር ፤ኢያቭ ኧሂዎት አክሊል ኢቭኸዴ ። ¹¹ ይሰቭአካ እንዝር አነንዳ መንፈስ ኧቤተክርስቲያን ኢዝሬኩዳ ሁዳ ኧስቭአ ፤አመረ በትሸኮወወ ሁዳ እንእ ኤኤመ ፤ስርም በዉርእኤተኘ ሙድ አይረግድኩዳ ። ¹² በጴርጋሞን አንዳ ቤተ ክርስቲያን መላአይካይ ዋኸ ባርቭ ጣፍ ፤ተቩርኤቸ አጋድኋ ያጠኸ አጣወሪ ቄቃ ሴፍ አነነዳ ሁዳ ዋኸ ይቭር፤ ¹³ አኸ ኧሴጣን ዙፋን ባኖዳ ኤኤዲ ትረቭረኸ ኧሂር፤ቢኸርቭ ጭን ሹቭኛ አጠበቅኸ ጠበጥኸ ።ሴጣን ቢረቭሩዎዳ ባሁዋይ ከተማ ኦኦተሪ ሙርቴ ምስክርኛ ኧኸረ አንጢጳስ በረፐረወ ዘቨር ዳር ቢያ ኧረፐረነኸ እምነት አኸታኸዳ። ¹⁴ ቢኸርቭ ጭን አታት ኧጠራቨኸዳ አአር አነ ፤ እእስራኤል ዴንጋ ኧቅርኘ ፈቸድ ኤፖዊ ሸረድ ኢዎርኦዋመኸዪ ኧረኮዉዋኸ ሁጅር በዱሙጅት ባጢር ዪንኦዋመኸ ኢክታቶፉኮዳ አአር ቢኢፍትሁኖዋይ ያዎራዎኸ ኧባላቅ አትመረን ኧበለአሚ ትምርት ኢትሄተርታ አትታት ሰቭ በግታሁዋ አነዉዋ ፤ ¹⁵ ኧኒቆላ ሰቪ ትምርት ኢትሄተርታ ሰብ በግታሁዋ አኖዉዋ ። ¹⁶ ህመኸ ኧኸረሜ ንስሃ ግቭአ ፤ሃአ ባኸረ ካች ባይተሁ ኧቫአኬ ፤ባአፉመኛ ሴፍ ኧዎጋኮቴ። ¹⁷ ኢሰቭአካ እንዝር አነንዳ መንፈስ ኧቤተ ክርስቲያን ኢዝሬኩዳ ሁዳ ኧስቭአ ፤አመረ በትሸከወወ ሁዳ ኤኤመ ሁዳ ተዶኦሪ መና ኢቭኩዴ ፤እመኸቭ አት ኢቴኤፐርኩዳ ሰቭ ባኸሬ ማንኝእሞዃ አይሂርኩ ወያ ሹቩ ኧጣፍኰ ጓድ እቭር ኢቭኩዴ። ¹⁸ በትያጥሮን አንዳ ቤተክርስቲያን መላአይካይ ዋኸ ባር ጣፍ፤ እእሳድ ላባናኸ ኦሆሩዋ ኤር አነንዳዪ ብእሳድቭ አረጠሪታ ኧዋአነ ናስ ኢዎስርታ ኧግር አነንዳ እእግዜር ትከ ዋኸ ይቭር ። ¹⁹ ሜናማኸዪ ንማጀማኸኧታአሞርትማኸ ፥አጎኩርትማኸዪ፥ኧፍሮሁትማኸ ፤ኧሂር እመኸቭ ታአወተራቸ ሜናኸ ኢረእ ኧዋአካ ሁዳ ኢረኧኸ ኧሂር። ²⁰ ቢኸርቭ ጭን ኧጠራቨኸዳ አአር አነኒ፤ነቢንሁ ትቭካ ኤልዛቤል ዩዉሪያዳ ምሽት፤ችላ ባኸ ቸኧኸና ፤ሂዳ አገልጋይኛ ተረኮዉዋ ሰቭ ኧረኮዉዋኸ ሁጅር ኢዶሙጁዋመኸዪኧቅርኘቭ ቧርሙ ፈቸድ ኤፖዊ ሸረድ ኢዎርኦዋኸ ፤በትምርትሻ ታሳስትኮዋ፤ ²¹ ሂድቭ ተቫጢርሻ ትትዠፐረኸ ግዚየ ኧህና ባንደ፤ ሂዳ ጭን ትትዠፐሪ አሴኤቻ። ²² በሃአ ኧቫአ ኢያ ቡሼእ ባአሸ ቃሽተሁ ኧገድርካዴ፤ተሂድቭ እማቲ ኧረኮዉዋኸ ሁጅር ኢዶምጅታ ሁኖዋ ፤ተሂዳይ መያ ተዣቨይተዉዋ ንስሃ ባጎፖዋ ኑእ ስቃያ ኧቃሽዎቴ፤ ²³ ዴንጋመሻ በዉድ ኧቀጣኮቴ ፤ተህም ቀጥወ ቤተ ክርስቲያን እንእ ኢያ ሂንቪ አሳብቭ ኧምረምርካ አአር ኧኸርሁኸ ኢግአኮሴ፤እእማት እማታሁዋ ኤቬናሁዋኸ ኧካስሁዋቴ። ²⁴ ኧሂዳይ ትምርትሻ አቴኤፐርሁምቪ ኧሴጣንሜ ኧከሲ ዘንጋን ቧርሙ ዩሪዳ ሁዳ አንቴኤፐርሁዋ አተነፍሁዋ በቲያጥሮን አነሁዋታ አሁዋ ጭን እቭሁዋ ባሁዋ ፎር ኤኛ ኧድቬ ፉንግ አንደቭርወሁዋታ፤ ²⁵ እማት ኢያ ትንቫአ ስን አነነሁዋታ ወሄ ዘንጋ አጥቡቁም ጥጩዋ። ²⁶ እመረ በትሸኮወወ ሁዳ ዪኢምካዪ ሜናመኛ ቀረ ያርእወዳ ስን ዪንአካሁዳ በአረማዊ ሰቭ ፎር ዳኝነድ ኢኩዴ፤ ²⁷ ሁድቭ በቭረድ አአር ኢገዛኮቴ ፤ኧሸህራ ግቭርመኸ ኢፌእኮቴ ፤እመዳቭ ህም አታአር ኢያ ታአቦኛይ ቢድ ዳኝነድ ኧቴኤፐርሁምነኸ ። ²⁸ ኢያቭ ኧጋአቶᎀ ሆሆ ኢቭኩዴ። ²⁹ ኢሰቭአካ እንዝር አነንዳ፤ መንፈስ ኧቤተክርስቲያን እንእ ኢዝሬኩዳ ሁዳ ኧስቭአ።